Iisiihkiyoo 1 - Ojibwe Kihcimasina'ikan

Iisiihkiyoo Kiiwaapamaatc Kishemanitoon

¹ Nihsimitana tahsopipoon (30) tahsh e⁠ishihsek, niiwikiisihs eh⁠pimakinsotc, naanan e⁠inakinsotc, ninkii ayaa weti siipink Kiipaar (Chebar) ecikaatek. Mekwaa kii⁠wiici'ayaamakwaa kaakii maaciinintwaapan, mii hsa weti kaakii waapantamaan eh⁠paahkishkaak kiishik. Miihsh ishinamowinink kaakii onci waapamak Kishemanitoo.

² Mii iitok aasha naanopipoon kii‑ishihsenikopanen, naanokiisihsoon eh⁠pimakinsonitc kihciokimaa Cehooyakin (Jehoiachin) kaakii maaciicikaniwikopanen.

³ Miitahsh weti siipink Kiipaar Paapilan ahkiink (Babylon), kaaTipenciketc kaakiih kanooshitc. Niin hsa Iisiihkiyoo (Ezekiel) anami'ewikimaa, nintete tahsh Piyoosaai (Buzi) ishinihkaaso. Miitahsh weti kaakii toohkishkaakowak kaaTipenciketc ekiih saaminitc.

⁴ Ishpimink tahsh e⁠inaapiyaan, ninkii waapantaan kiiwetinonk inahke ehpi kihci nootink, kihci wahkwi wiinke e⁠mihcaak e⁠kihci waawaahtehsek, waahkaaya'ii tahsh wiinke e⁠waahsenaakwahk. I'imaa tahsh naawaya'ii ishkotenk mii 'i kaa⁠ishinaakwahk taapishkoo piiwaapihk kaa⁠waahseyaapihkitek.

⁵ I'imaa tahsh naawaya'ii ishkotenk ninkii waapamaak niiwin awiyak eh⁠pimaatisiwaatc. Miihsh kaa⁠ishinaakosiwaatc taapishkoo ininiink.

⁶ Kaakiih tahso peshikowaatc ihsa kii⁠neniiwiinkwewak, oninkwiikaniwaan kaye kii⁠neniiwininiwan.

⁷ Kiih⁠kakwayahkwaahkokaatewak tahsh, aape pishihkiink ekii ayishisitewaatc. Miihsh kaa⁠ishi sakaahteyaapihkisitewaatc taapishkoo osaawaapihk kii⁠kisiiyaapihka'ikaatek.

⁸ Shiipaaya'ii tahsh kaakii ayishi oninkwiikanewaatc kii⁠ayoninciiwak ininiink ekii ishininciiwaatc. Kaakiih tahso peshikowaatc hsa kii⁠neniiwiinkwewak, kii⁠neniiwininiwan kaye oninkwiikaniwaan.

⁹ Oninkwiikaniwaan tahsh kiih⁠saasaamishkotaatiimakaniniwan ekii kahkahkekaapawiwaatc. E⁠maacaawaatc tahsh, mii hsa ko 'i kaa⁠ishi ohko maacaawaatc, kaawiin memwehc kiih⁠kwekihtaahsiiwak.

¹⁰ Miitahsh o'o kaa⁠ishiinkwewaatc kaakiih tahso peshikowaatc. Ininiink hsa kii‑ishiinkwewak. Okihcinihkiwaank tahsh inahke mihshipishiink kii‑ishiinkwewak. Onamantinihkiwaank tahsh inahke aape pishihkiink kii‑ishiinkwewak. Opihkwaniwaank tahsh inahke mikisiink kii‑ishiinkwewak.

¹¹ Kiih⁠tehsininkwiikaneniwak tahsh peshikwewaan oninkwiikaniwaan ekiih saamininkwiikanehtawaawaatc kwehkwehkaya'ii kaakii ayaanitc. Kotak tahsh ini oninkwiikaniwaan okii inaapacihtoonaawaan owiiyawiwaank kii‑ishi ahshici ninkwiikanehtaawak.

¹² Kaakii tahso peshikowaatc tahsh minciniiwayek inahke kii‑inaahsamikaapawiwak. Aaniinti tahsh iko pisaan inahke aahcaahkwan eshaanitc kii‑ishaawak, kaawiin memwehc cikii kwehkihtaawaatc.

¹³ Mekweya'ii tahsh eshi'ayaawaatc iki awiyak kaakiih pimaatisiwaatc kii⁠ayaa kekoon ekii ishinaakwahk taapishkoo kaa⁠kishaanshek ishkote. Taapishkoo ishkote kaa⁠niimaahkwa'ikaatek waahsahkonencikanaahkonk ekii ayaashawihsek kaakii ishi'ayaawaatc awiyak kaakiih pimaatisiwaatc. I'i tahsh ishkote wiinke kii⁠aahkonaakwan, miihsh kaye i'imaa kaa⁠onci waawaahtehsek.

¹⁴ Miitahsh kewiinawaa iki awiyak kaakiih pimaatisiwaatc kaa⁠ishi'ayaashawihsewaatc ekii ahpiihcihsewaatc ehpiihci kishiihsenik kaa⁠saakaahtehsenik.

¹⁵ Eh⁠kanawaapamakwaa tahsh iki awiyak kaa⁠pimaatisiwaatc, mii hsa 'i kaakii waapamimak niiwin kaa⁠tihtipihsenitc. Pehpeshik itahsh kaa⁠tihtipihsenitc eshi niipawiwaatc kii‑ishi'ayaawa' ekiih saamahkamikihshininitc.

¹⁶ Iki hsa kahkina kaa⁠tihtipihsewaatc peshikwan kii‑ishinaakosiwak, peshikwan kaye kii‑ishihcikaniwiwak. Entahso peshikowaatc hsa kii‑ishi saasaakaahteshkaawak taapishkoo Karihsalait (Chrysolite) tino ahsin. Entahso peshikowaatc kaye kii‑ishihcikaniwiwak taapishkoo niishin kaa⁠tihtipihsewaatc kaa‑aashitehshinowaatc.

¹⁷ Miitahsh iki kaa⁠tihtipihsewaatc kaakii onci wencihsewaatc aaniinti piko niiwayek inahke ekii ishi maaciishkaawaatc.

¹⁸ Wiinke ekii ishpapiwaatc ekii maamahkaasinaakosiwaatc iki kaa⁠tihtipihsewaatc, ekiih kishipaa waahkaa oshkiinshikowaatc.

¹⁹ Ahpii tahsh iko i'i awiya' kaa⁠pimaatisinitc e⁠maaciishkaanitc, mii hsa kewiinawaa iki kaa⁠tihtipihsewaatc kaa⁠ishi maaciishkaawaatc ekii wiiciiwaawaatc. Kiishpin hsa ishpimink inahke kiishi maaciishkaanitc i'i awiya', mii hsa ko kewiinawaa ishpimink inahke kaa⁠ishi maaciishkaawaatc.

²⁰ I'i hsa awiya' kaa⁠pimaatisinitc eshi mihsawentaminitc iko inahke kii‑ishaawa', miitahsh kewiinawaa iki kaa⁠tihtipihsewaatc mayaa kaa⁠ishihsewaatc, aaniihsh okiih tipenimikowaa' i'i awiya'.

²¹ Entahsink itahsh iko i'i awiya' kaa⁠pimaatisinitc e⁠maaciishkaanitc, komaa kaye eh⁠kipihciinitc, komaa kaye ishpimink inahke e⁠ishi maacihsenitc, mii hsa ko mayaa kewiinawaa iki kaa⁠tihtipihsewaatc kaa⁠ishihsewaatc.

²² Enihkwekaapawiwaatc itahsh iki awiyak kaa⁠pimaatisiwaatc kii⁠ayaani kekoon ishpimink e⁠wiimpaanik. Taapishkoo mihkwam kaashi saasaakaahtenaakositc ekii ishinaakwaninik, ekiih kohtaasinaakwaninik kaye.

²³ Shiipaaya'ii tahsh e⁠ayaawaatc i'imaa eshi wiimpaanik, kii‑ishi tehsininkwiikaneniwak ekiih saaminitiwaatc oninkwiikaniwaank. Kotak itahsh wiin i'i neniishin oninkwiikaniwaan entahso peshikowaatc owiiyawiwaank kii‑ishi ahshici ninkwiikanehtaawak.

²⁴ Ahpii tahsh e⁠wahkawiiwaatc ninkii noontawaak e⁠matweyaankehshinowaatc. Miihsh kaa⁠inihtaakwaninik taapishkoo kaa⁠kihci matweyaashkaak. Kii‑inihtaakwan kaye taapishkoo kaa⁠inwewehtoowaatc kaa⁠paahtiinowaatc shimaakanihshak, taapishkoo kaa⁠inihtaakositc Kishemanitoo kaaMaawaci mashkawisiitc. Ahpii tahsh kaah⁠poonihsewaatc, mii 'i kaa⁠ishi kakiishiwininkwiikanehtaawaatc.

²⁵ Keyaapi tahsh kekoon kiih⁠tanihtaakwanini weti paashiciya'ii ishpimink kaa⁠wiimpaanik. Miihsh i'imaa shiipaaya'ii kaa⁠ishi niipawiwaatc ekii kakiishiwininkwiikanehtaawaatc.

²⁶ Miitahsh weti ishpimink kaashi wiimpaanik kekoon kii⁠naakwan ekii ishinaakwaninik taapishkoo kihciokimaawapiwin saahpayar (sapphire) tino ahsiniink wenishihcikaatenik. Awiya tahsh i'imaa kii⁠matwe namatapi ininiink ekii ishinaakositc.

²⁷ Mii hsa 'i kaa⁠ishinaakositc taapishkoo osaawaapihk mekwe ishkotenk kaa‑ayaak. Misiwe waahkaaya'ii eshi'ayaatc ekii waahseyaanik.

²⁸ Taapishkoo hsa kaashi waahsenaakwahk kiisihsweyaap kii⁠kashkiitipihkaanahkwahk, mii hsa 'i kaa⁠ishi waahseyaanik eshi'ayaatc waahkaaya'ii. Mii iitok i'i mayaa eshinaakwaninik kaaTipenciketc okihci inentaakosiwin. Ahpii tahsh o'o kaa⁠ishinamaan, mii hsa 'i kaa⁠ishi ciinkicihseyaan, ninkii noontawaa kaye awiya eh⁠kanooshitc.