Hosiiya 3 - Ojibwe Kihcimasina'ikan

Hosiiya Kiikiiwewiiciiwaatc Wiiwan

¹ Miitahsh o'o kaaTipenciketc kaa'ishitc, “Maacaan miinawaa awi minwenim a'a kiwiiw kaa⁠pihshikwaacihciketc, kaa⁠minwenimaatc kotak awiyan pehshikwaacihcikenitc. Mii hsa 'i eshinaakwahk ci⁠saaki'atc taapishkoo kaashi saaki'akwaa keyaapi pemaatisiwaatc Isriyalak, aanawiin kotak manitoo' e⁠naasihkawaawaatc eh⁠pakitinamawaawaatc kaye shoomini pahkweshikanenhsa',” ninkii'ik.

² Miitahsh kaakiih tipa'ikeyaan mitaahshinaanan (15) waapaapihko shooniyaanhs, niishwaahsoohshkimot (7) manoomin ekii ataaweyaan a'a ihkwe.

³ Miihsh o'o kaa'inak a'a ihkwe, “Mii ohsha 'i iinsan kinwesh ci⁠wiici'ayaamiyan. Kaawiin kaye kika pihshikwaacihkwewihsii, kaawiin kaye kika wiihpemaahsii kotak inini, miihsh keniin ke⁠tootawinaan,” ninkii inaa.

⁴ Kinwesh ihsa Isriyalak kaawiin ta⁠okihci otookimaamihsiiwak, kaawiin kaye oka ayaawaahsiwaawaan ke⁠niikaanisinitc. Kaawiin kaye ta⁠onci pakitinaahsohsiiwak, kaawiin kaye oka ayaawaahsiwaawaa' kaa‑anami'ewentaakosinitc ahsinii'. Kaawiin kaye ta⁠manitoohkehsiiwak, kaawiin ta⁠mamaantaawi anta kihkencikehsiiwak.

⁵ Naanaake hsa tahsh ani ishihsenik mii 'i Isriyalak ci⁠kiiwenotawaawaatc, ci⁠kiiwe antone'waawaatc kaaTipencikenitc oKishemanitoomiwaan kaye okihciokimaamiwaan Tepitoon. Pi⁠naasihkawaawaatc hsa tahsh kaaTipencikenitc ta⁠nininkishkaawak, miihsh kaye ci⁠tepinamowaatc eshi shawencikenitc weti ishkwaac ani kakiishikaninik.