Ekihsatahs 9 - Ojibwe Kihcimasina'ikan

Aya'aawihshak Kiinipowaatc

¹ Miihsh o'o Moosihs (Moses) kaa'ikotc kaaTipencikenitc, “Maacaan anta waapam Peroo (Pharaoh) o'o ci'inatc, ‘Mii hsa 'o ehkitotc kaaTipenciketc, Hiiparoowak (Hebrews) weKishemanitoomiwaatc, “Pakitin nimpimaatisiimak ci⁠maacaawaatc, ci⁠awi anami'ehtawiwaatc.”

² Kiishpin itahsh wiin inentansiiwan ci⁠maacaawaatc, nehpici kihciwinatwaa tahsh,

³ miitahsh kaaTipenciketc ci⁠nana'ahsihk ci⁠aahkosii'aatc kahkina kitaya'aawihshimiwaa' entahswewaanakisinitc mihshawahkamik eyaanitc; mihtatimoo', maanshimihtatimoo', pihkwaawikane mihtatimoo', pishihkiwa', maanahcaanihsha', maanatihkwa'.

⁴ KaaTipenciketc hsa pahkaan owiih tootawaa' Isriyala' (Israel) otaya'aawihshimini, i'i tahsh kaye Iicip (Egypt) kaa‑ayaanitc otaya'aawihshimini. Kaawiin hsa ta⁠nipohsiiwa' aya'aawihsha' Isriyalak kaa⁠tipenimaawaatc,’ ” okii'ikoon ci‑ihkitotc.

⁵ KaaTipenciketc iitok okii onahtoon o'o ahpii ke⁠ishihsenik ekii ihkitotc, “Waapank hsa 'o ninka ishihcike i'imaa ahkiink,” kii‑ihkito.

⁶ E⁠ani waapaninik hsa mii 'i kaaTipenciketc kaa⁠ishihciketc. Kahkina aya'aawihsha' Iicip kaatinowinitc kaakiih tipenimaanitc kinipowa'. Kaawiin itahsh wiin kanake peshik aya'aawihsha' Isriyala' kaakiih tipenimaanitc kii⁠nipohsiiwa'.

⁷ Peroo tahsh kii‑ishinisha'owe ci⁠anta kihkencikenaaniwaninik. Miihsh kaa⁠ishi kihkencikaatenik awaac peshik ekii nipohsinik iinsan aya'aawihsha' Isriyala' kaakiih tipenimaanitc. Shaakooc itahsh Peroo kii⁠ani shashiipihtam, kaawiin itahsh okiih pakitinaahsii' Isriyala' ci⁠maacaanitc.

Kii'oshinkipihsiiminaaniwank

⁸ Miitahsh Moosihs, Eran kaye kaa⁠ikowaatc kaaTipencikenitc, “Kanihkinamok pinkwi wencihsek pootawaanaapihkonk, Moosihs itahsh oka ishpi wepinaan i'i pinkwiini eshi'ayaanitc Peroon.

⁹ Miitahsh i'i ke⁠ani piihsaawankihsek ci⁠ani paashkinehsek misiwe Iicipahkiink, miitahsh i'imaa ke⁠ani oncihsek shinkipihsiiwaahpinewin. Pemaatisiwaatc itahsh, aya'aawihshak kaye ta⁠oshinkipihsiimiwak ci⁠paashkiminiishkaawaatc,” okii'ikowaan.

¹⁰ Miitahsh kaa⁠ishihcikewaatc ekii otaahpinamowaatc pinkwi wencihsenik pootawaanaapihkonk, ekii awi niipawiwaatc eshi'ayaanitc Peroon. Miihsh Moosihs kaakii ishpi wepinank. Miitahsh i'imaa kaa⁠oncihsenik shinkipihsiiwaahpinewin. Pemaatisinitc itahsh, aya'aawihsha' kaye kii⁠oshinkipihsiimiwa' ekiih paashkiminiishkaanitc.

¹¹ Memaantaawisinitc itahsh kaawiin okiih kashkihtoohsiini ci⁠pi anta waapamikotc aaniihsh wiinke misiwe kii⁠oshinkipihsiimiwa' taapishkoo kotak Iicip kaatinowinitc.

¹² Mii iitok kaaTipenciketc ekiih tootawaatc Peroon aanciihke ci⁠shashiipihtaminitc. Kaawiin itahsh okiih pisintawaahsiini Moosihsoon, Eranoon kaye mayaa ekii ishihsenik kaaTipenciketc kaakii'inaakopanen Moosihsoon.

Kiikihcisehsekahk

¹³ Miitahsh Moosihs (Moses) kaa'ikotc kaaTipencikenitc, “Wiipa kikishep wanishkaahkan ci⁠anta waapamatc Peroo (Pharaoh) ci⁠awi niipawiwatc eshi'ayaatc o'o ci'inatc, ‘Mii hsa 'oweni ehkitotc kaaTipenciketc, Hiiparoowak (Hebrews) weKishemanitoomiwaatc: Taka pakitin nimpimaatisiimak ci⁠maacaawaatc ci⁠awi anami'ehtawiwaatc.

¹⁴ Noonkom itahsh wiinke kiwiih kihci tootawin o'o kaawii maanshihse'inaan, iki kaye kitaanihkewikimaamak, kipimaatisiimak kaye, ci⁠kihkentamek kotak awiya niin tino e⁠ayaahsik o'omaa misiwe ahkiink.

¹⁵ Kiishpin hsa nininc aapacihtooyaampaan cikiih pahkite'onaampaan, kipimaatisiimak kaye cikii aahkosii'inakookipan aasha ohsha kaawiin noonkom kitaakiih kihkentaakosihsiim o'omaa ahkiink.

¹⁶ Mii hsa 'i tepwe kaa⁠onci ineniminaan ci⁠pimaatisiyan ewii waapanta'inaan nimashkawisiiwin, niwiinsowin kaye ci⁠ani onci waawiintek misiwe ahkiink.

¹⁷ Shaakooc itahsh keyaapi kikihci inenintis ahpiihc nimpimaatisiimak, kaawiin itahsh kika pakitinaahsiik ci⁠maacaawaatc.

¹⁸ O'o hsa ahpii waapank, ninka ishihcike wiinke ci⁠kihci sehsekahk, wiihkaa mahshi kaapi kihkencikaatehsinok cipi ishiwepahk kii⁠maacihsekopanen o'o Iicipahki (Egypt) piinihsh itahsh o'o ishi ahpii.

¹⁹ Anoohkiin itahsh kitawahkaanak eyaawaatc mihshawahkamik ci‑ishiwinintwaa eshi tapinawaahkwaa'ikaatenik, kahkina kaye kekoon eyaayek ci‑ishiwicikaatekin eshi tapinawaahkwaa'ikaatek, aaniihsh o'o kaawiih sehsekahk misiwe kahkina awiyak, aya'aawihshak kaye oka miihkoshkaakonaawaa ke⁠piintikanaahsiwintwaa. Minihk hsa ko eyaawaatc mihshawaya'ii oka nihsikonaawaa kaawiih sehsekaninik,’ ” okii'ikoon ci‑ihkitotc.

²⁰ I'i tahsh aaninta Peroo otaanihkewikimaama' kaakiih kohtaanentaminitc ehkitonitc kaaTipencikenitc weyiip okiih piintikanaani pemiihtaakonitc, otawahkaanini kaye.

²¹ I'i tahsh wiin kotak kaakiih papaamihtansinik ehkitonitc kaaTipencikenitc kaawiin okiih piintikanaahsiini pemiihtaakonitc, otawahkaanini kaye, ekii ayaanitc mohshehkamik.

²² Miitahsh Moosihs kaa'ikotc kaaTipencikenitc, “Ishpimink inahke ishi niiminihkenin ci⁠sehsekahk misiwe Iicipahkiink. Tashi sehsekan hsa eshi'ayaawaatc pemaatisiwaatc, aya'aawihshihkaank kaye. Misiwe kaye mohshehkamik kekoon eshi nihtaawikink i'imaa misiwe Iicipahkiink,” okii'ikoon.

²³ Miitahsh Moosihs ishpimink inahke kaa⁠ishi niiminihkenitc. KaaTipencikenitc itahsh kii‑ishihcikewan ci⁠pinehsiiwaninik, ci⁠sehsekaninik, mihtahkamik itahsh inahke ekii ishi paakinenitc ekii kihci waawaahtehsenik. KaaTipencikenitc itahsh kii‑ishihcikewan ci⁠sehsekaninik misiwe Iicipahkiink.

²⁴ Kiih⁠sehsekanini hsa, ekiih kihci aashawi waawaahtehsenik. Mii hsa 'iwe maawac iko ekiih kihci ishiwepahk i'imaa ahkiink ahkonaak kaakiih pi ayaak Iicipahki.

²⁵ Misiwe hsa ko Iicipahkiink kii‑ishi sehsekan mohshehkamik, pemaatisiwaatc eshi'ayaawaatc, eshi'ayaawaatc kaye aya'aawihshak; kahkina kekoonan kaakii nihtaawikihkin kihtikewahkamikohkaank kii⁠nihshiwanaatanoon, mihtikook kaye kii⁠mashashkohsewak.

²⁶ Weti hsa ehta Kooshin (Goshen) ahkiink kaakii ishitaawaatc Isriyalak (Israel) kaawiin kii‑ishi sehseka'ansinoon.

²⁷ Miitahsh Moosihs, Eran kaye kaakii antomikowaatc Peroon ekii'ikowaatc, “Mii hsa 'i noonkom kii⁠macitootamaan; kaaTipenciketc hsa wiin kwayahkohcike, niin itahsh nimpimaatisiimak kaye kaawiin sesik nintishihcikehsiimin.

²⁸ Anami'ehtawihk ci⁠kakwecimek kaaTipenciketc, mii 'i teminihk kii‑ishihciketc o'o kaa⁠pinehsiiwaninik, kaa⁠sehsekaninik kaye. Miitahsh i'i ci⁠pakitininakook ci⁠maacaayek, kaawiin itahsh memwehc keyaapi o'omaa kika ayaahsiim,” okii'ikowaan.

²⁹ Miihsh o'o Moosihs kaa'inaatc, “Shemaak hsa ko onci saaka'amaan o'omaa ootenaank, ninka niiminihkehtawaa kaaTipenciketc. Miitahsh i'i ci⁠pooni pinehsiiwank, miikaye'i ci⁠pooni sehsekahk, ci⁠kihkentaman kaaTipenciketc eh⁠tipentank o'o ahkiini.

³⁰ Shaakooc itahsh ninkihkentaan, kiin, iki kaye kitaanihkewikimaamak mahshi e⁠kohtaanenimaahsiwek kaaTipenciketc Kishemanitoo.”

³¹ I'i hsa kaa⁠nihtaawikink ishiikinowaahtik kii⁠nihshiwanaatan, a'a kaye parlii manoomin aaniihsh aasha kiih⁠kiishatihtewaakopan.

³² A'a tahsh wiin pahkweshikanimin, mayaki pahkweshikanimin kaawiin kii⁠nihshiwanaatisihsiiwak, kaawiin aaniihsh mahshi kiihpi saakikiihsiiwak.

³³ Moosihs itahsh ekiih saaka'ank i'imaa ootenaank okii niiminihkehtawaan kaaTipencikenitc; miihsh kaa⁠ishi pooni pinehsiiwaninik, miikaye'i kaa⁠ishi pooni sehsekaninik, kaawiin itahsh kaye awahshime kiih⁠kimiwansinoon i'imaa ahkiink.

³⁴ Ahpii tahsh Peroo kaa⁠waapantank eh⁠pooni kimiwaninik, eh⁠pooni sehsekaninik kaye, eh⁠pooni pinehsiiwaninik kaye, miihsh miinawaa kaa⁠ishi macitootank aanciihke ekii ani shashiipihtank, i'i kaye otaanihkewikimaama'.

³⁵ Mii hsa 'i Peroo aanciihke kaakii ani shashiipihtank. Kaawiin itahsh okiih pakitinaahsii' Isriyala' ci⁠maacaanitc, ekii ishihsenik mayaa kaaTipencikenitc kaakii ihkitonitc e⁠aapaci'aanitc Moosihsoon.