Hosiiya 14 - Ojibwe Kihcimasina'ikan

Hosiiya Kiikanoonaatc Isriyala'

¹ Isriyalak (Israel), taka kiiwenotawihk kaaTipenciketc kiKishemanitoomiwaa. Kimacitootamowiniwaan ohsha kaa⁠pisokeshkaakoyek kaa⁠onci pankihshinek.

² Kiiwe naasihkawihk kaaTipenciketc, miihsh o'o keshi anami'ehtawek, “Poonentan kahkina kaashi maci'ishiwepisiyaank, pisaan tahsh otaahpinihshinaam. Niinawint hsa nintooninaanink ci⁠onci miikwehciwenimikooyan.

³ Ahsiiriya (Assyria) ahkiink kaa⁠onciiwaatc hsa kaawiin nintaa pimaaci'ikohsiinaanik; miikaasowi mihtatimook kaye kaawiin ninka naatamaakohsiinaanik. Kaawiin kaye miinawaa wiihkaa ninka inaahsiwaanaanik nininciinaanink kaakii onci oshi'ankitwaa, ‘Nimanitoominaanik.’ Tepencikeyan, kiin iitok kikoohpaatenimaak oko awiyak kwiiwahshishaanak.”

KaaTipenciketc Kii'ahshotamawaatc Oshkipimaatisiwin Isriyala'

⁴ Miitahsh o'o kaaTipenciketc ehkitotc, “Ninka kiiwe naasihkawaak hsa nimpimaatisiimak ci⁠piinakwaa kaashi ayaawak. Wawiinke hsa ko ninka shawenimaak; kaawiin awahshime ninka nishki'ikohsiik.

⁵ Kaa⁠shahki'ayaak hsa ninka inenimikook Isriyalak, miihsh ci⁠kiishikiwaatc taapishkoo waapikwaniin. Taapishkoo kiishkaahtik Lepanan ahkiink kaa⁠kontaawikininikin ociipihkoon anaamahkamik,

⁶ Miihsh i'imaa ke⁠onci maaciikiwaatc, ci⁠ani ahpiihci minonaakosiwaatc taapishkoo aalip tinowaahtik kaashi minonaakositc. Miitahsh ke⁠ahpiihci minomaakosiwaatc taapishkoo kaa⁠ishi maakosiwaatc kiishkaahtikook Lepanan ahkiink eyaawaatc.

⁷ Miitahsh miinawaa ci⁠tashi pimaatisiwaatc keshi kanawenimakwaa. Miitahsh kaye keshi nihtaawikiwaatc taapishkoo pahkweshikan kaashi mino nihtaawikitc, ta⁠ishi kiishikiwak taapishkoo shoominaahtik kaashi nihtaawikihciketc. Wiinke tahsh ta⁠kihkentaakosiwak taapishkoo kaashi kihkentaakwahk shoominaapo i'imaa Lepanan kaa⁠onciik.

⁸ Kiinawaa Iihpariyam kaa⁠onciiyek, aaniin tahsh ke⁠tootawakwaa kimanitoomiwaak? Niin iitok kaa⁠nahkwehtawinakook, niin kaye kaa⁠kanaweniminakook. Mii 'i enentaakosiyaan taapishkoo niin a'a shinkwaahk kaa⁠nehpici osaawahshkositc, miitahsh i'imaa wentinamek i'i kaa⁠nihtaawikihtooyek.”

Mii 'owe E'anikiishipii'ikaatek

⁹ Awenen tahsh kekiihtaawentank? Awenen tahsh nesitohtamowinitc? Miiwak hsa iki kaa⁠kihkentamowaatc, kaa⁠nihsitohtamowaatc o'oweni. KaaTipenciketc otishihtwaawin eh⁠kwayahkonaakwaninik; okwayahkwaatisiik kaye o'o nahke ishi pimohsewak. Iki tahsh kaa⁠shashiipihtamowaatc mii 'omaa eshi pisokehshinowaatc.