ᑲᓬᐁᔑᔭᓇᒃ 3 - Ojibwe Kihcimasina'ikan

Onahshowewin komaa kaye tepwehtamowin

¹ Etatawe hsa kikakiipaatisim kaa‑⁠Kalehshiyawininiiwiyek (Galatians)! Awenen tahsh aasha kaahshaakooteniminek? Aaniihsh taapishkoo ekii'waapamek Ciisahs Christ e'nipotc aashiteyaahtikonk inentaakwan aahpici kihciweweni kaa'wiintamaakooyek aaniin Christ kaa'ishihciketc.

² Peshikwayak tahsh kekoon wiintamawihshik: aaniinti kaa'oncitepinimek Kishemanitoo otAhcaahkwan? Ehtootamek ina kaainahtek i'i Onahshowewin, komaa kaye ekii'noontamek i'i minwaacimowin, ekiihtepwehtamek tahsh?

³ Etatawe hsa kikakiipaatisim! Kishemanitoo otAhcaahkonk ekii'oncimaacihtaayek, mii na tahsh waa'ishihcikeyek wakicaya'ii kiwiiyawiwaank kaanihtaaishihcikeyek ewii'ishikiishikiyek anami'aawinink?

⁴ Kaawiin inahsh kekoon kitinentansiim i'i kaakiihpiayishihseyek otaanaank? Kehcinaac maawiin kekoon i'imaa kikii'ontinaam kekihtaapacihtooyek.

⁵ Kikii'miinikowaa Kishemanitoo otAhcaahkwan shikwa kii'mashkawanohkii ekii'maamahkaacihciketc kaaishi/ayaayek. Mii na tahsh kaaonci‑ishihciketc e'ishihcikewek ehtootamek kaainahtek Coowiwi Onahshowewin, komaa kaye ehtepwehtamek tipaacimowin kaakii'noontamek?

⁶ Inashke mii peshikwan Eparahaam (Abraham) kaakii'ishihsetc, e'ishipii'ikaatek: “Eparahaam okiihtepwehtawaan Kishemanitoon, ekiihtepwehtawaatc tahsh Kishemanitoon, miitahsh kaakii'onci‑inakimintc okwayahkwaatis.”

⁷ Kikihkentaam iitok o'o, iki hsa kaatepwehtamowaatc pemaatisiwaatc miiwak ihsa iki mayaa Eparahaamink kaaontahkaanesiwaatc.

⁸ Kihcimasina'ikan aaniihsh niiyaak kiihtipaacimoomakan Kishemanitoo ewiihtinowaanaatc ehkwayahkwaatisinitc i'i ekaa kaaCoowiwihsinik otepwehtamowininiink onci. Aaniihsh kewiin Eparahaam niiyaak okii'minwaacimohtaakon Kihcimasina'ikan ekii'ikotc: “Kiin hsa Kishemanitoo kaawii'oncishawenimaatc kahkina pemaatisinitc.”

⁹ Eparahaam okiihtepwehtawaan Kishemanitoon, miitahsh kaakii'oncishawentaakositc. Miitahsh kaye noonkom kahkina kaaotepwehtamowiniwaatc tako⁠shawentaakosiwak taapishkoo kaakii'ishishawentaakositc.

¹⁰ Iki tahsh wiin kaa‑ahpenimonotamowaatc ewii'na'ihtamowaatc kaainahtenik i'i Onahshowewinini, miitahsh mooshak inentaakosiwak ewii'nihshiwanaatisiwaatc, aaniihsh Kihcimasina'ikan ishipii'ikaate: “Awenen hsa mooshak ekaa kaapisintansik ehtootansik kaye kahkina kekoonini kaaishipii'ikaatenik i'i Onahshowewimasina'ikanini, inakimaa cinihshiwanaatisitc.”

¹¹ Aahpici hsa wiinke payahtenaakwan, kaawiin hsa awiya otooncikwayahkwakimikohsiin Kishemanitoon e'mihcitootank kaainahtenik i'i Onahshowewinini, aaniihsh Kihcimasina'ikan ishipii'ikaate: “Awiya hsa kaaoncikwayahkwakimintc otepwehtamowinink tapimaatisi.”

¹² Awiya hsa kaakanawentank Onahshowewin kaawiin memwehc otaapacihtoohsiin otepweyentamowin. O'o iitok Kihcimasina'ikan ihkitoomakan: “Awenen hsa piko kaatootank kahkina kekoonini kaainahtenik i'i Onahshowewinini, mii hsa i'imaa eshipimaatisitc.”

¹³ Christ kikiihtipa'okonaan cipakitinikoowank Onahshowewin kaakii'ishi⁠nipoomikooyankipan, aaniihsh kiihtinowi'aa wiin kaananipoomintc kiinawint onci. Aaniihsh Kihcimasina'ikan ishipii'ikaate: “Awiya hsa ko mihtikonk kaa‑akoonintc mii hsa 'awe kaananipoomintc.”

¹⁴ Miitahsh o'o Christ Ciisahs kaakii'onci‑ishihciketc, ekaa kaaCoowiwihsikwaa kewiinawaa cimiinintwaa i'i shawentaakosiwinini, taapishkoo Kishemanitoo kaakii'ishiahshotamawaatc ewiihshawenimaatc Eparahaaman, kekiinawint tahsh tepweyentamowinink kikaoncitepinaanaan a'a Kishemanitoo otAhcaahkwan kaakii'ahshotamawinank.

Onahshowewin i'i tahsh kaye ahshotamaakewin

¹⁵ Niitanami'aak, kiwii'wiintamawininim hsa kekoon aaniin keoncinihsitohtamek o'o kaawiintamawinakook. Ahpii hsa niishin (2) ininiwak ekiihkiishentamowaatc kekoonini, ekii'oshipii'amowaatc kaye, kaawiin hsa awiya okapiikonansiin. Kaawiin kaye awiya awahshime otaanankihtoohsiin i'i aasha ahshotamaatiwinink kaakii'oshipii'ikaatenik.

¹⁶ Inashke tahsh Kishemanitoo okii'ahshotamawaan Eparahaaman (Abraham) ewiihshawenimaatc, ini kaye opiiwesiimini. Kaawiin tahsh Kihcimasina'ikan ishipii'ikaatehsinoon, “Kipiiwesiimak” kaapaahtiinowaatc. “Kipiiwesiim” ohsha ishipii'ikaate, mii hsa a'awe peshik awiya, Christ kaatashimintc.

¹⁷ Miitahsh o'o kaaitamaan, Kishemanitoo ahpii kiimiinaatc Eparahaaman i'i ahshotamaatiwinini, kii'ihkito kaye ewiihkanawentank. Niiwaahk nihsimitana (430) tahsopipoon tahsh ekii'ani‑ishihsek, Onahshowewin kii'onahcikaate. Kaawiin tahsh i'imaa Onahshowewinink taonciaanawencikaatehsinini Kishemanitoo aasha kaakii'aayiici ahshotamaaketc, kaawiin kaye taoncikaahsi'ikaatehsinini kaakii'ihkitotc.

¹⁸ Kiishpin tahsh Kishemanitoo omiikiwaan oncianohkiimakaninikipan i'imaa ehta ehkanawencikaatenik Onahshowewin, kaawiin iinsan awahshime Kishemanitoo kaakii'ishiahshotamaaketc anohkiimakahsinini. Aasha tahsh Kishemanitoo ekii'ahshotamaaketc, kaakii'oncimihcimiinaatc Eparahaaman i'i omiikiwaan.

¹⁹ Aaniin tahsh kaainahtek i'i Onahshowewin? Mii 'i iitok kaakii'oncinankihtootc Onahshowewinini ewiihpeyahtenaakohtootc i'i macitootamowinini. Mii kaye kaakii'inahcikaatek, paanimaa hsa Eparahaam opiiwesiiman pitakohshininitc niiyaak kaakiiahshotamawimintc, miitahsh 'i paamaa cipoonanohkiimakahk i'i Onahshowewin. Encalak tahsh kii'aapatisiwak cionahtoowaatc i'i Onahshowewinini. Peshik itahsh inini kii'aapatisi ciaanihkemiinaatc i'i pemaatisinitc.

²⁰ Kaakiikitohtamaaketc tahsh kaawiin aapatisihsii awiya kiimihcipeshikotc kekoonini kii‑ishihciketc. Kishemanitoo tahsh a'a kaamihcipeshikotc. Wiin iko kiikitohtamaaso e'miikiwetc otahshotamaakewin.

Miitahsh o'o enwaatek Onahshowewin

²¹ Onahshowewin ina tahsh omiitaakweshkaan i'i Kishemanitoo otahshotamaakewinini? Kaawiin i'i wiihkaa taaishihsehsinoon! Aaniihsh kiishpin ayaanikipan onahshowewin awiya kekiiontinankipan pimaatisiwin miitahsh i'imaa Kishemanitoon kekiioncikwayahkwakimikohpan ehtootank kaainahtenik i'i onahshowewin.

²² Kihcimasina'ikanink itahsh ishipii'ikaate, kahkina hsa pemaatisiwaatc ahkiink okihciwishkaakonaawaa macitootamowin. Miitahsh i'i Kishemanitoo kaakii'ahshotamawaatc awenena' iko ketepwehtawaanitc Ciisahs Christan, mii i'iwe tamiinaawak, aaniihsh tepwehtamook.

²³ I'i tahsh cipwaa ishihsek tepweyentamowin cianohkiimakahk, Onahshowewin ihsa kikiihtahkonikomin. Paanimaa hsa tepweyentamowin ekii'naakwahk miitahsh i'i kaa'ishipakitinikooyank.

²⁴ Christ tahsh cipwaa takohshink, Onahshowewin kikiihtipenimikomin ci⁠kihkinowinikoyank Christ ketashitipeniminank. Miitahsh i'i kaakii'onci‑ishihsek, Kishemanitoo cioncikwayahkwakiminank i'imaa tepweyentamowinink.

²⁵ Inashke tahsh aasha ekii'ocihcihsek tepweyentamowin ciaapatahk, kaawiin Onahshowewin awahshime kitipenimikohsiimin.

²⁶ Ehtepweyenimek ohsha Christ Ciisahs, kahkina kaaonciokosihsiminek Kishemanitoo.

²⁷ Kahkina hsa kaatahshiyek, kaakiihsiika'antaasoyek ciwiiciiwek Christ, miitahsh eshinaakosiyek, ehkikishkamowek wiin iko Christ opimaatisiwin.

²⁸ A'a tahsh Coo, a'a kaye kaaCoowiwihsik, a'a kaye opamiihtaake, a'a kaye kaatipenintisotc, a'a inini, a'a ihkwe, kaawiin pepahkaan inentaakosihsiiwak. Kahkina hsa kiinawaa kipeshikwentaakosim i'imaa Christink.

²⁹ Kiishpin tahsh Christink ishitipentaakosiyek kiinawaa iinsan Eparahaamink (Abraham) kitoontahkaanesim, kikatepinamowaam kaye Kishemanitoo kaakii'ahshotamaaketc.