Hosiiya 4 - Ojibwe Kihcimasina'ikan

KaaTipenciketc Kaashi'anaamimaatc Isriyala'

¹ Isriyalak (Israel), taka pisintawihk eninek kaaTipenciketc. KaaTipenciketc ohsha kekoonini otayaan eshi maanaapaminek o'omaa ahkiink kaa⁠tashi pimaatisiyek; miihsh o'o eninek, “Kaawiin hsa kanake tepweyentaakosiwin, saaki'iwewin kaye ayaahsinoon o'omaa ahkiink. Pemaatisiwaatc kaye kaawiin ihkitohsiiwak eh⁠Kishemanitoowiwak.

² Mii ehta ko eshihcikenaaniwank eh⁠maci kaakiikitonk, eh⁠kiiwanimonaaniwank, e⁠nihsitink, eh⁠kiimootink, e⁠pihshikwaatisink kaye. Nooci ishihcikewin e⁠ani paahtiinatink, e⁠ani ayaanihke nihsitinaaniwank.

³ Miitahsh kaa⁠onci mawinaaniwank i'imaa ahkiink aaniihsh pemaatisiwaatc i'imaa ahkiink ani nihshiwanaatisiwak. Aya'aawihshak mihshawahkamik eyaawaatc, pinehshiinshak kaye pepaamihsewaatc ishpimink, iki kaye kiikooyak kihcikamiink eyaawaatc kahkina ta⁠nipowak.”

KaaTipenciketc Kii'anaamimaatc Anami'ewikimaa'

⁴ “Taka keko awiya ta⁠mamishihtaakosihsii, keko kaye awiyak ta‑anaamenintihsiiwak. Kiinawaa ohsha kaa‑anami'ewikimaawiyek kaa⁠maanaapaminakook.

⁵ Entahso kiishik, entahso tipihk kaye e⁠inentaakwahk eh⁠papaapisokehshinek, Kishemanitoon kenootamawaawaatc e⁠wiici'winekwaa. Miihsh kaawii onci nihshiwanaaci'ak kimaamaawaa, Isriyal ahki kaa'itamaan.

⁶ E⁠kihkenimihsikwaa ohsha nimpimaatisiimak kaa⁠onci nihshiwanaatisiwaatc. Aaniihsh kiinawaa kitihkitom e⁠kihkenimihsiwek, kitaanawentaam hsa kaye kaa⁠inaahkonikeyaan eh⁠Kishemanitoowiyaan. Miitahsh kaa⁠onci aanaweniminakook anami'ewikimaawiyek, kaa⁠onci aanawenimakwaa tahsh kaye kiniicaanihsiwaak.”

⁷ “Aanakii ani paahtiinowaatc hsa tahsh anami'ewikimaak, mii hsa 'i aanciko anishi kaanci macitootawiyek. I'i hsa kaashi kihtentaakosiyekipan niwiih kwehkinaan meshkwac tahsh kika akatentaakosim.

⁸ Kaashi maci'ishiwepisiwaatc nimpimaatisiimak mii 'imaa wenci wenootisiyek, miihsh kaa⁠onci antawenimekwaa aanciko ci⁠ani maci'ishihcikewaatc.

⁹ Miitahsh peshikwan kekiinawaa keshi nana'ahsinakook keshi nana'ahsakwaa pemaatisiwaatc. Miihsh kahkina kaawii onci nana'ahsinakook ci⁠tipa'amek aaniin eshi maci'ishiwepisiyek.

¹⁰ Aana tahsh ontancikeyek pakitinaahsowinink, shaakooc hsa kika noonteskatem. Aana tahsh pihshikwaacihcikeyek, kaawiin tahsh kika ani paahtiinohsiim, aaniihsh kikii nakanaawaa kiKishemanitoomiwaa pahkaan manitook eh⁠piminisha'wekwaa.”

KaaTipenciketc Kii'aanwaapantank Manitoohkewin

¹¹ Miihsh ehkitotc kaaTipenciketc, “Mii hsa 'i kaa⁠onci onihsitohtamaawinihsikwaa onsaam e⁠ishiihkamowaatc pihshikwaacihcikewin, kehte shoominaapooni, oshki shoominaapooni kaye.

¹² Mihtiko manitoohkaana' hsa kekoonini okakwecimaawaa', miihsh kaye mihtikoni iinsan eshi nahkwehtaakowaatc. Miihsh eshi nakashiwaatc pihshikwaacihkwenk e⁠inentaakosiwaatc kwayahk eh⁠tootawaahsikwaa oKishemanitoomiwaan.

¹³ Weti hsa kihci waciiwatinaahkaank ishi nihtaa pakitinaahsowak, weti kaye eshi wawakitatinaanik ishi nihtaa minaahsikewak eshi mino akawaahtehkisonitc o'o ohk tinowaahtikoo' (oak), asaatii' (poplar), terapint (terebinth) kaye tinowaahtik.” “Mii hsa tahsh i'i kitaanihsiwaak kaa‑ani onci pihshikwaacihkwewiwaatc kihshimihsiwaak kaye kaa‑ani onci wiihpemaawaatc kotak ininiwa'.

¹⁴ Kaawiin itahsh niwii nana'ahsaahsiik kitaanihsiwaak kii⁠ani pihshikwaacihkwewiwaatc, kihshimihsiwaak kaye kii⁠ani onci wiiciiwaawaatc kotak ininiwa', onsaam aaniihsh kaa⁠ininiiwiyek kekiinawaa kinaasihkawaawaak pihshikwaacihkwewak, kiwiici pakitinaahsoomaawaak kaye pihshikwaacihkwewak eyaawaatc kihci anami'ewikamikonk. Pemaatisiwaatc hsa kaa⁠onihsitohtamowinihsikwaa ta⁠nihshiwanaatisiwak!”

¹⁵ “Aana hsa ko pihshikwaacihcikeyek Isriyal ahkiink wenciiyek, taka kaawiin i'i peshikwan Coota ahkiink wenciiwaatc ta⁠ishihcikehsiiwak. Keko ishaahkek Kilkal (Gilgal) ootenaank, komaa kaye weti Peht epan (Beth aven) ci⁠awi anami'aayek. Keko kaye ahpimowaahkek kaaTipenciketc owiinsowin ci‑ihkitoyek, ‘Tepwe hsa ko kaashi pimaatisitc kaaTipenciketc!’

¹⁶ Isriyalak hsa mii 'i enentaakosiwaatc taapishkoo kaa⁠eshaawaatisihsik pishihkiinhs, aaniin itahsh inaa keshi ahshamakwaapan eshi mashkohsiihkaanik taapishkoo kaa⁠tootawintc maanahcaanihshenhs?

¹⁷ Isriyalak hsa ishi akwiiwak manitoohkewinink, keko tahsh papaamenimaahkekwaanik.

¹⁸ Mihsawaa ko kii⁠caakihsewaatc kaa⁠minihkwaatamowaatc, mii 'i kaawiin ciwiih poonihtoowaatc opihshikwaacihcikewiniwaan; nawac e⁠antawentamowaatc ci⁠akatentaakosiwaatc ahpiihc wiin ci⁠kihtenimintwaapan.

¹⁹ Shipicicoohshink hsa tahsh tashi maacii wepaahshiwak. I'i nahke kaashi nihtaa pakitinaahsowaatc, mii 'imaa ke⁠onci akatentaakosiwaatc.”