Emahs 4 - Ojibwe Kihcimasina'ikan

¹ Noontamok o'o kiinawaa ihkwewak eyaayek Sameriyank (Samaria) Peshan (Bashan) ahkiink pishihkiink enentaakosiyek kaani ayaancipoyek. Kiinawaa iitok kimaanshi tootawaawaak kaa⁠niinamaatisiwaatc, kiwehsaani'aawaak kaye ketimaakisiwaatc. Miihsh kaye enekwaa kinaapemiwaak, “Taka piitamawihshinaam ke⁠minihkwaatamaank!”

² Kaa⁠Maawaci mashkawisiitc kaaTipenciketc kaa⁠kihtentaakositc hsa 'o ishi ahshotam, “Ta⁠ocihcihse hsa ci‑ishi kiishikahk ahpii ci⁠maaciinikooyek kahkina kaa⁠tahshiyek taapishkoo inahke kiikooyak kwaashkwepicikanink kaashi wiihkopinintwaa.

³ Entahshiyek hsa kika ishitaapaanikoom eshi pehshowank kaashi pahpakoneyaak waahkaayaapihkinikan keshi saakiciwepinikooyek,” ihkito kaaTipenciketc.

Isriyalak Kii'ishi'ayaawaatc Cikiikihkino'amawaahsiwintwaa

⁴ Miitahsh kaaMaawaci mashkawisiitc kaaTipenciketc eninek, “Maacaak Isriyalak Pehtal (Bethel) ootenaank ishaak ci⁠awi macitootamek. Kilkal (Gilgal) ootenaank kaye ishaak ci⁠awi kihci macitootamek. Pisaan kaye piinihkwahk aya'aawihshak kaa⁠nihtaa pakitinintwaa entahso kikishep, piitook kaye peshik kekoon entahso mitaahso eyaayek entahso nihsokiishik.

⁵ Pisaan kaye pakitinihk pahkweshikan kaa⁠ompisikaniwitc ci‑inwaanek miikwehciwi pakitinikewinink, pisaan kaye kihci maamiihkwaatamok ini kaa⁠nihtaa eshkwaaht pakitinamek. Mii iitok i'i nahke eshi minwentamek e⁠ishihcikeyek.”

⁶ “Kaah⁠tootawinakook kaashi ayayaayek entahsinkin kihci ootenawan ci⁠ayaahsiwekipan miicim, ci⁠ayaawaahsiwek kaye pahkweshikan eshi ayayaayek ootenaahkaank, shaakooc itahsh kaawiin kikiih pikiiwenotawihsiim,” ihkito kaaTipenciketc.

⁷ “Mii kaye kaah⁠tootawinakook ekiih pwaahtawi kimiwanohkeyaan maawac ahpii kaa⁠paahtek ahki. Ninkii ishihcike hsa peshik ootenaank cishi kimiwank, kaawiin itahsh kotak ootenaank kiih⁠kimiwansinoon. Kiih⁠kimiwan hsa kaye peshik kihtikewahkamikonk, kotak itahsh kihtikewahkamikonk kaawiin kiih⁠kimiwansinoon, kiih⁠paahte.

⁸ Wiinke hsa e⁠noonteyaapaakwewaatc, pemaatisiwaatc pepahkaan ootenaahkaank wenciiwaatc kii‑ishaawak kihci ootenaank ekii inentamowaatc ci⁠mihkamowaatc nipiini, kaawiin itahsh cikiih tepihsenik. Shaakooc itahsh kaawiin kikiih pikiiwenotawihshiim.”

⁹ “Miihsh kaye kaa⁠ishihcikeyaan ci⁠kihci kishinoowek, ci⁠otamwaapakwehsiihkaak ewii nihshiwanaacihtooyaan kaashi kihtikeyek. Pahpahkinek itahsh wiin okiih kitamwaawaa' pik tinowaahtikoo' (figs), shoominaahtikoo' kaye, shaakooc itahsh kaawiin kikiih pikiiwenotawihsiim,” ihkito kaaTipenciketc.

¹⁰ “Miitahsh kaye kaah⁠tootawinakook ci⁠kihci aahkosiyek taapishkoo kaakiih tootawakwaapan Iicip kaakii ayaawaatc. Ninkiih tootawaak kaye kitoshkiniikiimiwaak kaa⁠tashi miikaatiwintc ci⁠tashi nihsintwaa, kimihtatimoomiwaak kaye ci⁠kaahcitinintwaa. Kikiih tootawininim kaye ci⁠minaantamek ini wiiyawimaan kekwaanihsakimaakwahkin eshi kapehshiyek. Shaakooc itahsh kaawiin kikiih pikiiwenotawihsiim.”

¹¹ “Aaninta hsa kikii nihshiwanaaci'ininim taapishkoo kaakiih tootamaampaan ini ootenawan Swaatam (Sodom), Kamwaara (Gomorrah) kaye ecikaatekin. Kiinawaa hsa kaakiih shaapwiiyek mii 'i kaa⁠ishinaakosiyek taapishkoo mihtik kaa⁠piskanek ishkotenk kaa⁠onci otaahpinikaatek, shaakooc itahsh kaawiin kikiih pikiiwenotawihsiim.

¹² Miitahsh kaawii nana'ahsinakook kiinawaa Isriyalak. O'o tahsh ewiih tootawinakook, mii 'i ishi ahshwiik ci⁠nakishkawek kiKishemanitoomiwaa!”

¹³ “Kishemanitoo iitok kaakii oshihtootc waciin, nootin kaye kaakii oshihtootc. Okihkentaakohtamawaan hsa ininiwan inahke eshi naanaakatawentank. Kaa⁠kiishikaninik kaye wiin okashkihtoon ci⁠ani kashkiitipihkaninik. Wiin kaye kaa⁠pimohsaatank ahkiini eshi ishpaanik. KaaTipenciketc kaaMaawaci mashkawisiitc hsa ishinihkaaso,” ihkito kaaTipenciketc.