ᐅᓈᑯᓂᑫᒃ 16 - Ojibwe Kihcimasina'ikan

Saamihsan Kii'ayaatc Kesa Ootenaank

¹ Saamihsan (Samson) itahsh kii‑ishaa Kesa (Gaza) ootenaank. Okii waapamaan hsa pihshikwaacihkwewan weti, miitahsh kii‑ishi piintikawaatc.

² Ahpii tahsh i'i ininiwa' Kesa eyaanitc e⁠noontaminitc ekiih takohshink, okii waahkaashkamini eshi'ayaatc, ekiih pii'ikotc kapetipihk i'imaa ootenaawi kihci ishkwaantenk. Kaawiin tahsh awiyan kii⁠noontaatihsiiwan kapetipihk. Mii 'i kaa⁠ihkitonitc, “Taka piihtootaa piinihsh ci⁠waapank, miitahsh i'i ci⁠nihsank,” kii‑ihkitowa'.

³ Ninko aapihtaatipihk ihsa ehta Saamihsan kiih⁠papimihshin. E⁠aapihtaa tipihkaninik hsa kii⁠wanishkaa, ekii ayoninank i'i ootenaawi ishkwaantem, i'i kaye ishkwaantemaahtikoo', mii hsa kaa⁠ishi pahkwacipitootc kikipiiwaapihk. Miitahsh kaa⁠ishi pihciniketc, ekii ahkwaamaciwewitootc weti wakitatin Hiiparan (Hebron) ecikaatenik, kaakii onci na'inaakwaninik ootenaani.

Saamihsan, A'a Kaye Ihkwe Tilaaila

⁴ O'o tahsh ekii ishkwaa ayintitc okii minwenimaan ihkwewan weti kaakii ishitaanitc pahsatinaank Soorehk (Zorek) ecikaatenik. Tilaaila (Delilah) hsa kii‑ishinihkaasowan.

⁵ I'i tahsh kaakii okimaawinitc Pilistiiwahkiink okiih pi naasihkawaani ini ihkwewan ekii'inaanitc, “Kakwe kashkim ci⁠wiintamawihk aanti entanentaakwaninik i'i omashkawisiiwin, aaniin kaye ke⁠ishi shaakoocihcikaniwihpan ci⁠mamaancikwahpicikaniwihpan, ci⁠tootawintipan keshi kashkihtoohsik ci⁠naatamaasotc. Niinawint hsa piko kaa⁠tahso peshikoyaank kika miinikoo mitaahshipeshikwaahk 1,100 waapaapihko shooniyaak,” kii‑ihkitowa'.

⁶ Miihsh Saamihsan kaa'ikotc Tilaailawan, “Taka wiintamawihshin aanti entanentaakwahk kikihci mashkawisiiwin, aaniin kaye ke⁠tootaakooyampan ci⁠mamaancikwahpinikooyan ci⁠wehsaani'ikooyampan,” okii'ikoon.

⁷ Miihsh Saamihsan kaa'inaatc, “Kiishpin aapacihtoowaatc niishwaahso oshki ahcaapiin mahshi kaa‑aapatahsininikin mamaancikwahpishiwaatc, mii hsa 'i ci⁠maciiwakiiyaan taapishkoo kotak ininiwak,” okii'inaan.

⁸ I'i tahsh kaakii okimaawinitc Pilistiiwahkiink okiih piitamawaani ini ihkwewan niishwaahso oshki ahcaapiin mahshi kaakii aapatahsininikin. Miitahsh kaa⁠ishi mamaancikwahpinikotc Saamihsan ekii aapacihtoonitc kaakiih piicikaatenikin.

⁹ Tilaailawan hsa okiih kaanaani ininiwa' pahkaan pahkehcikanik. Miitahsh kaa'ikotc, “Saamihsan, Pilistiiwininiwak aasha kitootihsikook!” Okii pahpahkipitoonan hsa ini ahcaapiin taapishkoo kashkikwaacikaneyaap kaashi pahkihsetc kiih⁠caakisotc. Kaawiin cikii kihkentaakwaninik aanti kaa⁠onci mashkawisiitc.

¹⁰ Miihsh miinawaa kaa'ikotc Tilaailawan, “Inashke aahpici kikakiipaasinaako'ish, eh⁠kiiwanimohtawiyan, taka tahsh noonkom, wiintamawihshin aaniin ke⁠tootaakooyampan ci⁠mamaancikwahpinikooyan,” okii'ikoon.

¹¹ Miihsh o'o kaa'inaatc, “Kiishpin aayiitahpishiwaatc aapacihtoowaatc oshki shinootaakanan wiihkaa mahshi kaa‑aapatahsininikin, mii hsa 'i ci⁠maciiwakiiyan taapishkoo kotak ininiwak,” okii'inaan.

¹² Tilaailawan hsa okii aapacihtooni oshki shinootaakanan e⁠mamaancikwahpinikotc. Miitahsh kaa'ikotc, “Saamihsan Pilistiiwininiwak aasha kitootihsikook!” Ininiwa' iitok kiih⁠kaasowa' pahkaan pahkehcikanik. Miihsh Saamihsan kaakii pahpahkipitootc shinootaakanan ekiih tootank taapishkoo kashkikwaacikaneyaapiink.

¹³ Miitahsh kaa'ikotc Tilaailawan, “O'o tahsh ishi'ahpii kiwanimihsh, eh⁠kiiwanimohtawiyan, taka wiintamawihshin aaniin ke⁠tootaakooyampan ci⁠mamaancikwahpinikooyan.” Miihsh o'o kaa'inaatc, “Kiishpin hsa maamawahpihkaataman ini niinisihsan niishwaahsoyek kaashi ayohkwahpitekin, kihciwaahkwa'aman tahsh i'imaa ahpihkaanaahtikonk, mii hsa 'i keniin ci⁠maciiwakiiyan taapishkoo kotak ininiwak,” okii'ikoon.

¹⁴ Mekwaa tahsh Saamihsan e⁠nipaatc, Tilaailawan hsa okii maamawaahkwa'amini niishwaahsoyek wiinisihsan kaakii ayohkwahpitenikin. Miitahsh kaa⁠ishi kihciwaahkwa'aminitc mihtikoni ekii aapacihtoonitc. Miitahsh kaakii'ikotc, “Saamihsan, Pilistiiwininiwak aasha kitootihsikook.” Saamihsan hsa tahsh kii⁠wanishkaapani'o kaakii ishi nipaahpan, ekiih pahkwacipitootc mihtikoni i'imaa wiinisihsink kaakii ishi maamawaahkwa'ikaatenikin kihci naapisha'ikanink.

¹⁵ Miihsh Tilaailawan kaa'ikotc, “Aaniin tahsh keshi ihkitoyampan eh⁠saaki'iyan, kite'ink tahsh e⁠ishi saaki'ihsiwan. Nihsink ohsha aasha kiwanimihsh, kaawiin mahshi kiwiintamawihsii aanti entanentaakwahk kimashkawisiiwin.”

¹⁶ Kaawiin itahsh okiih poonimikohsiin entahso kiishik ekiih kakwecimikotc, ekiih kakaansomikotc kaye, aahpici hsa kii⁠kihci wiiyakishkentam, ekii antawentank ci⁠nipotc.

¹⁷ Miitahsh kekahpii Samson tepwe enikohkote'etc kaakii wiintamawaatc ekii'inaatc, “Kaawiin ohsha wiihkaa nimpashkwaakohtikwaneshokoohsii, nimaamaa hsa kii⁠nihtaawiki'itc ninkii onci maaciitinow Naasaraayit (Nazirite), ekiih tipinawewisiimitc Kishemanitoo. Kiishpin tahsh paskoshikaatek nihtikwaan, mii hsa 'i ci⁠nakanikoyaan nimashkawisiiwin, cishi maciiwakiiyaan taapishkoo kotak ininiwak,” okii'inaan.

¹⁸ Miihsh Tilaailawan kaakiih kihkentaminitc tepwe ekii wiintamawaatc enikohkote'etc. Okii antomaani wekimaawinitc Pilistiiwahkiink ekii'inaanitc, “Ampeyohk, shemaak iko, aasha ohsha ninkii wiintamaak tepwe enikohkote'etc.” Ini tahsh wekimaawinitc okiih piinaani shooniyaan ekii miinaanitc ini ihkwewan.

¹⁹ Miihsh Tilaailawan kaakii nipe'ikotc ociinkwaniniink, miitahsh kaa⁠ishi kanoonaanitc ininiwan ci⁠pashkoshaminitc kaakii ishi niishwaahso ahpihketc. Miihsh Tilaailawan kaa⁠ishi wehsaani'ikotc, ekii nakanikotc omashkawisiiwin.

²⁰ Tilaailawan hsa tahsh okii'ikoon, “Saamihsan, Pilistiiwininiwak aasha kitootihsikook.” Mii 'i kaa⁠ishi amacihsetc e⁠nipaahpan ekii inentank, “Mii hsa peshikwan ke⁠ishihcikeyaan kaapi nihtaa ishihcikeyaan ci⁠kaahcitinikoohsiwaan,” ekii inentank. Kaawiin okii kihkentansiin ekii nakanikotc kaaTipencikenitc.

²¹ Miihsh Pilistiiwininiwa' kaakiih kaahcitinikotc, mii hsa kaye kaa⁠ishi kicaapa'okotc, ekii ishiwinintc Kesa (Gaza) ootenaank ekii mamaancikwahpinintc osaawaapihko sakaapaaneyaapiin ekii aapataninikin. Miihsh kaa⁠inanohkii'intc ci⁠shikwa'waatc pahkweshikaniminan i'imaa tahkonitiiwikamikonk.

²² Inashke tahsh wiinisihsan kii⁠ani kiiwe nihtaawikininiwan, kaa⁠ishkwaa paashkoshikaatenik ohtikwaan.

Ehtashintenik Saamihsan Onipowin

²³ Kaakii okimaawiwaatc itahsh Pilistiiwahkiink kii⁠ohkwiino'itiwak, ewiih ciihkentamowaatc, ewiih pakitinaahsoohtamawaawaatc omanitoomiwaan Tekan (Dagon) enimintc; o'o ekii ihkitowaatc, “Nimanitoominaan hsa ninkii miinikonaan ci⁠shaakooci'imankitc Saamihsanoon (Samson) kaa⁠shiinkenimiyamintc,” kii‑ihkitowak.

²⁴ Ahpii tahsh pemaatisiwaatc e⁠waapamaawaatc, aahpici hsa okii kihci inwe'aawaan omanitoomiwaan ekii ihkitowaatc, “Nimanitoominaan ohsha ninkii miinikonaan ci⁠shaakooci'imankitc kaa⁠shiinkenimiyamintc, kaa⁠nihshiwanaacihtoonitc nintahkiiminaan, niipiwa' kaye kaakii nihsimiyamintc,” kii‑ihkitowak.

²⁵ Ahpii hsa kaa‑ani ciihkamanci'owaatc mii 'i kaa⁠ihkitowaatc, “Antomihk Saamihsan ke⁠minwentami'inank.” Mii 'i kaa⁠ishi antomaawaatc Saamihsanoon kaakii ishi kipa'omintc ekiih piinaawaatc ci⁠minwentamo'ikowaatc. Okii ishi niipawi'aawaan hsa i'imaa nahsawaya'ii kaakii onci aaswahkitenik i'i kihci waahkaa'ikan.

²⁶ Miitahsh Saamihsan kaa'inaatc kwiiwisenhsan kaakiih sakinihkenikotc, “Taka pakitinihshin ewiih saaminakwaa iki kaa⁠onci aaswahkitenik o'o waahkaa'ikan. Ewii ishi aaswaahkokaapawiyaan,” okii'inaan.

²⁷ I'imaa waahkaa'ikanik kimoshkina'itiwa', ihkwewa', kahkina kaye wekimaawinitc Pilistiiwahkiink. Ninkoci ko nihsink mitaahswaahk (3,000) ininiwa', ihkwewa' kaye ekiih tahshinitc wakitapahk ekii onsaapamikotc Saamihsan e⁠minwentami'iwetc.

²⁸ Miitahsh Saamihsan kaakiih kanoonaatc kaaTipencikenitc ekii'inaatc, “Kiin kaaTipencikeyan Kishemanitoo, taka maamihkwenimihshin, taka kaye keyaapi aapitink mashkawisii'ihshin, kiin kaaKishemanitoowiyan. Ewii nana'ahsakwaa Pilistii kaatinowiwaatc aaniihsh minciniish nishkiinshikoon okii otaahpinaanaawaan,” kii‑ihkito.

²⁹ Miihsh Saamihsan kaakii ayooninaatc niishin kaakiih patahkisonitc kaakii ishi aaswahkitenik waahkaa'ikan; weweni kaye ekii aasohshimoonotc peshik okihcinihkink, kotak tahsh onamantinihkink.

³⁰ Miitahsh kaa⁠ihkitotc, “Taka pisaan ninka wiici nipoomaak Pilistii kaatinowiwaatc!” Ehpiihciitc itahsh iko kiih⁠kaantinike. I'i hsa waahkaa'ikan kii⁠niisihse ekiih patakoshkoosowaatc kahkina wekimaawiwaatc, kahkina kaye pemaatisiwaatc i'imaa kaakii ayaawaatc piintik. O'oweniwa' tahsh kaakii nihsaatc mii 'imaa kewiin kaa⁠ishi nipotc, nawac niipiwa' i'imaa okii nihsaa', ahpiihc wiin minihk kaakiih pinihsaatc mekwaa kiihpi⁠pimaatisitc.

³¹ Wiicihkiweya' hsa, i'i kaye kahkina otetenk kaakii onci inawemaatc kiih⁠piishaawa' ekiih pinaasihkaminitc owiiyaw. Weti tahsh nahsawaya'ii kaakii ishi'ayaanikin ootenawan Soorah (Zorah), Eshteyol (Eshtaol) kaye kii‑ishi na'inikaniwi kaakii ishi na'inimintc oteten Menoowa (Manoah) kaakii ishinihkaasonitc. Niishtana (20) tahso pipoon hsa okii onaahkonaa' Isriyala' (Israel).