Ekihsatahs 32 - Ojibwe Kihcimasina'ikan

Pemaatisiwaatc Kii'anami'ehtawaawaatc Aape pishihkiihkaanan

¹ Ahpii tahsh Isriyalak (Israel) ekii waapantamowaatc ekiih pwaahtawi niihsaciwenitc Moosihsoon (Moses) i'imaa kihci waciink, okii maamawi naasihkawaawaan Eranoon (Aaron) ekii'inaawaatc, “Taka ampe oshihtamawihshinaam manitook ke⁠niikaaniihtamawinankwaa. Inashke tahsh a'a Moosihs kaa⁠icikaniwitc, kaakiih saakiciwininankitc weti Iicipahkiink (Egypt), kaawiin ninkihkenimaahsiwaanaan namanc iitok kaa⁠ishihsekwen,” okii'inaawaan.

² Miitahsh Eran kaa'inaatc, “I'i hsa kaa⁠osaawi shooniyaa waapihkowinitc onaapihtepisoniwaa' kaa⁠kikishkawaawaatc kiwiiwiwaak, kikosihsiwaak, kitaanihsiwaak kaye, kiihcikonimihk ci⁠piitamawiyek itahsh,” okii inaa'.

³ Miihsh kahkina pemaatisinitc kaakiih kihcikoshkawaanitc wesaawi shooniyaa waapihkowinitc onaapihtepisonini ekiih piitamaakotc Eran.

⁴ Miihsh Eran kaa⁠ishi ninkaapihkiswaatc naapihtepisona', ekii ishi siikinaatc ke⁠onci ishinaakosinitc aape pishihkiink. Mii hsa 'i ekii oshi'aatc aape pishihkiihkaanan. Pemaatisinitc tahsh kii‑ihkitowa', “Isriyalak (Israel), mii hsa wa'a kimanitoominaan kaakiih saakiciwininank weti Iicipahkiink,” ekii ihkitonitc.

⁵ Ahpii hsa Eran ekii waapantank o'o, mii hsa 'i kaa⁠ishi oshihtootc keshi pakitinaahsowintc enaahsamikaapawinitc ini aape pishihkiihkaanan. Miihsh kaa⁠ihkitotc, “Waapank hsa ta⁠wiihkwantinaaniwan ke⁠onci kihtenimintc kaaTipenciketc.”

⁶ Wiipa tahsh kii⁠wanishkaawak e⁠ani waapaninik, ekiih pakitinaahsowaatc ekii ankwaahkiswaawaatc aya'aawihsha', okiih pakitinaanaawaa tahsh kaye mino wiiciintiwi pakitinaahsowinan. Pemaatisiwaatc itahsh kii⁠onapiwak ekii wiihsiniwaatc, ekii minihkwewaatc kaye. Miitahsh kaye kaa⁠ishi pihshikwaatahkamikisiwaatc.

⁷ KaaTipencikenitc itahsh Moosihs okii'ikoon, “Shemaak niihsaamaciwen, anta waapam kipimaatisiimak kaakiih saakiciwinatwaa weti Iicipahkiink. Aasha ohsha nihshiwanaatahkamikisiwak.

⁸ Etatawe wiipa onakataanaawaa i'iwe nahke kaakii inakwaapan ci‑ishihcikewaatc. Osaawi shooniyaa waapihkonk ekii onci oshihtamaasowaatc aape pishihkiinhsan, miiwan hsa ini kaa‑anami'ehtawaawaatc, kaa⁠pakitinaahsoohtawaawaatc kaye. Miitahsh kaye ehkitowaatc, ‘Isriyalak mii hsa wa'a kimanitoominaan kaakiih saakiciwininank weti Iicipahkiink.’ ”

⁹ Miihsh kaa‑ani'ikotc kaaTipencikenitc, “Niwaapamaak hsa pemaatisiwaatc, aahpici eh⁠shashiipihtamowaatc.

¹⁰ Taka tahsh noonkom keko kakwe kipihtinishihken, aahpici ohsha ninishki'ikook, mii hsa tahsh kaawii onci nihshiwanaaci'akwaa. Kiin itahsh wiin kika ishi'in ci⁠kihci inentaakosiwaatc kipiiwesiimak,” okii'ikoon.

¹¹ Miitahsh Moosihs kaakiih kakwe wawaankawi'aatc kaaTipencikenitc oKishemanitooman, ekii'inaatc, “Wekonen itahsh wenci ahpiihci nishki'ihkwaa iki pemaatisiwaatc kaakiih pi saakiciwinatwaa weti Iicipahkiink kii⁠aapacihtaawatc kimashkawisiiwin, i'i kaye kimashkawihcikewinan?

¹² Inashke maakishaa Iicip kaatinowiwaatc ta⁠ihkitowak, ‘Kii⁠maci'inentam ohsha kaakii onci maaciinaatc Isriyala' ewii awi nihsaatc weti kihci waciink. Ewii nihshiwanaaci'aatc kaye wawiinke piko o'omaa ahkiink.’ Mii 'i ishi poonikitaason, aanihsentan i'i kaawii ishi macitootawatwaa kaa⁠tipenimatwaa pemaatisiwaatc.

¹³ Maamihkawinotaw Eparahaam (Abraham), Aaisik (Isaac), a'a kaye Isriyal (Israel) kaakii anohkiihtawihkwaa. Miiwak iitok iki kiin iko kaakii ahshotamawatwaa o'o ekii inatwaapan, ‘Ninka ishi'aak hsa kipiiwesiimak ci⁠ani paahtiinowaatc taapishkoo kaashi paahtiinowaatc wanankohshak ishpimink, miihsh kaye eshi ahshotamawinaan kahkina kipiiwesiimak ewii miinakwaa o'o ahkiini, nehpic iko ci⁠tipinawewisiwaatc,’ ” okii'inaan.

¹⁴ Miitahsh kaaTipencikenitc kaa⁠ishi aantentaminitc. Kaawiin tahsh okiih tootawaahsiini pemaatisinitc kaawii ishi nihshiwanaaci'aanihpan.

¹⁵ Miihsh Moosihs kaa⁠ishi kwehkikaapawitc ekii niihsaamaciwetc i'imaa kihci waciink ekiih pimiwinaatc niishin napakaapihkahsinii' eshi oshipii'ikaatenik Kishemanitoon otoonahshowenini kwehkwehkaya'ii.

¹⁶ Kishemanitoo hsa wiin iko okii oshi'aa' i'i napakaapihkahsinii', wiin iko kaye otooshipii'ikewin ekii oshipii'ikaatenik i'imaa napakaapihkahsiniink.

¹⁷ Ahpii tahsh Caahshowaan (Joshua) e⁠noontawaanitc pemaatisinitc eh⁠shaakowenitc okii'ikoon Moosihs, “Mii hsa enihtamaan e⁠miikaatinaaniwank weti kaashi kapehshinaaniwank,” okii'ikoon.

¹⁸ Miihsh o'o Moosihs kaa⁠ihkitotc, “Kaawiin niin i'i nintinihtansiin kaa⁠inwenaaniwank kii⁠shaakoocihtwaank, kaawiin kaye nintinihtansiin kaa⁠inwenaaniwank awiya kii⁠shaakooci'intc. Matwe nikamonaaniwan ihsa niin nintinihtam,” kii‑ihkito.

¹⁹ Ahpii tahsh Moosihs pehsho e⁠ani naasihkank eshi kapehshinaaniwaninik, mii hsa kaakii waapamaatc pishihkiihkaanan, kii⁠waapanke kaye e⁠niiminaaniwaninik. Miihsh i'i kaakii nishkaatisitc. I'imaa tahsh eshi maaciiyaamatinaanik okii ahpakinaa' i'i napakaapihkahsinii' ekiih pikishkihshimaatc.

²⁰ Miitahsh Moosihs kaakii otaahpinaatc ini aape pishihkiihkaanan kaakii oshi'imintc. Miihsh kaa⁠ishi ninkiswaatc, wiinke kaye ekiih pikishkaawanka'waatc nipiink itahsh ekii ishi ahpaakaminaatc. Miihsh kaa⁠ishi tootawaatc Isriyala' ci⁠minihkwenitc.

²¹ Miihsh kaa'inaatc Eranoon, “Aaniin tahsh kaah⁠tootawihkwaa oko pemaatisiwaatc, kiin ekiih tootawatwaa ci⁠kihci maci'ishihcikewaatc?” okii'inaan.

²² O'o tahsh Eranoon okii ishi nahkwehtaakoon, “Keko niin nishkaatisiihkantawihshihken, kikihkenimaak iitok oko pemaatisiwaatc ehpiihci waahke macitootamowaatc.

²³ Mii hsa o'o kaa'ishiwaatc, ‘Kaawiin nikihkenimaahsiwaanaan amanc iitok kaa⁠ishihsekwen a'a inini Moosihs kaakiih saakiciwininankitc weti Iicipahkiink! Oshihtamawihshinaam manitoo ke⁠niikaaniihtamawiyamintc.’

²⁴ Miitahsh o'o kaa⁠inakwaa, ‘Awenenak hsa ko kekishkawaawaatc osaawi shooniyaa waapihkoon oka kiihcikoshkawaawaan.’ Mii hsa tahsh kaa⁠ishihcikewaatc. Miihsh kaa⁠ishi macohte wepinimak, mii hsa i'imaa kaa⁠onciitc a'a pishihkiihkaan!”

²⁵ Moosihs itahsh e⁠waapamaatc pemaatisinitc waa⁠ishihcikenitc iko enentaminitc, aaniihsh Eranoon pisaaniko okiih pakitinaani ci‑ishihcikenitc waa⁠ishihcikenitc. Aahpici hsa Isriyala' (Israel) kiih⁠kakiipaasinaakosiwa' ekiih kanawaapamikonitc kaakiih shiinkenimikonitc.

²⁶ Miitahsh Moosihs kaa⁠ishi oshikaapawitc i'imaa kaa⁠onci piintikeshkikaatenik eshi kapehshiwintc ekii ishi shaakowetc, “Awenen tahsh iko kaawii wiiciiwaatc kaaTipencikenitc ninka pi naasihkaak.” Kahkina tahsh i'i Liipaaink (Levi) wentahkaanesinitc okiih pi naasihkaakoo'.

²⁷ Miihsh o'o kaa'inaatc, “KaaTipenciketc, kaa⁠oKishemanitoomiyank hsa kitikowaa, ‘Kahkina kaa⁠tahshiyek naapishkamok kipashipa'ikewihkomaaniwaan, misiwe tahsh papaa ishaak piinihsh weti wehkwaa'aya'ii kaashi kapehshinaaniwank, ci⁠nihsekwaa tipinawe kiicihkiweyiwaak, iki kaye kaa⁠saaki'ekwaa, iki kaye kaa⁠onci wiicitaamekwaa,’ ” okii inaa'.

²⁸ Iki tahsh Liipaaink wentahkaanesiwaatc kii‑ishihcikewak kaakii ihkitonitc Moosihsoon. Nihsink mitaahswaahk tahsh okii nihsaawaa' ininiwa' i'i eh⁠kiishikaninik.

²⁹ Miitahsh Moosihs kaa'inaatc Liipaaink wentahkaanesinitc, “Noonkom hsa kaa⁠kiishikahk mii 'i e⁠ishi'itisoyek eh⁠pehkenimikooyek ci⁠anohkiihtawek kaaTipenciketc. Ekii nihsekwaa tahsh kikosihsiwaak, kiicihkiweyiwaak kaye kaa⁠onci pahkaanenimikooyek. KaaTipenciketc hsa i'inahke kitishi shawenimikowaa.”

³⁰ E⁠ani waapaninik tahsh Moosihs okii inaa' pemaatisinitc, “Kiinawaa hsa aahpici kikiih kihci maci'ishihcikem i'i kaakii macitootamek. Noonkom tahsh niwii anta waapamaa kaaTipenciketc, maakishaa ninka ontinaan ke⁠onci poonentamawinek i'i kaakii ishi macitootamek.”

³¹ Miitahsh Moosihs kaakiih kiiwe naasihkawaatc kaaTipencikenitc ekii'inaatc, “Inashke oko pemaatisiwaatc aahpici kiih⁠kihci maci'ishihcikewak, ekii oshihtamaasowaatc aape pishihkii manitoohkaanan kaa⁠osaawi shooniyaa waapihkowinitc.

³² Taka tahsh poonentamaw i'i kaakii ishi maci'ishihcikewaatc, kiishpin tahsh wiih⁠poonentamawaahsiwatwaa, kaahsiipii'an hsa niin niwiinsowin i'imaa kaashi oshipii'watwaa kipimaatisiimak,” okii'inaan.

³³ Miihsh o'o kaaTipencikenitc kaa'ikotc, “Awenenak hsa ko kaakii macitootawiwaatc, miiwak hsa iki ke⁠kisii'amawakwaa owiinsowiniwaan i'imaa nimasina'ikanink.

³⁴ Miitahsh ishi maacaan, ci‑ishiwinatwaa pemaatisiwaatc kaakii ishi kanooninaan ci‑ishaayan. Inashke tahsh nintencalim kika niikaaniihtamaakowaa. Ahpii hsa kiishikaninik ke⁠nana'ahcikewak, mii hsa 'i ahpii ke⁠nana'ahsakwaa i'i kaakii ishi maci'ishihcikewaatc,” okii'ikoon.

³⁵ KaaTipenciketc tahsh okiih miinaa' inaahpinewin pemaatisinitc aaniihsh okiih kashkimaani Eranoon ci⁠oshi'aanitc aape pishihkiihkaanan kaa⁠osaawi shooniyaa waapihkowinitc.