ᑲᓬᐁᔑᔭᓇᒃ 1 - Ojibwe Kihcimasina'ikan

¹ Niin Pwaal (Paul) kaaoshipii'amawinakook. Kaawiin inini ninkiihkanoonikohsii, kaawiin kaye ininiihkaank ninkii'onci‑inentaakosihsii ishinisha'waakan citinowiyaan. Kishemanitoo ohsha, ini kaye oKosihsan Ciisahs Christan kaakiihkiiwepimaatisi'aatc kaakii'niponihpan, ninkiihkanoonikook.

² Kahkina hsa niiciotepwehtamook o'omaa kaa‑ayaawaatc kitako⁠pooshoo'ikowaak. Kiinawaa otepwehtamook weti kaa‑ayaayek Kalehshiya (Galatia) ahkiink pepahkaan kaaishimaamaawaci'itiyek kitooshipii'amawininim.

³ Taka Kishemanitoo Kaaoyoohsiyank, kaaTipenciketc kaye Ciisahs Christ, kikamiinikowaa kishewaatisiwin, pisaanentamowin kaye.

⁴ Christ tahsh ekii'na'ihtawaatc kiKishemanitoominaanin Kaaoyoohsimimank kaakii'oncipakitinank opimaatisiwin kimacitootamowininaanin kiinawint onci cishaapwiiwank o'omaa kaaishimacinaakwaninik o'o noonkom kaapimi‑ishiwepahk ahki.

⁵ Taka Kishemanitoo takihci‑inentaakosi ahpane pishihshik. Emen!

Mihcipeshikwan ehta Minwaacimowin

⁶ Aahpici hsa kikoshkowishim i'i kaakii'ishihcikeyek! Aahpici wiipa e'nakanek a'a Kishemanitoo kaakiihkanooninek i'imaa Christan kaaishikishewaatisinitc, pahkaan tahsh minwaacimowin e'otaahpinamek!

⁷ Kekeht hsa, kaawiin kotak minwaacimowin ayaahsinoon! Kiwiintamawininim tahsh e'ayaawaatc pemaatisiwaatc ehkakwe⁠wanishkwe'inekwaa, ehkakwe⁠aancihtoowaatc kaye i'iweni Christan ominwaacimowinini!

⁸ Kiishpin tahsh niinawint pahkaan inwehtooyaank komaa kaye mihsawaa ko encal kihcikiishikonk pionciitc pahkaan tahsh inwehtootc i'i minwaacimowinini aasha kaakii'wiintamaakooyek, taka tanihshiwanaatisiwak ninkaikoomin.

⁹ Aasha tahsh o'o ekii'ihkitoyaan, miinawaa tahsh niwii'ihkit: kiishpin hsa awiya kakiihkiminek pahkaan tahsh inwehtootc i'i aasha kaakii'otaahpinamek minwaacimowinini, taka tainakimaa cinihshiwanaatisitc.

¹⁰ Mii na 'i enihtaakosiyaan taapishkoo e'antawenimak inini ciminwaapamitc? Kaawiin! Kishemanitoo ohsha ninantawenimaa ciminwaapamitc. Mii na 'i eshinaakosiyan ehkakwe⁠ishihcikeyaan inini ciminwaapamitc? Kiishpin hsa 'i ishihcikeyaampaan, kaawiin iinsan Christ nintaa‑anohkiihtawaahsii.

Pwaal kaakii'ishionaapamintc ishinisha'waakan citinowitc

¹¹ Niitanami'aak! Kiwiintamawininim tahsh, i'i hsa minwaacimowin kaakakiihkwaatamaan kaawiin ininiihkaank kii'onciihsinoon.

¹² Kaawiin kaye ininiihkaank ninkii'ontinansiin, kaawiin kaye awiya inini ninkiihkihkino'amaakohsii. Ciisahs Christ ohsha wiin iko ninkii'waapanta'ik.

¹³ Aasha iitok kikii'noontaam aaniin kaa'ishipimaatisiyaan, aahpici weweni ekiihpiminisha'amaan i'i Coowi anami'ehcikewin. Aahpici kaye ekii'manaaci'aahsiwakwaa ekiihkakwaataki'akwaa otepwehtamook kaaishiayoohkoayaawaatc kaatipenimikowaatc Kishemanitoon, ekiihkakwenihshiwanaaci'akwaa kaye.

¹⁴ Iki kaye niici‑⁠Coowak kaakii'wiiciahpiihtaatisiimakwaa, nawac niin awahshime ninkii'ishihcike ekiihtootamaan i'i Coowi anami'ehcikewin. Nawac niin kaye ninkiihkihci‑inentaanan ini kaakii'ishihtwaawaatc iki mewisha kaakiihpimaatisiwaatc.

¹⁵ Kishemanitoo tahsh okishewaatisiwinink ninkii'oncionenimik cipwaa nihtaawikiyaan, okishewaatisiwinink kaye ninkii'oncikanoonik cianohkiihtawak, ekii'inentank tahsh kaye nimpimaatisiwinink ciwaapamimintc ini oKosihsan,

¹⁶ ekii'inentank kaye ciwiintamawimak i'i ekaa kaaCoowiwihsinik citashintamawimak i'i minwaacimowin, citashimimak ini Kishemanitoo oKosihsan. Ahpii tahsh kaakii'waapamimak kaawiin awiya ninkii'naasihkawaahsii ciwiintamawitc aaniin keishihcikeyaan.

¹⁷ Kaawiin kaye Ceroosalamink (Jerusalem) ninkii'ishaahsii ciantawaapamakwaa iki ishinisha'waakanak aasha mewisha kaakiihpionci‑inanohkiiwaatc. Takwac tahsh pikwatahkamik Arepiya (Arabia) ahkiink kaaishinihkaatek ninkii'ishaa. Miitahsh kaa'ishikiiweishaayaan miinawaa Timaaskahs (Damascus) ootenaank ekii'ishaayaan.

¹⁸ Paanimaa tahsh nihsopipoon (3) ekii'ishihsek Ceroosalamink ninkii'ishaa, ekii'antawaapamak Piitar (Peter) ewiihkihkenimak. Mitaahshinaanokiishik (15) tahsh ninkii'wiiciayaamaa.

¹⁹ Kaawiin tahsh kotak ishinisha'waakanak ninkii'waapamaahsiik, mii ehta ko Ciimis (James) kaaTipenciketc wiicihkiweyan kaawaapamak.

²⁰ Tepwe ohsha o'o kaaishipii'amawinakook. Kishemanitoo ninkihkenimik ehkiiwanimohsiwaan.

²¹ Naanaake tahsh weti ninkii'ani‑ishaa Siiriya (Syria) ahkiink shikwa Silihshiya (Cilicia) ahkiink.

²² Kaawiin tahsh weweni i'i ahpii ninkiihkihkenimikohsiik kaatepwehtawaawaatc Christan weti Cootiiyaahkaank (Judea) pepahkaan kaaishiayoohkwiinowaatc.

²³ I'imaa tahsh ehta kaakii'inaacimikoowak ninkii'oncikihkenimikook. Miitahsh o'o kaakii'inaacimikooyaan: “A'a hsa inini kaakiihkakwaataki'inank, noonkom opapaatashintaan i'i tepwehtamowinini kaakiih⁠kakwe⁠nihshiwanaacihtoohpan.”

²⁴ Miitahsh i'imaa kaa'ishimiikwehciwenimaawaatc Kishemanitoon i'i kaakiihtootawimitc i'imaa nimpimaatisiwinink.