ᑲᓬᐁᔑᔭᓇᒃ 6 - Ojibwe Kihcimasina'ikan

Mooshak waawiici'itik

¹ Niitanami'aak, kiishpin tahsh awiya oncimihkawintc aaniin iko ishimaci‑ishihciketc, kiinawaa hsa kaana'ihtawimek Kishemanitoo otAhcaahkwan wiici'ihk a'a kaakii'mamaashiitc miinawaa kwayahk cipimohsetc. Weweni hsa tootawihk ahpii wiici'ek. Kaatahsopeshikoyek itahsh naanaakaci'itisok kekiinawaa cikoci'ikoohsiwek.

² Waawiici'itik tahsh cipimiwitamaatiyek ini kaapimiwitooyek. O'o tahsh kii'ishihcikeyek mii hsa 'i e'na'ihtamowek Onahshowewin Christ kaakii'ishikihkino'iketc.

³ Kiishpin tahsh inini kihcikekoonini inenintisotc, kekoonini tahsh e'ahpiihtentaakosihsik, aahpici kihciwanenintiso.

⁴ Mii hsa eshinaakwaninik awiya wiin iko cikanawaapantank aaniin eshihciketc. Kiishpin tahsh minonaakwaninik i'i otishihcikewin, otayaan hsa kekoonini cioncikihci‑inentank. Kaawiin tahsh wiin memwehc pahkaan awiyan okakanawaapamaahsiin taka kwayahk ci‑ishipimaatisikwen.

⁵ Mii hsa eshinaakwaninik kahkina awiya wiin iko cipimiwitamaasohpan opimiwanaan.

⁶ A'a tahsh inini kaakihkino'amawintc i'i Kishemanitoo otipaacimowinini, mii hsa eshinaakwaninik i'imaa kaaonishihshininikin kekoonan kaatipentank cionciwiici'aatc ini kaakihkino'amaakotc.

⁷ Keko tahsh wiin wanentankek o'o: Kishemanitoo hsa kaawiin tinowihsii cipaahpinotawintipan. Wekonen hsa ko inini kehtikaatank, mii hsa i'iweni kemoona'ank.

⁸ A'a hsa awiya kaaishikihtiketc okehteinaatisiwinink, nipowinini tahsh okamoona'aan i'imaa kaakii'ishikihtiketc. A'a hsa wiin awiya i'imaa kaaishikihtiketc, kaaishiwiici'iwenitc Kishemanitoon otAhcaahkoni, mooshak keayaanik pimaatisiwinini okamoona'aan i'imaa kaakii'ishikihtiketc.

⁹ Taka tahsh kiinawint kaawiin kikapakitentansiimin i'i kaaishikakweminotootamank mooshak. Aaniihsh taocihcihse ahpii kekiinawint cimoona'ikeyank, kiishpin noontepakiciihsiwank.

¹⁰ Taka tahsh kiishpin ishihsek awiya ciminotootawankitc, taka kwayahk tootawaataanik kahkina pemaatisiwaatc, iki hsa awahshime wiici'aataanik kaaonci‑inawemankwaa tepwehtamowinink kaaishitipentaakosiwaatc.

Pwaal ekii'ayaankwaamihtaakositc, ekiihpooshoo'iwetc kaye

¹¹ Kiwaapantaam iitok niin aaniin ehpiihcimankipii'ikeyaan o'o ishkwaac kaaoshipii'amawinakook, niin iko nininc e'aapacihtooyaan.

¹² Iki tahsh awiyak kaakakwekashkiminekwaa cikihkinawaatashakeshikaniwiyek, miiwak hsa iki ehta kaakakweminonaakohtoowaatc ciwaapancikaatenikin otishihcikewiniwaa wiiyawimaank inahke, ewii'oncimamiihkwaanitisowaatc itahsh. Miitahsh i'i ehta kaaonci‑ishihcikewaatc, kiishpin aaniihsh tashimaawaahpan Christan kaakii'onciniponitc aashiteyaahtikonk kewiinawaa taakiihkakwaataki'aawak.

¹³ Iki hsa kaakihkinawaatashakeshowewaatc kaawiin tahsh kaye wiinawaa otootansiinaawaa i'i Onahshowewinini kaainahtenik. Mii hsa ehta tahsh kaaonciantaweniminekwaa cikihkinawaatashakeshokooyek ewii'mamiihkwaanitisowaatc ekiihkashkiminekwaa ciotaahpinamowek kaaishikihkinawaacihtoowaac wiiyawimaan.

¹⁴ Kaawiin itahsh niin wiihkaa nintaaishihcikehsii. Niin itahsh wiin i'i ehta ninkatashintaan Ciisahs Christ ekii'nipotc i'imaa aashiteyaahtikonk. O'omaa ahkiink kaakihci‑inentaakwahk niin wiin nintinakintaan taapishkoo enipoomakahk. Mii kaye niin eshinaasoyaan ekii'nipoyaan citootansiwaan kaakihci‑inentaakwahk o'omaa ahkiink.

¹⁵ A'a tahsh kaakiihkihkinawaatashakeshikaniwitc, kaye kaakihkinawaacihcikaniwihsik kaawiin kanake kekoon inaapatahsinini kaatootawintwaa. Awiya ohsha kaaoshkioshihcikaniwitc mii hsa o'owe kaakihci‑inentaawahk.

¹⁶ Iki hsa kaawii'ishipimaatisiwaatc i'i kaakii'ishkwaatashintamaan pisaanentamowinini, shawentaakosiwinini kaye tamiinaawak, iki kaye kahkina Isriyal (Israel) kaainentaakosiwaatc, Kishemanitoon kaatipenimikowaatc.

¹⁷ Miitahsh o'o ehkitoyaan ishkwaac, taka keko awiya awahshime ninkamikoshkaaci'ikohsii, aaniihsh naakwanoon ini ninkakwaataki'ikoowinan i'imaa niwiiyawink. Miitahsh i'imaa eshikihkinawaasinaakwahk e'anohkiihtawak Ciisahs.

¹⁸ Taka tahsh kaaTipenciketc Ciisahs Christ okishewaatisiwin kikawiiciiwikom kitahcaahkowaank kahkina kaatahshiyek, niitanami'aak! Emen.