Esara 1 - Ojibwe Kihcimasina'ikan

Kihciokimaa Saairahs Kiihkanoonaatc Coowa' Cikiiwenitc

¹ Peshikopipoon tahsh kaakiih kihciokimaawitc weti Persha (Persia) ahkiink Saairahs (Cyrus) eshinihkaasotc, kaaTipencikenitc hsa okii inentamo'ikoon ote'ink. Miitahsh i'imaa kaakii onci ishihsenik Ceramaayawan (Jeremiah) kenootamawaanitc Kishemanitoon kaakii ihkitonikopanen. Miitahsh i'i kihciokimaa Saairahs kaakii anoohkiitc misiwe eshi tipentank ahkiini ci⁠papaa tipaacimonaaniwaninik, kii⁠anoohkii kaye ci⁠oshipii'ikaatenik. Miitahsh o'o kaa⁠ishipii'iketc,

² “Mii hsa 'oweni Saairahs kehciokimaawitc Persha ahkiink ehkitotc, ‘KaaTipenciketc kaa⁠Kishemanitoowitc kihcikiishikonk ohsha ninkii miinik kahkina okimaawiwinan o'omaa ahkiink kaa‑ayaanikin, wiin kaye ninkii onakimik ci⁠oshihtooyaan kihci anami'ewikamik ke⁠tashi anami'ehtawintc weti kihci ootenaank Ceroosalamink (Jerusalem), Coota (Judah) ahkiink.

³ Awenen hsa piko eyaakwen weti kaashi maamawi ayaayek kiinawaa kahkina Kishemanitoo opimaatisiima' kaa'ikooyek, Kishemanitoo tahsh kika wiiciiwikowaa. Pisaan hsa ko kika ishaam kihci ootenaank Ceroosalamink weti Coota ahkiink, ci⁠awi kiiwe oshihtooyek ke⁠tashi anami'ehtawintc kaaTipenciketc, Isriyalak weKishemanitoomiwaatc. Wiin iitok kaa⁠Kishemanitoowitc, miihsh kaye i'imaa Ceroosalamink eyaatc.

⁴ Kahkina hsa iki kaakiih shaapwiiwaatc, aaniinti piko eshitaawaakwen, taka pemaatisinitc kaa⁠wiici'ayaamaawaatc oka wiici'ikowaa'. Oka miinikowaa' waapaapihko shooniyaan, osaawi shooniyaan kaye, aapacihcikanan kaye, pishihkiwa' kaye. Ta⁠tako miinaawak hsa kaye ke⁠pakitinikaakewaatc owaahkaa'ikaniniink Kishemanitoon weti kihci ootenaank Ceroosalamink.’ ” Mii hsa o'owe kaakii ishipii'iketc.

⁵ Iki tahsh entahsotaawinink kaakii niikaanisiwaatc Cootahkaank, Pencimanihkaank (Benjamin) kaye kaakii ontahkaanesiwaatc, iki kaye anami'ewikimaak, Liipaai kaa⁠ontahkaanesiwaatc kaye, kahkina ikiweniwak kaye kaakii inentamo'ikowaatc Kishemanitoon ci‑ishihcikewaatc. Miihsh kaa⁠ishi oshiihtaawaatc ewii ishaawaatc ewii anta oshihtoowaatc owaahkaa'ikanini kaaTipencikenitc weti Ceroosalamink.

⁶ Miitahsh kahkina ekii wiici'ikowaatc owiicitaamaakaniwaa' ekii miinikowaatc waapaapihko shooniyaan, osaawi shooniyaan kaye, aapacihcikanan kaye, pishihkiwa' kaye. Kekoonan kaye kii⁠miinaawak kaakii akintenikin pehkihsh itahsh ekii miinintwaa ke⁠pakitinikaakewaatc.

⁷ A'a tahsh kihciokimaa Saairahs okiih pi saakisihtoonan aapacihcikanan kaakii onci tipentaakwaninikin i'imaa owaahkaa'ikaniniink kaaTipencikenitc. Nepakanaasar (Nebuchadnezzar) kaakii⁠kihciokimaawikopanen iitok Ceroosalamink kii⁠onci piitookopanen, miihsh kaa⁠ishi piintikatookopanen omanitoohkaana' owaahkaa'ikaniniink.

⁸ Miitahsh kihciokimaa Saairahs kaakii anoonaatc kaa⁠naanaakaci'aanitc okimaawi shooniyaan Mihtariitaht (Mitherdath) eshinihkaasonitc, ci⁠piitoonitc ini aapacihcikanan. Miitahsh kaa⁠ishi sakahkakintaminitc ekii miinaanitc ini Sheshpesaran (Sheshbazzar) kaakii kanawenimaanitc i'iweniwa' Coota kaakii onci tipentaakosinitc.

⁹ Miiwan itahsh ono kaa⁠miinaanitc; nihsimitana (30) onaakanan wesaawaapihko shooniyaa waapihkowaninikin, mitaahswaahk (1,000) onaakanan kaa⁠waapaapihko shooniyaa waapihkowaninikin, niishtanashishaankahso (29) kaye wiihsiniwi aapacihcikanan.

¹⁰ Nihsimitana (30) onaakanenhsan wesaawaapihko shooniyaa waapihkowaninikin, niiwaahk (400) onaakanenhsan kaa⁠waapaapihko shooniyaa waapihkowaninikin, mitaahswaahk (1,000) itahsh kotak wiihsiniwi aapacihcikanan.

¹¹ Kahkina tahsh kekoonan kaakii osaawaapihko shooniyaa waapihkowaninikin, kaakii waapaapihko shooniyaa waapihkowaninikin kaakii maaciitoowaatc naanink mitaahswaahk niiwaahk (5,400) kiih⁠tahsininiwan. Miiwan hsa ono Sheshpesar kaah⁠tako maaciitootc kii⁠wiiciiwaatc Isriyala' kaakiih kanawentaakosinitc. Paapilan (Babylon) ahkiink tahsh kii⁠onci maacaawak Ceroosalamink ekii ishaawaatc.