Hosiiya 13 - Ojibwe Kihcimasina'ikan

Ewiintenik Aaniin Isriyalak Ishkwaac Waa'inaahkonintwaa

¹ Iihpariyam (Ephraim) wenciiwaatc hsa kekoon kii‑ihkitowaahpan, kotak Isriyala' kiih⁠sekisiwa'. Wiinawaa maawac kii⁠niikaanentaakosiwak. Miitahsh kaakii maci'ishihcikewaatc ekii anami'ehtawaawaatc manitoohkaanan Peyal (Baal) enimintc. Miitahsh i'i kaakii onci nipowaatc.

² Miitahsh awahshime enishi kaanci macitootamowaatc waapaapihko shooniyaa waapihkonk e⁠onci oshihtamaasowaatc manitoohkaana'. Wiinke hsa ko ominonaako'aawaa', kahkina ko piiwaapihkohkewininiwan e⁠oshi'aanitc. Miihsh ehkitowaatc, “Awiyohk, awiyawi pikitinaahsowinan pakitinaahsoohtamawihkwak!” Miihsh kaye eshi ociimaawaatc i'i pishihkiinhsiwi oshihcikana'.

³ Miitahsh ke⁠ishinaakosiwaatc taapishkoo kaa⁠paashkineyaak kii⁠kishepaawakahk, taapishkoo kaye kaa⁠shahki'ayaak wiipa kaani ankwahk. Taapishkoo kaye pahkweshikanimin ohkonoyaan kaa⁠onci ompweyaahsink entashi pawikanaancikenk, taapishkoo kaye ohkiciihkaan kaa⁠paashkinek; mii 'i enentaakosiwaatc.

⁴ Niin iitok kaaTipenciketc kiKishemanitoomiwaa kaakiih saakiciwininek Iicipahkiink. Kaawiin kotak manitoo kikihkenimaahsiwaawaa, niin ehta ko. Kaawiin kotak ayaahsii Pemaaci'iwetc, niin ehta ko.

⁵ Niin hsa kaakiih kanaweniminakook weti pikwatahkamik kaashi kishitek.

⁶ Ahpii hsa kii⁠ahshamakwaapan, ekiih tewiihsiniwaatc, mii hsa 'i kaa‑ani ishi kihci inenintisowaatc, miihsh kaa⁠ishi waniihkenotawiwaatc.

⁷ Mihshipishiink hsa tahsh ninka inentaakosiihkantawaak. Taapishkoo kihci pooshiinhs kaa‑ahkantootc miihkanaank, mii hsa 'i keshi ahkamawakwaa.

⁸ Taapishkoo hsa mahkwa kaa⁠ishihciketc kaa⁠mahkamintc omahkoonhsima', mii hsa i'inahke keshi miikaanakwaa, ci⁠pakociipinakwaa. Taapishkoo mihshipishiw kaashi kitamowetc ninkashi kitamwaak. Ninka piihsipinaak taapishkoo kaashi piihsipishiwenitc pikwaci aya'aawihshan.

⁹ Kiinawaa Isriyalak, mii 'owe kaa⁠onci nihshiwanaatisiyek e⁠aanwaapamiyek aana wi wiici'inakook.

¹⁰ Aaniinti tahsh eyaatc kikihciokimaamiwaa ke⁠shaapwii'inekipan? Aaniinti kaye eyaawaatc iki kahkina kaa⁠niikaanisiihtamawinekwaa ke⁠naatamawinekwaapan? Miiwak iitok iki kaakiih kakwetweyekipan ekii ihkitoyekipan, “Taka miishihshinaam kihciokimaa, kaa⁠niikaanisiwaatc kaye!”

¹¹ Miihsh kaakii nishkaatisiyaan e⁠miininakook kihciokimaa. Miihsh kaakii otaahpinak kitookimaamiwaa e⁠aahkokitaasoyaan.

¹² Eshi macitootamowaatc hsa Iihpariyam wenciiwaatc kanawencikaateniwan, oshipii'ikaateniwan kaye e⁠na'inikaatenikin.

¹³ Isriyalak hsa ta⁠pimaatisiwak, onsaam itahsh kakiipaatisiwak i'i ci‑ishihcikewaahpan. Mii hsa 'i enentaakosiwaatc taapishkoo apinoonciish aasha kekaa kaa⁠nihtaawikitc, kaa⁠inentansik itahsh cipi saaka'ank ke⁠onci nihtaawikihpan.

¹⁴ Ninka onci shaapwii'aak hsa eshi'ayaanitc kaa⁠niponitc, nipowinink kaye ninka onci kiiwe pimaaci'aak. Nipowin, aaniinti tahsh eyaakin kitinaahpinacikewinan? Ciipekamik, aaniinti tahsh i'i kinihshiwanaaci'iwewin? Kaawiin hsa ninka koohpaatenimiwehsii.

¹⁵ Mihsawaa hsa ko Isriyalak ani paahtiinowaatc taapishkoo mashkohsiwan, kaaTipencikenitc hsa waapanonk inahke eshi'ayaanik pikwatahkamik ta⁠ontaanimanohkewan. Miihsh ci‑iskahtenik kaa⁠moohkiciwaninik, onipiimiwaa otoonta'ipaaniwaan kaye. Otahtaahsowikamikowaan kaye ta⁠mashashkonikaateniwan aaniin eshi wenootaninikipanen.

¹⁶ Pemaatisiwaatc ayaawaatc Sameriya (Samaria) hsa wiinawaa piko ta⁠nana'ahsaawak i'i onci kaashi macitootamowaatc aaniihsh oshashiipihtawaawaan oKishemanitoomiwaan. Pashipa'ikewihkomaanink hsa ta⁠onci nihsaawak. Otapinoonciishimiwaa' hsa tahsh mihtahkamik tashi aahpicihshimaawa'. Otihkwemiwaa' kekishkawaawahsonitc hsa ta⁠taatociiwepishwaawa'.