ᐄᐸᕒᐆᐗᒃ 2 - Ojibwe Kihcimasina'ikan

Keko aanawentankek o'o kaakihci‑inentaakwahk pimaaci'ikoowin!

¹ Mii hsa tahsh keoncimashkawi minciminamankipan ini kaakiihpinoontamank, ciwaniwinikohsiwank kotak kihkino'amaakewinan.

² I'i tipaacimowin kaakii'aanihke wiintamaakewaakopanen iki encalak kiihkihciwentaakwanini. Awenen hsa kaakiihpiikonank, oncita kaakiihpisintansik kaye, okii'otihsikon kakwaataki'ikoowin.

³ Aaniin itahsh kekiinawint keonci⁠shaapwiiyankipan kiishpin aanawentamank i'i kaamaawaci niikaanentaakwahk pimaaci'ikoowin? Aaniihsh wiin iko kaaTipenciketc okiihtipaatotaan o'o pimaaci'iwewin, iki hsa kaye kaakii'noontamowaatc, miiwak ikiweniwak kaanaakohtamawinankitwaa ehtepweyentaakwaninik.

⁴ Kishemanitoo hsa kaye okiihtakowiicihtamawaa' otipaacimowinini kihkinawaacihcikanan ekii'aapacihtootc, kaamaamahkaasinaakwaninikin kaye, kihci‑ishihcikewinan kaye, shikwa kaaishimiikiwenitc otAhcaahkwan kaakii'ishi maamaata'oohkiitc wiin iko otinentamowin e'aapacihtootc.

Eshinaakositc a'a kaaishiwininank i'imaa pimaaci'ikoowinink

⁵ I'i hsa kaatashintamaank oshkiahki ewiihpitakohshinoomakahk, kaawiin Kishemanitoo okii'ishipakitinaahsii' encala' citipentaminitc.

⁶ I'i hsa Kihcimasina'ikan ishipii'ikaate: “Kekoon ina inini inentaakosi, cinaanaakatawenimatipan? Aaniin itahsh enentaakositc awiya pemaatisitc cinaanaakaci'atipan?

⁷ Acina hsa ehta kikiihtapahsentaakosi'aa aaniin kaa‑ahpiihtentaakosinitc encala', Kikiihkikipihtaanohkwaane'aa kihci‑inentaakosiwin, kihtentaakosiwin kaye. [Kikii'ishi'aa kaye kahkina kekoonini citipentank kininciink kaakii'oncioshihtaawatc.]

⁸ Kikii'ishi'aa kaye kahkina kekoonini citipentank citahtahkohkaatank.” E'ishipii'ikaatek hsa Kishemanitoo ekii'miinaatc ininiwan citipentaminitc kahkina kekoonini, kaawiin kekoon okii'ishkonansiin ketipentansinik. Kaawiin itahsh mahshi kiwaapamaahsiwaanaan inini citipentank kahkina kekoonini.

⁹ A'a tahsh wiin kiwaapamaanaan Ciisahs kaakii'ishi'intc acina citapahsentaakositc ahpiihc wiin i'i encala', miitahsh Kishemanitoon okishewaatisiwininiink ekii'oncinipoohtamawaatc kahkina awiyan pemaatisinitc. Inashke tahsh noonkom kiwaapamaanaan ehkikaanohkwaanaatank kihci‑inentaakosiwin, kihtentaakosiwin kaye, aaniihsh wiin piko kiihkakwaatakihtoo ahpii kiiwii'nipoohtamaaketc.

¹⁰ Kishemanitoo hsa kahkina kekoonini kaaoshihtootc, kahkina kaye kekoonini kaakanawentank. Aahpici hsa kii'na'inaakwanini ci‑ishi'aatc Ciisahsoon okakwaatakihtoowininiink misiwe ci‑ishikiishinaakohcikaniwinitc, ewiihpiinaatc i'i kaapaahtiinonitc okosihsimaa' ciwiitoohkaasonitc okihci‑inentaakosiwinink. Miiwan itahsh ini Ciisahsoon kaakihkinowinaanitc keshipimaaci'imintc i'i okosihsimaa'.

¹¹ Wiin aaniihsh Ciisahs opehki'aa' pemaatisinitc omacitootamowininiink; a'a hsa kaa⁠pehki'iwetc iki kaye kaapehki'intwaa opeshiko'aawaan oTetewaan. Miitahsh Ciisahs kaaonciakacihsik ci‑ishinihkaanaatc o'o kaakiihpehki'aatc tipinawe niicihkiweyak.

¹² Aaniihsh o'o otinaan Kishemanitoon: “Ninkatashintamawaak hsa niicihkiweyak kiwiinsowin keoncikihkenimihkwaa aaniin nehtaa⁠ishihcikeyan, Eshimaawaci'itiwaatc hsa ninkaina'am kaaishi miikwehciwenimikooyan.”

¹³ O'owe hsa ekii'ani‑ihkitotc: “Kishemanitoo hsa ninkatepweyenimaa.” Miinawaa tahsh kii'ani‑ihkito: “Inashke tahsh niin, niwiiciiwimaa' nimpimaatisiima' Kishemanitoo kaakii'miishitc, taapishkoo niniicaanihsa' enentaakosinitc.”

¹⁴ O'o tahsh oniicaanihsimaa' e'ishi⁠owiiyawinitc, e'ishi⁠omiskwiiminitc kaye, miitahsh Ciisahs kewiin kaa'ishi⁠otaahpinank ci‑ishinaakositc taapishkoo kaaishi⁠naakosinitc pemaatisinitc. Miitahsh o'o kaakii'onci ishihciketc ekii'nipotc cionci nihshiwanaacihtamawaatc omashkawisiiwinini ini kaatipentaminitc kaashaakooci'iwemakaninik nipowin, amiiwan hsa ini maciaya'aan.

¹⁵ Miitahsh i'i kaakii'aapa'waatc i'i minihk kaapimaatisinitc kaakii'mincimahpinikonitc ekiihkohtaminitc nipowin.

¹⁶ Aahpici tahsh pehtentaakwanini: kaawiin tashintehsinini Kishemanitoo eshiwiici'aatc encala'; i'iweniwa' iitok Eparahaaman (Abraham) opiiwesiimini kaawiici'aatc.

¹⁷ Miitahsh i'i oncitako kii'ishinaakwanini ci‑ishinaakositc kaaishinaakosinitc misiwe i'i owiicipimaatisiimaakana'. Mii hsa tahsh kaaoncitinowitc kaakoohpaasinaaketc kaatepweyentaakositc kaye, Maawac ehKihcianami'ewikimaawitc i'imaa kaaishianohkiihtawaatc ini Kishemanitoon, cipoonentamawimintc ini pemaatisinitc omacitootamowinini.

¹⁸ Kewiin hsa ekiihkakwaatakihtootc kiihkakweci'intc, mii hsa kaaoncikashkihtootc cinaatamawaatc i'iweniwa' kaakoci'imintc.