ᐄᐸᕒᐆᐗᒃ 11 - Ojibwe Kihcimasina'ikan

Tepweyentamowin ehtashintek

¹ Inashke tahsh, kaaotepweyentamowiniyank kitoncikehcinaa'omin ini kekoonan kaa‑ahpenimonotamank tepwe e'ayaakin, kitooncikihkentaamin kaye kehcinaac e'ayaakin kekoonan kaawaapancikaatehsinokin.

² Otepweyentamowiniwaank iitok mewisha ininiwak kaakiihpimaatisiwaatc okii'onciminwaapamikowaan Kishemanitoon.

³ Tepweyentamowinink hsa nintooncinihsitohtaamin kahkina kekoonan kiishikonk kaa‑ayaakin ahkiink kaye ekii'oncioshihcikaatekin i'imaa Kishemanitoo otihkitowinink. Ini tahsh kaanaakwahkin kii'oncioshihcikaatewan i'imaa kekoonink kaanaakwahsinokin.

⁴ Tepweyentamowinink hsa Epal (Abel) kaakii'oncipakitinamawaakopanen Kishemanitoon nawac kaakii'onishihshininik pakitinaahsowin ahpiihc wiin iniweniwan Kenan (Cain). Mii hsa tahsh i'i kaakii'onciminwaapamikokopanen Kishemanitoon ekii'inakimikotc okwayahkwaatis, aaniihsh okii'minwaapantamini omiikiwewin. Aana tahsh wiin noonkom ehpimaatisihsik mii 'iwe eshinaakwaninik otepweyentamowinink keyaapi e'oncikaakiikitotc.

⁵ Iinohk (Enoch) itahsh otepweyentamowinink kaakii'onci ishiwinintc ishpimink, kaakii'onci otihsaapantansikopanen cinipotc. Kishemanitoon hsa okii'mihci otaahpinikoon, miitahsh awiya' kaakii'oncimihkaakohsik. Kihcimasina'ikan hsa ishipii'ikaate: “Aahpici Iinaahk okii'minwaapamikoon Kishemanitoon cipwaa maaciinikotc.”

⁶ Kaawiin itahsh awiya otaaminwaapamikohsiin Kishemanitoon kiishpin ayaahsik tepweyentamowin. Awiya hsa kaapinaasihkawaatc Kishemanitoon mii 'i eshinaakwaninik citepweyenimaatc e'ayaanitc, ehtipa'amawaanitc kaye weweni kaa‑antone'okonitc.

⁷ Noowa (Noah) ohsha otepweyentamowinink kaakii'oncinoontawaakopanen Kishemanitoon niiyaak ekii'wiintamaakotc aaniin waa'ani‑ishiwepaninik, aanawiin ekii'waapantansik, okii'na'ihtawaan ehkohtaanenimaatc Kishemanitoon. Miitahsh kaakii'oshihtootc kihcimihtikociimaan aanti keoncipimaatisitc, i'i kaye kahkina kaatahshitc otaawinink. Miitahsh otepwehtamowinink kaakii'ishinaakohtamawaatc kotak pemaatisinitc sesik ekii'ishipimaatisihsinik, kaakii'oncitepinank kaye kwayahkwaatisiwin tepweyentamowinink kaaonciinik.

⁸ Eparahaam (Abraham) hsa otepweyentamowinink kaakii'oncina'ihtawaakopanen Kishemanitoon kiikanoonikotc pahkaan ahkiink ci‑ishaatc, ekii'ahshotamaakotc ahkiini ewii'miinikotc ciayaatc. Okii'nakataan itahsh otahkiim ekiihkihkentansik aanti eshaatc.

⁹ Ekiihtepwehtank itahsh kaakii'onci ayishitaatc i'imaa ahkiink Kishemanitoon kaakii'ishi ahshotamaakotc, ekiihtashipiiwitewitc i'imaa ahkiink, pakwaanekamikonk ekii'ishitaatc. Miitahsh peshikwan Aaisik (Isaac), Cekap (Jacob) kaye kaa'ishihcikewaatc, kewiinawaa peshikwan ekiihtepinamowaatc otahshotamaakoowinini.

¹⁰ Eparahaam aaniihsh okiihpiihtoon i'i kaaonaapihkihsicikaatenik kihciootenaani kenehpiciayaanik, Kishemanitoon kaakii'onentaminitc aaniin keishinaakwaninik, kaakii'oshihtoonitc kaye.

¹¹ Otepweyentamowinink itahsh kaakii'onciotetemaawitc aanawiin ekii'ahkiwensiiwitc, wiiwan itahsh kaye Serawan (Sarah) ekiihkashkihtoohsinik ciotapinoonciishiminitc, ekiihkehcinaa'aatc Kishemanitoon cikanawentaminitc kaakii'ishiahshotamaakenitc.

¹² Inashke tahsh a'a peshik inini Eparahaam aasha paahkac kii'inentaakwaninikopan ciotetemaawihsik, mii hsa i'imaa takwac niipiwa' pemaatisinitc kaaonciinitc, ekii'ahpiihci paahtiinonitc taapishkoo kaatahshinitc wanankohsha' weti kiishikonk, ekiihtahshinitc kaye citepakimimaahsiwintc taapishkoo kaa‑ahpiihci paahtiinwewaawankaak i'i newank i'imaa kaaishi nanaanewaawankaak kihcikamiink.

¹³ Iki tahsh kahkina kaakiihtepweyentamowaatc aasha kii'nipowak, ekiihtepinansikwaa kaakii'ahshotamawintwaapan, shaakooc itahsh niiyaak okii'mihcitepaapantaanaawaan ini kaakii'ishiahshotamawintwaa, waahsa kaye okii'onsaapantaanaawaan, okii'otaahpinaanaawaan itahsh kaye, ekii'ihkitowaatc ekiihpiiwitewiwaatc, e'oncitipentaakosihsikwaa aanawiin ekii'ishitaawaatc o'omaa ahkiink.

¹⁴ Iki tahsh i'i kaaihkitowaatc, mii 'imaa eshinaakwaninik e'nanaantawaapantamowaatc ahkiini wiinawaa piko ewiihtipinawewisiwaatc.

¹⁵ Kaawiin tahsh kaye mooshak okii'naanaakatawentansiinaawaa i'i ahkiini kaakiihpioncimaacaawaatc, aaniihsh kiishpin i'i ishihcikewaahpan, taakii'ishihseni iitok cikiihkiiwewaahpan.

¹⁶ I'iweni tahsh nawac kaaonishihshininik ahkiini okii'antawentaanaawaa. Kihcikiishikowi ahkiini okii'antawentaanaawaa. Miitahsh i'i Kishemanitoo kaaonciakacihsik, “Ninkishemanitoom” ci‑ishinihkaanikotc, aaniihsh okiihkwayaancihtamawaa' kihciootenaani keishiayaanitc.

¹⁷ Eparahaam itahsh otepwehtamowinink kaakii'oncina'ihtawaatc Kishemanitoon ahpii kii'antakihkenimikotc, kiikanoonikotc cipakitinaatc ini okosihsan Aaisikoon ci‑inwaanaatc pakitinaahsowinink. Wiin iitok kaakii'ahshotamaakotc Kishemanitoon, shaakooc itahsh kii'inentam ekiiwiihpakitinaatc okosihsan kaakii'mihcipeshikonitc.

¹⁸ Kishemanitoon hsa okii'ikopaniin: “Iki hsa kaakii'ahshotamawinaan keopiiwesiimiyan, Aaisikonk taonciiwak.”

¹⁹ Eparahaam itahsh okiihkihkenimaan Kishemanitoon cikashki'aanitc cikiiwepimaatisi'aanitc Aaisikoon kii'ishkwaaniponitc. Inashke tahsh tepwe Eparahaam okii'ishinawaan Aaisikoon taapishkoo ekiiniponitc, ekiihkiiwemiinintc itahsh kaye kii'ishkwaa kiiwepimaatisi'imintc.

²⁰ Aaisik itahsh ekiihtepweyentank kaakii'onci niikaani shawenimaatc cianiminohsenitc Cekapoon, Iihswaan (Esau) kaye, ekiitashintamawaatc aaniin niiyaak keni‑ishihsenitc.

²¹ Cekap itahsh ekiihtepweyentank aasha piko kekaa ewii'nipotc kaakii'onci shawenimaatc cianiminohsenitc Coosapoon (Joseph) okosihsini. Ekii'aahpataahkwiitc itahsh osahka'onaahkonk, ekii'anami'ehtawaatc Kishemanitoon.

²² Coosap itahsh otepweyentamowinink, aasha kekaa ewii'aninipotc, niiyaak okiihtashintaan Isriyala' (Israel) cinakataminitc Iicipahkiini (Egypt). Miitahsh i'i kaakii'wiintank aaniin mayaa ketoocikaatenikin ohkanan.

²³ Moosihs (Moses) itahsh oniiki'ikoo' ekiihtepweyentaminitc kaakii'oncikaanikotc nihsokiisihs (3) minihk kii'ishkwaa nihtaawikitc. Aaniihsh okii'waapamikoo' ekii'minonaakositc. Kaawiin kaye kiihkohtaacihsiiwa' ekii'ishihcikehsinik kihciokimaan kaakii'inaahkonikenitc.

²⁴ Moosihs itahsh otepweyentamowinink ahpii kiikiishaapewitc, kaakii'onci‑inentansik ci‑icikaniwitc Peroo (Pharaoh) otaanihsan hsa ini okosihsan.

²⁵ Awahshime tahsh kii'inentam ewii'wiicikakwaatakihtoomaatc i'i wiicipimaatisii' Kishemanitoon kaakiihtipenimaanitc, ahpiihc wiin ciciihkentankipan acina kaaishiminwentaakwaninik macitootamowinini.

²⁶ Miitahsh kaa'inakintank nawac e'onishihshininik ci‑ishimacitashimintc ini Kishemanitoon KaaOnenimaanitc keishimacitashimimintc, ahpiihc wiin kekii'ishiwenootisihpan Iicipahkiink. Aaniihsh okii'ahshawaapantaan niikaanaya'ii kemiinintc tipa'amaakoowin.

²⁷ Moosihs itahsh ekiihtepweyentank kaakii'oncinakatank Iicip ekiihsekisihsik, aanawiin kihciokimaan ekii'nishkaatisinitc. Kaawiin kii'inentansii cikiiwetc, aaniihsh okii'waapamaan kaanaakosihsinik Kishemanitoon.

²⁸ Otepweyentamowinink itahsh kaakii'oncioshihtootc ci‑ishihcikenaaniwaninik i'i Pimaaci'ikoowi Wiihkwantiwin, i'i kaye kaakii'anoohkiitc miskwiini ciahcikaatenik ishkwaantemaahtikohkaank. Miitahsh kaakii'onci‑ishihcikewaatc ini hsa Kaanihshiwenitc Encalan cinihsaahsinik i'i kaasasiihkisinitc kwiiwisenhsa' i'imaa Isriyalihkaank.

²⁹ Otepweyentamowiniwaank itahsh Isriyalak kaakii'oncikashkihtoowaatc e'aashawishkaawaatc i'imaa KihciMiskokamiink (Red Sea), ekiihpaankwahkamikaanik kaakii'ishipimohsewaatc. Iicipiiwi (Egyptian) shimaakanihshak itahsh ekiihkakwekashkihtoowaatc kewiinawaa, kahkina hsa mii 'imaa kaa'ishinihsaapaawewaatc.

³⁰ Otepweyentamowiniwaank itahsh i'i kihciootenaani Cerahko (Jericho) kaakii'ishi waahkaayaapihkinikaatenik kaakii'onciniihsihsenik ahpii Isriyalak kii'ishkwaa kishipaashkaawaatc niishwaahso (7) kiishik.

³¹ Orehaap (Rahab) kaakiihpihshikwaacihkwewitc, ekiihtepweyentank kaakii'oncinihsaahsiwintc ahpii kiinihshiwanaacihcikaniwinitc i'i kaakiihshashiipihtawaanitc Kishemanitoon. Aaniihsh weweni pisaan okiihpiintikanaa' ininiwa' kaakii'niikaani ayinaapinitc, Isriyalihkaank kaakii'onciinitc.

³² Keyaapi na tahsh ninkawaawiinaak awiyak? Kaawiin itahsh nintepihsehsii citashimakwaapan Kiitiyan (Gideon), Perahk (Barak), Saamihsan (Samson), Cepihta (Jephthah), Tepit (David), Saamiyoo (Samuel), iki kaye kaakiihkanoocikehtamawaawaatc Kishemanitoon.

³³ Otepweyentamowiniwaank itahsh ahpii kiimiikaasowaatc kaakii'oncishaakoocihtoowaatc ininiiwi okimaawiwinan. Okii'onahtoonaawaa kwayahk ci‑ishihcikenaaniwaninik. Okiihtepinaanaawaa kaye Kishemanitoon otahshotamaakewinini. Okiihkipa'amawaawaa' kaye mihshipishiwa' otoonini.

³⁴ Okii'aahtaweshkaanaawaan kaye kaakiihkishahkwanenikin ishkoten, ekii'maaciipa'iwaatamowaatc kaye pashipa'ikewihkomaanan. Ekii'ishi'intwaa kaye cimashkawentaakosiwaatc aanawiin ekii'macentaakosiwaatc; ekiihsoonkentaakosiwaatc kaye kiimiikaasowaatc; ekii'maaciiyaama'waawaatc kaye kaakii'mayakisinitc shimaakanihsha'.

³⁵ Otepweyentamowiniwaank itahsh kaye ihkwewak kaakii'onci kiiwe waapamaawaatc otinawemaakaniwaa' kaakii'niponihpan ekiihkiiwepimaatisi'imintc. Aaninta tahsh kaye kiihkakwaatakihcikaniwiwak ekii'antawentansikwaa cipakitinintwaa, aaniihsh okii'antawentaanaawaa cikiiwepimaatisi'intwaa ciayaawaatc nawac kaawii'onishihshininik pimaatisiwin.

³⁶ Aaninta tahsh kii'ishikakwaataki'aawak ekiihpaahpinotawintwaa, ekiihpahpahshanshe'ontwaa kaye. Kotak kaye piiwaapihkweyaapiini kii'aapatanini ekii'mamaancikwahpinintwaa, ekiihkipa'ontwaa kaye.

³⁷ Aaninta tahsh kiihpapiimwahsina'aawak, kotak kiihtaashkipoocikaniwiwak, aaninta kaye kihcimoohkomaanini kii'aapatanini ekii'nihsintwaa. Misiwe tahsh kiihpapaamiayaawak maanahcaanihshiwayaana', maanatihkowayaana' ekii'okikishkikaniwaatc, ekiihkitimaakisiwaatc, ekiihkakwaataki'intwaa, noociko kaye ekiihtootawintwaa.

³⁸ Aaniihsh kaawiin ahkiini kiihteahpiihtentaakwahsinini o'omaa cikii'ayaawaahpan. Pakwatahkamik hsa kiihtashipapaamipa'iwewak, kaaishipapiihkwatinaanik kaye kii'ahpa'iwewak. Kaaishiwawiimpaapihkaanik, kaaishipapakonehkamikaanik kaye ekii'ayishitaawaatc.

³⁹ Okoweniwak itahsh aahpici kiihkihciminwaapancikaniwiwak otepweyentamowiniwaank onci. Shaakooc itahsh kaawiin okiihtepinansiinaawaa i'i Kishemanitoon kaakii'ahshotamaakenitc.

⁴⁰ Kishemanitoo tahsh kii'inentam ewii'oshihtamawinank nawac kekoonini kaaonishihshininik. Aaniihsh kii'inentam paanimaa ko wiiciiwimank ewiihkiishinaakosi'aatc.