Ekihsatahs 22 - Ojibwe Kihcimasina'ikan

Aaniin Keshitipa'ikenk E'onahshowaatek

¹ Kiishpin ihsa inini kiimootitc pishihkiwan, komaa kaye maanahcaanihshan, nihsaatc itahsh komaa kaye ataawaaketc, mii hsa 'i eshinaakwaninik naanan (5) pishihkiwa' ci⁠kiiwe tipa'ikaaketc ini onci pishihkiwan kaakiih kiimootihpan. Naanan kaye maanahcaanihsha' ci⁠kiiwe tipa'ikaaketc ini onci maanahcaanihshan kaakiih kiimootihpan.

² Kiishpin ihsa okimoocishk kaahcitinintc mekwaa eh⁠kiimootitc pahkihte'ontc itahsh, miihsh ishi nipotc, ini hsa kaakii naatamaasonitc kaawiin ta⁠inakimaahsiiwan ekii nihshiwenitc.

³ Kiishpin itahsh wiin i'i kaa⁠ishihsenik eh⁠kiishikaninik, mii hsa 'i ci‑icikaniwinitc ekii nihshiwenitc. Mii hsa 'i eshinaakwaninik okimoocishk ci⁠naapinank kaakiih kiimootihpan. Kiishpin itahsh kekoon ayaahsik, miihsh ci⁠ataawaakaasotc ke⁠onci tipa'ikehsitamawintc okimootiwinan.

⁴ Kiishpin itahsh mihkawimintc ayaawaawaatc okimootiwinan eh⁠pimaatisinitc, pishihkiwan, maanshimihtatimoon, komaa kaye maanahcaanihshan mii hsa 'i eshinaakwaninik ci⁠napo kiiwe tipa'ikaaketc kaakiih kiimootihpan.

⁵ Kiishpin ihsa inini tashi ahshamaatc otawahkaana' mihshawahkamik, i'imaa kaye eshi nihtaawikinitc shoomina', kiishpin ani ishaanitc weti ani ontancikenitc pahkaan awiyan eshi tipentaminitc mihshawahkamik, mii hsa 'i eshi naakwaninik ci⁠onci tipa'amawaatc ini kotak ininiwan maawac eshi onishihshininik omihshawahkamikom, kaye tahsh eshi nihtaawikinitc shoomina'.

⁶ Kiishpin ihsa inini sahka'ank omihshawahkamikom, mashkohsiihkaank itahsh ani inaahkitenik piinihsh weti otihtaahkitenik kotak ininiwan eshi kihtikenitc, caakisamawaatc itahsh nehtaawikininikin, aasha kaye kaakii manishaminihpan ekii ohkositoonihpan, a'a hsa kaakii sahka'iketc ta⁠tipa'ike.

⁷ Kiishpin ihsa awiya kanawenta'aatc owiicitaamaakanan miinaatc waapaapihko shooniyaan, komaa kaye otaya'iiman, onci kiimootinaaniwaninikin itahsh i'imaa owaahkaa'ikaniniink, kiishpin ihsa tahsh mihkawimintc kaakiih kiimootinitc ta⁠napo tipa'ike'aawan kaakii ishi kiimootinihpan.

⁸ Kiishpin itahsh wiin mihkawimaahsiwintc kaakiih kiimootinitc, a'a hsa kaakiih kanawenta'intc aya'iiman ta⁠piicikaniwi eshi'ayaanitc otipaahkoniwe' ci⁠anta kihkencikaniwitc taka wiin cikii otaahpinamokwen okanawenta'ikoowinan kotak awiyan tepentaminitc.

⁹ Kahkina hsa piko kekoon wenci kihci kakanoonitinaaniwank, komaa pishihkiwak, komaa maanshimihtatimook, komaa maanahcaanihshak, komaa kikishkikanan, kekoon ihsa piko kaa⁠wanihcikaatek, niishin (2) awiyak ihkitowaatc wiinawaa iniweniwan eh⁠tipinawewisiwaatc. Miiwak ihsa oko ke⁠piitoowaatc otihkitowiniwaan eshi'ayaanitc otipaahkoniwe'. Awenen itahsh ke'ikotc Kishemanitoon eh⁠tepimintc eh⁠kiiwanimotc, mii hsa awe ke⁠napo tipa'amawaatc kotak ininiwan.

¹⁰ Kiishpin inini kanawenta'aatc owiicitaamaakanan maanshimihtatimoon, komaa pishihkiwan, komaa maanahcaanihshan, komaa kaye kotak aya'aawihshan, ishi niponitc itahsh, komaa kaye wiihsakihshininitc, komaa kaye kiimootinaaniwinitc awiyan itahsh kii⁠onci waapankehsinik

¹¹ ini hsa ininiwan ta⁠ishaawan eshi anami'aawintc ci⁠ahpimonitc ekiih kiimootimikohsik otawahkaana'. Kiishpin itahsh iinsan kaah⁠kiimootimikohsik, mii hsa 'i pisaan ci‑inentank e⁠wanihciketc, kaawiin memwehc oka kiiwe tipa'amaakohsiin.

¹² Kiishpin itahsh kaah⁠kiimootimikonitc, mii 'i eshinaakwaninik ci⁠kiiwe tipa'amaakotc.

¹³ Kiishpin itahsh wiin pakwaci aya'aawihsha' kaa⁠nihsikonitc, ini hsa ininiwan piitoonitc eshi ishkwamimintc otawahkaana', kaawiin memwehc ta⁠tipa'ikehsiiwan kaa⁠ishihcikenitc pikwaci aya'aawihsha'.

¹⁴ Kiishpin ihsa inini awi'aasomaatc owiicitaamaakanan awahkaanan, wiihsakihshininitc itahsh, komaa kaye niponitc, ayaahsinik itahsh i'imaa tepenimikonitc, mii hsa ci⁠tipa'iketc.

¹⁵ Kiishpin itahsh i'i ishihsenik ayaanitc i'imaa tepenimikonitc, kaawiin memwehc ta⁠tipa'ikehsii. Kiishpin kota kaah⁠tipa'ikekopanen e⁠aapaci'aatc ini awahkaanan, mii 'imaa ke⁠onci tipa'ikehsenik.

Anami'aawi'onahshowewinan

¹⁶ Kiishpin ihsa inini wanimaatc pehki oshkiniikihkwen ci⁠pihshikwaaci'aatc eh⁠ahshotamawaakaaniwihsinik ci⁠wiitikenitc, mii hsa 'i eshinaakwaninik oncita ko ci⁠mooshkine tipa'iketc minihk kaa⁠tipa'ikenk kii⁠kihci wiitikemimintc ihkwewan. Miitahsh keshi wiiwitc.

¹⁷ Kiishpin itahsh oteteni inentansinik ci⁠wiitikemaatc ini ihkwewan, mii hsa ko 'i oncita eshinaakwaninik ci⁠tipa'ikehpan minihk kaa⁠tipa'ikenk kii⁠kihci wiitikemimintc pehki oshkiniikihkwewan.

¹⁸ Keko pakitinaahkek kaa⁠mamaantaawihciketc ihkwe ci⁠pimaatisitc.

¹⁹ Awenen ihsa piko ke⁠wiici pihshikwaacihcikemaatc aya'aawihshan ishinaakwanini ci⁠nihsintipan.

²⁰ Awenen ihsa koke⁠pakitinaahsoohtamawaatc kotak manitoon ishinaakwanini ci⁠nihsintipan. KaaTipencikenitc iitok i'i cikii ishihcikehtamawaahpan.

²¹ Keko maanshitootawaahken, keko kaye kitima'aahken kaa⁠mayakisitc, kekiinawaa iitok kikii mayakisim weti Iicipahkiink (Egypt).

²² Keko kaye kakwaataki'aahken kiiwaacihkwe, kwiiwahshishaanak kaye.

²³ Kiishpin itahsh i'i ishihcikeyan shaakowaashiwaatc itahsh ci⁠wiici'akwaa, kehcinaac ihsa ko ninka noontawaak.

²⁴ Miihsh ci⁠nishkaatisiyaan, kaa⁠tashi miikaatinaaniwank kika onci nihsininim. Kiwiiwiwaak ihsa ta⁠kiiwaacihkwewiwak, kiniicaanihsiwaak kaye kaawiin awahshime ta⁠otetehsiiwak.

²⁵ Kiishpin awi'aatc shooniyaan peshik awiya kaa⁠kitimaakisinitc nimpimaatisiiman mekwe'aya'ii eyaatc, keko ishihcikehken eshihcikewaatc kaa⁠masina'ike miikiwewaatc shooniyaan. Keko akintamawaahken awahshime ci⁠kiiwe tipa'amawihk.

²⁶ Kiishpin otaahpinamawatc okashkiikiiwin kaa‑ahpi tipa'ikaaketc, kiiwe miinaahkan cipwaa pankihshimonitc kiisihsoon.

²⁷ Mii iitok i'iweni ehta eyaatc ke⁠onci kiishoositc. Wekonenini tahsh ke⁠kashkiikihshinkipan nipaatc? Ahpii hsa shaakowaashitc ninka noontawaa hsa aaniihsh ninkishewaatis.

²⁸ Keko macakimaahken Kishemanitoo; keko kaye maci'inaahken kaa⁠niikaanisiihkantawinekwaa.

²⁹ Keko tahsh pwaahtawiihkek ci⁠onci pakitinaahsoohtamawiyek kaakii onci manishamek kikihtikewiniwaank, kishoominaapoomiwaank kaye, aalip tino pimitenk kaye ahpii ishihsek ci⁠pakitinamekipan. Miishihshik kwiiwisenhsak nihtam kaa⁠nihtaawiki'ekwaa.

³⁰ Pakitinamawihshik kaye maawac iko nihtam wenci nihtaawikiwaatc kipishihkiimiwaank, kimaanahcaanihshimiwaank kaye. Maano iki ayaapenhsak oka wiici ayaamaawaa' omaamaawaa' niishwaahso (7) kiishik. Miihsh keshi pakitinaahswaanekwaa ci⁠miishiyek.

³¹ Kiinawaa iitok nimpimaatisiimak kaa⁠tipinawewisiiminakook. Keko ihsa tahsh miicihkek wiiyaahs aya'aawihshak kaakii nihtoowaatc.