ᐃᐲᔑᔭᓇᒃ 3 - Ojibwe Kihcimasina'ikan

Pwaal kaakii'inanohkiitc ekaa kaaCoowiwihsinik onci

¹ Mii hsa o'o niin Pwaal (Paul) kaa'oncitahkonikooyaan e'anohkiihtawak Christ Ciisahs kiinawaa onci ekaa kaaCoowiwihsiwek.

² Kehcinaac maawiin aasha kikii'noontaam Kishemanitoo kaakishewaatisitc ekii'miishitc o'o anohkiiwinini kiinawaa ciminohseyek.

³ Wiin ihsa piko Kishemanitoo ninkii'waapanta'ik cikihkentamowak i'i kaakiihkihkencikaatehsininik otinentamowin. Aasha pankii ninkiihtashintaan o'o kaakii'oshipii'amawinakook.

⁴ Kiishpin hsa anamihtooyek kikanihsitohtaam ihsa, kikakihkentaam kaye aaniin eshikihkentamowak i'i Christ otinentaakosiwin kaakiihkihkencikaatehsininik.

⁵ Weti tahsh otaanaank ininiwak kaawiin kii'waapanta'aahsiiwak cikihkentamowaatc o'o. Kishemanitoo tahsh wiin iko ekii'aapaci'aatc otAhcaahkwan okii'waapanta'aa' i'i otishinisha'waakana' otipaacimowininiima' kaye kaakihtentaakosinitc.

⁶ Miitahsh o'o kaaitamaan: Iki hsa kaye kaaCoowiwihsikwaa minwaacimowinink kewiinawaa okaoncitepinaanaawaa kaawiihtepinaminitc Coowa' Kishemanitoon kaawii'miinikonitc. Mii hsa kaye wiinawaa i'imaa eshiwiitoohkaasowaatc Christ owiiyawininiink. Kii'inentaakosiwak kaye wiinawaa cimiinintwaa Kishemanitoon kaakii'ishiahshotamaakenitc i'imaa Christ Ciisahsonk.

⁷ Niin ninkiihtinowi'ikoo cianohkaatamaan Minwaacimowin, Kishemanitoo ekii'ishishawenimitc ci‑inanohkiiwak, ekii'oncimiishitc kaashianohkiimakaninik omashkawisiiwin.

⁸ Niin itahsh nawac nintapahsentaakos ahpiihc wiin iki maawac kaatapahsentaakosiwaatc Kishemanitoo opimaatisiima'. Shaakooc itahsh ninkii'ishimiinikoowis ci‑ishiwitawakwaa ekaa kaaCoowiwihsikwaa minwaacimowinini, cikihkentamowaatc wiihkaa kaatetakowiintehsininik aaniin ehpiihciwenootisinitc ini Christan.

⁹ Kishemanitoo niin ninkii'aapaci'ik kahkina pemaatisinitc cipeyahteyaapantaminitc aaniin waaishianohkiihtootc kaakiihkihkencikaatehsininik otinentamowin. I'iweni tahsh otinentamowin mewisha otaanaank Kishemanitoo kahkina kekoonini kaaoshihtootc, mii 'iweni mooshak kaakiihpikaatootc cikihkencikaatehsininik.

¹⁰ Noonkom itahsh Kishemanitoo, otanami'aa' otaapaci'aa' e'waapanta'iwetc okakiihtaawentamowin. Miitahsh i'i kaa‑ahcaahkowentaakosinitc kaaokimaahkantaakenitc kaainintwaa, kaakashki'ewisinitc kaye, kihcikiishikonk kaa‑ayaanitc cipikihkentaminitc Kishemanitoo e'ayaatc kakiihtaawentamowin.

¹¹ Kishemanitoo hsa kii'ishihcike mewisha otaanaank kaakiihpi‑inentamokopanen i'imaa tahsh Christ Ciisahsonk kaaTipeniminank, mii 'imaa eshinaakwaninik i'i ekiihkiishihtootc kaawii'ishihcikekopanen.

¹² Christ tahsh e'wiiciiwank, ehtepwehtawank kaye kaaoncisoonkite'eyank, kaaoncikehcinaa'oyank kaye ahpii kiipinaasihkawank Kishemanitoo weti kaaishiayaatc.

¹³ Miitahsh eshipakohsenimininakook, cipiikote'ehsiwek o'o kiinawaa kaaoncikakwaatakihtooyaan, kiinawaa hsa kikaonciminohsem o'o kaashikakwaatakihtooyaan.

Christ keshikihkentamowank eshisaaki'inank

¹⁴ Miitahsh o'o kaaonci ociciinkwanapihtaayaan enaahsamiitc Kaaoyoohsimintc,

¹⁵ mii 'i iitok kahkina awiyak wentinamowaatc owiinsowiniwaan kihcikiishikonk, ahkiink kaye kaa‑ayaawaatc, kaatahso⁠pepahkaanwewaanakisiwaatc kaaotetewaatc.

¹⁶ Nimashkawikakwecimaa Kaaoyoohsimintc cimiininek, kaaishiwenootaninik okihci‑inentaakosiwin cioncimashkawisii'ikoyek i'imaa kaashimashkawisiinitc otAhcaahkwan. Cimashkawisiiyek i'imaa piincaya'ii kipimaatisiwiniwaank.

¹⁷ Ehtepwehtamek kaye Christ ci‑ishitaatc i'imaa kite'iwaank, kiinawaa kaye taapishkoo watapiin kaakotaawikihkin, cikotaawikiyek saaki'iwewinink, kaashionahtek kaye saaki'iwewin mii 'imaa ci‑ishiaayiitapiyek.

¹⁸ Cikashkihtooyek kaye ciwiicikihkentamoomimek i'i Kishemanitoo kahkina otanami'aama' aaniin enikohkwentaakwaninik Christ osaaki'iwewin, aaniin ehpiihcimankateyentaakwaninik, aaniin kaye ehpiihcikinwewentaakwaninik, aaniin kaye ehpiihci‑ishpentaakwaninik, aaniin kaye ehpiihciwaahsawentaakwaninik anaamaya'ii inahke.

¹⁹ Kekeht kaye cikihkentamowek Christ osaaki'iwewin, wiihkaa ketepikihkencikaatehsininik, cimooshkineshkaakowek kaye kahkina Kishemanitoo otinaatisiwin eshimooshkinewentaakwaninik.

²⁰ A'a tahsh Kishemanitoo kaa‑anohkiimakaninik omashkawisiiwin i'imaa kipimaatisiwininaanink, okashkihtoon awahshime ci‑ishihciketc kaaishikakwecimank, aaniin kaye enentamowank,

²¹ taka hsa wiin mooshak iko takihci‑inentaakosi i'imaa otanami'aa' kaaishiayaanitc, i'imaa kaye Christ Ciisahsonk mooshak iko ahpane keniayayaanik. Emen.