Haapakahk 1 - Ojibwe Kihcimasina'ikan

¹ Mii hsa o'oweni tipaacimowin Haapakahk (Habakkuk) okanootamaake kaakii waapanta'ikotc kaaTipencikenitc.

Haapakahk Kii'oncimamayehciwi kaakiikito Weweni E'inaahkonikenaaniwansininik

² Kiin Tepencikeyan, aaniin itahsh minihk ke⁠kanooninaan cipwaa noontawiyan, cipwaa naatamawiyaank o'o kaashi macitootaakoyaank?

³ Wekonen itahsh wenci pakitiniyan ci⁠kanawaapantamaan sesik e⁠inaahkonikenaaniwansinok? Wekonen itahsh wenci papaapisiskentansiwan wanitootamowin? Nihshiwanaacihcikewin iitok, ompwehkamikisiwin kaye misiwe ayaamakan waahkaaya'ii; misiwe e⁠miikaatinaaniwank, e⁠kiihkaantinaaniwank.

⁴ I'i hsa inaahkonikewin kekii ishi anohkiimakahkipan kaawiin ishihsehsinoon, kaawiin kekoon ci⁠ahpiihtentaakwahk. Miihsh meci'ishiwepisiwaatc kaa⁠onci shaakootaahkonaawaatc kwayahk kaa⁠ishi pimaatisinitc, e⁠nihpaacisitoowaatc kwayahk inaahkonikewin. Noociko e⁠inwaatek inaahkonikewin.

KaaTipencikenitc Kaakii'ishinahkwehtaakotc Haapakahk

⁵ Miitahsh kaaTipenciketc kaa'inaatc opimaatisiima', “Inashke kanawaapamihkwak entahswewaanakisiwaatc pemaatisiwaatc waahkaaya'ii eyaawaatc, wiinke tahsh kika maamahkaasaapihshinim. Kekoon ohsha niwii ishihcike mekwaa kaa⁠pimaatisiyek ke⁠tepwehtansiwek mihsawaa ko aana wiintamaakooyek.

⁶ Niwii ishi'aak hsa Paapilan (Babylon) wenciiwaatc ci⁠okimaahkantaakewaatc, kekwaanihsakisiwaatc, menaaci'iwehsikwaa kaye. Miiwak hsa iki misiwe ahkiink ke⁠pimi ayaawaatc ci⁠mahkantwewaatc ahkiin tepentansikwaa.

⁷ Wiinke hsa kohtaanentaakosiwak eh⁠kakwaanihsakentaakosiwaatc; wiinawaa mii ehta ko otinaahkonikewiniwaan kaa⁠piminisha'amowaatc kaa⁠onci kihci inenintisowaatc.”

⁸ “Omihtatimoomiwaa' hsa nawac kishiipa'itiwa' ahpiihc wiin kihci pooshiinhsa', nawac e⁠aahkwentaakosinitc ahpiihc wiin ma'iinkana' kiini onaakohshininik. Oshimaakanihshiimiwaa' pemiwanepa'ikonitc hsa waahsa pimi onciiwa' eh⁠piishaanitc, e⁠inentaakosinitc taapishkoo mihtaskihtikwaanaankehsiwa' kaa⁠moohkiihcikenitc ewii amowenitc.”

⁹ “Kahkina hsa piishaawak ewii ompwehkamikisiwaatc, miihsh kahkina awiya' eshi sekisinitc eh⁠pinaakosiwaatc. Kaa⁠kaahcitinaawaatc hsa mihtaawankonk ahpiihci paahtiinowa'.

¹⁰ Miihsh eshihcikewaatc e⁠miihkinsomaawaatc kihciokimaa', e⁠paahpinotawaawaatc kaye tepenimiwenitc. Kaawiin kanake ahpa'iwewikamikoon ci⁠akaawaatamowaatc. Opihkohsitoonaawaa hsa ahkamikoni aahsamaya'ii ahpa'iwewikamikonk, miihsh eshi kaahcicihtoowaatc.

¹¹ Nootinonk hsa inentaakosiwak eh⁠pimi ayaawaatc, miihsh kaawiin ci'ani kihkentaakosiwaatc. Wiinawaa iitok ta⁠tepimaawak e⁠mamaashiiwaatc, wiinawaa ko omashkawisiiwiniwaan e⁠omanitoomiwaatc.”

Miinawaa Haapakahk Kiimamayehciwikanoonaatc KaaTipencikenitc

¹² Kiin Tepencikeyan ninKishemanitoom, kiin kaa⁠kihci inentaakosiyan, weti iitok nehpici otaanaank kipionci ayaa! Kaawiin hsa ninka nipohsiimin. Kiin iitok kaakii onaapamatwaa ci⁠onaahkoniyamintwaa! Kiin Ahsin kaa⁠naatamaakeyan, kiin kikii inakimaak ci⁠nana'ahsimiyamintwaa.

¹³ Kishkiinshikoon hsa onsaam pehkentaakwanoon ci⁠kanawaapantamampan macikekoon; kaawiin ci⁠shashiipinawe'ikoyampan mamaashiiwin. Wekonen itahsh wenci shashiipinawe'ikoyan eshi kakayeshihcikewaatc? Wekonen itahsh wenci noontaatihsiwan eh⁠tashi nihshiwanaaci'aawaatc nawac kwayahk eshi pimaatisinitc ahpiihc wiinawaa enaatisiwaatc?

¹⁴ Miitahsh enentaakwahk inini ekii ishi'atc taapishkoo kiikooyink kihcikamiink eyaanitc, taapishkoo amiskosiinsak kaa‑ayaawaahsikwaa ke⁠kihkinowinikowaatc.

¹⁵ Miitahsh Paapilan kaa⁠onciiwaatc eshi kwaashkwepinaawaatc pemaatisinitc taapishkoo kiikooya', kaye owiimpahsapiiwaa' e⁠onci kaahcitinaawaatc, miihsh eshi maaciitaapaanaawaatc, eh⁠shaakowewaatc ehpiihci minwentamowaatc.

¹⁶ Miihsh eshi pakitinaahsoohtamawaawaatc otahsapiiwaa', e⁠minaahsamawaawaatc kaye, aaniihsh otahsapiimiwaank onci kashkihtamaasowak ci⁠wenootisiwaatc kekoonan.

¹⁷ Mii na tahsh mooshak ke⁠inaapaci'aawaatc otahsapiimiwaa' ci⁠caaki'aawaatc entahswewaanakisinitc pemaatisinitc ci⁠manaaci'aahsikwaa.