ᐄᐸᕒᐆᐗᒃ 5 - Ojibwe Kihcimasina'ikan

¹ Kaatahsopeshikotc ihsa Maawac Kihcianami'ewikimaa mekwe ininiihkaank onci⁠otaahpinikaniwi e'otaahpinintc cikanoocikehtamawaatc ininiwan Kishemanitoon cikanoonaatc, cipakitinank kaye miikiwewinan, cipakitinikehtamawaatc kaye ininiwa' keonci⁠poonentamawimintc kaakii'ishi‑⁠macitootaminitc.

² Miitahsh kaaonci⁠kashkihtootc weweni ciwiiciiwaatc i'i kaa‑ayehshaawaatisihsinik i'i kaye kaanihtaa wanihshininitc, aaniihsh kewiin misiwe omatisiwin onihtaawanishkwe'ikon.

³ Kewiin tahsh e'wahkewawaniitc mii 'i eshinaakwaninik cipakitinikehtamaasotc kewiin cipoonentamawintc kaaishimacitootank, taapishkoo kaaishipakitinikehtamawaatc pemaatisinitc.

⁴ Kaawiin itahsh awiya onenintisohsii ciotaahpinank o'o kaakihtakintenik anohkiiwin. Paanimaa hsa awiya ehkanoonikotc ini Kishemanitoon, miitahsh i'i payesh ciKihcianami'ewikimaawitc taapishkoo Eran (Aaron) kaakiihtootawintc.

⁵ Miitahsh peshikwan a'a Christ kaa'ishihciketc, kaawiin wiin kiihkihci‑inentaako'itisohsii Maawac ciKihcianami'ewikimaawitc. O'o tahsh Kishemanitoon okii'ikoon: “Kiin ninKosihs, noonkom hsa kaakiishikahk mii 'i cimaaciioTetemihshiyan.”

⁶ O'o tahsh kaye Kishemanitoo kii'ihkito: “Kiin hsa kiKihcianami'ewikimaaw nehpic taapishkoo Melhkisitehk (Melchizedek) kaakii'ishi‑⁠Kihcianami'ewikimaawitc.”

⁷ Ciisahs hsa mekwaa o'omaa ahkiink kiipimaatisitc, kii'ishinihtaa‑anami'aa, kekoonini kaye ekiihkakwecimaatc ini Kishemanitoon, ekii'matwemoohkwentank kaye, ekii'oncikawaapitc kaye, ekiihkanoonaatc Kishemanitoon kaakiihkashkihtoonitc cipimaaci'ikotc i'imaa onci nipowinink. Miitahsh wiinke ekiihtapahsenimotc, weweni kaye ekiihkihtenimaatc Kishemanitoon kaakii'oncinoontaakotc.

⁸ Aana tahsh wiin Kishemanitoon ekii'oKosihsimikotc, i'i hsa kaakii'ishi kakwaatakihtootc, mii hsa i'imaa kaa'oncikihkentank i'i na'ihtamowin.

⁹ Miitahsh i'imaa ekii'oncikiishinaakositc, mii hsa i'imaa wenciik i'i pimaatisiwin keishkwaahsehsinok. Iki tahsh kena'ihtawaawaatc tapimaatisiwak.

¹⁰ Kishemanitoo tahsh okii'inaan Ciisahsoon ciKihcianami'ewikimaawinitc ci‑inanohkiinitc i'i kaakii'inanohkiinikopanen ini Melhkisitehkoon Maawac kaakii'ishi‑⁠Kihcianami'ewikimaawinikopanen.

E'ayaankwaamimintwaa iki kenakatamowaatc otepweyentamowiniwaa

¹¹ Aahpici tahsh niipiwa' nintaakii'ihkitomin, aahpici kaye sanakan ciwiintamaakooyekipan citashimankitc a'a inini, kaawiin tahsh misiwe kitishinaakosihsiim cinihsitohtamekipan, mihsawaa aanawiintamaakooyek.

¹² Mii ohsha 'i eshinaakwahk, aasha kiinawaa cikiih kihkino'amaakeyekipan, shaakooc itahsh keyaapi kinoontehsem awiya cikihkino'amawinek maawac iko nihtam kaaishi⁠kihkino'amaatinaaniwitc Kishemanitoo. Miitahsh eshinaakosiyek taapishkoo keyaapi e'noontehseyek coocoohshaapo e'mihciminihkweyek, aasha tahsh cikiimiiciyekipan kaamashkawaak miicim.

¹³ Awiya tahsh coocoohshaapooni ehta kaaminihkwaatank, miitahsh taapishkoo eshinaakositc keyaapi e'apinoonciishiwitc. Kaawiin onakaci nihsitawinansiin kwayahkwaatisiwin.

¹⁴ Iki tahsh wiin aasha kaakiishaapewiwaatc, okashkihtoonaawaa e'miiciwaatc kaamashkawaanik miicim. Aaniihsh weweni onakaci kihkentaanaawaa aaniin enentaakwaninik kwayahkwaatisiwin.