ᑲᓬᐁᔑᔭᓇᒃ 2 - Ojibwe Kihcimasina'ikan

Pwaal, iki kaye kotak ishinisha'waakanak

¹ Mitaahshiniiwipipoon (14) tahsh ekii'ani‑ishihsek ninkiihkiiweishaa weti Ceroosalamink (Jerusalem). Paarnapahs (Barnabas) hsa ninkii'wiiciiwaa, Taitahs (Titus) kaye ninkiih⁠tako⁠wiiciiwaanaan.

² Kishemanitoo tahsh ekii'waapanta'itc ci‑ishaawak kaakii'onci‑ishaawak. Ninkiih⁠kiimooci⁠nakishkawaak tahsh iki oniikaanisiik ekii'wiintamawakwaa aaniin mayaa kaaishikakiihkimak i'i ekaa kaaCoowiwihsinik, ekiihtashintamawimak i'i minwaacimowinini. Aaniihsh ninkii'naniisaanentaan i'i otaanaank kaakii'inanohkiiyaan noonkom kaye kaaishihcikeyaan, ekaa kekoon cionciihsinok.

³ A'a tahsh Taitahs kaakii'wiiciiwak Kariihk (Greek) kiihtinowi. Kaawiin tahsh kiihkakaanci'aahsii cikihkinawaatashakeshikaniwitc.

⁴ Aaninta hsa aanakii'inentamook i'i cikii'ishi'imintipan. Iki tahsh ininiwak ekii'anami'ehkaasowaatc ninkii'wiiciiwikonaanik ekiih⁠kiimooci⁠piintikanitisowaatc, ekiih⁠kiimooci⁠naanaakaci'inankitwaa ekiihkakwemihkamowaatc aaniin eshitipenimikohsiwaank i'i Moosihs (Moses) otOonahshowewin, aaniihsh Christ Ciisahsoon kaa‑aapa'omiyamintc niwiiciiwikonaanin. Miitahsh i'i kaakii'onci‑ishihcikewaatc ekii'antawenimankitwaa miinawaa citipenimikoyaank Onahshowewinini.

⁵ Kaawiin tahsh ninkiihpakitinitisohsiimin i'i ci‑ishihseyaank. Kaawiin iko peshikotipa'ikanenhs ninkiihpisintawaahsiwaanaanik. Miitahsh i'i kaakii'onci‑ishihcikeyaank: i'i minwaacimowin kaaishitepwemakahk ninkii'antawentaamin keyaapi ciwiiciiwikoyek.

⁶ Iki tahsh kaainintwaa e'niikaanentaakosiwaatc – mii o'o tahsh kaaonci‑ihkitoyaan, kaawiin niin kekoon nintinenimaahsiik aaniin kaahtinowiwaatc, aaniihsh Kishemanitoo kaawiin otishikanawaapamaahsiin awiyan aaniin eshinaakosinitc saakicaya'ii – Iki kaaniikaanentaakosiwaatc kaawiin awahshime kekoon ninkii'miinikohsiik kekihkino'amaakeyaan.

⁷ Shaakooc tahsh okii'waapantaanaawaa ekii'miinikoowak ciwiintamaakeyaan minwaacimowinini, cikakiihkimimak i'i ekaa kaaCoowiwihsinik, taapishkoo kewiin Piitar (Peter) kaakii'ishimiinintc ciwiintamaawaatc minwaacimowinini i'i Coowa'.

⁸ Kishemanitoo ohsha omashkawisiiwinink ishinisha'waakan kaa'oncitinowiyaan, cinaasihkawakwaa iki ekaa kaaCoowiwihsikwaa, taapishkoo kewiin Piitar ishinisha'waakan kaakii'oncitinowitc cikakiihkimaatc i'i Coowa'.

⁹ Ciimis (James), Piitar, Cwaan (John) kaainakimintwaa e'niikaaniiwaatc okii'nihsitaawinaanaawaa Kishemanitoon kaakii'ishishawenimimitc. Ninkii'onci sakininciinikonaanik itahsh Paarnapahsan keniin, ewii'naakohtoowaatc ewii'wiitanohkiintiyaank. Miitahsh kahkina kaa'inentamaank niinawint Paarnapahs citananohkiiyaank ekaa kaaCoowiwihsinik kaaishi/ayaanitc, kewiinawaa tahsh Coowa' kaaishi/ayaanitc.

¹⁰ Miitahsh ehta kaa'ishipakohseniminankitwaa cimaamihkawinotawimankitc i'i kaakitimaakisinitc otepwehtamoo' kaakii'ayaanitc kaakii'ishiayaawaatc. Miitahsh i'iwe maawac iko kaakii'antawentamaan ewii'ishihcikeyaan.

Pwaal ahpii kiikiishikanoonaatc Piitaroon

¹¹ Ahpii tahsh Piitar (Peter) kiipitakohshink i'imaa Entiyaahkohkaank (Antioch), ninkiihkihcinooci'aa. Kahkina tahsh awiyak kii'noontamook. Aaniihsh kii'naakwanini wiin sesik ekii'ishihcikehsik.

¹² Miitahsh o'o Piitar kaa'ishihciketc: cipwaa takohshininitc tahsh i'i ininiwa' Ciimis (James) kaakiihpiicinisha'waatc, Piitar pisaan iko okii'wiiciwiihsiniimaa' i'i ekaa kaaCoowiwihsinik otepwehtamoo'. Ahpii tahsh kaahpitakohshininitc, mii 'i kaawiin okii'wiiciwiihsiniimaahsii' aaniihsh kiihkohtaaci. Aaniihsh okiihkohsaa' i'i kaakiihkihci‑inentaminitc kihkinawaatashakeshokoowinini.

¹³ Miitahsh kotak kaakii'anami'aawaatc Coowak kaa'ani‑ishihcikewaatc Piitaroon kaakii'ishihcikenitc ekii'wepi'ikowaatc ekaa sesik e'ishihcikehsinik. Paarnapahs (Barnabas) hsa kewiin kii'ishihcike kaakii'ishihcikenitc i'i kaakohsaanitc Coowa'.

¹⁴ Ahpii tahsh ekii'waapamakwaa ekaa ekii'ishihcikehsikwaa aaniin kaainahtenik i'i tepwewin kaatashintek minwaacimowinink, Piitar ninkiihkanoonaa enaahsamiinitc kahkina i'imaa kaakii'ayaanitc. Miitahsh o'o kaa'inak: “Kiin iitok kiCoowiw, kaawiin tahsh i'i kitishihcikehsii. Ekaa kaaCoowiwihsikwaa hsa kaaishipimaatisiwaatc kitishihcike. Aaniin tahsh keshikashki'atwaapan i'i ekaa kaaCoowiwihsikwaa ci‑ishihcikewaatc Coowa' kaapimaatisiwaatc?” ninkii'inaa.

Coowak, ekaa kaaCoowiwihsikwaa kaye tepwehtamowinink onci pimaaci'aawak

¹⁵ Niinawint tahsh tepwe kaaCoowiwiyaank ninkii'ishinihtaawikimin. Kaawiin wiin nintinowihsiimin taapishkoo iki ekaa kaaCoowiwihsikwaa omacitootamook kaaishinihkaanintwaa.

¹⁶ Ninkihkentaamin aaniihsh awiya kiitepwehtawaatc Ciisahs Christan, mii hsa 'i wenciminowiiciiwikotc ini Kishemanitoon, kaawiin wiin ehtootank i'i Onahshowewinini kaainahtenik. Keniinawint tahsh ninkiihtepwehtawaanaan Christ Ciisahs. I'imaa tahsh ehtepwehtawankitc Christ, mii 'i keonciminowiiciiwinankitc Kishemanitoo, aaniihsh kaawiin awiya otoonciminowiiciiwikohsiin Kishemanitoon e'mihcitootank kaainahtenik i'i Onahshowewinini.

¹⁷ Keniinawint tahsh e'antone'amaank i'i minwaapamikoowin ehtepwehtawankitc Christ, miitahsh iinsan keniinawint eshinaakosiyaank kaamacitootamowaatc. Mii na tahsh eshinaakwaninik taapishkoo Christ wiin e'animaaciikihtootc macitootamowinini? Keko i'i inentankek!

¹⁸ Kiishpin kiiweoshihtooyaan i'i kaakii'nihshiwanaacihtooyaan, mii 'imaa eshinaakwahk niin ehpiikonamaan Kishemanitoo otOonahshowewin.

¹⁹ Miitahsh taapishkoo eshinaakosiyaan aasha ekii'nipoyaan, taapishkoo Onahshowewin hsa ekii'nihsikoyaan. Miitahsh i'i kaaoncitipenimikohsiwaan Onahshowewin. Miitahsh i'i kaakii'onci‑ishihsek ci‑ishi⁠pimaatisiyaan kaashiantawenimitc Kishemanitoo.

²⁰ Christ hsa ninkii'wiicinipoomaa ahpii ekii'nihsintc i'imaa aashiteyaahtikonk. Kaawiin tahsh niin wa'a kaapimaatisiyaan, wiin ohsha Christ kaapimaatisitc nimpimaatisiwinink. Ehtepwehtawimak Kishemanitoo oKosihsan, kaaoncipimaatisiyaan o'o noonkom pimaatisiwin kaapimaatisiyaan. Aaniihsh Christ ninkiihsaaki'ik, okiihpakitinaan kaye opimaatisiwin niin onci.

²¹ Kaawiin nintaanawentamowaahsiin Kishemanitoo okishewaatisiwin. Kiishpin kwayahkwaatisiwin onciimakahkipan i'imaa Onahshowewinink, anihshaa iinsan Christ kiinipokopan.