Emahs 1 - Ojibwe Kihcimasina'ikan

¹ Miitahsh o'o Emahs (Amos) kaa⁠ihkitohpan. Wiin iitok kaakii naakaci'aatc maanahcaanihsha' kaakii onciitc ootenaank Tehkooa (Tekoa) ecikaatenik. Niishopipoon (2) hsa cipwaa koshkohsenik ahki, mii 'i ahpii Emahs kaakii naakohtaakotc Kishemanitoon aaniin ke⁠ani ishihsenitc Isriyala' (Israel). Mii hsa 'i ahpii Yoosaaya (Uzziah) kii⁠kihciokimaawitc weti Coota (Judah) ahkiink. Ceroopooam (Jeroboam) tahsh wiin weti Isriyal ahkiink kiih⁠tashi kihciokimaawi kaakii otetetc Cihooaashan (Jehoash).

² Mii hsa 'oweni kaa⁠ihkitotc, “KaaTipenciketc hsa weti Saayanink (Zion) tashi kohtaanihtaakosi, Ceroosalamink kaye onci pinehsiiwihtaakosi. Miitahsh eshi paahtenik i'imaa okanawi maanahcaanihshiwe' kaashi ahshamaanitc otawahkaanini, mii kaye 'i kaa‑ani onci osaawaahtenikin mashkohsiwan wakicaya'ii waciink Kaarmal ecikaatenik.”

Kishemanitoo Aaniin Kaahtootawaatc Pemaatisinitc Pehsho Kaakiiwiicitaamaanitc Isriyala'

³ Miitahsh o'o kaaTipenciketc ehkitotc, “Iki hsa pemaatisiwaatc ootenaank Timaaskahs (Damascus) wenciiwaatc, etatawe nihtaa macitootamok, e⁠ani aanihke mooshak macitootamowaatc miihsh i'i kaawii onci nana'ahsakwaa. Kaawiin iitok awaac pankii okii manaaci'aahsiwaawaa' pemaatisinitc Kiliyat (Gilead) ahkiink wenciinitc, ekiih tootawaawaatc taapishkoo kihtikaanan kaashi wiihkopicikaatekin kaashi piiwaapihkwaapiteyaak aapacihcikan.

⁴ Miitahsh ke⁠onci tootamowak ci⁠caakitenik kihciokimaa Haseal (Hazael) otaawin, ninka ankwaahkisamowaan kaye Pen hetaat (Ben hadad) kaakii oshihtoohpan otahpa'iwewikamik.

⁵ Wiinke hsa ninka pikishka'aan i'i kihci ootenaawi ishkwaantem i'imaa ootenaank Timaaskahs (Damascus) kaa‑ayaak. Ninka caaki'aak kaye iki kaa⁠taawaatc i'imaa Epan Pahsatinaa (Aven Valley) ecikaatenik. Miihsh kaye ke⁠tootawak a'a kaa⁠okimaawitc Pehtiitin (Betheden). Iki hsa tahsh pemaatisiwaatc Siiriya (Syria) ahkiink kaa⁠onciiwaatc ta⁠maaciicikaniwiwak ci⁠tahkonintwaa, weti ahkiink Ker (Kir) ecikaatenik ta⁠ishiwinaawak,” ihkito kaaTipenciketc.

⁶ Miitahsh kaaTipenciketc eni ihkitotc, “Iki hsa pemaatisiwaatc ootenaank Kesa (Gaza) wenciiwaatc, etatawe nihtaa macitootamok, e⁠ani aanihke mooshak macitootamowaatc, miitahsh i'i kaawii onci nana'ahsakwaa. Onsaam aaniihsh okii maaciinaawaa' kahkina piko entahshinitc pemaatisinitc, weti Iitam ahkiink inahke ekii ishi ataawaakewaatc ci‑inwaasonitc opamiihtake'.

⁷ Ninka ishihcike hsa i'i kaashi waahkaayaapihkinikaatek ootena Kesa ci⁠ankwaahkitek. Ninka ankwaahkisamawaanan kaye otahpa'iwewikamikowaan.

⁸ Ninka nihsaak kaye iki kaa⁠okimaahkantamowaatc ini ootenawan Aashtaat (Ashdod), Ashkelan (Ashkelon) kaye kaa'icikaatenikin. I'iwe hsa kaye kihci ootena Ehkaran (Ekron) kaa'icikaatek niwii nana'ahtoon. Iki tahsh Pilistii kaatinowiwaatc kaa⁠ishkwiinowaatc kahkina ta⁠nipowak,” ihkito kaaTipenciketc.

⁹ Miitahsh kaye eni ihkitotc, “Iki hsa pemaatisiwaatc ootenaank Tayar (Tyre) wenciiwaatc, etatawe nihtaa macitootamok, e⁠ani aanihke mooshak macitootamowaatc miitahsh i'i kaawii onci nana'ahsakwaa. Onsaam aaniihsh okii maaciinaawaa' kahkina pemaatisinitc ci⁠tahkonimintc, Iitam ahkiink ekii ishiwinaawaatc. Kaawiin okiih kanawentansiinaawaa Iitamii kaatinowinitc kaakii ishi ahshotamaatiwaakopanen ewii mino wiiciintiwaatc.

¹⁰ Ninka ishihcike ci⁠caakitek i'i kaashi waahkaayaapihkinikaatek ootena Taayar, niwii ankwaahkisaanan kaye otahpa'iwewikamikowaan.”

¹¹ Miihsh o'o kaaTipenciketc eni ihkitotc, “Iki hsa pemaatisiwaatc ootenaank Iitam wenciiwaatc, etatawe nihtaa macitootamok, e⁠ani aanihke mooshak macitootamowaatc miitahsh i'i kaawii onci nana'ahsakwaa. Onsaam iitok opiminisha'waawaa' owiici onciimaakaniwaa' pashipa'ikewihkomaanan eh⁠tahkonamowaatc, awaac pankii awiyan eh⁠koohpaatenimaahsikwaa. Kaawiin iitok wiihkaa ta⁠poonikitaasohsiiwak kaawiin kaye wiihkaa ta⁠wayehkwaahsehsinini.

¹² Ninka ishihcike hsa kaye ci⁠sahkitek i'i ootena Teman (Teman) kaa'icikaatek, ninka ankwaahkisaanan kaye ini ahpa'iwewikamikoon weti Poosra (Bozrah) ootenaank eyaakin.”

¹³ Miihsh o'o kaaTipenciketc ehkitotc, “Iki hsa pemaatisiwaatc ootenaank Aman (Ammon) wenciiwaatc, etatawe nihtaa macitootamok, e⁠ani aanihke mooshak macitootamowaatc. Miitahsh i'i kaawii onci nana'ahsakwaa. Onsaam aaniihsh otaatociiwepishwaawaa' ihkwewa' kaa⁠kikishkawaawahsonitc i'imaa Kiliyat (Gilead) ahkiink eyaanitc, miihsh kaa⁠onci ishihcikewaatc ewii nanki tipentamowaatc ahkiini.

¹⁴ Ninka caakisaan tahsh i'i kaashi waahkaayaapihkinikaatek i'i ootena Orapah (Rabbah), ninka ankwaahkisaanan kaye otahpa'iwewikamikowaan. Ta⁠shaahshaakowenaaniwan tahsh i'i ahpii kiishikahk miikaatink, taapishkoo hsa e⁠kihcinootink ta⁠inentaakwan ke⁠ahpiihci kihci miikaatink.

¹⁵ Okihciokimaamiwaan hsa tahsh ta⁠maaciicikaniwiwan, i'i kaye aanihkewikimaa' pahkaan ahkiink ci⁠awi kipa'omintc,” ihkito kaaTipenciketc.