ᐄᐸᕒᐆᐗᒃ 9 - Ojibwe Kihcimasina'ikan

Ahkiiwi anami'ehcikewin, kihcikiishikoowi anami'ehcikewin

¹ I'i tahsh nihtam ahshotamaatiwin kaakii'ayaak aahpici hsa kiihpaahtiinatinoon inaahkonikewinan aaniin mayaa awiya kekii'ishihcikehpan antapiintiketc o'omaa ahkiink. Inini aaniihsh okii'oshihtoon aanti keshipiintiketc.

² Kii'onahkicikaate tahsh i'i kihcianami'epakwaanekamik. I'imaa tahsh kaakii'ishinihtamipiintikenk, kaaishikohtaanentaakwahk kii'ishinihkaate. Miiwan itahsh ono i'imaa piintik kaa'ahtekin. Waahsahkonencikanaahk, toohpowinaahk, a'a kaye pahkweshikan kaakii'apitc toohpowinaahkonk kaakiihpakitinamawintc Kishemanitoo.

³ Maawac iko kaaishikohtaanentaakwahk itahsh awahsinahke kipiika'ikanink kii'ishiayaa.

⁴ Miitahsh o'omaa maawac iko kaaishikohtaanentaakwahk piintik ono kaa‑ahtekin: i'i kaaosaawaapihko shooniyaawank kaakii'ishi minaahsikaatek i'i minaahsikan; i'i tahsh kaye anami'emahkahk kaakii'osaawaapihko shooniyaawank kaakii'ishi kanawencikaatenik Kishemanitoo otahshotamaakewin. Miiwan itahsh ono kekoonan kaakiihpiintekin i'imaa mahkahkonk: osaawi shooniyaa waapihko onaakan mena (manna) pahkweshikan kaakii'ishipiinsotc; Eran (Aaron) osahka'onaahk kaakii'aniipiihshiwaninikipan; niishin kaye kaakii'mino napakaapihkisinitc ahsinii' kaakii'ishi oshipii'ikaatenik Kishemanitoo kaakii'ishi ahshotamaatiwaakopanen ininiwa'.

⁵ I'imaa tahsh wakicimahkahkonk kii'apiwak niishin Cerapiihkaanak (Cherubim) aahpici ekii'minonaakosiwaatc. Oninkwiikaniwaan itahsh okii'aapacihtoonaawaan e'aakooshkamowaatc i'imaa kaakii'ishi poonencikaatenikin macitootamowinan. Kaawiin itahsh wiin mayaa kekoon kiwii'wiintamawihsinooninim.

⁶ Miitahsh o'o kaakii'inahtenik ci‑ishihcikewaatc i'imaa Kihcianami'epakwaanekamikonk. Anami'ewikimaak itahsh wiin kiihpiintikewak i'imaa kaaishikohtaanentaakwaninik entahsokiishik ekiihtootamowaatc otanohkiiwiniwaan.

⁷ I'imaa tahsh wiin maawac iko kaaishikohtaanentaakwaninik piintik, Maawac Kihcianami'ewikimaa ehta kiihpiintike aapitink entahsotakwaakin. Okiihtakopiitoon itahsh omiskwiini kaakiinihsimintc aya'aawihshan ekiihpakitinamawaatc Kishemanitoon wiin cipoonentamaakotc omacitootamowinan, miitahsh kaye peshikwan kaaishihciketc ahpii kiipakitinikehtamawaatc kotak pemaatisinitc, i'i kaakiihkihkentansinik ekii'macitootaminitc.

⁸ Kishemanitoo otAhcaahkwan itahsh pehtenaakwanini kekoonini e'oncikihkino'iketc i'imaa kihcianami'epakwaanekamikonk. Minihk iko kaapatahkitek i'i nihtam kihcianami'epakwaanekamik, mii hsa taapishkoo eshinaakwahk mahshi ekiihpaahkintenamawaahsiwintwaa pemaatisiwaatc cipiintikewaatc i'imaa mayaa maawac iko kaaishikohtaanentaakwaninik.

⁹ Miitahsh i'imaa eshiwaapantamank aaniin mayaa eshihseyank noonkom kaapimaatisiyank. Ini tahsh miikiwaanan, pakitinaahsowinan kaye kaapakitinamawintc Kishemanitoo, kaawiin i'i nahke awiya kaa‑anami'ehtawaatc Kishemanitoon taoncikwayahkohcikaatehsinini kaaoncinaanaakatawentank.

¹⁰ Aaniihsh miicim, kaaminihkwaatekin kaye, kisiininciiwinan kii⁠aapatanoon ahpii kiipakitinaahsonk. Miiwan itahsh ono Kishemanitoo kaakii'miikiwetc ishihcikewinan ciaapataninikin. Onoweniwan itahsh kii'ishkwaahsewan ahpii Kishemanitoo kiionahtootc oshkikekoonini aaniin waa'ishinaakaci'aatc pemaatisinitc.

Christ omiskwiim aaniin eshipehki'iwemakaninik

¹¹ Aasha tahsh Christ kiihpitakohshin Maawac ekiihKihcianami'ewikimaawitc, ewii'naakacihtootc ini kaaonishihshininikin kekoonan aasha o'omaa kaa‑ayaanikin. I'imaa tahsh noonkom kaatashipamiihtaaketc Kihcianami'epakwaanekamikonk, nawac kihci‑inentaakwanini, nawac kaye weweni kiishinaakwanini. Aaniihsh kaawiin ininiinaank kii'oncioshihcikaatehsinini i'i Kihcianami'epakwaanekamik, kaawiin kaye kiihtako‑oshihcikaatehsinoon ahpii kii⁠oshihcikaatekin o'omaa ahkiink kaa‑ayaakin.

¹² Ahpii tahsh wiin Christ kaa'anipiintiketc i'imaa Kihcianami'epakwaanekamikonk, aapitink hsa ehta kiihpiintike i'imaa maawac iko kaaishikohtaanentaakwaninik. Wiin itahsh iko omiskwiim okii'aapacihtoon ekiihtepinamawinank pimaaci'ikoowin wiihkaa kepoonihsehsininik. Kaawiin wiin maanatihkwa', kaawiin kaye aape pishihkiinhsa' omiskwiini okii'aapacihtoohsiin ahpii kiipakitinaahsotc.

¹³ Iki tahsh kaakiihpehkentaakosihsikwaa kiihsihswewepinamawaawak i'i maanatihk omiskwiini, aape pishihkiinhsan kaye omiskwiini, i'i kaye otishkwaahkisowinini i'i nooshepishihkiinhsa'. Miitahsh i'i kaainwaatenik o'o ishihcikewin wakicaya'ii nahke cioncipehkakimintwaa kaakii'ishi pehkentaakosihsikwaa.

¹⁴ Kiishpin itahsh o'o tepwe ishihsek, awahshime tahsh Christ omiskwiim niipiwa' takashki'ewisiimakanini. Aaniihsh Ahcaahkwan kaanehpiciayaanitc ekiihkikishkaakotc kaakii'oncikashkihtootc cipakitinank opimaatisiwin ekiihpakitinamawaatc Kishemanitoon, aahpici kwayahk ekii'ishinaakositc. I'imaa hsa tahsh kaaishinaanaakatawentamank, mii 'imaa Christ omiskwiim taishipehkihcikemakanini, cikikisiwaahsiwank kaapaahtaa'ikowank ishihcikewinan. Miitahsh i'i keishi⁠anohkiihtawank kaapimaatisitc Kishemanitoo.

¹⁵ Inashke tahsh Christ wiiniko onaakacihtoon i'i oshkiahshotamaatiwin. Iki hsa kaakiihkanoonikowaatc Kishemanitoon okatepinaanaawaa kaakii'ahshotamaakowaatc wiihkaa kepoonihsehsininik. Inashke tahsh kii'nipo ekiihtipa'waatc ciaapa'omintc kaakii'ishi macitootaminitc mekwaa kehteahshotamaatiwin kiiaapataninik.

¹⁶ Awiya tahsh kiioshihtootc nipowimasina'ikan aaniin ketoocikaatenikin otaya'iiman ishkwaapimaatisitc, mii hsa eshinaakwaninik pinamaa cinipotc cipwaa aapataninik i'i ahshotamaatiwin kaakii'oshihtootc.

¹⁷ Kaawiin itahsh kekoon inaapatahsinini ahshotamaatiwin, a'a kaakii'oshihtootc mekwaa ehpimaatisitc. Paanimaa tahsh kiinipotc ta‑aapatanini.

¹⁸ Miitahsh i'i nihtam ahshotamaatiwin kaakii'ayaak kaakii'onci maacii anohkiimakahk ehta miskwi ekii'aapatahk.

¹⁹ Moosihs (Moses) itahsh ahpii kiiwaawiintamawaatc pemaatisinitc aaniin ehkitoomakaninik Onahshowewin, miitahsh o'o paanimaa kaakii'ishihciketc. Ini hsa aape pishihkiinhsa', maanatihkwa' kaye omiskwiini okii'otaahpinaan. Nipiini tahsh okiihtakwaakaminaan. Miitahsh Moosihs kaa'ishititipinank i'imaa ihsap (Hyssop) miihshaahtikoonhsink opiiwayini maanahcaanihshan kaakii'miskwatahtenikin. Okiihcehkipiinaan itahsh i'imaa otakwaakaminikanink. Miitahsh kaa'ishiohswepiikiwepinank i'i otakwaakaminikan i'imaa Onahshowewi‑⁠Masina'ikanink, pemaatisinitc kaye ekiihsasiihswepiikiwepinamawaatc.

²⁰ Miitahsh o'o Moosihs kaakii'ihkitotc: “Mii hsa o'oweni miskwiini Kishemanitoo eshionahtamawinek i'i ahshotamaatiwin. Kinantawenimikowaa kaye cina'ihtamowek.”

²¹ Miitahsh kaye peshikwan kaahtootank i'i Kihcianami'epakwaanekamikoni, ini kaye kahkina kekoonan kaakii'aapataninikin kiianami'aank, miskwiini misiwe ekiihpiiwaakamiwepinank.

²² Miitahsh i'imaa Onahshowewinink eshinaakwahk, kekaa kahkina kekoon e'oncipehkihcikaatek i'imaa miskwiink. Kaawiin kaye macitootamowin taapoonencikaatehsinoon kiishpin miskwi siikinikaatehsinokipan.

Macitootamowin kaahsiinikaatek i'imaa Christ kaakii'ishi pakitinitisotc

²³ Ono hsa ahkiiwikekoonan kaakiihkakwe naapihcikemakahkin aaniin eshiwepahk weti kihcikiishikonk, oncitako kii'ishinaakwanoon o'o nahke miskwiink cikii'ishipehkihcikaatekipanen. Ini tahsh wiin kihcikiishikoowi kekoonan wiihpehkihcikaatekin, mii 'i eshinaakwahk maawac iko wenishihshink pakitinaahsowin cikii'aapatahkipan.

²⁴ Kaawiin itahsh wiin ininiwan okii'oshihtoohsiini i'i kaaishikohtaanentaakwaninik Christ kaakii'ishipiintiketc. I'i iitok ininiiwi oshihcikan kii'mihcikakwenaapinaakwan aaniin eshinaakwahk kihcikiishikonk. Weti tahsh iko mayaa kihcikiishikonk kii'ishipiintike, e'niipawiihtamawinank enaahsamiinitc Kishemanitoon.

²⁵ A'a hsa Coowiwi Kihcianami'ewikimaa nihtaapiintike i'imaa maawac iko kaaishikohtaanentaakwaninik entahso peshiko takwaakin, ekiihpiintikatootc miskwiini kaatipinawewisihsik. A'awe tahsh Christ kaakii'ishipiintiketc kihcikiishikonk kaawiin paahtiinwaa cipakitinitisotc kaakii'oncipiintiketc.

²⁶ Kiishpin itahsh o'o eshihcikekopanen, aasha maawiin paahtiinwaa taakiihpikakwaatakihtoo weti otaanaank nihtam kii'oshihcikaatenik ahkiini piinihsh noonkom. Inashke tahsh aasha kekaa e'ocihcihsek ewii'ishkwaahsek o'owe ahki, aapitink iko kii'naakosi cipoonencikaatenik pemaatisinitc kaakii'ishi macitootaminitc, pakitinaahsowinink ekiihtinowitc.

²⁷ Oncitako ishinaakwanini awiya aapitink cinipotc. Kii'ishkwaanipotc itahsh mii 'i citipaahkonikotc Kishemanitoon.

²⁸ Miitahsh peshikwan Christ kewiin aapitink kaakii'oncipakitinintc pakitinaahsowinink citinowitc, ekii'oncikakwaatakihtootc kaapaahtiinonitc pemaatisinitc kaakii'ishi macitootaminitc. Miinawaa tahsh pitakohshink kaawiin wiin macitootamowinan okapapaapisiskentansiinan. I'i hsa kaa‑aaskonipii'ikotc okapimaaci'aa'.