ᐃᐲᔑᔭᓇᒃ 4 - Ojibwe Kihcimasina'ikan

Aaniin eshimaamawanohkiimakaninik i'i wiiyawimaa

¹ Niin itahsh kaaTipenciketc e'anohkiihtawak kaaoncikipa'okooyaan, kitishipakohsenimininim, aahpici ehkihci‑inentaakwahk kaashikanoonikooyek, kiiantominek Kishemanitoo, miitahsh inahke ci‑ishipimaatisiyek.

² Mooshak kakwetapahsenimohk, kakwenoohkaatisik, shashiipentamohk kaye, kakweshashiipenintik ciwaapanta'itiyek ehsaaki'itiyek.

³ Maawac hsa ko kihcianohkiik cikanawentamowek wiiciintiwin Kishemanitoo otAhcaahkwan kaamiininek, pisaanisiihkantaatiwin aapacihtook kaaoncimincimishkaak kaaishiminowiiciintiyek.

⁴ Mihcipeshikwan hsa wiiyawimaa, mihcipeshiko kaye a'a Ahcaahk, mihcipeshikwanini kaaishiantominek Kishemanitoo, miitahsh i'imaa eshiahpenimoyek.

⁵ Mihcipeshiko kaye kaaTipenciketc, mihcipeshikwan kaye tepweyentamowin, mihcipeshikwan kaye siika'antaasowin,

⁶ mihcipeshiko kaye Kishemanitoo, kahkina awiyan Kaaoyoohsimikotc, wiin kaye kahkina awiya' otipenimaa', misiwe kaye tananohkii, wiin kaye kahkina awiya' opimaatisiwininiink ayintaa.

⁷ Kahkina tahsh kaatahsopeshikoyank Christ omiikiwewinink kikii'ishishawentaakosimin, ekii'ishimaamaata'ooninank omiikiwewinan kaakii'onentank ci‑inanohkiiyank.

⁸ Kihcimasina'ikan tahsh ishipii'ikaate: “Ahpii hsa weti ishpimink kii'ishaatc, kaahcitinikana' niipiwa' okii'maaciinaa', miikiwewinan tahsh okii'miinaa' ininiwa'.”

⁹ Wekonen tahsh “ishpimink kii'ishaatc” kaaicikaatek? Mii hsa o'o kaaicikaatek, pinamaa hsa maawac iko tapahsahkiink kiihpiishaa.

¹⁰ A'a tahsh kaakiihpinaashiitc o'omaa ahkiink, mii hsa a'a peshikwan ishpimink kaakii'ishaatc, waahsa weti awahshime kihcikiishikonk ekii'ishaatc, kahkina kekoonini ewii'mooshkineshkank.

¹¹ Wiin itahsh kaakii'miinaatc ininiwa' anohkiiwinan, aaninta ishinisha'waakan citinowinitc, aaninta citinowinitc kaakanoocikehtamawaanitc Kishemanitoon, aaninta cipapaawiintamaakenitc minwaacimowin, aaninta cikanawenimaanitc otanami'aa', aaninta kaye cikihkino'amaakenitc.

¹² Miitahsh i'i kaakii'oncimiinaatc ewiihkwayaanci'aatc Kishemanitoo otanami'aama' citootaminitc owaawiici'iwewi⁠anohkiiwin, cioncikiishinaakwaninik e'ompihcikaatenik Christ owiiyaw,

¹³ paanimaa kahkina kiipeshikwentaakwahk kitepwehtamowininaan, kaaishikihkenimank kaye Kishemanitoo oKosihsan, miitahsh i'i payesh cinikiishaapewiwank, ciocihcishkaawank omooshkinewentaakosiwinink Christ mayaa kekiinawint ci‑ishinaakosiyank.

¹⁴ Taka tahsh kaawiin apinoonciishink kikaishiayaahsiimin, cipapaamaa'okohsiwank, cipapaamiwepaahshihsiwank aanti piko wentaanimahk, aaniihsh taapishkoo nootinonk inentaakwanini okihkino'ikewiniwaan iki kaawanikihkino'ikewaatc. Aaniihsh okashki'aawaa' aaninta e'wanimaawaatc e'aapacihtoowaatc kaakakayentaakwaninikin otishihcikewiniwaan.

¹⁵ Kiinawint tahsh wiin saaki'iwewinink e'onciimakahk kaatashintamank tepwewin, misiwe kikaishimaaciikimin inahke Christ kaaishiayaatc, kaaniikaanishkank owiiyaw.

¹⁶ Wiin itahsh kahkina kekoonini e'naakacihtootc, mii 'i kaaonci maamawi minohsinkin ini pepahkaan kaainwaatekin i'imaa wiiyawimaank. Mii 'imaa kahkina wencimincimishkaak kaaishiayoonahcikaatekin ayaanihkawikanaanan. Entahso peshikwahk hsa inaapatan kekii'inanohkiimakahkipan. Miitahsh o'o saaki'itiwin enanohkiimakahk, kaaoncimaaciikihk wiiyawimaa, kaaonci mashkawi'itisoomakahk kaye.

Oshkipimaatisiwin kaamiikiwetc Christ

¹⁷ Kitayaankwaamimininim itahsh kaaTipenciketc otishinihkaasowinink: keko awahshime ishipimaatisihkek taapishkoo iki ekaa kaaCoowiwihsikwaa kaaishihcikewaatc, aaniihsh otinentamowiniwaan kaawiin kekoon ahpiihtentaakwahsininiwan.

¹⁸ Kashkiitipihkaniniwan kaye onaakatawentamowiniwaan, kaawiin kaye i'imaa Kishemanitoo kaashipimaaci'iwenitc ishitipentaakosihsiiwak, aaniihsh kaawiin oncita owiihkakwekihkenimaahsiwaawaan aaniihsh kaye ehshashiipihtamowaatc.

¹⁹ Kaawiin kaye awaac pankii akaciwin otayaahsiinaawaa, pisaan iko wiinke anoociko e'ishihcikewaatc aaniin wiinehtawaa ko keonciminwentamowaatc, e'ishihcikewaatc kahkina ini tino kaawiinentaakwaninikin, aahpici kaye e'onsaamentamowaatc keyaapi ewii'ishihcikewaatc.

²⁰ Kaawiin tahsh wiin i'i nahke kikii'ishikihkino'amaakohsiwaa Christ.

²¹ Tepwe iitok kikii'noontawaawaa a'a Christ, kikiikihkino'amaakowaa kaye. Mii hsa 'iwe kaanoontamek tepwewin kaamihkikaatek Ciisahsonk,

²² ekiihkihkino'amaakooyek ketootamek ini kikehteinaatisiwiniwaan, pahkeya'ii ci‑ishiwepinamek, aaniihsh mii 'imaa kaaishikakayenisiimakahkin macimihsawentamowinan kaakii'anionci nihshiwanaacihcikaatek.

²³ Noonkom itahsh anioshki'ikoowisik kitahcaahkowaank kaaoncinaanaakatawentamek.

²⁴ Pihsihkamok kaye i'i oshkipimaatisiwin kaakii'oshihcikaatek ci‑ishinaakwahk Kishemanitoo kaaishinaakositc, tepwe cikwayahkwaatisiihkantawekwaa pemaatisiwaatc, tepwe cikwayahkotootamowek Kishemanitoo kaaishiantaweniminek.

²⁵ Haw itahsh poonihtook kikiiwanimowiniwaan! Kaatepweyentaakwahk tahsh waawiintamawihk kahkina kaatahsopehpeshikoyek kiicipimaatisiik, aaniihsh kahkina kaatahshiyank peshikwan kitishitipentaakosimin.

²⁶ Kiishpin tahsh nishkaatisiyek, keko i'imaa kinishkaatisiwiniwaank oncimacitootankek. Poonikitaasok cipwaa pankihshimotc kiisihs.

²⁷ Keko kaye tawinamawaahkek maciaya'aa kipimaatisiwiniwaank.

²⁸ Taka kaye a'a kaanihtaakimootitc tapoonikimooti, nawac anohkiitc taonishihshinini oninciin ciaapacihtoohpan. Aaniihsh mii 'imaa keonciayaatc kekoonini cimiinaatc i'i kaanoontehsenitc.

²⁹ Keko kaye kaanihshiwanaaci'iwemakahkin ihkitowinan aapacihtoohkek kiikiikitoyek, ini hsa kaawiici'iwemakahkin ihkitowinan aapacihtook, ciwiici'intwaa noonkom iko kaaishinoontehsewaatc, iki hsa kaapisintawinekwaa cionciminohsewaatc.

³⁰ Keko kaye maanentamo'imaahkek kaapehkaatisinitc Kishemanitoo otAhcaahkwan, mii 'i aaniihsh i'imaa wencikihkinawaaci'ikooyek aanti wencitipentaakosiyek, ninkotink hsa Kiishikaninik Kishemanitoo okakiishihtoon kipimaaci'ikoowiniwaa.

³¹ Wepinamohk tahsh kahkina nishkentamowinan, aahkokitaasowin kaye, nishkaatisiwinan kaye, nishkikishiiwekiihkaantiwin kaye, macitashintiwinan kaye, ini kaye kiimoocishiinkencikewinan.

³² Minotootaatik, kohpaatenintik kaye weweni ciwiici'itiyek, poonentamaatik kaye taapishkoo Kishemanitoo kaakii'ishipoonentamawinek i'imaa Christink.