ᐃᐲᔑᔭᓇᒃ 2 - Ojibwe Kihcimasina'ikan

Ekiihpimaaci'inank Christ

¹ Kiinawaa tahsh kikii'nipom kimacitootamowiniwaank, kiwanihcikewiniwaank kaye.

² I'i hsa ekii'ishipimohseyek kaaishihcikaaniwank o'omaa ahkiink, ekii'ishihcikeyek kaye kaaishihciketc a'a kaatipenimaatc kaatipentaminitc kashki'ewisiwin o'omaa mishahkiishikonk, a'a ahcaahk kaatipenimaatc i'i pemaatisininitc kaashashiipihtaminitc.

³ Kahkina tahsh kekiinawint i'i kikii'ishipimaatisimin kaaishipimaatisiwaatc, ekii'ishihcikeyank aaniin eshipihshikwaatentamoomakahkin kikehteinaatisiwininaanin, ekii'ishihcikeyank kaye eshimihsawentamoomakahkin kikehteinaatisiwininaanin, kitinentamowininaanin kaye. Ekii'ishinihtaawikiwankopanen kaye kikii'inaatisimin cipakamishkaakoyank Kishemanitoo onishkaatisiwin, taapishkoo kotak awiyak kaashipimaatisiwaatc.

⁴ Kishemanitoo tahsh aahpici e'wenootaninik okoohpaasinaakewin, aahpici kaye ekiihpaahtiinahtootc oshawencikewin kaakii'ishishaweniminank,

⁵ mekwaa tahsh kii'nipowank i'imaa kimaci‑ishihcikewininaanink, wiin ihsa Kishemanitoo kikiihpimaatisi'ikonaan kaakiihpimaatisi'aatc Christan. Okishewaatisiwin aaniihsh kitooncipimaaci'ikoom.

⁶ Kikii'ishi'ikonaan kaye ciwiicikiiwepimaatisiimimank ini Christan, kikii'ishi'ikonaan kaye ciwiitapimimank weti kihcikiishikonk ci‑ishiayaawank Christ Ciisahsoon kaaishiayaanitc.

⁷ Miitahsh i'i kaakii'onci‑ishihciketc, i'i hsa piciinak kaawiihpiahkiiwaninik ewii'waapanta'iwetc kaa⁠kihciwenootaninik okishewaatisiwin, i'imaa tahsh Christ Ciisahsoon opimaatisiiwininiink mii 'imaa eshinaakohtootc.

⁸ Okishewaatisiwinink ohsha kikii'oncipimaaci'ikoom, aaniihsh kikiihtepweyentaam. Kaawiin wiin kiinawaa i'i kikashkihtamaasohsiim, Kishemanitoo ohsha i'i omiikiwewin.

⁹ Kaawiin wiin kaye anohkiiwinink onciihsinoon pimaaci'ikoowin, awiya hsa inini ekaa cioncikihcikaakiikitohsik.

¹⁰ Kiinawint itahsh Kishemanitoo otishimaaciiwin, Christ Ciisahsonk kikii'oshi'ikonaan ciminohcikewank, wiin aaniihsh kikiihkwayaanciihtamaakonaan keishipimaatisiwank.

Ehpeshikwentaakosiyank e'wiiciiwank Christ

¹¹ Taka tahsh maamihkawik kiinawaa ekii'ishinihtaawikiyek ekaa Coo citinowihsiwek, “ekaa kaakihkinawaatashakeshokoohsiwek” kaye ekii'ishinihkaaninekwaa iki kaakihkinawaatashakeshontwaa, oninciimaank iitok onciini i'i kaatootawintwaa i'imaa owiiyawimaank.

¹² I'i tahsh ahpii kaawiin kikii'wiiciiwaahsiwaawaa Christ, kaawiin kaye kikii'oncitipentaakosihsiim Isriyalak (Israel) kaaishitipentaakosiwaatc, kaawiin imaa kikiihtakonikoohsiim i'imaa kaakii'ishi⁠ahshotamaatinaaniwankipan, kaakii'ishi⁠ahshotamawaatc Kishemanitoo opimaatisiima', ekii'ayaahsiwek kaye ahpenimowin, ekii'oKishemanitoomihsiwek kaye o'omaa ahkiink.

¹³ Kikii'naawinaakosim i'iwe ahpii. Noonkom itahsh i'imaa Christ Ciisahs omiskwiimink, aasha pehsho kaakii'oncipiinikoyek.

¹⁴ Wiin aaniihsh Christ kaapiitamawinank pisaan ciwiiciintiyank, wiin kaakii'ishi'aatc cipeshikwentaakosinitc i'i kaakiihshiinkenintinitc, wiin kaye kaakiihpiikopitootc maashiwiiciintiwin taapishkoo pahkehcikanink kaakii'inentaakwaninik.

¹⁵ Wiin kaye owiiyawink okiihkaahsii'aan Onahshowewin aaniin kaakii'inaahkonikemakaninik, aaniin kaye eshihcikemakaninik. Miitahsh kaakii'inentank cipeshikwentaakosinitc pemaatisinitc ekiiwii'oncioshkioshi'aatc kaaishiniishwewaanakisinitc, ewii'ishi'aatc pisaan ciwiiciintinitc Coowa' i'i kaye ekaa kaaCoowiwihsinik.

¹⁶ Wiin iitok kaye Christ ahpii kiinipotc aashiteyaahtikonk okii'nihtamawaa' i'i kaakii'ishishiinkenintinitc, ekii'naacipinaatc kwayahk ciwiiciintinitc. Ekii'ishi'aatc kaye cipeshikwentaakosinitc peshikwan wiiyawimaank cioncitipentaakosinitc. Aashiteyaahtikonk kaye okii'oncinaacipinaa' kwayahk ciwiiciiwaanitc Kishemanitoon.

¹⁷ Kiihpitakohshin Christ ekiihtashintamawinek kaashiminwaatotenik pisaan wiiciintiwin kiinawaa ekaa kaaCoowiwihsiwek kaakii'naawentaakosiyek kaye, kewiinawaa tahsh kaaCoowiwiwaatc kii'wiintamawaawak pisaan wiiciintiwin wiinawaa kaakiihpehshwentaakosiwaatc.

¹⁸ Wiin itahsh onci, kaaoncikashkihtaawank kiinawint kaashiniishwewaanakisiyank mincikahkina cipinaasihkawank a'a Kaaoyoohsimintc, aaniihsh kipeshikwentaakosiwaamin e'wiiciiwiminank kaapeshikonitc otAhcaahkwan.

¹⁹ Nashke tahsh kiinawaa ekaa kaaCoowiwihsiwek kaawiin awahshime kipiiwitewihsiim, kaawiin kaye kimayakentaakosihsiim, noonkom itahsh wiin kekiinawaa kitooncitipentaakosim i'i Kishemanitoo opimaatisiima' kaaishiayaanitc, Kishemanitoo kaye owaahkaa'ikanink kaaoncitipentaakosinitc.

²⁰ Miitahsh i'imaa kekiinawaa eshiahsikooyek ciwaahkaa'ikaniwiyek i'imaa kaakii'ishionaahkohsicikewaatc ishinisha'waakanak, i'i kaye Kishemanitoo otipaacimowininiima', Christ Ciisahs wiiniko Kaanihtamaapihkihshink Ahsin tinowi waahkaa'ikanink.

²¹ Aaniihsh mii 'imaa Christink kaaonciminwahtek i'i kahkina waahkaa'ikan, piinihsh e'animaaciikik, piinihsh itahsh Kishemanitoo okihcianami'ewikamik cianitinowaninik, kaaTipenciketc ketashianami'ehtawintc.

²² Christ e'wiiciiwinek kekiinawaa tahsh kaaonci⁠maamawionahkinikooyek e'oshihcikaatek waahkaa'ikan, mii 'imaa Kishemanitoo entaatc aaniihsh otAhcaahkwan i'imaa ayaawan.