ᐄᐸᕒᐆᐗᒃ 3 - Ojibwe Kihcimasina'ikan

Ciisahs nawac kihci‑inentaakosi ahpiihc Moosihs

¹ Kiinawaa tahsh niitanami'aak kaatipeniminek Christ, kekiinawaa hsa kikiihkanoonikowaa Kishemanitoo! Naanaakatawenimihk Ciisahs Kishemanitoo oKihci Ishinisha'waakanan kaatinowitc, Maawac Kihcianami'ewikimaa kaye, kekanawaapantank hsa kaye kitepweyentamowininaan kaawiintamank.

² Aahpici hsa kiihtepweyentaakosi Kishemanitoon ekii'onakimikotc ekii'miinikotc anohkiiwin citootank, taapishkoo Moosihs (Moses) kaakii'ishi tepweyentaakositc i'imaa Kishemanitoon owaahkaa'ikaniniink.

³ Awiya hsa kaaoshihtootc waahkaa'ikanini nawac kihci‑inentaakosi ahpiihc wiin i'iweni waahkaa'ikanini kaaoshihtootc. Miitahsh peshikwan Ciisahs nawac kihci‑inentaakosi ahpiihc wiin a'a Moosihs.

⁴ Waahkaa'ikan hsa kiiayaak, awiya ohsha okii'oshihtoonaatok. Kishemanitoo tahsh wiin kahkina kekoonini kaaoshihtootc.

⁵ Moosihs itahsh anohkii'aakan ekiihtinowitc, aahpici weweni kii'anohkii i'imaa Kishemanitoon owaahkaa'ikaniniink, ekii'anitashintamaaketc aaniin Kishemanitoon paanimaa naake keni‑ihkitonitc.

⁶ A'a tahsh wiin Christ aahpici weweni kii'oKosihsimaawi ekiihkanawentank Kishemanitoon owaahkaa'ikanini. Kiinawint hsa i'i waahkaa'ikan kiishpin kihciwinamank eshimashkawentamank, eshitepweyentamank kaye i'i kaakihci inentamank ahpenimowin.

Anwepiwin Kishemanitoo kaawii'miinaatc opimaatisiima'

⁷ O'o hsa Kishemanitoo otAhcaahkwan ekii'ihkitonitc: “Kiishpin noontawek Kishemanitoo noonkom kaakiishikaninik,

⁸ Keko shashiipihtankek taapishkoo kikehteya'aamiwaak kaakii'ishi‑⁠shashiipihtawaawaatc Kishemanitoon, I'i ehkiishikaninik weti pikwatahkamik ekiihkakwetenimaawaatc taka kekoon cikiihtootaakowaatc.”

⁹ O'o tahsh Kishemanitoo ihkito: “Mii hsa i'iweti kaakii'ishi kakwetenimiwaatc ekii'antakihkenimiwaatc kaye, Aana tahsh wiin niimitana tahsopipoon ekii'waapantamowaatc aaniin kaakiihpi‑ishihcikewak.

¹⁰ Miitahsh ninkii'maanaapamaak iki pemaatisiwaatc ekii'ihkitoyaan: ‘Mooshak hsa otinentamowiniwaan owaniwinikonaawaan, kaawiin kaye otootaahpinansiinaawaan kaanihtaa⁠ishihcikewak.’

¹¹ Ekii'maanaapamakwaa tahsh mii hsa kaa'ishiahshotamaan: ‘Kaawiin hsa wiihkaa tapiintikehsiiwak i'iweni ahkiini kekii'ishianwepiwaahpan kaawii'miinakwaapan.’ ”

¹² Niicitepwehtamook! Aahpici hsa ayaankwaamisik, kaatahshiyek awiya cimacinaakwahsininik ote' citepwehtamoomakahsininik kaye, keoncinakanekipan kaapimaatisitc Kishemanitoo.

¹³ Mekwaa hsa keyaapi ehtawinamaatinaaniwank, “Noonkom kaakiishikahk” kaaishinihkaatek, entahsokiishik hsa waawiici'itik ekaa ciwayeshimikoohsiwek i'imaa macitootamowinink, cishashiipihtansiwek kaye, kahkina kaatahsopeshikoyek.

¹⁴ Aaniihsh kiwiiciiwaanaan Christ, kiishpin ehta mashkawiminciminamank i'i kikehcinaa'owininaan nihtam kaakii'ayaayank, piinihsh weti ishkwaac kiishikahk.

¹⁵ Miitahsh o'o kaakii'ishipii'ikaatek Kihcimasina'ikan: “Kiishpin noontawek Kishemanitoo ehkanooninek noonkom kaakiishikaninik, Keko shashiipihtankek taapishkoo kikehteya'aamiwaak otaanaank kaakiihpimaatisiwaatc, kaakii'ishi‑⁠shashiipihtawaawaatc Kishemanitoon.”

¹⁶ Awenenak itahsh iki pemaatisiwaatc kaakii'noontawaawaatc Kishemanitoon, shaakooc itahsh ekiihshashiipihtawawaatc? Mii hsa i'i Moosihs (Moses) kaakiihsaakiciwinaatc i'imaa Iicipahkiink (Egypt).

¹⁷ Awenena' itahsh Kishemanitoo kaakii'nishki'ikotc niimitana tahsopipoon? I'i hsa pemaatisinitc kaakii'macitootaminitc, i'i piinihsh kaakii'anicaakinenitc i'imaa pikwatahkamik.

¹⁸ Awenena' hsa kaakii'ahshotamawaatc cipiintikehsinik otanwepiwinink? Miiwa' hsa i'i kaakiihshashiipihtaakotc.

¹⁹ Miitahsh eshiwaapantamank, aaniihsh ekiihtepwehtansikwaa, kaakii'onci pwaanawihtoowaatc cipiintikewaatc i'imaa ahkiink kaawii'ishi anwepi'intwaapan.