Hosiiya 6 - Ojibwe Kihcimasina'ikan

Isriyalak Tepwe Kiihkwehkaatisihsikwaa

¹ Miitahsh o'o pemaatisiwaatc ehkitowaatc, “Taka kiiwe naasihkawaataa kaaTipenciketc! Wiin iitok kaa⁠wiihsakentamo'inank, miihsh ci⁠antawi'inank, wiin kaye kaa⁠maahki'inank, miihsh ci⁠siitoohpininank!

² Niishokiishik tahsh ishihsenik mii 'i ci⁠kiiwe pimaatisii'inank; nihsokiishik tahsh ishihsenik mii 'i ci⁠kiiwe onahsinank. Miitahsh i'i ci⁠pimaatisiwank enaahsamiitc.

³ Taka hsa ihkitotaa e⁠kihkenimank kaaTipenciketc; maano kaye kakwe kihkenimaataa. Kehcinaac hsa kaashi moohka'ank kiisihs, mii maawiin i'i nahke keshi naasihkawinank. Kaashi kimiwank hsa kii⁠siikwank, mii maawiin i'i nahke kehcinaac kaaTipenciketc keshi naasihkawinank.”

⁴ O'o tahsh kaaTipenciketc ihkito, “Iihpariyam wenciiyek, kiinawaa kaye Coota wenciiyek, aaniin tahsh ke⁠tootawinakook? Taapishkoo hsa kaa⁠paashkineyaak kii⁠kishepaawakahk, kaa⁠shahki'ayaak kaye kii⁠kishepaawakahk kinwesh kaa‑ayaamakahsinok, mii hsa 'i enentaakwahk kisaaki'iwewiniwaa.

⁵ Mii ohsha 'i kaa⁠onci ishinisha'wakwaa kaa⁠kanootamawiwaatc eshi'ayaayek eh⁠pimiwitoowaatc nintipaacimowin e⁠wiintamawinekwaa kaawii ishi kwetahto tipaahkonininakook, kaawii ishi nihshiwanaaci'ininakook kaye. I'i hsa kaa‑antawentamawinaan wiinke pehtenaakwan.

⁶ Kikishewaatisiwiniwaa ohsha kaa‑antawentamaan kaawiin wiin kaa⁠pakitinaahsoohtamawiyek. Nawac iitok nintaa minwentaan pemaatisiwaatc ci⁠kihkenimiwaahpan ahpiihc wiin ci⁠pakitinaahsoohtamawiwaahpan.”

⁷ “Taapishkoo Aatam (Adam) kaakii‑ishi piikonank i'i ahsotamaatiwin, mii hsa 'i kewiinawaa kaakiih piikonamowaatc kaakii oshihtamawakwaapan.

⁸ I'imaa hsa Kiliyat (Gilead) ootenaank wiinke paahtiinowak meci'ishiwepisiwaatc ininiwak, kaa⁠nihtaa nihshiwewaatc kaye.

⁹ Anami'ewikimaak hsa mii 'i eshihcikewaatc taapishkoo kaa‑ayohkwiinowaatc okimoocishkak kaa‑ahkamawaawaatc awiyan. Kaawiin hsa shaakwenimohsiiwak i'imaa ehtashi nihshiwewaatc miihkanaank enamoninik weti Shiihkam (Shechem) ootenaank. Kehcinaac hsa maci'ishihcikewak o'o kaa⁠tootamowaatc.

¹⁰ Niwaapantaan hsa kekoon e⁠kihci kakwaanihsakentaakwahk eshi'ayaawaatc Isriyalak; tepwe hsa eyaamakan pihshikwaacihcikewin i'imaa Iihpariyam (Ephraim) ahkiink. Isriyalak hsa wiinentaakosiwak.”

¹¹ “Kekiinawaa hsa Coota ahkiink eyaayek, ninkii onahtoon ohsha ahpii kekiinawaa waa⁠nana'ahsininakook kitishihcikewiniwaan onci.”