Esara 7 - Ojibwe Kihcimasina'ikan

Esara Kiihtakohshink Ceroosalamink

¹ Kinwesh ahpii kaa‑ani ishihsenik e⁠kihciokimaawinitc Aartasarkihsiis (Artaxerxes) eshinihkaasonitc Persha (Persia) ahkiink, mii hsa 'i Esara (Ezra) wetetetc Siireyawan (Seraiah) kaakii mihkank aanti kaa⁠ontahkaanesitc. Omihshoomihsan hsa Esaraayawan (Azariah) kii‑ishinihkaasowan, otaanihkoopisan itahsh Hilkaayawan (Hilkiah).

² Hilkaaya hsa kii⁠ani otete Shalaman (Shallum), kaakii ani otetenitc Setahkoon (Zadok), kaakii ani otetenitc Ahaaitapoon (Ahitub),

³ kaakii ani otetenitc Amaraayawan (Amariah), kaakii ani otetenitc Esaraayawan, kaakii ani otetenitc Mireyahtan (Meraioth),

⁴ kaakii ani otetenitc Serahaayawan (Zerahiah), kaakii ani otetenitc Asaaiwan (Uzzi), kaakii ani otetenitc Pakaaiwan (Bukki),

⁵ kaakii ani otetenitc Apihshooawan (Abishua), kaakii ani otetenitc Pineyahsan (Phinehas), kaakii ani otetenitc Eli'esaroon (Eleazar), kaakii ani otetenitc Eranoon (Aaron) maawac nihtam kaakiih kihci anami'ewikimaawinitc. Miitahsh i'imaa kaakiih pi onciitc Esara.

⁶ Mii hsa wa'a Esara Paapilan (Babylon) ahkiink kaakiih pionci takohshink. Kii⁠oshipii'ikewininiiwi hsa wiinke ekii nakaci kihkentank Moosihsoon (Moses) otOonahshowewinini, kaakii miinikonitc kaaTipencikenitc kaa⁠oKishemanitoomiwaatc Isriyalak. Kihciokimaan hsa okii miinikon kahkina kekoon kaakiih kakwetwetc aaniihsh kaaTipencikenitc okii wiiciiwikoon.

⁷ Kiihpaahtiinowa' itahsh Isriyala' kaakiih⁠pi takohshininitc i'imaa Ceroosalamink, aaninta anami'ewikimaa', aaninta kaye Liipaai kaa⁠ontahkaanesinitc, kaa⁠nikamonitc kaye, kenawencikewi shimaakanihsha' kaye, anami'ewanohkii'aakana' kaye kiih⁠pi takohshinoo' niishwaahso pipoon e⁠ani ishihsenik kaah⁠pi pimikimaawinitc Aartasarkihsiisan (Artaxerxes).

⁸ Esara hsa kiih⁠takohshin i'imaa Ceroosalamink naanokiisihsoon eh⁠pimakinsonitc, niishwaahso (7) pipoon kaa⁠pi kihciokimaawinitc.

⁹ Peshik e⁠inakinsonitc nihtam kiisihsoon kiih⁠pi maacaakopan weti Paapilan ahkiink. Peshik itahsh e⁠inakinsonitc naanokiisihsoon kaakiih takohshink i'imaa Ceroosalamink, aaniihsh weweni okii wiiciiwikoon kaaTipencikenitc.

¹⁰ Mii 'iwe aasha kaakiih pi ishi onentank ote'ink ewiih kakwe kihkentank kaaTipencikenitc otOonahshowewinini, ewii ishihciketc kaye enahtenik. Kii‑inentam kaye ehkitoomakaninik, enaahkonikemakaninik kaye ewii ishi kihkino'amawaatc Isriyala'.

Kaa'ishipii'ikaatenik Esara Kaakiimiinikotc Maawac Kihciokimaan

¹¹ Miitahsh Esara (Ezra) anami'ewikimaa, takohsh iko oshipii'ikewinini, kaakiih kihkentank kaye kaaTipencikenitc enaahkonaanitc, enaanitc kaye Isriyala' (Israel), kaakii miinikotc oshipii'ikan kihciokimaan Aartasarkihsiis (Artaxerxes) eshinihkaasonitc:

¹² “Niin Aartasarkihsiis, wekimaahkantawakwaa kihciokimaak, kitooshipii'amawin Esara kaa‑anami'ewikimaawiyan, weshipii'amowatc kaye otoonahshowewin Kishemanitoo kihcikiishikonk eyaatc.”

¹³ “Mii hsa 'i enaahkonikeyaan awenenak iko Isriyalak eyaawaatc eshi okimaawiwak, iki kaye anami'ewikimaak, Liipaai kaa⁠ontahkaanesiwaatc kaye mehsawentamowaatc ewii ishaawaatc Ceroosalamink, pisaan hsa kika wiiciiwikook.

¹⁴ Niin kaa⁠kihciokimaawiyaan hsa kitishinisha'on, niishwaahso kaye nintoonahshowewininiimak, ci⁠anta kihkentamowatc Coota (Judah) ahki, Ceroosalam kaye taka onahshowewin Kishemanitoo kaakii miinihk ci⁠na'ihcikaatenikwenan.

¹⁵ Ci⁠maaciinatc itahsh kaye waapaapihko shooniyaa, osaawi shooniyaa kaye niin kihciokimaa, iki kaye onahshowewininiwak kaa⁠mihsawentamaank ewii miinimankitc oKishemanitoomiwaan Isriyalak, eshitaanitc Ceroosalamink.

¹⁶ Kahkina tahsh iko waapaapihko shooniyaa, osaawi shooniyaa kaye minihk iko ke⁠ontinek Paapilan (Babylon) ahkiink, ini kaye ke⁠pakitinikewaatc Isriyalak, anami'ewikimaak kaye. Mii 'i iitok kaa⁠onci pakitinikewaatc owaahkaa'ikanini oKishemanitoomiwaan eyaanitc Ceroosalamink.”

¹⁷ “Wa'a hsa shooniyaa weweni ci‑inaapaci'ek, kehcinaac iko ci⁠ataaweyek, aape pishihkiwak, aape maanahcaanihshak, aape maanahcaanihshenhsak kaye. Shikwaahsh kaye pahkweshikaniwi pakitinikewinan, minihkwewi pakitinikewinan kaye ci⁠pakitinamek eshi pakitinaahsonk kiKishemanitoomiwaa okihci anami'ewikamikonk eyaanik Ceroosalamink.

¹⁸ Aaniin hsa piko keshi minwaapantaman, iki kaye kiwiici'onciimaakanak kika inaapaci'aawaa a'a ke⁠ishkohsetc waapaapihko shooniyaa, osaawi shooniyaa kaye, ci‑ishihcikewek ke⁠inentamokwen kiKishemanitoomiwaa.

¹⁹ Shikwa tahsh ci⁠miinatc Kishemanitoo eyaatc Ceroosalamink kahkina aapacihcikanan kaa⁠miinikooyan ke⁠aapacihcikaatenikin anami'ehtawintc kiKishemanitoomiwaa kihci anami'ewikamikonk.

²⁰ Wekonen itahsh iko ke⁠noontehsenik otanami'ewikamikonk kiKishemanitoomiwaa, kiin kaa⁠waapantaman kaa⁠noontehsekin i'imaa hsa kika onci tipa'aan kihciokimaawi shooniyaank.”

²¹ “Niin hsa Aartasarkihsiis kehciokimaawiyaan nintinaahkonaak kahkina kaa⁠naakaci'aawaatc shooniyaan weti Ishi ninkaapii'anonk Iyoohparetiis ahkiink shemaak ci⁠ontinamawek Esara (Ezra) anami'ewikimaa, kehkino'amaaketc otoonahshowenini Kishemanitoon eyaanitc kihcikiishikonk, aaniin iko keshi kakweciminek, weweni ci⁠tootawintc.

²² Pisaan iko kika miinaa i'i minihk niishwaahsimitanashinaanwaahk (7,500) tahso tipaapiishkoocikan waapaapihko shooniyaa waapihkoon, naanwaahk (500) tahso tipaapiishkoocikan pahkweshikaniminan, naanwaahk naanimitana (550) tahso tipa'oopaan shoominaapooni, naanwaahk naanimitana (550) tahso tipaa'oopaan aalip pimiteni, minihk iko kaye ke⁠noontehsetc shiiwihtaakanini.

²³ Aaniin hsa ko Kishemanitoo kihcikiishikonk eyaatc keshi anoohkiitc, mii hsa ko 'i weweni ke⁠ishihcikenaaniwaninik onci otanami'ewikamik, kekoon ke⁠onci anwaapantansik nintokimaawiwin, ninkosihsa' kaye.

²⁴ Miitahsh kaye enaahkonikeyaan ci⁠tipa'ike'aahsiwintwaa takiihs shooniyaan (tax). Iki anami'ewikimaak, Liipaai kaa⁠ontahkaanesiwaatc, kaa⁠nikamowaatc, kenawentamowaatc ishkwaantem, kihci anami'ewanohkii'aakanak kaye, awenen hsa ko ke⁠tananohkiitc kihci anami'ewikamikonk, kaawiin ta⁠tipa'ike'aahsiiwak.”

²⁵ “Kiin itahsh wiin Esara ci⁠aapacihtaawatc kakiihtaawentamowin kiKishemanitoom kaa⁠miinihk, onakim onaahkonikewikimaak, ke⁠onaahkonikewaatc kaye, ke⁠onaahkonaawaatc weweni kahkina pemaatisinitc eyaanitc Eshi ninkaapii'anowank Iyoohparetiis, kahkina kehkentamowaatc otoonahshowenini kiKishemanitooman. Kika kihkino'amawaak hsa iki kaye kehkentansikwaa.

²⁶ Awenen itahsh iko ke⁠na'ihtansik onahshowenitc kiKishemanitooman, kihciokimaan kaye enaahkonikenitc, mii hsa awe kehcinaac ke⁠inaahkonintc ci⁠nipotc, komaa kaye ci⁠maaciinintc, komaa kaye ci⁠mahkamintc otaya'iiman, komaa kaye ci⁠kipa'ontc,” kii‑ishipii'ikaateni.

Esara Kiinanaahkomaatc Kishemanitoon

²⁷ Miihsh Esara kaa⁠ihkitotc, “Taka ta⁠miikwehciwenimaa kaaTipenciketc, weKishemanitoomiwaatc kikehteya'aaminaapaniik, kaakii ishi'aatc kihciokimaan ote'iniink ci⁠kihtentaminitc kaaTipenciketc owaahkaa'ikan eyaanik Ceroosalamink.

²⁸ Kishemanitoo hsa kaashi minotootawitc wenci minwaapamimitc maawac kihciokimaan, okiikitoowininiimini kaye, i'i kaye kahkina meshkawentaakosinitc otaanihkewikimaamini. KaaTipenciketc hsa ninKishemanitoom ekii wiiciiwitc, kaakii onci maawantoonakwaa kaa⁠niikaanisiwaatc ininiwak i'imaa onci Isriyal ci⁠pikiiwe wiiciiwiwaatc o'omaa Isriyalahkiink,” kii‑ihkito Esara.