ᐄᐸᕒᐆᐗᒃ 6 - Ojibwe Kihcimasina'ikan

¹ Taka tahsh niikaanaya'ii inahke ishimaacaataa cinaasihkamank kaaishikihkino'amawintwaa kaakiishaapewiwaatc, cinakatamank ini maawac iko nihtam kaakii'ishi kihkino'amaakooyankipan kiimaacii⁠anami'ewaatisiyank. Kaawiin miinawaa kika‑⁠kakwe‑⁠onahtoohsiimin ono kaawii'wiintamaan: eshikihkino'amaatink awiya cioncikwehkaatisihpan ishihcikewinan nipowinink kaaishiwishiwemakahkin, i'i kaye kaaishitepweyenimintc a'a Kishemanitoo,

² i'i kaye kaaishi‑⁠anami'e‑⁠kisiiyaapaawasonk, awiya kaye kaaishi‑⁠anami'e‑⁠saaminintc, i'i kaye keishikiiwepimaatisiwaatc kaanipowaatc, i'i kaye kepoonihsehsininik wiihkaa tipaahkonikoowin.

³ Taka tahsh niikaanaya'ii ishimaacaataa. Mii hsa o'o keshihcikeyank kiishpin Kishemanitoo inentank.

⁴ Iki tahsh aasha kaakii'nihsitohtamowaatc, kaakii'mansihpotamowaatc kaye miikiwewin kihcikiishikonk kaakii'onciinik, kaakii'wiitoohkaasowaatc kaye Kishemanitoon otAhcaahkoni enanohkiinitc,

⁵ kaakii'minohpotamowaatc kaye Kishemanitoon kaaonishihshininik otihkitowinini, ekiihkihkentamowaatc kaye mashkawisiiwinan kaawiihpi naakohcikaatenikin weti piciinak kaawii'ani ishiwepaninik –

⁶ ono tahsh ekiihkihkentamowaatc, ishinakatamowaatc itahsh kaaishitepwehtawaawaatc Christan, kaawiin taishinaakwahsinini miinawaa cioshki kwehkaatisi'intwaapan. Aaniihsh mii 'i taapishkoo wiinawaa piko e'ishihcikewaatc ehkiiwe akosaka'waawaatc Kishemanitoon oKosihsini i'imaa aashiteyaahtikonk. Mii hsa kaye taapishkoo entootawaawaatc piniskwe piko cimaanencikaniwinitc.

⁷ I'i hsa kihtikaanahkamik kaaminihkwemakahk ahpii ehkimiwank, aahpici hsa ini miicimi kihtikaanan taminokinoon i'imaa kihtikewahkamikonk. Iki hsa kaanaakacihtamawintwaa i'i kihtikewahkamikoni aahpici okakihtaapacihtoonaawaan ini miicimi kihtikaanan. Kishemanitoo kaye okaminohsetoon i'i kihtikaanahkamik.

⁸ Kiishpin itahsh wiin okaawiminakashiik, macaahtikook kaye ehta nihtaawikiwaatc i'imaa kihtikaanahkamikonk, kaawiin kekoon tainaapatahsinoon i'i kihtikaanahkamik. Mii ehta ko eshinaakwaninik Kishemanitoo ci‑itank cinihshiwanaataninik, miitahsh i'i kaye cicaakisikaatek.

⁹ Kaasaaki'ikooyek, aanawiin o'o e'ishikiishweyaank, shaakooc itahsh kitepweyenimikoom kiinawaa nawac ciminohseyek. Aaniihsh kika⁠otihsikom kaaonishihshinkin pimaaci'ikoowinink kaatako‑onciikin.

¹⁰ Weweni aaniihsh Kishemanitoo awiyan otootawaan. Kaawiin okapanaapantansiin aaniin kaakii'inanohkiiyek. Kaawiin kaye tawaniihkehsii e'naakohtawek ehsaaki'ek ehpiwiitoohkawimek keyaapi kaye ehpami'imek Kishemanitoo opimaatisiima'.

¹¹ Mii hsa tahsh eshipakohsenimikooyek kiinawaa kaatahsopeshikoyek citaapitawihcikeyek kaapi‑ishihcikeyek piinihsh weti ishkwaac, kehcinaac ciwaapantamek i'i kaaishiahpenimoyek.

¹² Kaawiin itahsh kinantawenimikoohsiim cianikihtimaatisiyek. Nanaapinawihkook itahsh iki kaakii'onci tepinamowaatc Kishemanitoon otahshotamaakewinini otepwehtamowiniwaank, oshashiipentamowiniwaank kaye.

Kishemanitoo kaatepweyentaakwaninik otahshotamaakewin

¹³ Ahpii tahsh Kishemanitoo kiiahshotamawaatc Eparahaaman (Abraham), wiin iko owiinsowin okii'aapacihtoon ekii'ahpimotc, aaniihsh kaawiin awiyan pahkaan owiinsowinini awahshime te⁠ahpiihtentaakwahsinini.

¹⁴ Miitahsh o'o kaakii'ihkitotc: “Tepwe hsa kitahshotamawin ewiihshaweniminaan, aahpici kaye tapaahtiinowak iki kipiiwesiimak.”

¹⁵ Eparahaam itahsh wiinke kiihshashiipentam. Miitahsh i'i kaakii'oncitepinank i'i kaakii'ishi ahshotamaakotc Kishemanitoon.

¹⁶ Ahpii hsa ininiwak kiiwii'aayiici⁠ahshotamaatiwaatc, awiyan hsa pahkaan otakowiinaawaan nawac kehci‑inentaakosinitc ahpiihc wiinawaa. Miitahsh i'imaa kaakii'ishionahtoowaatc ekii'ahpimowaatc, kaawiin awahshime takakweshaakoosontihsiiwak.

¹⁷ Miitahsh i'i Kishemanitoo kaakii'oncitootank ewii'naakohtamawaatc i'i kaawiihtepinaminitc otahshotamaakewin, ekii'antawenimaatc cikihkentaminitc wiihkaa ewii'aantentansik. Miitahsh i'imaa otahpimowinink kaakii'onci⁠aayiitahtootc otahshotamaakewin.

¹⁸ Ono tahsh niishin kekoonan kaapitashintamaank kaawiin wiihkaa taa‑aancihsehsinoonan. Kaawiin wiihkaa taaishinaakwahsinini Kishemanitoo cikiiwanimotc. Mii hsa tahsh kaaoncimashkawentamank, aaniihsh kikii'naacipa'iwaatamowaamin ehkakwetepinamowank ahpenimowin kaawii'miininank.

¹⁹ I'i hsa kihciwaamihka'ikan kaakihciwaamihkihsink, mii hsa taapishkoo eshinaakwahk i'i kitahpenimowininaan, kipimaatisiwininaan eshiaayiicimincimahpitek. Aahpici hsa kehcinaa'owentaakwan, kaawiin awiya okakashkihtoohsiin ciwahkawipitootc! O'o tahsh ahpenimowin ehtepaapiikamok weti maawac piintik kaaishikipiikakootek kihcikiishikonk kaaishi Kihcianami'ewikamikowank.

²⁰ Ciisahs itahsh kikii'niikaani piintikehtamaakonaan aaniihsh wiin pishihshik Maawac taKihcianami'ewikimaawi, peshikwan ci‑ishinaakositc i'i kaakii'inanohkiinikopanen ini Melhkisitehkoon (Melchizedek) kaakiih‑⁠kihcianami'ewikimaawinikopanen.