Biblia Todo Logo
Bìoball air-loidhne

- Sanasan -

ᐅᓈᑯᓂᑫᒃ 2 - Ojibwe Kihcimasina'ikan


KaaTipenciketc Otencaliman Kii'ayaanitc Ayaawinink Poohkim Ecikaatenik

1 KaaTipenciketc itahsh otencaliman Kilkal (Gilgal) kii⁠onci maacaawan ekii ishaanitc Poohkim (Bochim) ecikaatenik ayaawinink. O'o tahsh okii'inaani Isriyala' (Israel), “Iicipahkiink (Egypt) hsa kikii onci saakiciwininim, ekii ishiwininakook itahsh ahkiink kaakii ayiici ahshotamawakwaapan kikehteya'aamiwaapaniik; o'o ekii ihkitoyaampaan, ‘Kaawiin hsa wiihkaa ninka aancihtoohsiin ahshotamaakewin kaakii oshihtamawinakookipan.

2 Kiinawaa tahsh kaye kaawiin kika ahshotansiim ci⁠wiiciiwekwaa oko pemaatisiwaatc o'omaa ahkiink eyaawaatc, kika piikopitaawaam hsa eshi pakitinaahsowaatc.’ Kaawiin itahsh kikii na'ihtawihsiim, aaniin itahsh inaa eshihcikeyek?

3 Miitahsh o'o kaakii ihkitoyaan, ‘Kaawiin hsa ninka saakitaama'waahsiik wa‑ani ishaayek eyaawaatc kaa⁠pepahkaanwewaanakisiwaatc pemaatisiwaatc. Mii hsa ke⁠inenimekwaa taapishkoo okaawiminakashiik ke⁠patahkihshinek ohpimenaw, omanitoomiwaa' kaye kika tootaakowaam taapishkoo ci⁠nakwaasoyek,’ ” kii‑ihkito.

4 Ahpii o'o ekii ishkwaa ihkitonitc kaaTipencikenitc otencalimini, kahkina hsa Isriyalak kii⁠mawiwak ekiih kishiiwewaatc.

5 Miitahsh kaa⁠ishinihkaatamowaatc eshi'ayaawaatc Mawiwinink. Miitahsh i'imaa kaa⁠ishi pakitinaahsoohtamawaawaatc kaaTipencikenitc.


Caahshowaa Kii'ishkwaapimaatisitc

6 Miitahsh Caahshowaa (Joshua) kaa'inaatc pemaatisinitc ci⁠ani maacaanitc. Miihsh entahshinitc Isriyala' kaakii ishaanitc ke⁠ishi tipinawewisinitc ci⁠tipentaminitc ahkiini.

7 Minihk itahsh iko Caahshowaa kaah⁠pimaatisitc, pemaatisinitc okii anohkiihtawaani kaaTipencikenitc. Minihk iko kaye kaakii ani pimaatisinitc oniikaanisii' kii‑ishkwaa pimaatisitc kaakii waapantaminitc kahkina aaniin kaaTipencikenitc kaakii ishi kihci ishihcikehtamawaanitc Isriyala' (Israel).

8 Miitahsh Caahshowaa kaakii otetetc Nanan (Nun), enohkiihtawaatc kaaTipencikenitc kaakii ishkwaa pimaatisitc, ninkotwaahk mitaahso (110) ekiih tahso pipoonwetc.

9 Weti tahsh kii‑ishi na'inaa ahkiink kaakii ishi tipinawewisitc Timinaht Herahs (Timnath Heres) ecikaatenik, kaakii ishi papiihkwatinaanik Iihpariyam (Ephraim) ahkiink kiiwetinonk inahke eshi'ayaanik Keaash (Gaash) waciw.

10 Kahkina hsa ko kaakii wiitaatisiimaatc kii‑ishkwaa pimaatisiwa'. Kotak itahsh kii⁠ani ayaawa' pemaatisinitc kaa⁠ishkwaa nipowaatc. Kaawiin itahsh okiih kihkenimaahsiini kaaTipencikenitc, aaniin kaye kaa⁠ishihcikehtamawaanitc Isriyala'.


Isriyalak Kiihpooni'anami'ehtawaawaatc KaaTipencikenitc

11 Isriyalak (Israel) itahsh kii⁠maci'ishihcikewak enaahsamiinitc kaaTipencikenitc, ekii anami'ehtawaawaatc manitoo' Peyal (Baal) enimintc.

12 Okii nakanaawaan kaaTipencikenitc okehteya'aamiwaapanii' kaakii oKishemanitoominitc, Iicipahkiink (Egypt) kaakii onci saakiciwinikonihpan. Okiih piminisha'waawaa', okii anami'ehtawaawaa' kaye pepahkaani manitoo' kotak pemaatisinitc kaakii nooci'aanitc waahkaaya'ii eyaanitc. Miitahsh kaakii nishki'aawaatc kaaTipencikenitc.

13 Okii nakanaawaan tahsh kaaTipencikenitc, tekwac itahsh ekii anami'ehtawaawaatc Peyalan, ini kaye Aastahti (Astarte) enimintc.

14 Miihsh kaakii nishki'aawaatc kaaTipencikenitc. Miitahsh kaakiih pakitinaanitc omahkantwe' pisaan ci⁠mahkamikowaatc kekoonan. Okii ishi'ikowaan kaye ci⁠shaakooci'ikowaatc kotak pemaatisinitc waahkaaya'ii eyaanitc, kaawiin itahsh awahshime okiih kashkihtoohsiinaawaa ci⁠naatamaasowaatc ahpii e⁠miikaanikowaatc kaa⁠shiinkenimikowaatc.

15 Entahsink itahsh iko enta miikaasowaatc, kaaTipencikenitc hsa ko okii nakaashkaakowaan ci⁠shaakoocihtwaahsikwaa, ekii ishihcikenitc kaakii ihkitonihpan ewiih tootaakowaatc. Wiinke tahsh kii⁠kihci wahsitaawihsewak.

16 KaaTipencikenitc itahsh okii miinikowaan onaahkonike' ke⁠naatamaakowaatc i'i kaakii mahkamikowaatc kekoonan onci.

17 Shaakooc itahsh kaawiin okiih pisintawaahsiwaawaa' i'i onaahkonike', aaniihsh taapishkoo pihshikwaacihkwenk kii‑inentaakosiwak eh⁠piminisha'waawaatc kotak manitoo', ekii animihkohtaawaatc kaye eshi'ayaanitc. Aahpici hsa wiipa okii nakataanaawaa okehteya'aamiwaapanii' kaakii ishi pimohsenitc ekii na'ihtaminitc kaaTipencikenitc enaahkonikenitc. Kaawiin kii‑ishihcikehsiiwak kaakii ishihcikenitc okehteya'aamiwaapanii'.

18 Ahpii hsa ko kaaTipencikenitc kii⁠miinikowaatc onaahkoniken, mii hsa kaa⁠ishi wiiciiwaanitc ini onaahkoniken. Okii naatamaakowaan kaye kii⁠miikaanikowaatc kaakiih shiinkenimikowaatc minihk iko kaakiih pimaatisinitc ini onaahkoniken, aaniihsh okiih koohpaatenimikowaan kaaTipencikenitc e⁠moohkonewaatc i'i kaakii ishi wehsaani'intwaa, kaakii ishi kakwaataki'intwaa kaye.

19 Ahpii tahsh iko kaakii ishkwaa pimaatisinitc ini onaahkoniken, mii hsa 'i kaa⁠ishi kiiwenotamowaatc otishihcikewiniwaan, aanciihke noociko ekii ishihcikewaatc ahpiihc wiin okehteya'aamiwaapanii'. Okiih piminisha'waawaa' kotak manitoo' ekii anami'ehtawaawaatc, ekii animihkohtaawaatc kaye eshi'ayaanitc, kaawiin hsa okii nakatansiinaawaa otishihcikewiniwaan, i'i kaye kaakii ishi kakiipaacihcikewaatc.

20 Miitahsh Isriyalak wiinke kaakii nishki'aawaatc kaaTipencikenitc o'o ekii ihkitonitc, “Onsaam hsa oko pemaatisiwaatc Isriyalak opiikonaanaawaa ahshotamaakewin kaakii'inimakipan okehteya'aamiwaapanii', kaawiin hsa nimpisintaakohsiik ehkitowak.

21 Kaawiin hsa kaye niwiih saakitaama'omaahsii' i'i kotak pemaatisinitc kaakii ishko'aatc Caahshowaa (Joshua) cipwaa ishkwaa pimaatisitc.

22 Miiwa' hsa 'i ke⁠aapaci'imak ci⁠onci kihkentamowak taka tepwe ciwiih piminisha'owaakwen kaakii ishihcikenitc okehteya'aamiwaapanii', komaa tahsh iko kaye kaawiin.”

23 KaaTipenciketc itahsh okiih pakitinaa' i'i kotak pemaatisinitc i'imaa ci⁠ayaanitc, nanaansh ekiih saakitaama'waahsik. Kaawiin okiih pakitinaahsiin Caahshowaan cikiih shaakooci'aanihpan.

Ojibwe Shorter Bible (Roman Script) © 2008 Canadian Bible Society

Canadian Bible Society
Lean sinn:



Sanasan