ᐄᐸᕒᐆᐗᒃ 10 - Ojibwe Kihcimasina'ikan

¹ I'i hsa Coowiwi Onahshowewin mii 'i eshinaakwahk, taapishkoo kekoon kaa‑aakawaahtehsink ekiihkakwe naapinaakwahk kaawii'ishinaakwahkin ini kaaonishihshinkin kekoonan kaawiihpi takohshinoomakahkin. Aaniihsh Onahshowewin kaawiin mayaa aawansinoon kaawiihpi takohshinoomakahk. Ini tahsh peshikwan pakitinaahsowinan pakitinikaatewan entahsokihkinoonowin. Ini tahsh pakitinaahsowinan mooshak ehpakitinikaatekin kaawiin tepwe oncikiishinaakosihsiiwak iki pehsho kaapinaasihkawaawaatc Kishemanitoon.

² Kiishpin tahsh tepwe iki pemaatisiwaatc kaakii'anami'ehtawaawaatc Kishemanitoon kiihpehki'aawintwaapan omacitootamowiniwaank onci, kaawiin iitok otaakimikoshkaatentamo'ikohsiinaawaan omacitootamowiniwaan. Kahkina tahsh pakitinaahsowinan taakiihpoonihsewan.

³ Ini tahsh kaaishi pakitinaahsonaaniwaninik entahsokihkinoonowin, mii hsa i'imaa aanciko pemaatisiwaatc kaaishi kiiwe maamihkawiwaatc omacitootamowiniwaan.

⁴ Iki tahsh aape pishihkiinhsak, maanatihkwak kaye omihskwiimiwaan kaawiin wiihkaa i'imaa macitootamowinan taaonci otaahpinikaatehsinoonan.

⁵ Inashke tahsh wiin ahpii Christ kiiwiihpitakohshink o'omaa ahkiink, o'o hsa okii'inaan Kishemanitoon: “Kaawiin hsa kinantawentansiinan ini pakitinaahsowinan ini kaye pakitinikewinan. Kikiihkwayaancihtamawihsh itahsh wiiyaw.

⁶ Kaawiin kaye kiminwaapamaahsiik aya'aawihshak kiimisiwecaakisontwaa i'imaa kaashipakitinaahsonk, Kaawiin kaye kiminwaapantansiinan ini pakitinaahsowinan kaapakitinikaatekin cionciotaapinikaatekin macitootamowinan.

⁷ Miitahsh o'o kaa'ihkitooyaan: ‘Inashke tahsh niin nintakohshin, Ewiihtootaman kaaishimihsawentaman, Kishemanitoo, Aaniihsh mii'i eshipii'ikaatek i'i Onashowewimasina'ikanink kaaishitashinsoyaan.’ ”

⁸ O'owe tahsh kii'ihkito: “Kaawiin kinantawentansiinan, kaawiin kaye kiminwaapantansiinan ini pakitinaahsowinan, miikiwewinan kaye. Kaawiin kaye kiminwaapamaahsiik kaamisiwecaakisontwaa aya'aawihshak i'imaa kaaishipakitinaahsonk, ini kaye pakitinaahsowinan kaapakitinikaatekin cionciotaahpinikaatekin macitootamowinan.” Shaakooc itahsh o'o kii'ihkito aanawiin ini pakitinaahsowinan ekiihtoocikaatekin aaniin ehkitoomakahk i'i Onahshowewin.

⁹ Miinawaa tahsh kii'ihkito: “Inashke tahsh niin nintakohshin, ewiihtootamaan kaaishimihsawentaman.” Kishemanitoo tahsh okii'wepentaanan ini kehtepakitinaahsowinan. I'iweni tahsh Christan kaakiihpakitinaahsonitc, mii hsa i'iweni kaaotaahpinank.

¹⁰ Ciisahs Christ tahsh ekii'ishihciketc aaniin kaakii'ishiantawentaminitc Kishemanitoon, mii hsa kiinawint kaaoncipehki'ikooyank macitootamowinink onci cinaasihkawimank Kishemanitoon. Aaniihsh okiihpakitinaan aapitink owiiyaw, mii 'i kahkina kekoonini wiinke kiihtekashkihtootc.

¹¹ Miitahsh Coowi anami'ewikimaa niipawi eshianami'ewanohkiitc entahsokiishik ehpakitinank ini peshikwan pakitinaahsowinan. Kaawiin tahsh i'imaa wiihkaa inahke onciotaahpinikaatehsinoonan macitootamowinan.

¹² Christ itahsh wiin aapitink ehta kiihpakitinaahso omacitootamowinini pemaatisinitc onci, wiin iko ekiihpakitinank opimaatisiwin; kaawiin itahsh wiihkaa taaishkwaahsehsinini i'i kaakii'ishihciketc. Miitahsh kaa'ishionapitc okihcinihkiniink inahke Kishemanitoon.

¹³ Miitahsh weti entashipii'aatc Kishemanitoon, cipatapinaanitc i'i kaashiinkenimikotc taapishkoo otahpisitepiwinink ci‑ishinaakosinitc.

¹⁴ Aapitink itahsh ekiihpakitinaahsotc, mii hsa i'imaa kaaonci nehpici kiishinaakosi'imintc i'i kaapehki'imintc omacitootamowininiink onci.

¹⁵ Kishemanitoo tahsh kaye otAhcaahkwan kinaakohtamaakonaan ehtepwewaninik. Aaniihsh o'o nihtam kii'ihkitowan:

¹⁶ “Ninkotink itahsh kiishikaninik, ihkito kaaTipenciketc, Ninkaoshihtamawaak ihsa i'i ahshotamaatiwinini. Ninka‑ahtaawaanan nintoonahshowewinan i'imaa ote'iwaank, Ninkaoshipii'amowaanan kaye i'imaa otinentamowiniwaank.”

¹⁷ Miitahsh o'o eni‑ihkitonitc: “Ninka⁠nehpici waniihkenotamowaanan hsa omacitootamowiniwaan, ini kaye noociko otishihcikewiniwaan.”

¹⁸ Ono tahsh aasha ekiihpoonencikaatekin, kaawiin miinawaa memwehc pakitinaahsowinan ta‑aapatahsinoonan.

Taka kaawiin wiihkaa tapakiciinaaniwansinoon

¹⁹ Niiciotepwehtamook, kekiinawint itahsh kitayaamin kehcinaa'owin keoncipiintikeyank maawac iko kaaishikohtaanentaakwahk piintik i'imaa Kishemanitoo kaaishianami'ehtawintc; aaniihsh Ciisahs omiskwi kii'miikiwe.

²⁰ Kikiihpaahkintenamaakonaan itahsh oshki‑ishaawin, kikii'miinikonaan kaye oshkipimaatisiwin. Christ itahsh owiiyawink kikaoncikashki'owaamin cipiintikewank i'imaa awahsinahke kipiika'ikanink kaakiihkipakootenik.

²¹ Kitayaawaanaan aaniihsh ehkihci‑inentaakositc Anami'ewikimaa kenawaapantank Kishemanitoon owaahkaa'ikanini.

²² Ehkehcinaa'oyank itahsh kite'inaanink, kehcinaac kaye ehtepweyentamank, taka pehsho naasihkawaataa Kishemanitoo. Aaniihsh kaaoncinaanaakatawentamank kiihpehkaapaawacikaatewan wiihkaa miinawaa cinaanaakatawentansiwank kaakiihpi ishi macitootamank. Kiwiiyawinaanin kaye kiihpehkaapaawacikaatewan pehkinipi e'aapatahk.

²³ Taka tahsh aayiiciminciminantaa i'i kaawiintamank kitahpenimowininaan, aaniihsh kitepwehtawaanaan Kishemanitoo citootank otahshotamaakewin.

²⁴ Taka tahsh naanaakatawentantaa aaniin keshiwaawiici'itiyank cisaaki'itiyank, ciminotootaatiyank kaye.

²⁵ Taka kaye kaawiin kiinawint kikapakiciihsiimin ci‑ishaayank kaaishiayoohkwapiyank kaa‑anami'aayank. Aaniihsh aaninta o'o ishihcikewak. Taka tahsh maano kakwewiici'ititaa entahsopeshikoyank, aaniihsh aasha kekaa ocihcihseni ninkotink kiishikaninik kaaTipenciketc citakohshink.

²⁶ Kiishpin itahsh kakaancihc animacitootamank ekii'ishkwaakihkentamank i'i tepwewin, kaawiin miinawaa awahshime ayaahsinoon pakitinaahsowin keoncipoonencikaatekipan i'i macitootamowin.

²⁷ Miitahsh ehta ko eshinaakwahk cikohtaanentamankipan i'i kaawiihpitakohshinoomakahk tipaahkonikewin, i'i kaye kaa‑aahkwahkwanek ishkote kenihshiwanaaci'ikowaatc iki kaashashiipihtawaawaatc Kishemanitoon.

²⁸ Awiya kiishashiipihtank Moosihs (Moses) otOonahshowewin mewisha, miitahsh o'o kaahtoocikaniwitc: kiishpin niishin (2), komaa kaye nihsin (3) awiyak kiitipaacimikotc, mii hsa shemaak iko kaa'ishinihsintc. Kaawiin wiin awiya kii'manaacihcikaniwihsii.

²⁹ Awiya tahsh wiin kaa‑aanawenimaatc Kishemanitoon oKosihsini, awiya kaye kaa‑aanawentank i'i miskwiini Kishemanitoon kaakii'ishionahtamaakenitc ahshotamaatiwin, mii iitok i'imaa kaakii'oncipehki'intc, aanciko tahsh kaye ehpaahpinotawaatc ini kaakishewaatisinitc Kishemanitoon otAhcaahkoni – kaawiin ina kitinentansiim aahpici awahshime cikihcikakwaataki'intipan?

³⁰ Kikihkenimaanaan tahsh a'a kaakii'ihkitotc: “Niin hsa ishinaakwan cinanaahkonamaakeyaan, niin kaye ninkakiiwetipa'ike.” Miinawaa tahsh kii'ani‑ihkito: “KaaTipenciketc hsa okatipaahkonaa' kaatipenimaatc opimaatisiima'.”

³¹ Aahpici ohsha takihcikohtaanentaakwanini awiya tepinikotc kaapimaatisinitc Kishemanitoon.

³² Maamihkawik itahsh otaanaank kaakiihpi‑ishihseyek ahpii kii'ishkwaa kihkentamek kaawaahseyaak, aahpici hsa kikiihshashiipentaam ini kakwaatakihtoowinan, kaawiin kaye kikiihshaakooci'ikoowisihsiim.

³³ Ninkotink kaye ekiiwaapamikooyek mohshe ekiihtashi miihkinsomikooyek, noociko kaye ekiihtootaakooyek, ninkotink kaye ekiihkiishentamek ewii'wiici kakwaatakihtoomekwaa iki noociko kaakiihtootawintwaa.

³⁴ Kikii'wiici kakwaatakihtoomaawaak kaye iki tahkonikanak kaaishikakwaatakihtoowaatc. Ahpii kaye kiimahkamikooyek kitayi'iimiwaan, aanciko kikiihciihkentaam, aaniihsh kikiihkihkentaam keyaapi e'ayaayek nawac kaaonishihshik wiihkaa kepooniayaahsinok.

³⁵ O'o tahsh ehpi⁠ayishihseyek, keko tahsh wepinankek i'i kaaishikehcinaa'oyek, aaniihsh mii 'imaa keontinamek i'i kihcitipa'amaakoowin.

³⁶ Ishinaakwan ohsha cishashiipentamek citootamowek Kishemanitoo kaaishimihsawentank, citepinamowek kaye i'i kaakii'ahshotamaaketc.

³⁷ Aaniihsh Kihcimasina'ikan ishipii'ikaate: “Aahpici hsa wiipa tatakohshin a'a kaawiihtakohshink, Kaawiin tapwaahtawiihsii.

³⁸ A'a hsa ninkwayahkwaatisiim otepwehtamowinink taishipimaatisi. Kiishpin tahsh awiya noonteashekiiwetc, kaawiin ninkaminwaapamaahsii.”

³⁹ Kiinawint itahsh kaawiin kitinowihsiimin kaanoontekiiwewaatc kenihshiwanaatisiwaatc. Iki ohsha kitinowimin otepwehtamowiniwaank keoncipimaaci'intwaa.