ᑲᓬᐁᔑᔭᓇᒃ 5 - Ojibwe Kihcimasina'ikan

Kanawentan i'i kitipenimitiso'ikoowin

¹ Christ hsa kikii'aapa'okonaan ekaa miinawaa citipenimikohsiwank Onahshowewin. Mashkawikaapawik itahsh i'imaa kaakii'ishiaapa'okooyek. Keko miinawaa pakitinitisohkek citipenimikoyek Onahshowewin.

² Inashke pisintawihshik, niin Pwaal (Paul) kiwiintamawininim! Kiishpin pakitinitisoyek cikihkinawaatashakeshokooyek, kaawiin i'imaa kanake Christ kikaonciwiici'ikohsiiwaa.

³ Miinawaa kitayaankwaamimininim, kiishpin awiya pakitinitisotc pisaaniko cikihkinawaatashakeshontc, mii hsa eshinaakwaninik oncitako cina'ihtank kahkina i'i Onahshowewin kaainahtenik.

⁴ Kiinawaa tahsh kaakakwecihtooyek cionciminwakiminek Kishemanitoo ehpiminisha'amek i'i Onahshowewin kaainahtek, mii hsa 'i taapishkoo e'ishihcikeyek e'nakanek Christ e'wiiciiwaahsiwek. Mii hsa e'ayaayek aanti Kishemanitoo okishewaatisiwin keshiwiici'ikohsiwek.

⁵ Niinawint tahsh wiin, mii 'i eshiahpenimoyaank Kishemanitoo cioncikwayahkwakimiyamintc. OtAhcaahkwan itahsh niwiicii'ikowaamin ehtepweyentamaank kaaoncipiihtooyaank i'i kwayahkwaatisiwin.

⁶ Ahpii hsa kiiwiiciiwintc Christ Ciisahs, a'a hsa kaakihkinawaatashakeshikaniwitc a'a kaye ekaa kaakihkinawaatashakeshikaniwihsik kaawiin peshik awahshime ahpiihtentaakosihsii. Kaawiin tahsh wiin i'i kaakihci‑inentaakwahk. Tepwehtamowin hsa i'i saaki'iwewinink kaaishianohkiimakahk, mii hsa 'i kaakihci‑inentaakwahk.

⁷ Aahpici tahsh wiinke weweni eminopahtooyekipan ehkakwecihkashiweyek e'ishihcikeyekipan! Awenen tahsh kaakipihtininek ehpiminisha'amekipan i'i tepwewin? Aaniin tahsh kaa'ihkitotc kaakii'oncikashkiminek?

⁸ Kaawiin tahsh wiin Kishemanitoo kaa‑antominek i'i kikii'ikohsiiwaa!

⁹ “Aahpici hsa pankii ompisikan e'aapatahk, mii hsa misiwe pahkweshikan eshiompishkaatc,” maawiin taaihkitom.

¹⁰ Kitooncikehcinaa'ininim ewiiciwek kaaTipenciketc, ciotaahpinansiwek kekoon pahkaan kaaishitepwehtansiwaan. Kishemanitoo hsa okanana'ahsaan ini ininiwan aweneniwinikwen kaamikoshkaaci'inek.

¹¹ Niitanami'aak, kiishpin tahsh niin keyaapi kakiihkwaatamaampaan i'i kihkinawaatashakeshokoowin, wekonen tahsh keyaapi wencikakwaataki'ikooyaan? Kiishpin tahsh i'i tepwe ishikakiihkweyaan, kaawiin iitok awiya nintaamaanihtaakohsii kakiihkwaanimak ini Ciisahsoon kaakii'niponitc aashiteyaahtikonk.

¹² Miitahsh eshimihsawentamaan iki hsa kaamikoshkaaci'inekwaa pisaaniko cianimanishamowaatc otininiiwiniwaan.

¹³ Kiinawaa tahsh wiin niitanami'aak, Kishemanitoo ohsha kikii'antomikowaa i'imaa aapa'okoowinink citipenintisoyek. Keko tahsh wiin i'i kitipenimitiso'ikoowiniwaa aapacihtoohkek cioncimacitootamek, keko kaye pakitinankek ini kimacimihsawentamowiniwaan citipenimikoyek. O'o tahsh ishihcikek, saaki'itiwinink ishinaanaakaci'itik.

¹⁴ Aaniihsh kahkina Onahshowewin taaishimooshkinetoocikaate o'o ishihcikenaaniwank: “Saaki' kiicipimaatis taapishkoo kaaishisaaki'itisoyan.”

¹⁵ Ayaankwaamisik! Kiishpin aya'aawihshink tootaatiyek, maamaakwanitiyek, wiihsakaahpinanitiyek, mii maawiin i'i cicaakinanitiyek!

Ahcaahk entashinsotc, kehteinaatisiwin kaye entashintek

¹⁶ Miitahsh o'o eninakook: Pakitinihk hsa a'a Kishemanitoo otAhcaahkwan cipimiwitootc ini kipimaatisiwiniwaan. Kaawiin tahsh kikaishihcikehsiim kaaishimacimihsawentamoomakahk kikehteinaatisiwiniwaa.

¹⁷ Awiya hsa okehteinaatisiwin nahpaac inahke ishimihsawentamoomakanini, kaawiin wiin Kishemanitoo otAhcaahkwan kaaishimihsawentaminitc ishihcikemakahsinini. A'a tahsh kaye Kishemanitoo otAhcaahkwan kaawiin ishimihsawentansiiwan i'i kehteinaatisiwin kaawii'ishihcikemakaninik. A'a tahsh Ahcaahk omihsawentamowin i'i kaye kikehteinaatisiwiniwaa miitahsh mooshak miikaatiimakanoon. Miitahsh i'i kaaoncikashkihtoohsiwek i'i kaashiantawentamek ewii'ishihcikeyek.

¹⁸ Kiishpin tahsh Kishemanitoo otAhcaahkwan pimiwitoonitc kipimaatisiwiniwaan, kaawiin iinsan kitipenimikohsiim i'i Onahshowewin.

¹⁹ Aahpici tahsh peyahtenaakwan i'i kehteinaatisiwin eshihcikemakahk. Miitahsh o'o eshianohkiimakahk: pihshikwaatisiwin, wiinaatisiwin, nahpaacipihshikwaacihcikewin,

²⁰ manitoohkewin, mamaantawihcikewin, shiinkenintiwin, kiihkaantiwin, ayaahshenintiwin, wahkewikitaasowin, kakweniikaanenintisowin, kakweshaakoosontiwin, pahkewinitiwin,

²¹ mihsawinaakewinan, kiiwashkwepiiwin, papaakakiipaatisiwin kaye taapishkoo miiwan ono tino. Miitahsh niiyaak eshiayaankwaamiminakook, awiya kaatootank ini kaawiintamaan, kaawiin tawiicihtwaahsii Kishemanitoon otOokimaawiwininiink.

²² Ini tahsh Kishemanitoo otAhcaahkwan, miiwan ono nehtaawikihtoonitc: saaki'iwewin, minwentamowin, pisaanisiwin, shiipentamowin, kishewaatisiwin, minotootaatiwin, tepweyentaakosiwin,

²³ noohkaatisiwin, weweni kanawenintisowin. Iki tahsh o'o kaaishipimaatisiwaatc kaawiin okapapaamenimikohsiinaawaa Onahshowewinini.

²⁴ Iki tahsh Christ Ciisahsonk kaaishitipentaakosiwaatc aasha aashiteyaahtikonk okii'ishinihtoonaawaan okehteinaatisiwiniwaan, ini kaye kaakii'ishi⁠tako⁠antawentamoomakaninikipaniin, kaye kaakii'ishi⁠mihsawencikemakaninikipaniin.

²⁵ Ahcaahkonk itahsh e'oncipimaatisiyank, taka tahsh kaye Ahcaahkonk ishipimohsetaa.

²⁶ Taka kaawiin kikawawishwaasohsiimin kaawiin kaye kikakakwenishki'itihsiimin, kaawiin kaye kika ayaahshenintihsiimin.