Iisiihkiyoo 2 - Ojibwe Kihcimasina'ikan

Kishemanitoon Kiikanoonikotc Iisiihkiyoo Cikanootamawaatc

¹ Ahpii tahsh o'o kaa⁠ishinamaan, miihsh kaa⁠ishi animihkohtaayaan, ekii noontawak awekwen eh⁠kanooshitc, “Eniniiwiyan, taka pasikwiin, ewiih kakanooninaan.”

² Eh⁠kakanooshitc tahsh, mii 'i Kishemanitoo otAhcaahkwan kaakiih piintikeshkaanitc nimpimaatisiwinink, miihsh kaakiih pasikwii'imitc. Ninkii noontawaa tahsh o'o ekii'ishitc,

³ “Eniniiwiyan, kitishinisha'on hsa Isriyalak (Israel) eshi'ayaawaatc, pemaatisiwaatc sheshiipihtamowaatc, niin eh⁠shashiipihtawiwaatc. Mii hsa ko 'i mayaa eshi shashiipihtamowaatc okehteya'aamiwaapanii' kaakiih pi ishihcikenitc mewisha piinihsh o'o ishi ahpii.

⁴ Weti hsa kaa⁠ishinisha'onaan eshi'ayaawaatc pemaatisiwaatc, wiinke shashiipihtamook, kaawiin kaye ninkihci inenimikohsiik. Miitahsh inaahkan, ‘Mii ohsha 'o eninek kaaTipenciketc kaaMaawaci mashkawisiitc.’

⁵ Mihsawaa ko pisintamowaatc, komaa kaye pisintansikwaa; shaakooc hsa ko shashiipihtamook. Miihsh i'i ci⁠kihkentamowaatc e⁠ayaanitc kaa⁠kanootamawaanitc Kishemanitoon mekweya'ii eshi'ayaawaatc.”

⁶ “Kiin tahsh wiin Eniniiwiyan, keko kohsaahken, keko kaye kohtamowaahken ehkitowaatc. Aanawiin kaashi saki'ayaak, kaashi kaawiminakashiihkaak ishi'ayaayan, mihsawaa ko kaye waahkaashkawihkwaa kinepikook. Keko tahsh kohsaahken, aaniin kaye ehkitowaatc, aanawiin e⁠nihtaa shashiipihtamowaatc.

⁷ Onsaam itahsh e⁠nihtaa shashiipihtamowaatc mii 'i eshinaakwaninik ci⁠wiintamawatwaa eninaan, mihsawaa ko pisintamowaatc, komaa kaye pisintansikwaa.”

⁸ “Taka kiin Eniniiwiyan, pisintawihshin eninaan; keko ishi'ayaahken kaa⁠ishi'ayaawaatc iki pemaatisiwaatc sheshiipihtamowaatc. Taawanin, ci⁠miiciyan o'o kaa‑ahshaminaan.”

⁹ Miitahsh kaakii waapantamaan oninciimaa e⁠niiminamaakooyaan kihci masina'ikan kaa⁠iitawi titipiikinikaatek.

¹⁰ Miitahsh kaa⁠ishi paahkiikinikaatek i'i kaa⁠iitawi titipiikinikaatek masina'ikan. Miihsh kaakii waapantamaan kwehkwehkinahke ekii ishi oshipii'ikaatek. Miihsh i'imaa kaa⁠ishi oshipii'ikaatekin mawiwinan, kakwaatakatemowinan, koohpaacihsewinan kaye.