Iisiihkiyoo 34 - Ojibwe Kihcimasina'ikan

Kaaniikaaniihtamawaawaatc Isriyala' Kiikanoonintwaa

¹ Miitahsh o'o kaaTipenciketc kaa'ishitc,

² “Eniniiwiyan, taka kanoosh iki kaa⁠niikaaniihtamawaawaatc Isriyala' (Israel) okanawi maanahcaanihshiwenk enentaakosiwaatc, miihsh o'o ke'inatwaa, ‘Mii ohsha 'o kaaMaawaci mashkawisiitc kaaTipenciketc ehkitotc: Etatawe kikihci koohpaasinaakosim kaa⁠niikaaniihtamawekwaa Isriyalak, kiinehtawaa e⁠ahshantisoyek! Pinamaa iitok cikii ahshamekwaapan maanahcaanihshak!

³ Kiinawaa coocoohshaapo e⁠minihkweyek, e⁠kikishkamek tahsh kaye kikishkikanan maanahcaanihshiwayaanink wenciikin kaye kinihsaawaak maawac iko sasekaa maanahcaanihshak e⁠amwekwaa. Kaawiin tahsh kinaanaakaci'aahsiwaawaak maanahcaanihshak.

⁴ Kaawiin hsa kiwiici'aahsiwaawaak kaa⁠niinamisiwaatc, kaawiin kaye kinantawi'aahsiwaawaak kaa‑aahkosiwaatc. Kaawiin kaye kisiitoohpinaahsiwaawaak kaa⁠maahkihshinowaatc. Kaawiin kaye kikiih kiiwe naasihkawaahsiwaawaak, kaawiin kaye kikii antone'waahsiwaawaak kaakii wanihshinowaatc. Wiinke kikii wehsaani'aawaak ekiih kakwaanihsakisiihkantawekwaa kii⁠tipenimekwaa.

⁵ Misiwe hsa tahsh kii‑ishi misihteshkaawak ekii inentaakosiwaatc taapishkoo maanahcaanihshak eyaawaahsikwaa okanawi maanahcaanihshiwen. Misiwe tahsh ekii ishi misihteshkaawaatc, miihsh aya'aawihsha' kaakii nihsikowaatc ekii amokowaatc.

⁶ Nimpimaatisiimak maanahcaanihshink kaa⁠inenimakwaa misiwe kihci waciihkaank tashi wawaanentamok, misiwe kaye kaashi papiihkwatinaanik. Misiwe hsa ahkiink tashi wawaanentamok, kaawiin tahsh awiyan onanaantone'okohsiiwaan, kaawiin kaye awiyan onanaantawaapamikohsiiwaan.’ ”

⁷ “ ‘Taka tahsh noonkom kiinawaa okanawi maanahcaanihshiwek, pisintawihshik aaniin eninakook niin kaaTipencikeyaan.

⁸ Tepwe hsa ko niin kaaMaawaci mashkawisiitc kaaTipenciketc kaa'ininakook; onsaam nimpimaatisiimak maanahcaanihshink kaa⁠inenimakwaa kaawiin otayaawaahsiwaawaa' kaa⁠naakaci'ikowaatc. Miihsh kaa⁠onci wehsaani'intwaa, kaye e⁠amokowaatc aya'aawihsha'. Ninkanawi maanahcaanihshiwemak aaniihsh kaawiin okii antone'waahsiwaawaa' kaa⁠wanihshininitc maanahcaanihsha'. Mii hsa 'i wiinehtawaa kaakii naanaakaci'itisowaatc ekiih papaapisiskenimaahsikwaa maanahcaanihsha'.

⁹ Kiinawaa tahsh okanawi maanahcaanihshiwek, pisintawihk aaniin eninek kaaTipenciketc.’

¹⁰ Mii hsa 'owe kaaMaawaci mashkawisiitc kaaTipenciketc eninek, ‘Kaawiin hsa kiminwaapamihsinooninim kiinawaa okanawi maanahcaanihshiwek, kiinawaa hsa kika pakamishkaakom kekoonini kaashi maanshihsewaatc nimaanahcaanihshimak. Kaawiin hsa kiwiih pakitinihsinooninim awahshime ci⁠naanaakaci'ekwaa nimaanahcaanihshimak. Kaawiin kaye keyaapi i'imaa ci⁠ontancikehsiiwek. Mii ohsha 'i ewii naatamawakwaa nimaanahcaanihshimak kiinawaa onci ci⁠amwaahsiwintwaa.’ ”

Wenishihshitc Okanawimaanahcaanihshiwe

¹¹ Miitahsh o'o kaaMaawaci mashkawisiitc kaaTipenciketc ehkitotc, “Intawaa hsa niin iko ninka nanaantone'waak, nimaanahcaanihshimak ewii naanaakaci'akwaa.

¹² Taapishkoo hsa okanawi maanahcaanihshiwe kaashi nanaantone'waatc omaanahcaanihshima' kaakii misihteshkaanitc, mii hsa keniin ke⁠ishihcikeyaan. Ninka shaapwii'aak hsa piko aaniinti kaakii ishi misihtenisha'ontwaapan ahpii eh⁠kiishikaninik kii⁠ninkwahkwaninik, kii⁠kashkiitipihkaninik kaye.

¹³ Weti hsa pepahkaan ahkiink kaashi ayayaawaatc ninka onci maawantoonaak, ewiih piinakwaa otahkiimiwank i'imaa Isriyalahkiink. Mii iitok i'imaa kaashi kihci waciihkaanik, kaashi wawaanatinaanik kaye. Misiwe kaye kaa‑ayishitaaniwaninik ewiih tashi ahshamakwaa eshi wawenooci mashkohsiihkaanik.

¹⁴ Pisaan hsa ko ninka pakitinaak i'imaa kihci waciink ci⁠tashi wiihsiniwaatc kaashi wawenooci mashkohsiihkaanik. Kaashi maminoshkohsiwakaanik hsa tahsh kaye tashi pimihshinook. Kaashi wawenooci mashkohsiihkaanik hsa i'imaa tashi wawiihsiniwak kaashi papiihkwatinaanik Isriyalahkiink (Israel).

¹⁵ Niin hsa tahsh iko ninka naanaakaci'aak nimaanahcaanihshimak. Ninka ishiwinaak kaye keshi anwehshinowaatc,” mii 'i ehkitotc kaaMaawaci mashkawisiitc kaaTipenciketc.

¹⁶ “Ninka antone'waak hsa kaa⁠wanihshinowaatc, ci⁠piinakwaa iki kaa⁠papaa wawaanentamishkaawaatc kaye. Ninka siitoohpinaak hsa iki kaa⁠wiihsakihshinowaatc, ci⁠antawi'akwaa kaye kaa‑aahkosiwaatc. Iki tahsh wiin kaa‑aayaancipowaatc, kaa⁠mashkawisiiwaatc niwii nihshiwanaaci'aak. Niin iitok weweni kaa⁠naakaci'aatc maanahcaanihsha' kwayahk eshihciketc.”

¹⁷ Miitahsh o'o Niin kaaMaawaci mashkawisiitc kaaTipencikeyaan eninakook nimpimaatisiimak maanahcaanihshink eneniminakook, “Kiwii onaahkonininim ohsha nimaanahcaanihshimak wenishihshiyek, kaa⁠maci'ayaayek itahsh. Iki kaye niwii onaahkonaak aape maanahcaanihshak, aape maanatihkwak kaye.

¹⁸ Kaawiin ina teminihk kitinentansiim e⁠ontancikeyek i'imaa kaashi wenootahkin mashkohsiin? Shaakooc tahsh oncita eh⁠tahtahkohkaatamek i'iwe kaa⁠miicihsiwek kaashi wenootahkin mashkohsiin. Kaawiin ina teminihk kitinentansiim e⁠minihkweyek kaa⁠pehkaakamik nipi? Oncita na kitishihcikem eh⁠pahkwepiikiwepishkamek i'i nipi kii‑ishkwaa minihkweyek?

¹⁹ Mii na tahsh i'imaa nimaanahcaanihshimak ke⁠ontancikewaatc kaakiih tahtahkohkaatamek? Mii na kaye i'imaa ke⁠ontaakamancikewaatc nipiink kaakii ishi pahkwepiikiwepishkikeyek?”

²⁰ “Niin kaaMaawaci mashkawisiitc kaaTipenciketc, mii 'o eninakook ewii onaahkoninakook maanahcaanihshak kaa⁠mashkawaatisiyek, kaye kaa⁠niinamisiyek.

²¹ Onsaam aaniihsh kaa⁠mashkawaatisiyek ninkoci kitishi kaanciwepishkawaawaak kaa⁠niinamisiwaatc, ninkoci kaye e⁠ishi kaanciwepa'wekwaa kaa⁠niinamisiwaatc, miihsh piinihsh ninkoci eshi inaamohkiiyek.

²² Niwii naatamawaak ohsha nimaanahcaanihshimak, kaawiin tahsh miinawaa wiihkaa ta⁠wehsaani'aahsiiwak. Niin hsa niwii nenaawinaak nimaanahcaanihshimak kaa⁠onishihshiwaatc, kaa⁠macaatisiwaatc itahsh ewii onaahkonakwaa.

²³ Ninka onahsimaan hsa peshik ke⁠kanawenimikowaatc okanawi maanahcaanihshiwen. Nintanohkii'aakanan hsa Tepit (David) eshinihkaasonitc oka naanaakaci'ikowaan ke⁠ahshamikowaatc.

²⁴ Niin hsa tahsh kaaTipencikeyaan ninka oKishemanitoomimikook, nintanohkii'aakanan itahsh Tepitoon oka tipenimikowaan eshi'ayaawaatc. Niin ohsha kaaTipencikeyaan o'o kaa⁠ihkitoyaan.

²⁵ Miihsh ci⁠oshihtamawakwaa ahshotamaakewin pisaan ci⁠ayaawaatc. Ninka caaki'imaa' kaye aya'aawihsha' kaa‑aahkwaatisinitc, pisaan ci⁠ayintaawaatc pikwatahkamik, pisaan kaye noohpimiink ci⁠nanipaawaatc.”

²⁶ “Miitahsh ci⁠minohsewaatc. Ta⁠minohseni kaye i'imaa waahkaaya'ii ke⁠ishitaawaatc niwaciimink. Ninka ishihcikewaan hsa ci⁠kimiwaninik ahpii noontehsewaatc. Ta⁠kimiwanini hsa ke⁠ahpiihci shawenimakwaa.

²⁷ Mihtikook hsa mihshawahkamik kaa⁠patahkisowaatc oka nihtaawikihtoonaawaa miicim, ta⁠wenooci nihtaawikin kaye kekoon ahkiink, miihsh ci⁠kihkentamowaatc eh⁠kanawentaakosiwaatc i'imaa otahkiimiwaank. Miitahsh i'i ci⁠kihkentamowaatc niin eh⁠Tipencikewak, niin kaye eh⁠piikonamowak piiwaapihkoon kaa⁠minciminikowaatc, niin ekii naatamawakwaa awahshime ci⁠kakwaataki'ikohsikwaa kaa⁠tahkonikowaatc.

²⁸ Kaawiin tahsh miinawaa oka kacishkaanimi'ikohsiiwaa' pehkaanwewaanakisinitc pemaatisinitc, kaawiin kaye aya'aawihsha' kaa‑aahkwaatisinitc oka papaamenimikohsiiwa'. Pisaan hsa ta⁠papimaatisiwak, kaawiin kaye awiyan miinawaa oka seki'ikohsiiwaan.

²⁹ Miihsh kaye ci⁠miinakwaa ahkiini kekoon keshi wenooci nihtaawikininik, kaawiin tahsh awahshime ta⁠kawaskatehsiiwak. Kaawiin tahsh kaye awahshime pehkaanwewaanakisinitc pemaatisinitc oka maanenimikohsiiwaa'.

³⁰ Miitahsh kahkina ci⁠kihkentamowaatc niin eh⁠Tipencikewak e⁠oKishemanitoomimiwaatc Isriyalak, e⁠naatamawakwaa, eh⁠tipenimakwaa kaye,” mii 'i ehkitotc kaaMaawaci mashkawisiitc kaaTipenciketc.

³¹ “Kiinawaa nimaanahcaanihshimak kaa‑ayaayek kaashi mashkohsiihkaak. Kiinawaa nimpimaatisiimak, niin itahsh kiKishemanitoomiwaa,” ihkito kaaMaawaci mashkawisiitc kaaTipenciketc.