Hosiiya 11 - Ojibwe Kihcimasina'ikan

Kishemanitoo Kiisaaki'aatc Kaashashiipihtaakotc Opimaatisiima'

¹ Miitahsh o'o kaaTipenciketc ehkitotc, “Isriyal (Israel) hsa kii⁠apinoonciishiwitc wiinke ninkiih saaki'aa. Iicipahkiink kii⁠ayaatc ninkosihsink ninkii ishinihkaanaa kii⁠saakici antomakipan.

² Aanciko tahsh aanakii antomak Isriyal mii 'i aanciihke waahsa kaa⁠ishi nakashitc. Manitoohkaana' Peyal (Baal) enimintc ekiih pakitinaahsoohtamawaatc, oshihcikana' kaye ekii minaahsamawaatc.

³ Niin iitok kaakii kihkino'amawakwaa Isriyalak ci⁠pimohsewaatc apinoonciishink kii‑inentaakosiwaahpan, niin kaye kaakiih tahkonakwaa ninihkiink; kaawiin tahsh ninkii kihkenimikohsiik niin ekii antawi'akwaa.

⁴ Ninkii naaci wiihkopinaak hsa ekii aapacihtooyaan minotootaakewin, saaki'iwewin kaye. Niin tahsh kaye kaakii otaahpinamowak kaakiih pimiwanewaatc ohkwekaniwaank, ninkiih pihskiciihtaa kaye ekii ahshamakwaa.”

⁵ “Kaawiin itahsh inentansiiwak cikiih pikiiwe naasihkawiwaahpan, Iicipahkiink (Egypt) hsa iinsan inahke tashi kiiwewak. Miihsh Asiiriya (Assyria) ahkiink kaa⁠onciinitc ci⁠tipenimikowaatc.

⁶ Miitahsh ci⁠miikaatinaaniwaninik kaashi ayootenaamiwaatc, otootenaawi kihci ishkwaantemiwaan ci⁠nihshiwanaacihcikaatenikin. Ninka kipihtinamowaan hsa kaye kaa⁠inentamowaatc wa‑ani ishihcikewaatc.

⁷ Nimpimaatisiimak hsa ishi wiihkoshkaawak ewii nakashiwaatc. Mihsawaa tahsh iko kanoonaawaatc Maawac Eshpentaakosinitc, kaawiin tahsh aapiinciko oka kihci inenimikohsiiwaan.”

⁸ “Kiinawaa Iihpariyamink wenciiyek aaniin tahsh ke⁠onci pakitenimininakookipan? Isriyalak, aaniin itahsh pisaan keshi wepininakookipan? Mii na 'i peshikwan ke⁠tootawinakook kaakii ishi nihshiwanaacihtooyaan ootena Aatma eshinihkaatekipan? Mii na 'i kaye ke⁠tootawinakook kaakiih tootamaampaan ootena Siipooim? Ninte'ink hsa kaawiin nintoonci inentansii i'i ci‑ishihcikeyaan, onsaam aaniihsh kimashkawi saaki'ininim.

⁹ Kaawiin hsa kiwii nana'ahsinihsinooninim nishkaatisiyaan, kaawiin kaye niwii nihshiwanaaci'aahsiik Isriyalak miinawaa. Niin iitok ninKishemanitoow, kaawiin wiin nintininiiwihsii, niin kaa⁠kohtaanentaakosiyaan nintayaa eshi'ayaayek, kaawiin miinawaa kika pi naasihkawihsinooninim nishkaatisiyaan.”

¹⁰ Miihsh ehkitotc kaaTipenciketc, “Miitahsh ci⁠piminisha'owaatc ahpii mihshipishiink inihtaakosiwak. Ahpii noontaakosiwak mii hsa 'i nimpimaatisiimak cipi naasihkawiwaatc ci⁠nininkaanimisiwaatc, ninkaapii'anonk inahke cipi onciiwaatc.

¹¹ Pinehshiinshink hsa ta⁠inentaakosiwak Iicipahkiink ci⁠pionci takohshinowaatc ci⁠nininkaanimisiwaatc. Taapishkoo kaye omiimiihsiink ta⁠inentaakosiwak Ahsiiriya ahkiink pi⁠onci takohshinowaatc. Ninka oshi kapehshi'aak hsa tahsh otaawiniwaank,” mii 'i ehkitoyaan kaaTipencikeyaan.

Isriyalak, Coota Kaye Wenciiwaatc Kii'inintwaa Ewiinihshiwanaaci'intwaa

¹² Misiwe hsa waahkaaya'ii eshi'ayaawak ayaaniwan okiiwanimowiniwaan Iihpariyam wenciiwaatc. Isriyalak kaye eshi wayeshihtaakosiwaatc misiwe waahkaaya'ii tanentaakwaniniwan. Iki hsa kaye Coota ahkiink wenciiwaatc keyaapi oshashiipihtawaawaan Kishemanitoon, kaa⁠tepweyentaakosinitc kwehtaanentaakosinitc.