Ekihsatahs 4 - Ojibwe Kihcimasina'ikan

Moosihs Kiimiinikotc Kishemanitoon Mashkawisiiwin

¹ Miitahsh o'o Moosihs (Moses) kaa⁠ishi nahkwehtank, “Wekonen itahsh wiin tepwehtansikwaa, pisintansikwaa kaye aaniin ke⁠ihkitowak? O'o maawiin ninka'ikoo, ‘Kaawiin maawiin kikii naakosiihtaakohsiitok kaaTipenciketc,’ ” kii‑ihkito.

² Miihsh o'o kaaTipencikenitc kaa'ikotc, “Wekonen i'i kaa⁠tahkonaman.” Miihsh kaa'inaatc, “Sahka'onaahk,” okii'inaan.

³ O'ohsh okii'ikoon, “Mihtahkamik ahpakitoon,” okii'ikoon. Miitahsh Moosihs kaa⁠ishi ahpakitootc mihtahkamik. Mii hsa kaa⁠ishi kinepikohsenik. Miihsh kaa⁠ishi tapasiihtootc.

⁴ Miihsh kaaTipencikenitc kaa'ikotc, “Sakaanowepihsh a'a kinepik,” okii'ikoon. Miitahsh Moosihs kaa⁠ishi sakaanowepinaatc ini kinepikoon. Miitahsh miinawaa kaakiih kiiwe sahka'onaahkowaninik.

⁵ Miitahsh kaa‑ani'ikotc, “Mii hsa 'owe ke⁠ishihcikeyan ci⁠tepwehtawihkwaa ekii naakosiihtawimihk oKishemanitoomiwaan Eparahaam (Abraham), Aaisik (Isaac), Cekap (Jacob) kaye,” okii'ikoon.

⁶ Miinawaa tahsh okii ani'ikoon, “Sheko ninciinin kaa⁠kikishkaman kikashkiikiiwin,” ekii'ikotc. Miihsh Moosihs kaakiih sheko ninciinitc okashkiikiiwinink. Ahpii hsa kaah⁠wiihko ninciinitc, mii hsa 'i oninc kaakii waapaahpinewi naakwaninik taapishkoo koonink ekii ishi waapinaakwaninik.

⁷ Miitahsh kaaTipencikenitc miinawaa kaa'ikotc, “Miinawaa hsa sheko ninciinin kikashkiikiiwinink,” okii'ikoon. Miihsh Moosihs miinawaa kaa⁠ishi sheko ninciinitc okashkiikiiwinink. Ahpii tahsh eh⁠wiihko ninciinitc, mii hsa 'i kaakiih kiiwe ishi'ayaanik taapishkoo eshinaakwaninik misiwe owiiyaw.

⁸ Miihsh o'o kaa'ikotc, “Kiishpin hsa tepwehtansikwaa, komaa kaye papaapisiskihtansikwaa i'i nihtam maamahkaaci kihkinawaacihcikewin, kehcinaac maawiin oka tepwehtaanaawaa i'i kotak maamahkaaci kihkinawaacihcikewin.

⁹ Kiishpin itahsh tepwehtansikwaa ono niishin maamahkaaci kihkinawaacihcikewinan, komaa kaye ehkitowatc, mii hsa 'i ke⁠ishihcikeyan ci⁠onci kwaapa'aman i'i nipi i'imaa Naayal (Nile) siipink. Mihtahkamik hsa kika ishi siikinaan. Miihsh ci⁠miskwiiwaakamihsek i'i nipi i'imaa mihtahkamik,” okii'ikoon.

¹⁰ Moosihs itahsh okii'inaan kaaTipencikenitc, “Kiin, Tepencikeyan, kaawiin iitok wiihkaa nimpi nihtaa kaakiikitohsii, piinihsh o'o ishi ahpii noonkom kaa⁠kanooshiyan. Etatawe iitok kaawiin aahpici ninihtaawehsii, wiinke kaye nimpapwaahtawikiishwe.”

¹¹ Miitahsh kaa'ikotc, “Awenenan inini kaa⁠oshihtamaakotc otoon? Awenenan kaye kaa⁠ishi'ikotc ci⁠onsihtehsik, komaa kaye ci⁠okiikitoowinihsik? Awenenan kaye kaa⁠ishi'ikotc ci⁠waapitc komaa kaye ci⁠waapihsik? Niin ohsha kaaTipencikeyaan i'i kaa⁠ishi'iweyaan!

¹² Noonkom itahsh anishi maacaan! Niin hsa ko kika wiici'in ci⁠kiikitoyan, kika kihkino'amawin kaye aaniin ke⁠ihkitoyan,” okii'ikoon.

¹³ Moosihs kii‑ihkito, “Kiin Tepencikeyan, taka pahkaan awiya ishinisha'o o'o ci‑ishihciketc,” kii‑ihkito.

¹⁴ Miitahsh o'o ahpii kaakii nishki'aatc kaaTipencikenitc o'o ekii'ikotc, “A'a tahsh wiin kiicihkiwensi Eran (Aaron) Liipaaink (Levi) kaa⁠ontahkaanesitc, ninkihkenimaa ohsha e⁠nihtaa kaakiikitotc. Inashke, aasha ohsha kipi anta nakishkaak, aahpici hsa ta⁠minwentam ahpii waapamihk.

¹⁵ Kiin tahsh kika kakanoonaa ci⁠wiintamawatc aaniin ke⁠ihkitotc; kika wiici'ininim hsa minciniish ci⁠kakitoyek, kika kihkino'amawininim kaye aaniin ke⁠ishihcikeyek.

¹⁶ Wiin hsa kika kiikitoohtamaak ahpii kakanoonimatc pemaatisinitc, mii hsa 'i ke⁠inentaakwaninik eh⁠kanootamawihk. Miitahsh ci‑inentaakwahk kaye kiin taapishkoo e⁠oKishemanitoomimihk ci⁠wiintamawatc aaniin ke⁠ihkitotc.

¹⁷ Maaciitoon itahsh o'o sahka'onaahk, ke⁠onci kashkihtooyan ci‑ishihcikeyan maamahkaaci kihkinawaacihcikanan,” okii'ikoon.

Moosihs Kiishikiiwetc Iicipahkiink

¹⁸ Moosihs (Moses) itahsh okiih kiiwe anta waapamaan oshihshenshan Cehtaroon (Jethro) ekii'inaatc, “Taka pakitinihshin ci⁠kiiwenotawakwaa niicipimaatisiimak Iicipahkiink (Egypt) eyaawaatc, ewii anta waapamakwaa taka keyaapi ci⁠pimaatisiwaakwen,” okii'inaan. Miihsh kaa'ikotc, “Pisaan maacaan.”

¹⁹ Mekwaa hsa Moosihs kii⁠ayaakopanen Mitiyan (Midian) ahkiink kaaTipencikenitc kii‑ikookopan, “Maacaan, kiiwe ishaan Iicipahkiink, kahkina ohsha kaawii nihsinohkwaapan kaawiin pimaatisihsiiwak,” kii‑ikookopan.

²⁰ Miitahsh Moosihs kaa⁠ishi maaciinaatc wiiwan, okosihsa' kaye ekii onapi'aatc maanshimihtatimonk, ekii maacaatc e⁠ishaatc Iicipahkiink. Okiih tako maaciitoon Kishemanitoon osahka'onaahkoni.

²¹ Miitahsh kaaTipencikenitc kaa'ikotc, “Ahpii hsa takohshinan weti Iicipahkiink, kehcinaac hsa ishihcikehkan enaahsamiitc Peroo (Pharaoh) kahkina maamahkaaci kihkinawaacihcikanan kaakii miininaan ci⁠kashki'ewisiyan ci⁠tootaman. Aanciihke ohsha niwiih tootawaa Peroo ci⁠shashiipihtank ci⁠pakitinaahsik pemaatisinitc ci⁠maacaanitc.

²² Miihsh o'o ke'inatc Peroo, ‘Mii hsa 'o ehkitotc kaaTipenciketc; “Isriyalak (Israel) hsa ninkosihs nintinenimaak, maawac nihtam kaakii okosihsiyaan.”

²³ Miitahsh eninaan, “Taka pisaan pakitin ninkosihs ci⁠maacaatc, ci⁠anami'ehtawitc.” Kaawiin itahsh kitinentansii i'i ci‑ishihcikeyan; miihsh ci⁠nihsak kikosihs nihtam kaa⁠nihtaawikitc,’ ” okii'ikoon ci‑ihkitotc.

²⁴ Kaa⁠ishi kapehshiwaatc itahsh eh⁠pimi ayaawaatc, kaaTipencikenitc Moosihs okii nakishkaakoon, ewii nihsikotc.

^25-26 Wiiwan itahsh Sihpoorawan (Zipporah) okii otaahpinaani kaahshaapihkahsiniin, ekii kihkinawaatashakeshwaanitc okosihsini, miihsh kaa⁠ishi ahpakitoonitc Moosihs eshi sitekaapawitc. I'i tahsh kihkinawaatashakeshikewin o'o kaakii onci'ikotc, “Mii hsa 'i eneniminaan ninaapem kaa⁠miskwiiwitc kaa⁠kihkinawaatashakeshontc,” okii'ikoon. Miitahsh kaaTipencikenitc kaa⁠ishi pooni'ikotc.

²⁷ KaaTipenciketc itahsh okii'inaan Eranoon (Aaron), “Pikwatahkamik ishaan ci⁠anta nakishkawatc Moosihs,” okii'inaan. Miitahsh Eran kaa⁠ishi ishaatc ekii anta nakishkawaatc Moosihsoon weti Kishemanitoo owaciimink, miihsh kaye kaa⁠ishi ociimaatc.

²⁸ Miitahsh Moosihs kaakii wiintamawaatc Eranoon kahkina kaakii ihkitonitc kaaTipencikenitc ci‑ihkitotc ahpii takohshink Iicipahkiink; okii wiintamawaan kaye kahkina maamahkaaci kihkinawaacihcikewinan kaakii anoonikotc ci‑ishihciketc.

²⁹ Miihsh Moosihs a'a kaye Eran kii‑ishaawak Iicipahkiink ekii maamawi antomaawaatc kahkina kaa⁠niikaanisinitc Isriyala' (Israel).

³⁰ Miitahsh Eran kaakii wiintamaaketc kahkina kekoon Moosihsoon kaakii ikonitc kaaTipencikenitc. Miitahsh kaakii ishi ishihciketc maamahkaaci kihkinawaacihcikewinan enaahsamiinitc pemaatisinitc.

³¹ Pemaatisiwaatc hsa kiih⁠tepwehtamook ahpii kaa⁠noontamowaatc kaaTipencikenitc eh⁠koohpaatenimikowaatc, ekii waapantaminitc kaye eshi kakwaataki'intwaa. Miihsh kaa⁠ishi acitawihkwehtaawaatc ekii anami'ehtawaawaatc Kishemanitoon.