ᐃᐲᔑᔭᓇᒃ 5 - Ojibwe Kihcimasina'ikan

Kaawaahseyaak pimaatisiwin

¹ Kiinawaa tahsh kaashaweniminek Kishemanitoo e'oniicaanihsiminek, nanaapinawihk eshipimaatisitc.

² Saaki'itiwinink kaye ishipimohsek taapishkoo Christ kaakii'ishishaweniminek, ekiihpakitinank opimaatisiwin kiinawint onci, pisaan iko cinihsintc ekiihpakitinamawaatc Kishemanitoon, okii'minaahsamawaan, mii hsa i'iweni Kishemanitoo kaaminomaantank.

³ Kaawiin iitok awaac ta‑ayaahsinoon pihshikwaatisiwin, wiinaatisiwin kaye, aaskonisiwin kaye citakowiintek i'imaa kaashiayaayek, ehtinowiyek Kishemanitoo opimaatisiima'.

⁴ Keko kaye wiinikiishwehkek, keko kaye kakiipaacikiishwehkek, keko kaye noociko ishimiihkinsihtaakosihkek, aaniihsh kaawiin i'i onishihshinsinoon. Mooshak itahsh tashintamok keoncimiikwehciwentamek.

⁵ Kehcinaac iitok kikihkentaam awiya kaapihshikwaatisitc, kaawiinaatisitc kaye, kaamihsawentank kekoonini pahkaan awiyan otaya'iimini, mii 'i aaniihsh eshimanitoohketc, kaawiin iki kaatootamowaatc okatepinansiinaawaa i'i kaawii'miinitinaaniwaninik i'imaa otOokimaawiwininiink Christan shikwa kaye Kishemanitoon.

⁶ Keko kaye pakitinaahkek awiya ciwaniwininek kakiipaacikiishwewinan aapacihtootc, aaniihsh miiwan ono kaaishihcikewaatc, kaashashiipihtamowaatc kaawii'oncipakamishkaakowaatc Kishemanitoon onishkaatisiwinini.

⁷ Keko tahsh wiiciiwaahkekwaanik iki o'o kaaishihcikewaatc.

⁸ Kiinawaa tahsh kashkiitipihkanonk kikii'ishipimaatisim otaanaank, noonkom itahsh kiwaahsenaakosim kaaTipenciketc onci. Miitahsh i'imaa ishipimohsek kaaishipimaatisiwaatc waahseyaank kaaishitipentaakosiwaatc.

⁹ Aaniihsh kaawaahseyaak oncinihtaawikiimakanoon kahkina kaaonishihshik minotootamowin, kwayahkwaatisiwin, tepwewin kaye.

¹⁰ Kakwekihkentamohk itahsh kaye wekonen ini kaaTipenciketc kaaminwaapantank.

¹¹ Keko kaye wiici'aahkekwaanik iki pemaatisiwaatc otishihcikewiniwaan kashkiitipihkanonk kaaoncitipentaakwaninikin, aaniihsh kaawiin kekoonini i'imaa otoontinansiinaawaa. O'o tahsh ishihcikek, mohshenamawihkwak ini otishihcikewiniwaan.

¹² Aaniihsh tepwe wiinke akatentaakwaniniwan citashincikaatenikin okiimooci‑ishihcikewiniwaan.

¹³ Kahkina tahsh kekoonan naakwanoon kiipiicikaatekin kaaishiwaahseyaak, kahkina tahsh kekoon kiinaakwahk mii 'imaa wencikihkencikaatek entinowank.

¹⁴ Miitahsh o'o kaaonci‑ishipii'ikaatek Kihcimasina'ikan: “Koshkosin kaanipaayan! Kiiwepimaatisin onci 'imaa kaaishinipoyan, Christ itahsh kikawaahseshkaak.”

¹⁵ Aahpici tahsh ayaankwaamisik aaniin eshipimaatisiyek, keko ishipimaatisihkek taapishkoo kaakakiipaatisiwaatc. Kaaishipimaatisiwaatc itahsh okakiihtaawentamook ishipimaatisik.

¹⁶ Kakweminwaapacihtook hsa minihk kaashitawinamaakooyek ciminohcikeyek, aaniihsh aahpici mooshak macikiishikan.

¹⁷ Keko tahsh kakiipaatisihkek. Nihsitohtamowaahk ihsa kaaTipenciketc otinentamowin.

¹⁸ Keko kiiwashkwepiinotankek i'i shoominaapo, kikanihshiwanaaci'itisom. O'o tahsh ishihcikek, pakitinimihk Kishemanitoo otAhcaahkwan mooshak cimooshkineshkawiminek.

¹⁹ Ishikakanoonitik ehkitoomakahkin Kihcimasina'ikani Nikamonan, anami'enikamonan kaye, ci‑ina'amowek kaye Kishemanitoo otAhcaahkwan kaamiininek nikamonan, cinanikamoyek, cinanikamohtawek kaaTipenciketc kite'iwaank.

²⁰ Mooshak kaye miikwehciwenimihk Kishemanitoo Kaaoyoohsimaawitc, wekonen iko wetihsikoyek ishimiikwehciwenimihk otishinihkaasowininiink kaaTipencikenitc Christ Ciisahsoon.

²¹ Kaye tahsh pakitinitisohkantaatik kaatahshiyek ehkohtaanenimek Christ.

Wiiwimaa, onaapemimaa kaye ehkihkino'amawintwaa

²² Kiinawaa wiiwimaak pakitinitisok cina'ihtawekwaa kinaapemiwaak taapishkoo ketootawekipan kaaTipenciketc.

²³ Aaniihsh onaapemimaa oniikaanishkawaan wiiwan taapishkoo Christ kaaishiniikaanishkawaatc kaamaamawenonitc otanami'aa', wiin aaniihsh okiihpimaaci'aa' i'i otanami'aa', mii 'i aaniihsh i'i owiiyaw.

²⁴ Taapishkoo otanami'aak kaaishipakitinitisohkantawaawaatc Christan, mii hsa peshikwan wiiwimaak ketootawaawaahpan onaapemiwaa' misiwe piko.

²⁵ Kiinawaa kaye onaapemimaak, shawenimihkwak kiwiiwiwaak taapishkoo Christ kaakii'ishishawenimaatc kaamaamawiino'aatc otanami'aa', ekii'oncipakitinank opimaatisiwin kaye.

²⁶ Mii hsa tahsh kaaoncipakitinitisotc, ewii'onahsaatc otanami'aa' Kishemanitoon citipinawewisinitc, ekii'aapacihtootc otihkitowin, ekii'ishipehkaapaawanaatc nipiink,

²⁷ ewiihpiitamaasotc i'i otanami'aa' taapishkoo e'oshkihkwewetc wiin ewii'onaapemimintc, wiinke cipehkinaakosinitc i'imaa kaaishiayaatc, kanake cipaahpaahtewinaakosihsinik, ciayoosiikinaakosihsinik kaye, wiinke hsa ciminonaakosinitc. Miitahsh eshiantawenimaatc wiin ehta ko ewiihtipinawewisitc, kekoonini kaye ci‑ishianaamentaakosihsinik.

²⁸ Miitahsh eshinaakwaninik onaapemimaak cishawenimaawaahpan wiiwiwaa' taapishkoo kaaishisaakihtoowaatc owiiyawiwaan. A'a hsa kaashawenimaatc wiiwan, mii hsa a'awe kaasaaki'itisotc.

²⁹ Aaniihsh kaawiin awiya wiihkaa oshiinkentansiin owiiyaw. Aahpici hsa weweni ahshantiso, weweni kaye onaanaakacihtoon i'i owiiyaw. Miitahsh entootawaatc Christ otanami'aa'.

³⁰ Aaniihsh kahkina Christ owiiyawink kitishitipentaakosimin.

³¹ O'o tahsh ishihsin: “Miitahsh o'o inini kaaoncinakanaatc oteten, omaamaan kaye ciwiiciiwaatc ini wiiwan. I'i e'niishiwaatc miitahsh eshinaakosiwaatc ehpeshikowaatc wiiyawiwaank.”

³² O'o tahsh kaakiihkihkencikaatehsinok otaanaank, aahpici kihci‑inentaakwan. O'o tahsh kaatashintamaan, aaniin Christ eshiwiiciiwaatc otanami'aa'.

³³ Taka tahsh kiinawaa kaatahshiyek shawenimihkwak kiwiiwiwaak taapishkoo kaaishisaaki'itisoyek, taka kaye wiiwimaak okakihtenimaawaa' onaapemiwaa'.