ᐄᐸᕒᐆᐗᒃ 4 - Ojibwe Kihcimasina'ikan

¹ Kekiinawint hsa noonkom Kishemanitoo kiwii'miinikonaan kaakii'ahshotamaaketc, anwepiwin kaakiihtashintank citepinamowankitc. Taka tahsh ayaankwaamisitaa, kiinawaa kaatahshiyek cimihkawaahsiwintc awiya cipwaa nawihtootc citepinank i'i anwepiwin kaakii'wiintenik.

² Kikii'noontaamin hsa i'i minwaacimowin taapishkoo kewiinawaa kaakii'ishinoontamowaatc. Kaawiin itahsh kekoonini okii'inaapacihtoohsiinaawaa i'i tipaacimowin aanawiin ekii'noontamowaatc, aaniihsh kaawiin tepwehtamowinink okii'ishi otaahpinansiinaawaa.

³ Kiinawint itahsh kaatepwehtamank kipiintikemin i'imaa anwepiwinink Kishemanitoo kaakii'ahshotamaaketc. Aaniihsh kii'ihkito: “Ekii'maanaapamakwaa tahsh mii'i kaa'ishiahshotamaan, ‘Kaawiin hsa wiihkaa tapiintikehsiiwak i'iweni ahkiini kekii'ishi anwepiwaahpan kaawii'miinakwaapan.’ ” Mii hsa o'o kaa'ihkitotc aanawiin ekii'ishi kiishinaakwaninikin otanohkiiwinan ahpane kaakii'ishkwaaoshihtootc o'oweni ahkiini.

⁴ Ninkoci hsa Kihcimasina'ikanink Kishemanitoo okiihtashintaan i'i kaaniishwaahso‑⁠kiishikwakaanik: “Kishemanitoo kii'anwepi e'niishwaahso‑⁠kiishikwakaanik i'imaa onci otanohkiiwinink,” e'ishipii'ikaatek.

⁵ I'i tahsh peshikwan keyaapi anitashincikaate: “Kaawiin hsa wiihkaa tapiintikeshkaahsiiwak i'iweni ahkiini kekii'ishi⁠anwepiwaahpan kaawii'miinakwaapan.”

⁶ Keyaapi tahsh tawinikaate pisaan iko awiya cipiintiketc i'imaa anwepiwinink. Iki tahsh kaakii'wiintamawintwaapan minotipaacimowin kaawiin kiihpiintikehsiiwak, aaniihsh kiihshashiipihtamook.

⁷ Mii hsa tahsh o'omaa tepwe eshiwaapantamowank Kishemanitoo e'kiiwiintank peshik kotak kaakiishikaninik, “Noonkom kaakiishikahk” ekii'ishinihkaatank. Tepitoon (David) okii'aapaci'aan ekii'ihkitotc taapishkoo aasha mewisha kaakii'ihkitokopanen: “Kiishpin noontawek Kishemanitoo ehkanooninek noonkom kaakiishikaninik, Keko shashiipihtawaahkek.”

⁸ Inashke kiishpin Caahshowaa (Joshua) kiimiinaakopanen anwepiwinini i'i pemaatisinitc kaakiihpimiwinaatc, kaawiin itahsh Kishemanitoo otaakiihtashintansiin miinawaa naanaake kotak kekiishikaninik cikii'Anwepiiwi kiishikaninikipan.

⁹ Miitahsh eshinaakwahk pemaatisiwaatc kaatipenimikowaatc Kishemanitoon keyaapi e'ishkonamawintwaa cianwepiwaatc taapishkoo Kishemanitoo kaakii'ishi‑⁠anwepikopanen onci otanohkiiwinink e'niishwaahso‑⁠kiishikwakaanik.

¹⁰ Awiya hsa kaatepinank i'i anwepiwin Kishemanitoon kaakii'ahshotamaakenitc, kewiin hsa ta‑anwepi onci otanohkiiwinink taapishkoo Kishemanitoon kaaishianwepinitc.

¹¹ Taka tahsh kekiinawint, weweni ishihciketaa citepinamank i'i anwepiwin, awiya hsa kiinawint cinoontepwaanawi'ohsiwank, ci‑ishihcikewaahsiwank kaakii'ishihcikewaatc ekiishashiipihtamowaatc.

¹² Kishemanitoo kaaihkitotc hsa pimaatanini, anohkiimakanini kaye, nawac kaye kaahshaani ahpiihc wiin kaaiitawikaahshaanik pashipa'ikewihkomaan. Mii hsa ehpiihcikaahshaanik i'i otihkitowin, ehkashkihcikemakaninik ciocihcishikemakaninik aanti eshiaanihkawihsininik pimaatisiwinini i'imaa ahcaahkonk. Mihkoshikemakanini kaye aanti ohkanini i'i kaye paahsa'iwinaanini eshiaanihkawihsininik. Kihkentamaamakan awiyan eshimihsawencikenitc ote'iniink, eshinaanaakatawencikenitc kaye.

¹³ Kaawiin hsa kekoonini kahkina kaaoshihcikaatenik taakaatamawaahsii Kishemanitoo ciwaapantansikipan. Kaawiin kaye kekoon opiswaapantansiin, kahkina hsa kekoonini mohshenaakwanini enaahsamiitc. Wiin hsa tapinawe kewiintamawank aaniin kaakiihpi‑ishihcikewank.

Ciisahs kaakihci‑inentaakositc Kihcianami'ewikimaa

¹⁴ Taka tahsh aayiiciminciminantaa i'i kitepwehtamowininaan kaawiintamank. Aaniihsh kitayaawaanaan ehkihci‑inentaakositc Maawac kiKihcianami'ewikimaaminaan ishikwayahk ekii'ishaatc Kishemanitoon kaaishiayaanitc. Mii hsa a'a Ciisahs Kishemanitoo oKosihsan.

¹⁵ Wa'a tahsh Maawac kiKihcianami'ewikimaaminaan, kaawiin wiin kimihcikoohpaatenimikohsiinaan kaaishipimatisiyank. Kewiin ohsha misiwe kii'ishikakweci'aa taapishkoo kiinawint kaaishikakweci'ikooyank, kaawiin itahsh wiihkaa kiimacitootansii.

¹⁶ Taka tahsh kiinawint soonkite'etaa cinaasihkamowank Kishemanitoo okihciokimaawapiwin, mii aaniihsh 'imaa wentinikaatek kishewaatisiwin, mii hsa 'imaa keshitepinamank koohpaasinaakoowin, kikamiinikoomin kaye kishewaatisiwin kewiici'ikoyank ahpii noontehseyank.