Hosiiya 1 - Ojibwe Kihcimasina'ikan

¹ Mii hsa o'oweni Hosiiya (Hosea) kaakii otetetc Pii'eriwan (Beeri) kaa'ikotc kaaTipencikenitc ahpii Yoosaayawan (Uzziah), Coohtamoon (Jotham), Ehaasan (Ahaz), Hesihkaayawan (Hezekiah) kaye kii⁠kihciokimaawinitc Coota (Judah) ahkiink. Weti tahsh wiin Isriyal ahkiink Ceroopooam (Jeroboam) oteten Cihooaash (Jehoash) kaakii ishinihkaasonitc kiih⁠tashi kihciokimaawi i'i ahpii.

Hosiiya Wiiwan Ehtashinsonitc

² Ahpii hsa kaaTipenciketc kii⁠maacii kanoonaatc Isriyala' (Israel), Hosiiyawan kenootamaakotc o'o okii'inaan, “Maacaan aanta wiiwin pihshikwaacihkwe, kaawiin hsa tahsh tepwe kwayahk ta⁠ishihcikehsii. Ke⁠oniicaanihsitc hsa kaye kaawiin ta⁠tepwewentaakosihsiwa'. Mii hsa 'i peshikwan nimpimaatisiimak Isriyalak kaakii nakashiwaatc eshinaakosiwaatc taapishkoo kaa⁠pihshikwaatisiwaatc,” okii'inaan.

³ Miitahsh Hosiiya kaa⁠ishi wiiwitc ihkwewan Koomar (Gomer) eshinihkaasonitc kaakii otetenitc Tipleim (Diblaim). Miihsh kaa⁠ishi kikishkawaawahsonitc ekii nihtaawikinitc kwiiwisenhsan.

⁴ Miihsh o'o kaaTipencikenitc kaa'ikotc, “Cesriiyal (Jezreel) hsa ishinihkaash a'a kikosihs. Mii 'i ke⁠onci ishinihkaanatc aasha kekaa ci⁠ocihcihsenik ciwii nana'ahsakwaa Ciihoo (Jehu) kaa⁠ontahkaanesiwaatc onci kaakii ishi nihshiwewaakopanen Cesriiyal ootenaank. Miihsh kaye wa⁠ishihcikeyaan ci⁠poonihsek i'i Isriyal kihciokimaawiwin.

⁵ Miitahsh ahpii 'i kiishikaninik, weti kaashi pahsatinaanik Cesriiyal eshinihkaatek, keshi piikonamowak Isriyalak eshi mashkawentaakosiwaatc.”

⁶ Miinawaa tahsh wiin Koomaran (Gomer) kiih⁠kikishkawaawahsowan, ihkwesenhsan ekii nihtaawikinitc. Miihsh Hosiiya kaa'ikotc kaaTipencikenitc, “Kaa⁠saaki'aahsiwintc ishinihkaash a'a ihkwesenhs. Kaawiin aaniihsh awahshime niwii waapanta'aahsiik pemaatisiwaatc Isriyalak cikiih saaki'akwaapan, cikiih poonentamawakwaapan kaye.

⁷ Iki tahsh wiin pemaatisiwaatc eyaawaatc Coota ahkiink ninka waapanta'aak eh⁠saaki'akwaa, ewii naatamawakwaa. Kaawiin wiin miikaasowin niwii aapacihtoohsiin, mihtikwaapiik, pashipa'ikewihkomaanan kaye. Kaawiin kaye mihtatimook, shimaakanihshak kaa⁠pimiwanepa'ikowaatc kaye niwii aapaci'aahsiik. Niin ohsha piko kaaTipencikeyaan kaa⁠oKishemanitoomimiwaatc ninka naatamawaak,” okii'ikoon.

⁸ Ahpii tahsh Koomaran kaa⁠ishkwaa nooni'aanitc otaanihsan Kaa⁠saaki'aahsiwintc eshinihkaasonitc, kwiiwisenhsan hsa miinawaa kii⁠nihtaawikiwan.

⁹ Miihsh Hosiiya o'o kaakii'ikotc kaaTipencikenitc, “Kaawiih opimaatisiimaahsiwakwaa hsa kika ishinihkaanaa a'a kwiiwisenhs. Onsaam aaniihsh pemaatisiwaatc Isriyalak kaawiin nintipenimaahsiik, kaawiin kaye nintoKishemanitoomimikohsiik,” okii'ikoon.

Isriyalak Cikiiweminohse'intwaa

¹⁰ Shaakooc tahsh Isriyalak tani paahtiinowak cini tahshiwaatc newaank kaa⁠tahsink naanew kihcikamiink. Kaawiin hsa ta⁠kashki'aahsiiwak ci⁠akimintwaa, ci⁠tipaapiikinintwaapan kaye. I'imaa hsa tahsh kaakii'ikowaakopanen Kishemanitoon, “Kaawiin hsa kitipenimihsinooninim,” meshkwac itahsh o'o oka'ikowaan, “Kishemanitoo kaa⁠pimaatisitc hsa kitokosihsimikowaa!”

¹¹ Iki hsa pemaatisiwaatc Coota ahkiink wenciiwaatc, Isriyalahkiink kaye wenciiwaatc ta⁠kiiwe wiiciintiwak. Wiinawaa hsa ko oka onenimaawaan peshik ke⁠niikaaniihtamaakowaatc, miihsh miinawaa cini paahtiinowaatc, ci⁠ani minohsewaatc kaye i'imaa otahkiimiwaank. Wiinke hsa ta⁠kihci ishi kiishikan ahpii ishikiishikanohkewaatc, “Kishemanitoowi kihtikewi kiishikan,” kaa'itamowaatc.