ᐃᐲᔑᔭᓇᒃ 6 - Ojibwe Kihcimasina'ikan

Apinoonciishak, oniiki'ikomaak kaye ehkanoonintwaa

¹ Kiinawaa tahsh apinoonciishak, na'ihtawihkwak kiniiki'ikowaak, aaniihsh kaaTipenciketc okii'ishionentaan, aahpici hsa kaye onishihshin i'i ci‑ishihcikeyekipan.

² Kihtenimihkwak kitetewaak, kimaamaawaak kaye, mii hsa o'owe payesh inaahkonikewinink kaaishitashintek ahshotamaakewin:

³ “Aahpici hsa kikaminohsem, kinwesh kaye kikapimaatisim o'omaa ahkiink,” e'ishihsink.

⁴ Kiinawaa otetemaak keko kakaanci'aahkekwaanik kiniicaanihsiwaak cinishkaatisiwaatc. Ishiompiki'ihkwak, ishimaamiinomihkwak, ishikihkino'amawihkwak kaye ci‑ishihcikewaatc kaaTipencikenitc kaakii'ishionahcikenitc.

Opamiihtaakek, okimaak kaye ehkanoonintwaa

⁵ Kiinawaa opamiihtaakek na'ihtawihkwak iki kaaotookimaamiyek, o'omaa ahkiink kaa‑ayaawaatc. Kihtenimihkwak, kohtaanenimihkwak kaye tepwe i'imaa kite'iwaank, citootawekwaa taapishkoo kaatootawek Christ.

⁶ Kaawiin wiinehta ehkanawaapaminekwaa, ci‑ishihcikehsiwek ininiwak ehta ciminwaapaminekwaa. I'imaa hsa kite'iwaank ishihcikek Kishemanitoo kaaishiantawentank, aaniihsh Christ kitanohkiihtawaawaa.

⁷ Ciihkentamok itahsh i'i kaaishipamiihtaakeyek, ci‑ishihcikeyek taapishkoo kaaTipenciketc e'anohkiihtawek, kaawiin wiin ininiwak.

⁸ Kihkentamok itahsh o'o, aaniin hsa ko awiya eshiminotootank, kaaTipencikenitc hsa okakiiwetootaakoon, komaa kaye enohkiihtamaakekwen ehtipenintisohsik, komaa kaye tepenintisokwen.

⁹ Kiinawaa tahsh kaaokimaawiyek, mii hsa peshikwan tootawihkwak kaa‑anohkiihtamawinekwaa. Keko kaye kakwesekimaahkekwaanik, aaniihsh otOokimaamiwaan kaye kiinawaa tahsh kitOokimaamiwaa kihcikiishikonk ayaa. Kahkina hsa awiyan peshikwan otinenimaan.

Kishemanitoo kaapihsihkamo'inek miikaasowi kikishkikan

¹⁰ Miitahsh o'o ishkwaac waa'ininakook, kaaTipenciketc okihcimashkawisiiwinink, mii 'imaa ontinamok kimashkawisiiwiniwaa.

¹¹ Pihsihkamowaahk tahsh misiwe piko Kishemanitoo kaamiininek miikaasowi kikishkikan, cikashkihtooyek cionci⁠mashkawikaapawiihtawek maciaya'aa, ini kaye okakayenisi‑⁠ishihcikewinan.

¹² Kaawiin iitok owiiyawihsiiwak iki kaamiikaaninankwaa, aaniihsh ahcaahkowiwak kaaokimaahkantaakewaatc, kaakashki'ewisiwaatc kaye, iki kaye kaatipentamowaatc noonkom kaakashkiitipihkentaakwaninik ahkiini, iki kaye maciahcaahkwak kaamacinoocihcikewaatc pepahkaan ayaawinink kiishikonk kaaishiayayaawaatc.

¹³ Otaahpinamowaahk itahsh kahkina Kishemanitoo miikaasowi kikishkikanan kaamiininek cimisiwe aakooshkaakoyek, cikashkihtooyek cinanaahkwiiyek ahpii kiishikahk macikekoon nooci'ikoyek, kahkina kaye kekoon ci‑ishihcikeyek cimashkawikaapawiyek.

¹⁴ Mashkawikaapawik itahsh wiinke, ehkihcihpisoyek i'i tepwewin, ehkikishkamek kaye i'i kwayahkwaatisiwin taapishkoo i'i piiwaapihk shimaakanihshak kaapihsihkamowaatc ohkaahkikaniwaank.

¹⁵ Mooshak ahshowisik ciwiintamaakeyek minwaacimowin kaaishitashintek keshipisaaniwiiciiwintc Kishemanitoo, mii 'i inahkisinek.

¹⁶ O'o tahsh maawac iko ishihcikek: otaahpinamok i'i tepweyentamowin, cionakaa'ikaniyek, cikashkihtooyek ciaahtawe'amowek kahkina kaaishkotewaninikin maciaya'aa opihkwahkoon kaapimonek.

¹⁷ Pimaaci'ikoowin tahsh kaye pihsihkamok ciomiikaasowaanohkwaaniyek. Taka tahsh kaye Kishemanitoo otIhkitowin opashipa'ikewihkomaanik, otAhcaahkwan kaamiiniminek.

¹⁸ Kishemanitoo tahsh otAhcaahkwan kaaishiwiici'iminek mooshak anami'aak ehkakwetweyek kekoon piko. O'o tahsh e'ishihcikeyek, mooshak ahshawaapik, keko kaye pakiciihkek e'anami'aayek, e'anami'ehtamawimek kahkina Kishemanitoo opimaatisiima'.

¹⁹ Anami'ehtamawihshik itahsh Kishemanitoo cimiishitc kwayahk ihkitowinan keaapacihtaawak ahpii kiikitowak, cisoonkite'ewak citashintamowak kaakiihpi⁠kihkencikaatehsininik tepwewin kaatashintenik i'imaa minwaacimowinink.

²⁰ Mii hsa tahsh kaaonci⁠maamaancikwahpisoyaan, ehkiikitoohtamaakewininiiwiyaan e'anohkiihtawak kaaTipenciketc, o'o kaye kaatashintamaan minwaacimowin, cisoonkite'eyaan ci‑ihkitoyaan aaniin kaaishiantawentaakosiyaan.

Pwaal ishkwaac ekiihpooshoo'iwetc

²¹ Tihkihkahs (Tychicus) kaasaaki'ankitc niitanami'aanaan, aahpici kaye kaatepweyentaakositc kaa‑anohkiihtawaatc kaye kaaTipencikenitc, kikawiintamaakowaa kahkina kekoonini cikihkenimiyek aaniin eshiwepisiyaan, aaniin kaye eshiayaayaan.

²² Mii hsa tahsh i'i kaakii'onci‑ishinisha'wak weti kaaishiayaayek, ciwiintamawinek aaniin kahkina eshiayaawankitc kaye kiinawaa cimashkawentamek.

²³ Kahkina kaawiicitepwehtamoomintwaa, taka Kishemanitoon Kaaoyoohsimimintc, kaaTipencikenitc Ciisahs Christan kaye okamiinikowaan pisaanentamowinini, saaki'iwewinini kaatakohsininik tepweyentamowinini.

²⁴ Taka Kishemanitoon okishewaatisiwinini okawiiciiwikonaawaa kahkina kaasaaki'aawaatc kaaTipencikenitc Ciisahs Christan, wiihkaa osaaki'iwewiniwaa kaanipoomakahsininik.