Ekihsatahs 3 - Ojibwe Kihcimasina'ikan

Kishemanitoo Kiikanoonaatc Moosihsoon

¹ Aapitink tahsh eh⁠kiishikaninik Moosihs (Moses) okii naanaakaci'aa' omaanahcaanihshimini Cehtaroon (Jethro) oshihshenshan, kaakii anami'ewikimaawinitc i'imaa Mitiyan (Midian) ahkiink. Miitahsh kaakii aashawiwinaatc weti pikwatahkamik, piinihsh ekii ani takohshink Kishemanitoo owaciiminiink Saainai (Sinai) ecikaatenik.

² Miitahsh i'imaa kaaTipencikenitc otencalimini kaa⁠ishinaakosiihtaakotc mekwe ishkote eshi ohkohkopaanik. Moosihs tahsh okii waapantaan i'i wekohkopaanik eh⁠sahkitenik, kaawiin tahsh kii⁠ankwaahkitehsinini.

³ Miitahsh kaakii inentank, “Etatawe nimaamahkaasinam, taka ninka pahke ewii waapantamaan wekonen wenci ankwaahkitehsinok i'i kaa⁠piskanek,” kii‑inentam.

⁴ Ahpii tahsh ekii waapamikotc Kishemanitoon eh⁠pahketc ewii inaapitc, mii 'imaa mekweya'ii eshi ohkohkopaanik okii onci kanoonikoon Kishemanitoon ekii'ikotc, “Moosihs, Moosihs.” Miihsh kaa⁠ishi nahkwehtank, “O'omaa nintayaa.”

⁵ Miihsh o'o kaa'ikotc, “Keko awahshime pehsho piishaahken, kiihcikoshkan ini mahkisinan kaa⁠kikishkaman. Kohtaanentaakwan iitok i'imaa kaashi niipawiyan.

⁶ Niin hsa weKishemanitoomiwaatc kikehteya'aamak, Eparahaam (Abraham), Aaisik (Isaac) Cekap (Jacob) kaye nintoKishemanitoomimikook,” okii'ikoon. Miitahsh Moosihs kaa⁠ishi aakawiinkwenintisotc ekiih sekisitc ci⁠kanawaapamaatc Kishemanitoon.

⁷ Miitahsh kaa‑ani'ikotc kaaTipencikenitc, “Tepwe hsa niwaapantamowaan kaashi naakaci'aahsiwintwaa kaa⁠tipenimakwaa pemaatisiwaatc eyaawaatc Iicipahkiink (Egypt). Ninoontawaak hsa kii⁠shaakowaashiwaatc ci⁠naatamawakwaa i'i onci kaa⁠kakwaataki mihtanohkii'intwaa. Ninkihkentamowaan kaye i'i kaashi kakwaatakihtoowaatc.

⁸ Aasha kaye ninkiih pi naashii ewiih shaapwii'akwaa kaashi mashkawisiinitc Iicip kaatinowinitc. Niwiih saakiciwinaak kaye i'imaa ahkiink eshi'ayaawaatc, ewii ishiwinakwaa ahkiink kaashi onishihshininik, kaashi mankitawaanik kaye. Wiinke kaye wenootan i'i ahki, kekoon i'imaa e⁠wahke nihtaawikink. Pepahkaanwewaanakisiwak pemaatisiwaatc itahsh weti kaataawaatc, Kenan kaatinowiwaatc (Canaanites), kaye Heht (Hittites), Emorii (Amorites), Perisii (Perizzites), Kipii (Hivites), iki kaye Ciipas (Jebusites) kaatinowiwaatc.

⁹ Inashke tahsh ninoontawaak Isriyalak e⁠shaakowaashiwaatc. Niwaapantamowaan kaye aaniin eshi manaaci'ikohsikwaa Iicip kaa‑ayaanitc.

¹⁰ Kiin tahsh noonkom kiwii ishinisha'on ci⁠anta waapamatc kihciokimaa Peroo (Pharaoh), kiin hsa ci⁠pionci saakiciwinatwaa pemaatisiwaatc Isriyalak weti Iicipahkiink,” okii'ikoon.

¹¹ Moosihs tahsh okii ishi nahkwehtawaan Kishemanitoon, “Awenen niin tenowiyaan ci⁠anta waapamakipan kihciokimaa Peroo, ci⁠saakiciwinakwaapan Isriyalak (Israel) weti Iicipahkiink?”

¹² Miihsh o'o Kishemanitoon kaa'ikotc, “Tepwe hsa kika wiiciiwin, ahpii tahsh saakiciwinatwaa nimpimaatisiimak weti Iicipahkiink mii hsa o'omaa kihci waciink ke⁠tashi anami'ehtawiyek. Mii hsa tahsh i'i keshi kihkinawaacihtamawinaan niin ekii ishinisha'onaan,” okii'ikoon.

¹³ Miihsh o'o kaa'inaatc Kishemanitoon, “Inashke ahpii anta waapamakwaa Isriyalak inakwaa, ‘Kaakii oKishemanitoomiwaatc kikehteya'aaminaanik hsa ninkiih piicinisha'ok o'omaa eshi'ayaayek.’ Kehcinaac iitok ninka'ikook, ‘Aaniin itahsh eshinihkaasotc?’ Aaniin itahsh ke⁠inakwaa?”

¹⁴ Miitahsh o'o Kishemanitoon kaa'ikotc Moosihs, “Niin hsa a'a NINTINOW KAATINOWIYAAN. Mii hsa 'i ke'inatwaa, a'a hsa NINTINOW eshinihkaasotc ninkiih piicinisha'ok.

¹⁵ Wiintamaw Isriyalak, ‘Niin kaaTipenciketc, weKishemanitoomiwaatc kikehteya'aamiwaak Eparahaam, Aaisik, a'a kaye Cekap, mii hsa a'awe kaah⁠piicinisha'otc. Mii hsa 'iwe ke⁠nehpici ishinihkaasoyaan, ke⁠onci kihkinawaaci nihkaashiwaatc kahkina awiyak keni ayaanihke pimaatisiwaatc.’

¹⁶ Maacaan maawantoon Isriyalak kaa⁠niikaanisiwaatc ci⁠ohko ayaawaatc o'o ci‑inatwaa, ‘KaaTipenciketc weKishemanitoomiwaatc kikehteya'aaminaaniik Eparahaam, Aaisik, a'a kaye Cekap, wiin hsa ko ninkii naakosiihtaak, miitahsh o'owe kaa⁠ihkitotc, “Tepwe hsa kinaanaakatawenimininim i'i kaa⁠tootaakooyek i'imaa Iicipahkiink.”

¹⁷ Miitahsh o'o eninakook, ewiih saakisi'inakook i'imaa kaashi manaaci'ikoohsiwek Iicipahkiink, kika ishiwininim weti eshi'ayaawaatc Kenan kaatinowiwaatc, kaye Heht, Emorii, Perisii, Kipii, iki kaye Ciipas kaatinowiwaatc. Aahpici tahsh wenootan i'i ahki, aahpici kaye kekoon wahke nihtaawikin weti.’ ”

¹⁸ “Kika pisintaakook hsa aaniin ke'inatwaa nimpimaatisiimak. Miitahsh i'i keshi maaciinatwaa Isriyalak kaa⁠niikaanisiwaatc ci⁠anta waapamek kaa⁠kihciokimaawitc i'imaa Iicipahkiink. Miitahsh o'o ke'inek, ‘KaaTipenciketc weKishemanitoomiwaatc Hiiparoowak (Hebrews) ninkii naakosiihtaakonaan. Taka tahsh noonkom pakitinihshinaam nihsokiishik ci‑ishaayaank weti pikwatahkamik ci⁠awi pakitinaahsoohtamawankitc kaaTipenciketc weKishemanitoomiyaank.’

¹⁹ Ninkihkentaan kaye kaa⁠kihciokimaawitc i'imaa Iicipahkiink ci⁠pakitinowihsinowinek ci⁠maacaayek, paanimaa hsa mashkawi tootawintc mii 'i payesh ci⁠pakitininek.

²⁰ Nimashkawisiiwin hsa ewii aapacihtooyaan ewii nana'ahsakwaa Iicipahkiink kaa‑ayaawaatc ewiih tootamaan nimaamahkaacihcikewinan. Miitahsh i'i ahpii ke⁠pakitininek ci⁠maacaayek.”

²¹ “Ninka ishi'aak hsa kaye Iicip kaa‑ayaawaatc ci⁠kihteniminekwaa, ahpii hsa maacaayek kaa⁠tipeniminakook, kaawiin ta⁠kwiinawi onciihsinoon ke⁠maaciitooyek.

²² Entahshiwaatc hsa Hiiparoowihkwewak oka naasihkawaawaa' pehsho kaa⁠wiicitaamaawaatc, i'i kaye Iicipiiwihkwewa' kaataanitc owaahkaa'ikaniwaank. Oka antotamawaawaa' hsa kikishkikanan, kaa⁠osaawi shooniyaa waapihkowaninikin, kaa⁠waapaapihko shooniyaa waapihkowaninikin kaye waweshi'onan. Okosihsiwaa', otaanihsiwaa' itahsh kaye oka pihsihkamo'aawaa' ci⁠maaciitaawek kaashi wenootisiwaatc Iicipahkiink kaa‑ayaawaatc,” okii'ikoon Kishemanitoon.