Hosiiya 12 - Ojibwe Kihcimasina'ikan

¹ Iihpariyam wenciiwaatc hsa mii 'i eshinaakosiwaatc taapishkoo eh⁠piminisha'amowaatc nootin. Eh⁠piminisha'amowaatc waapani nootin kapekiishik, miihsh eshi paahtiinahtoowaatc eshi kiiwanimowaatc, eshi ompwehkamikisiwaatc kaye. Mii 'i enaawaatc Ahsiiriya (Assyria) ahkiink wenciinitc pisaan ewii wiiciiwaawaatc, e⁠ishinisha'amawaawaatc kaye aalip tino pimiteni Iicipahkiink.

² KaaTipenciketc ohsha otayaan kekoon eshi anaamimaatc Coota ahkiink wenciinitc, owii nana'ahsaan kaye Cekapoon (Jacob) kaakii ishihcikenitc, owiih tipa'amawaan kaye kaakiih pi ishihcikenitc.

³ Mekwaa iitok Cekap kii⁠piinsokopanen omaamaan omihsataaniink, okiih sakitoontanenaan iitok wiicihkiweyan; kiih⁠kiishaapewitc itahsh kii⁠nawatinitiwak Kishemanitoo.

⁴ Okii nawatinaan kaye encalan Kishemanitoonk kaakii onciinitc ekiih shaakooci'aatc; miihsh kaakii mawitc ekiih pakohsenimotc ci⁠minwaapamikotc. Miitahsh kaakii nakishkaakotc Kishemanitoon weti Pehtal (Bethel) ecikaatenik ekiih kakanoonikotc.

⁵ Miiwan hsa ini kaaTipencikenitc Kishemanitoon kaaMaawaci mashkawisiinitc; kaaTipenciketc iitok ishinihkaasowan.

⁶ Miitahsh i'i ishi kiiwe naasihkawihk kiKishemanitoomiwaa; ci⁠saaki'iweyek, weweni kaye ci⁠tootaakeyek, mooshak kaye ci⁠pii'ek kiKishemanitoomiwaa.

Keyaapi E'inaatc Waa'ishinana'ahsaatc

⁷ Miitahsh kaaTipenciketc ehkitotc, “Isriyalak hsa mii 'i eshi wayeshinkewaatc taapishkoo Kenan kaatinowinitc e⁠minwentamowaatc ci⁠wayeshimaawaatc kaa‑ataamikowaatc e⁠aapacihtoowaatc tipaapiishkoocikanan kaa⁠wayeshimiwemakaninikin.

⁸ Miihsh Iihpariyam wenciiwaatc ehkitowaatc, ‘Wiinke hsa niwenootisimin, maawaciko e⁠ani wenootisiyaank, kaawiin itahsh awiya kekoon nintaa ishi anaamimikohsiinaan ci'ishiyamintc eh⁠wayeshinkeyaank!’

⁹ Niin iitok kaaTipenciketc kiKishemanitoomiwaa kaakiih saakiciwininek Iicipahkiink (Egypt); kika tootawininim hsa miinawaa pakwaanekamikonk ci‑ishitaayek taapishkoo kaakii ayintiyekipan ahpii kaakiih pi naasihkawinakookipan weti pikwatahkamik.”

¹⁰ “Niin ohsha kaakiih kanoonakwaa Kishemanitoon kaa⁠kanootamawaawaatc, kaakiih tootawakwaa kaye ci⁠kihci waapantamowaatc ishinamowinan. Ninkii miinaak kaye awehcikanan ci⁠tipaatotamowaatc.

¹¹ Shaakooc itahsh pemaatisiwaatc weti Kiliyat (Gilead) eyaawaatc maci'ishiwepisiwak e⁠anami'ehtawaawaatc manitoohkaana'. Miiwak hsa iki ke⁠nipowaatc. Aape pishihkiwak hsa kaye pakitinaahsowaakaniwiwak weti Kilkal (Gilgal) ootenaank, otoonaapihkinikaniwaan eshi pakitinaahsonk hsa ta⁠ohkwaapihkisininiwan weti mihshawahkamik.”

¹² Miitahsh Cekap (Jacob) kaakii ahpa'iwetc Mesopohtemiya (Mesopotamia) ahkiink, ekii anohkiihtawaatc awiyan weti ekiih kanawenimaatc omaanahcaanihshimini ekiih tipa'waatc ke⁠wiiwitc.

¹³ KaaTipenciketc itahsh kaa⁠kanootamaakotc okii aapaci'aan eh⁠saakiciwinaatc opimaatisiima' weti Iicipahkiink, ci⁠naanaakacihtamaakotc kaye.

¹⁴ Iki hsa Iihpariyam (Ephraim) wenciiwaatc okii aahkonawe'aawaan kaaTipencikenitc; miihsh eshinaakwaninik ci⁠onci nipowaahpan otishihcikewiniwaan onci. KaaTipencikenitc hsa oka tipa'amaakowaan aaniin inahke kaakiih tootawaawaatc ke⁠onci paahpinotawimintc.