ᐄᐸᕒᐆᐗᒃ 13 - Ojibwe Kihcimasina'ikan

Aaniin keshiminwaapaminank Kishemanitoo

¹ Kiinawaa tahsh keko wiihkaa poonihtoohkek i'i kaaishisaaki'ekwaa kaawiiciotepwehtamoomekwaa.

² Maamihkawihk kaye cipiintikanekwaa piiwitek i'imaa kitaawiniwaank. Aaninta hsa i'i kii'ishihcikewak, ekiihkihkentansikwaa tahsh encala' ehpiintikanaawaatc.

³ Maamihkawinotawihkwak itahsh iki kaakipa'ontwaa, ci‑inentamek taapishkoo e'wiiciiwekwaa. Maamihkawinotawihkwak kaye iki kaamaashitootawintwaa, taapishkoo kiinawaa piko 'i eshikakwaatakihseyek.

⁴ Wiitikentiwin tahsh maawac iko taakihci‑inencikate. Onaapemimaa, wiiwimaa kaye mii 'i eshinaakwaninik kwayahk tepwe citootaatiwaahpan. Kishemanitoo hsa wiin okatipa'amawaa' kaawiinaatisinitc i'i kaye awiya' kaapimenimaanitc pahkaan awiyan owiitikemaakanini.

⁵ Cisaaki'aahsiwek kaye shooniyaa ishipimaatisik, mii 'i teminihk inentamok kekoon kaa‑ayaayek. Aaniihsh Kishemanitoo kii'ihkito: “Kaawiin wiihkaa kikanakanihsinoon, kaawiin wiihkaa kikawepinihsinoon.”

⁶ Taka tahsh soonkite'etaa ci‑ihkitoyank: “KaaTipenciketc ohsha kaawiici'itc, Kaawiin tahsh ninkasekisihsii. Aaniin tahsh inini ketootawihpan?”

⁷ Maamihkawinotawihkwak itahsh iki kaakii'niikaaniihtamawinekwaa, iki kaakii'waawiintamawinekwaa Kishemanitoon otihkitowinini. Kanawaapantamowaahk itahsh kaye wekonen kaakii'onciinik aaniin kaakii'ishipimaatisiwaatc. Kaaishitepwehtamowaatc kaye kekiinawaa mii inahke ishitepwehtamok.

⁸ Ciisahs Christ hsa peshikwan ishiaawi, kaakiihtinowitc otaanaank, mii hsa peshikwan noonkom kaakiishikaninik, mii kaye peshikwan mooshak keishiaawitc.

⁹ Keko tahsh ishipakitinitisohkek ciwanihshimikoyek kaapepahkaanatinkin kihkino'ikewinan, kaamayakihtaakwahkin kaye. Onishihshinini awiya kaaontinank mashkawisiiwin i'imaa Kishemanitoon okishewaatisiwininiink, kaawiin wiin i'imaa onciimakahsinoon kaaishipiminisha'ikaatek kaainahtek aaniin awiya keinancikehpan. Iki hsa 'i nahke kaaishihcikewaatc kaawiin i'imaa onciwiici'aahsiiwak.

¹⁰ Kiinawint hsa kitayaamin kaaishipakitinaahsonk, iki tahsh wiin kaatashipamihtaakewaatc Coowi Anami'epakwaanekamikonk kaawiin wiinawaa ishinaakwahsinini cikiimiiciwaahpan i'i kaapakitinamowank.

¹¹ Nashke tahsh Maawac Coowi Kihcianami'ewikimaa okii'nihtaa piintikatoon aya'aawihshi miskwiini ekiihpakitinank i'imaa maawac iko kaaishikohtaanentaakwahk, omacitootamowinini onci. Iki tahsh wiin aya'aawihshak owiiyawiwaan saakicaya'ii inahke kaakii'ishikapehshink kii'ishicaakisikaateniwan.

¹² Miitahsh peshikwan Ciisahs kaakii'oncinipotc akwaciink inahke kihciootenaawishkwaantemink ewiihpehki'aatc pemaatisinitc omacitootamowininiink onci, wiin iko omiskwiim ekii'aapacihtootc.

¹³ Taka tahsh kekiinawint ishaawaataa saakicaya'ii kaaishikapehshink, kekiinawint pisaan citootaakoowank kaakii'menihshentaakwaninik kaakiihtootawintc.

¹⁴ Kaawiin iitok kiinawint ayaahsinoon nehpic kaa‑ayaak kihciootena o'omaa ahkiink, i'i hsa kaananaantawaapantamank kihciootena kaawiihpitakohshinoomakahk.

¹⁵ Taka tahsh kiinawint mooshak Ciisahsonk oncimiinaataa Kishemanitoo i'i kaaishimiikwehciwenimank, kitooninaanink hsa e'onci‑ihkitoyank, e'wiinank kaye ehtipeniminank.

¹⁶ Keko waniihkehkek ciminotootaakeyek ciwaawiitoohkaakeyek kaye, miitahsh ono tino ishihcikewinan Kishemanitoo pakitinaahsowinink kaaishinank kaaminwaapantank.

¹⁷ Na'ihtawihkwak hsa kaaniikaaniihtamawinekwaa, ishihcikewaahk kaye kaaininekwaa, aaniihsh kaawiin aahpici anwepihsiiwak e'naakacihtoowaatc kitahcaahkopimaatisiwiniwaan. Aaniihsh okatakwakintamaakowaan Kishemanitoon i'i kitishihcikewiniwaan. Kiishpin itahsh pisintawekwaa aahpici hsa taciihkanohkiiwak. Kiishpin itahsh shashiipihtawekwaa tamaanentamook, kaawiin itahsh i'i nahke kitaaonciminohsehsiim.

¹⁸ Keko tahsh pakiciihkek cianami'ehtamawiyaank. Wiinke kaye ninkehcinaa'omin awaac iko pankii kekoon kaawahsitaawinaakwahk e'ayaahsinok nimpimaatisiwininaanink, mooshak kwayahk e'antawentamaank kwayahk ci‑ishihcikeyaank.

¹⁹ Miitahsh i'i eshipakohseniminakook, weweni cikakwecimek Kishemanitoo miinawaa ci‑ishinisha'otc weti kaaishiayaayek.

Ishkwaac anami'ehtamaakewin

²⁰ Kishemanitoo ohsha okiihkiiwepimaatisii'aan kaaTipencikenitc Ciisahsoon kaakii'nihsimintc. Miiwan ini kaakihci‑inentaakosinitc ehkanawenimaanitc i'i omaanahcaanihshimini, aaniihsh Ciisahsoon okiihpakitinamini omiskwiimini, kaaonciaayiicihsininik i'i Kishemanitoo kaakii'ishi nehpici ahshotamaaketc. Taka Kishemanitoo kaamiininank pisaan cipimaatisiwank,

²¹ kikaontinamaakowaa kahkina kaaonishihshininikin kekoonan citootamowek otinentamowin. Taka kaye Ciisahs Christink kikaonci‑ishi'ikonaan citootamowank aaniin eshiminwaapantank. Taka Christ takihci‑inentaakosi mooshak iko ahpane. Emen.

Ishkwaac kaaishipooshoo'iwetc

²² Niiciotepwehtamook! Kipakohsenimininim itahsh cishashiipentamek cipisintamek o'o kaaishikanooninakook cimashkawentamek. Aaniihsh nintahkoohsitoon o'o kaa'oshipii'amawinakook.

²³ Kinantawenimininim itahsh cikihkentamek, kiitanami'aanaan Timahti (Timothy) ekiihsaaka'ank i'imaa kipa'otiiwikamikonk. Kiishpin itahsh wiipa piishaatc ninkapiwiiciiwaa ahpii antawaapaminakook.

²⁴ Nimpooshoo'aak itahsh kahkina kaaniikaaniihtamawinekwaa, kahkina kaye Kishemanitoo kaatipenimaatc opimaatisiima'. Kiitanami'aanaanik kaye o'omaa Itali (Italy) ahkiink kipooshoo'ikowaa.

²⁵ Taka Kishemanitoo okishewaatisiwin kikawiiciiwikom mooshak kaatahshiyek. Mii 'iwe.