Ekihsatahs 29 - Ojibwe Kihcimasina'ikan

Kii'onahcikaatenik Eran, Okosihsa' Kaye Aaniin Mayaa Ke'ishihcikenitc

¹ Miitahsh o'owe ke⁠tootawatc Eran (Aaron), i'i kaye okosihsa' ahpii ishi pakitinikoowisiwaatc ci⁠anami'ewikimaawiwaatc ci⁠anohkiihtawiwaatc. Kika otaahpinaa peshik aape pishihki, niishin itahsh aape maanahcaanihshak kekoon eshi maanshi ayaahsikwaa.

² Kika aapaci'aa maawac wenishihshitc pahkweshikan, kaawiin itahsh wiin ompisikan kika aapacihtoohsiin. Kika oshi'aak itahsh aaninta pahkweshikan aalip tino pimite ci⁠aapacihtooyan, aaninta tahsh kaawiin kika aapacihtoohsiin. Pahkweshikanehsak kaa⁠pipakisiwaatc kaye kika oshi'aak ci⁠poosinatwaa aalip tino pimite.

³ Mashkohsii mahkahkonk itahsh kika ishi piina'waak ci⁠tako pakitinaahsoohtamawiyan ahpii pakitinaahsowaakeyan aape pishihki, niishin kaye aape maanahcaanihshak.

⁴ Miitahsh keshi piinatc Eran, i'i kaye okosihsa' i'imaa eshi ishkwaantemiwaninik Pakwaanekamik Entanentaakosiwak, kaye ta⁠kisiihsipasowak.

⁵ Miitahsh Eran i'i kaye okosihsa' keshi pihsihkamoonatwaa anami'e kikishkikanan. Papakiiwayaan, misiwe kashkiikiiwin ci⁠aakawekihsink i'imaa ohkaahkikani naapishkikanink, i'i kaye ohkaahkikani naapishkikan, wakiic ohkaahkikani naapishkikan, kihkinciciihpison kaye.

⁶ Miihsh keshi pihsihkamonatc titipiikinikaniwi aanohkwaan ohtikwaanink kaa⁠tahkopitenik o'o kaa⁠ishi masinaapihka'ikaatenik “Ishi pakitinikoowisi kaaTipencikenitc.”

⁷ Miitahsh keshi otaahpinaman pimite tino kaa‑aapatahk awiya kiiwii kihtakimintc, miihsh keshi siikinamowatc Eran ohtikwaanink.

⁸ Kika piinimaa' itahsh kaye okosihsa' ci⁠pihsihkamonimatc papakiiwayaanan.

⁹ Kika kihkinciciihpiso'aak, kaye tahsh kika pitaanohkwaane'aak, miihsh o'o nahke keshi onakinsowaatc Eran, i'i kaye okosihsa'. Wiinawaa hsa, i'i kaye keni opiiwesiimiwaatc ninka anohkiihtaakook ci⁠anami'ewikimaawiwaatc nehpic iko.

¹⁰ Kika piinaa tahsh aape pishihki enaahsamahkitek Pakwaanekamik Entanentaakosiyaan, miihsh Eran, okosihsa' kaye keshi saaminaawaatc ohtikwaaninink.

¹¹ Miihsh i'imaa ke⁠tashi nihsatc a'a aape pishihki eshi ishkwaantemiwank Pakwaanekamik Entanentaakosiyaan.

¹² Kika otaahpinamowaan itahsh aape pishihki omiskwiim i'imaa kininciink cishi shishoonamowatc kiihkeyaank kaashi sasaakahkitekin kaashi pakitinaahsonk. Miihsh keshi siikinaman miskwi kaakii ishkonaman eshi kihtahtek kaashi pakitinaahsonk.

¹³ Miihsh kaye keshi manishaman eshi pimitewankin piincaya'ii piiwesiin, maawac iko eshi onishihshik ohkon, otetihkwahsiwak kaye ci⁠kikipimitewiwaatc. Miihsh keshi caakisaman ci⁠pakitinaahsoohtamawiyan.

¹⁴ Kaye tahsh kika caakisamowaan owiiyaahs aape pishihki, opashkwekinom kaye, oonakish kaye. Mii hsa tahsh o'o pakitinaahsowin ke⁠onci otaahpinikaatenikin omacitootamowiniwaan anami'ewikimaak. Weti tahsh saakicaya'ii eshi kapehshink o'o kika tashi ishihcikem.

¹⁵ Kika otaahpinaa tahsh a'a peshik aape maanahcaanihsh, miihsh Eran, i'i kaye okosihsa' keshi saaminaawaatc ohtikwaaniniink.

¹⁶ Miihsh keshi nihsatc a'a aape maanahcaanihsh, omiskwiim itahsh kika ishi siiswepiikiwepinamowaan aahsamaya'ii waahkaaya'ii eshi pakitinaahsonk.

¹⁷ Wiinke tahsh kika piihsishwaa, ci⁠kisiihsipataawatc piincaya'ii opiiwesiin, ini kaye ohkaatan. Ohtikwaanink itahsh kika ishi ahtoonaawaan ini kaye kaakii ishi piihsihshwatc.

¹⁸ Miitahsh keshi misiwe caakisontc i'imaa kaashi pakitinaahsonk ci‑inwaatek miicimi pakitinikewin. I'i hsa kaa⁠ishi maahsotc wiinke niminomaantaan.

¹⁹ A'a tahsh kotak aape maanahcaanihsh kika otaahpinaa, Eran itahsh, i'i kaye okosihsa' oka saaminaawaan ohtikwaaniniink.

²⁰ Kika nihsaa tahsh a'a aape maanahcaanihsh. Omiskwiim itahsh kika otaahpinamowaan ci⁠shishoonamowatc Eran ohtawakaank, i'i kaye okosihsa'. Kika shishoonamowaanan kaye omincihciniink, okihcisitaaniniink kaye okihcinihkaanink inahke. I'i tahsh kaakii ishkonaman miskwi kika ishi siiswepiikiwepinamowaan i'imaa aahsamaya'ii waahkaaya'ii kaashi pakitinaahsonk.

²¹ Miihsh keshi otaahpinaman i'i miskwi eyaak i'imaa kaashi pakitinaahsonk, i'i kaye kihkinawaaci'ikoowi pimite, miihsh keshi siiswepiikiwepinamowatc Eran okikishkikanink, i'i kaye okosihsa' okikishkikaniniink. Miitahsh ci‑inakimintwaa eh⁠tipinawewisiimakwaa.

²² Miitahsh keshi manishamowatc eshi pimitewitc aape maanahcaanihsh, eshi pimitewaninik kaye osow, eshi pimitewankin piincaya'ii piiwesiin maawac iko eshi onishihshik ohkon, otetihkwahsiwak kaye, okihcinihkipwaam kaye.

²³ I'i tahsh mashkohsii mahkahkonk pahkweshikanak eshi piinsowaatc kaakiih pakitinamaakooyaan, mii 'imaa ke⁠onci otaahpinatwaa pahkweshikanak. Peshik pahkweshikan kaakiih takonikaatek aalip tino pimite, a'a tahsh kaye peshik pimite kaakiih takonikaatehsinok, a'a tahsh kaye pahkweshikanehs kaa⁠pipakisitc.

²⁴ Ta⁠miinaawak itahsh ci⁠tahkonamowaatc o'o kahkina miicim Eran i'i kaye okosihsa', miihsh keshi waawaahta'ikaakewaatc ci‑inakintek waawaahta'ikewi pakitinikewin.

²⁵ Miitahsh keshi otaahpinamawatwaa ci⁠caakisamowatc i'imaa kaashi pakitinaahsonk, ci⁠ahtaawatc wakicaya'ii i'imaa pakitinaahsowinink kaa⁠caakaahkisamaakoowak miicimiwi pakitinaahsowin. Wiinke i'iwe niminomaantaan i'i tino kii⁠minaahtek.

²⁶ Kika otaahpinimaan itahsh ini otaahsinaahken a'a aape maanahcaanihsh Eran kaa⁠onci onakinsotc. Miihsh keshi waawaahta'ikaakeyan enaahsamiitc kaaTipenciketc ci‑inakintek waawaahta'ikewi pakitinaahsowin. Miitahsh kiin a'a ke⁠tipinawewisiyan.

²⁷ Ahpii tahsh anami'ewikimaa kii⁠onakimintc, i'i hsa aape maanahcaanihsh otaahsinaahke, i'i kaye okihcinihkipwaam kaakii waawaahta'ikaaniwankin kaakii miinikoyaan wiinawaa kii⁠ani miinaawak ci⁠tipentamowaatc.

²⁸ Miitahsh i'iwe nintoonentamowin wiihkaa ke⁠aancihsehsinok ahpii nimpimaatisiimak pakitinamowaatc wiiciintiwini pakitinaahsowin. I'i hsa aape maanahcaanihsh otaahsinaahke, okihcinihkipwaam kaye ta⁠miinaawak ci⁠tipinawewisiwaatc anami'ewikimaak. Mii hsa 'i ke⁠inakintenik Niin Tepencikeyaan eh⁠pakitinamawiwaatc.

²⁹ Ini tahsh Eran otanami'e kikishkikanan ta⁠miinimaawa' okosihsa' ahpii ishkwaa pimaatisitc e⁠kikishkaminitc ahpii onakinsonitc ci⁠anami'ewikimaawinitc.

³⁰ Eran itahsh okosihsan ke⁠naapishkaakotc ke⁠anami'ewikimaawinitc oka kikishkamini niishwaahsokiishik ini otanami'e kikishkikanan ahpii pi⁠piintikenitc pi⁠anta wanohkiinitc i'imaa Pakwaanekamikonk Entanentaakosiwak.

³¹ Otaahpinan itahsh i'i aape maanahcaanihsh wiiyaahs kaakii aapatahk kii⁠onakimintc Eran i'i kaye okosihsa' ci⁠tashi kiishisaman kaashi kohtaanentaakwahk piintik.

³² I'imaa tahsh eshi ishkwaantemiwank Pakwaanekamikonk Entanentaakosiyaan, mii 'imaa Eran, i'i kaye okosihsa' ke⁠tashi miiciwaatc i'i wiiyaahs, kaye ci⁠amwaawaatc ini pahkweshikanan eshkohsenitc i'imaa mashkohsii mahkahkonk.

³³ Miitahsh i'i ke⁠miiciwaatc kaakii aapataninik kii⁠onakinsowaatc ci⁠anami'ewikimaawiwaatc kaye kii⁠poonentamaakoowisiwaatc. Anami'ewikimaak ehta i'i oka miicinaawaa aaniihsh kihtakinteni i'i miicim.

³⁴ Kiishpin itahsh ishkohsek i'i wiiyaahs, a'a kaye pahkweshikan piinihsh ci⁠ani kishepaawakahk, intawaa iinsan ta⁠caakisikaatewan. Kaawiin awiya oka miicihsiin i'i wiiyaahs kaye pahkweshikanan aaniihsh onsaam kihtakinteni i'i miicim.

³⁵ Miitahsh i'i ke⁠ishihcikeyan onakimatc Eran, i'i kaye okosihsa', ci‑ishihcikeyan kahkina kekoon kaakii'ininaan niishwaahsokiishik minihk.

³⁶ Entahso kiishik itahsh kika pakitinaahsowaaken aape pishihki ci⁠poonencikaatekin macitootamowinan. Miihsh i'imaa ke⁠onci pehkakincikaatek kaashi pakitinaahsonk. Miihsh keshi kihtakintaman ci⁠aapacihtooyan aalip tino pimite.

³⁷ Niishwaahsokiishik itahsh o'o kika ishihcikem entahso kiishik. Miitahsh kaashi pakitinaahsonk wiinke tetako ci⁠kihtentaakwahk. Wekonen itahsh iko i'imaa eshi saamihsink, komaa kaye awiya saamishkank, kehcinaac ta⁠ishi'ayaa e⁠kihtentaakositc.

Tahsokiishik Pakitinaahsowinan Ehtashintekin

³⁸ Miitahsh o'o ke⁠ishihcikeyan entahso kiishik mooshak iko. Kika pakitinaahswaaken niishin kaa⁠peshiko tahso pipoonwewaatc maanahcaanihshenhsak.

³⁹ Peshik kika pakitinaahswaaken kishepaawakahk, a'a tahsh kotak peshik ani onaakohshik.

⁴⁰ A'a tahsh nihtam maanahcaanihshenhs, kika tako pakitinaa maawac wenishihshitc pahkweshikan ci⁠takonikaatek peshiko omootayaapihk aalip tino pimite. Peshiko omootayaapihk shoominaapo tahsh kika siikinaan i'imaa ci⁠pakitinaahswaakaaniwank.

⁴¹ A'a tahsh kotak maanahcaanihshenhs ke⁠pakitinaahswaakaniwitc onaakohshik, miihsh peshikwan minihk maawac wenishihshitc pahkweshikan ke⁠aapatisitc, aalip tino pimite kaye, shoominaapo kaye. Niin kaaTipencikeyaan, i'i nimpakitinaahsoohtamaakoo, wiinke e⁠minomaantamaan e⁠minaahtek.

⁴² Miitahsh o'o mooshak iko keni ishihcikenaaniwank ci⁠pakitinikaatek kaa⁠caakisikaatek pakitinaahsowin minihk iko keni ayaanihke nihtaawikiwaatc. I'imaa tahsh eshi ishkwaantemiwank Pakwaanekamikonk Entanentaakosiyaan tashi pakitinikaate. Miitahsh i'imaa keshi nakishkawakwaa nimpimaatisiimak, miihsh kaye i'imaa keshi kakanooninaan.

⁴³ Miitahsh i'imaa kaye keshi nakishkawakwaa nimpimaatisiimak Isriyalak, Niin itahsh i'imaa ayaayaan Ninkihci inentaakosiwinink kaa⁠waahsenaakwahk ta⁠onci kihtentaakwan Pakwaanekamik.

⁴⁴ Ninka ishihtoon Pakwaanekamik, kaashi pakitinaahsonk kaye ci⁠kihtentaakwahkin. A'a hsa Eran i'i kaye okosihsa' pahkaan ta⁠inakinsowak ci⁠anohkiihtawiwaatc ci⁠anami'ewikimaawiwaatc.

⁴⁵ Niin ihsa piko ninka wiicitaamaak mekweya'ii eshi'ayaawaatc Isriyalak, Niin itahsh ninka oKishemanitoomimikook.

⁴⁶ Ninka kihkenimikook ihsa Niin ehTipencikeyaan, e⁠oKishemanitoomimiwaatc. Ekiih pionci saakiciwinakwaa weti Iicipahkiink (Egypt) ewii wiicitaamakwaa. Niin ihsa kaaTipencikeyaan oKishemanitoomiwaan.