ᑲᓬᐁᔑᔭᓇᒃ 4 - Ojibwe Kihcimasina'ikan

¹ O'o tahsh nintihkit, a'a hsa okosihsimaa mekwaa ehkwiiwisenhsiwitc kaawii'nakatamaakotc oteten otaya'iimini citipentank, mii hsa kewiin ehtoocikaniwitc taapishkoo opamiihtaaken kaatoocikaniwinitc, aanawiin kahkina kekoonini ehtipentank a'a okosihsimaa.

² Mekwaa tahsh ehkwiiwisenhsiwitc, ayaawa' hsa ininiwa' kenawenimikotc, kenaakacihtamaakotc kaye ini oteten kaakii'nakatamaakotc. Paanimaa tahsh e'ocihcihsenik ahpii kaakii'ihkitonitc oteten cipooninaanaakaci'intc, mii hsa ahpii kepooninaanaakacihcikaniwitc.

³ Miitahsh peshikwan kekiinawint, kikiihtipenimikonaanik iki ahcaahkwak kaatipentamowaatc o'o misiwe ahkiini cipwaa kihkentamank i'i tepwewin.

⁴ Ahpii tahsh tipa'ikan ekii'ocihcihsenik, Kishemanitoo wiin iko oKosihsan okiihpiicinisha'waan. I'imaa tahsh ihkwenk kii'ishinihtaawiki. Miitahsh kaye ekii'ishipimaatisitc kaakii'ishikanawencikaatenik Moosihs (Moses) otOonahshowewinini.

⁵ Miitahsh ewiihtipa'waatc cipakitinikonitc i'i opimaatisii' kaakiihtipenimikonitc Onahshowewinini kaakii'oncipiishaatc, mii hsa tahsh Kishemanitoo kahkina kekiinawint tipinawe ciokosihsiminankitc.

⁶ E'okosihsiminek itahsh Kishemanitoo kikii'ishinisha'amaakonaan hsa ini oKosihsan otAhcaahkoni i'imaa kite'inaanink. Miitahsh a'a Ahcaahk kaaihkitotc: “Aapa, Kiin ninTete!”

⁷ Kaawiin tahsh keyaapi opamiihtaake kitinowihsii, Kishemanitoo hsa noonkom kitookosihsimik. E'okosihsimihk itahsh kiwii'miinik kaamiinaatc i'i okosihsa'.

Pwaal ekii'naanaakatawenimaatc Kalehshiyaank kaa‑ayaanitc

⁸ Otaanaank tahsh kaawiin kikiihkihkenimaahsiwaawaa Kishemanitoo. Iki hsa kikiihtipenimikowaak ekii'anohkiihtawekwaa awiyawak ekaa tepwe kaamanitoowihsikwaa.

⁹ Aasha tahsh kikihkenimaawaa tipinawe Kishemanitoo – nawac maawiin taaonishihshin ci‑ihkitoyaan kikihkenimikowaa Kishemanitoo. Wekonen tahsh wenciwiihkiiwenotawekwaa oko tino ahcaahkwak kaaniinamisiwaatc, iki kaye kaakohpaasinaakosiwaatc kaakakwetipencikewaatc? Mii na 'i eshiantawenimekwaa miinawaa citipeniminekwaa?

¹⁰ Aahpici hsa weweni kikanawentaam ono kaakihci‑ishikiishikahkin, kiisihsook kaye, waa'ani‑ishiwepahk kaye, ini kaye aaninta kaakihci‑inentamek kihkinoonowinan.

¹¹ Aahpici hsa kitoocaanimenimininim, koonike mii'i eshinaakwahk anihshaa ekii'oncianohkiiyaan ekiihkakwewiici'inakook.

¹² Niitanami'aak! Miitahsh eshipakohseniminakook, kaaishipimaatisiyaan ci‑ishipimaatisiyek, aaniihsh keniin kaatinowiyek nintinow. Kaawiin aapiinc iko kikii'macitootawihsiim.

¹³ Kikihkenimihshim iitok ekii'aahkosiyaan kaakii'onci‑ishihsek ciwiintamawinakook minwaacimowin, miitahsh i'i payehsh ekii'noontawiyek.

¹⁴ Aana tahsh ekiihsanaki'ikooyek i'i kaakii'ishiayaayaan i'imaa niwiiyawink, kaawiin tahsh shaakooc kikii'aanawenimihsiim, kaawiin kaye kikiihshiinkentansiim kaakii'inaahpineyaan. Miitahsh kaa'ishihcikeyek, ekii'otaahpiniyek taapishkoo kekii'ishiotaahpinekipan encal Kishemanitoonk kaakii'onciitc, ekii'ishiotaahpiniyek kaye taapishkoo kekii'ishiotaahpinekipan Christ Ciisahs.

¹⁵ Aahpici hsa ekiihciihkentamekipan! Aaniin tahsh kaa'ishihseyek? Miitahsh o'o keinaaciminakook, kiishpin kashkihtooyekipan ciotaahpinamekipan kishkiinshikowaan, kitaakii'miishim iitok.

¹⁶ Mii na tahsh o'o noonkom kaaonci'inenimiyek ehshiinkeniminakook, e'wiintamawinakook i'i tepwewin?

¹⁷ Miitahsh kaaoncikakwesaaki'inekwaa iki kotak ininiwak pahkaan kaainwehtoowaatc i'i minwaacimowin, kaawiin aaniihsh kinantawenimikohsiiwaak ciwii'wiiciiwiyek. Kinantawenimikowaak ohsha ciwii'wiiciiwekwaa. Kaawiin tahsh tepwe kwayahk kiwiihsaaki'ikohsiiwaak.

¹⁸ Aahpici tahsh onishihshinini awiyak kiiwiihsaakiwiiciiwinekwaa, kaawiin ehta weti kii'ayaayaan, kiishpin kota kwayahk wiiwiiciiwinekwaa.

¹⁹ Niniicaanihsak kaainaweniminakook! Taapishkoo ihkwe kaa‑ahpiihciwiihsakentank kiiwiiwaapamaawahsotc, mii keniin peshikwan ehpiihciwiihsakentamaan kiimihkweniminakook, e'mihsawentamowak Christ otishiayaawin cinihtaawikininik i'imaa kipimaatisiwiniwaank.

²⁰ Ampehsh tahsh noonkom wiiciiwinakook weti kaashiayaayek! Pahkaan iitok kitaainininim. Aahpici hsa kikwiinawitootaakoom!

Hekaar shikwa Sera

²¹ Taka kiwiihkakwecimininim kekoon kiinawaa kaa‑antawentamek Onahshowewin citipenimikoyek: Kaawiin ina kinoontansiim aaniin ehkitoomakahk i'i Onahshowewin?

²² O'o iitok ishipii'ikaate, Eparahaam (Abraham) kii'niishiwa' (2) okosihsa'. Ini tahsh ihkwewan kaakiihpamiihtaakotc, mii 'imaa peshik okosihsan kaa'ontinaatc. Ini tahsh kotak peshik okosihsan, wiiwink hsa piko okii'ontinaan.

²³ A'a tahsh kwiiwisenhs i'imaa opamiihtakewihkwenk kaakii'oncinihtaawikitc, kahkina awiya kaaishinihtaawikinitc ihsa kii'ishinihtaawiki. A'a tahsh kotak kwiiwisenhs i'imaa Eparahaam wiiwink kaakii'onciitc, Kishemanitoo hsa otahshotamaakewinink kii'oncii.

²⁴ Tipaacimowin tahsh kimiinikoom keoncinihsitohtamek. Iki hsa niishin ihkwewak mii taapishkoo eshinaakosiwaatc ini niishin ahshotamaatiwinan Kishemanitoon kaakii'onahtoonitc. Hekaar (Hagar) tahsh kii'ishinihkaaso a'a ihkwe kaakii'nihtaawiki'aatc oniicaanihsa' cipamiihtaakenitc. Miitahsh kaye eshinaakositc taapishkoo i'i ahshotamaatiwin kaakii'onahcikaatek i'imaa kihciwaciwink Saainai (Sinai).

²⁵ Hekaar tahsh kaye ishinaakosi taapishkoo i'i kihciwaciw Saainai kaakii'ishinihkaatenik weti Arepiya (Arabia) ahkiink kaa‑ayaanik. Mii hsa kaye taapishkoo eshinaakositc i'i kihciootenaani Ceroosalam (Jerusalem) noonkom kaawaapantamek. Ceroosalam ihsa ishinaakwan taapishkoo opamiihtaake, iki kaye kahkina pemaatisiwaatc imaa kaaishitipentaakosiwaatc.

²⁶ I'iwe tahsh wiin Ceroosalam kihcikiishikonk kaaoncitipentaakwahk piniskwe piko tipenintisoomakan. Mii hsa eshinaakosiyank e'omaamaantamank.

²⁷ Aaniihsh Kihcimasina'ikan ishipii'ikaate: “Ciihkentan tahsh kiin ihkwe wiihkaa kaa'ayaawaahsiwatc apinoonciish! Shaakowen, ciikihtaakosin, kiin wiihkaa kaamooshihtoohsiwan i'i kaaishiwiihsakentamowaatc ihkwewak kaawii'oniicaanihsiwaatc! A'a hsa ihkwe kaakii'nakacikaniwitc nawac niipiwa' oka‑ayaawaa' apinoonciisha' ahpiihc wiin a'a ihkwe wiihkaa kaakii'nakanikohsik onaapeman.”

²⁸ Noonkom tahsh kiinawaa niitanami'aak, Kishemanitoo otahshotamaakewinink kitoonci⁠oniicaanihsimikoom, taapishkoo Aaisik (Isaac) ahshotamaakewinink kaakii'ishi⁠oniicaanihsimintc.

²⁹ I'i tahsh ahpii, a'a hsa kwiiwisenhs kaakii'ishinihtaawikitc kahkina awiya kaaishinihtaawikinitc, okiihkakwaataki'aan ini kotak kwiiwisenhsan kaakii'oncinihtaawikinitc Kishemanitoon otAhcaahkoni otishihcikewininiink. Miitahsh keyaapi noonkom eshihsek.

³⁰ Mii hsa o'o Kihcimasina'ikan eshipii'ikaatek: “Ninkoci hsa ishinisha'ohk a'a kaapamiihtaaketc ihkwe, ini kaye okosihsan. Aaniihsh a'a kwiiwisenhs kaakii'omaamaatc ini ihkwewan kaakiihpamiihtaakenitc, kaawiin tamiinaahsii kekoonini oteten otaya'iimini taapishkoo kaawii'ishimiinintc a'a kwiiwisenhs kaakii'omaamaatc ini ihkwewan kaapamiihtaakehsinik.”

³¹ Niitanami'aak, kaawiin tahsh a'a ihkwe kaapamiihtaaketc kitooniicaanihsimikohsiinaan, a'a hsa ihkwe kaapamiihtaakehsik kitooniicaanihsimikonaan.