Ekihsatahs 21 - Ojibwe Kihcimasina'ikan

Ketootawintwaapan Opamiihtaakek

¹ Miitahsh onoweniwan onahshowewinan ke⁠onahtamawatwaa Isriyalak;

² Kiishpin ataaweyek Hiiparoo opamiihtaake, ninkotwaahso pipoon ihsa kika pamiihtaak. Niishwaahso (7) pipoon tahsh ishihsenik mii 'i ci⁠pakitinatc ci⁠maacaatc ci⁠tipenintisotc, kaawiin kekoon mamayehc ci⁠tipa'amawihk.

³ Kiishpin wiiwihsik ahpii kaakii otihsihkipan, ahpii tahsh ocihcihsenik pisaan ci⁠maacaatc ci⁠tipenintisotc, mii hsa 'i keshi mihci peshikotc. Kiishpin itahsh wiin kaa⁠wiiwihpan, mii hsa 'i keshi maaciinaatc wiiwan ahpii ocicihsenik pisaan ci⁠maacaatc ci⁠tipenintisotc.

⁴ Kiishpin itahsh otookimaaman miinikotc ihkwewan ci⁠wiiwitc, ontinaatc i'imaa ihkwenk okosihsa', otaanihsa' kaye, otookimaaman ihsa oka tipenimaani ini wiiwan, oniicaanihsa' kaye. Wiin ihsa ehta a'a inini ta⁠maacaa ci⁠tipenintisotc.

⁵ Kiishpin itahsh a'a opamiihtaake ihkitotc, “Nisaaki'aa nintookimaam, niwiiw, iki kaye niniicaanihsak, kaawiin niwii maacaahsii.”

⁶ Otookimaaman ihsa tahsh oka ishiwinikoon eshi'ayaanitc otipaahkoniwen. Miihsh ci‑ishiwinintc ishkwaantenk eshi patahkisonitc ishkwaantemaahtikoon i'imaa ahshitc cishi pakonehtawake'ontc mikoohs ci⁠aapataninik. Minihk itahsh iko ke⁠pimaatisitc oka pamiihtawaan otookimaaman.

⁷ Kiishpin ihsa inini ataawaaketc otaanihsan ci⁠pamiihtaakenitc, a'a hsa ihkwe kaawiin pakitinaahsii ci⁠maacaatc ci⁠tipenintisotc taapishkoo kaa⁠tootawimintc ininiiwi pamiihtaake'.

⁸ Kiishpin itahsh a'a ihkwe minwaapamikohsik kaakii ataawaanikotc kaakii otaahpinikohpan, miihsh pisaan ci⁠pakitinintc ci⁠kiiwe ataawaanikotc oteten. Ini hsa kaakii ataawaanikohpan kaawiin ta⁠ishinaakwahsinini ci⁠anihke ataawaakaanikotc i'i kaa⁠mayakisinitc ci⁠tipenimikotc onsaam iitok kaawiin weweni okiih tootaakohsiin.

⁹ Kiishpin ihsa inini ataawetc ihkwewi opamiihtaaken ewii miinaatc okosihsan ci⁠wiiwinitc, mii hsa 'i ke⁠tootawaatc taapishkoo otaanihsan kaa⁠tootawaatc.

¹⁰ Kiishpin itahsh inini wiitikemaatc kotak ihkwewan, mii hsa ko 'i peshikwan ke⁠tootawaatc ini nihtam kaakii wiiwitc ci⁠ahshamaatc miicim, kaye ci⁠miinaatc ke⁠kikishkaminitc. Peshikwan iko cishi opapaamisiwininitc ini nihtam wiiwan.

¹¹ Kiishpin itahsh ono nihsin kekoonan ishi tepami'aahsik, mii hsa 'i pisaan ci⁠pakitinaatc ci⁠maacaanitc ci⁠tipenintisonitc kaawiin kekoon mamayehc ci⁠tipa'amawintc.

Eonahshowaatekin Piikwahkamikisiwinan

¹² Awenen ihsa piko niiwana'waatc pemaatisinitc, kewiin ihsa kooncita ko ta⁠nihcikaniwi.

¹³ Kiishpin itahsh wiin oncita kaah⁠tootawaahsik kaakii nihsaatc, Kishemanitoon kaah⁠pakitinaminitc i'i ci‑ishihsenik weti hsa ta‑ahpa'iwe kaawii oshihtaawak ayaawin awiyan keshi papaamenimikohsik kekoon ci⁠tootawaakaniwihsik.

¹⁴ Kiishpin itahsh wiin awiya oncita inentank ci⁠nihsaatc wiicipimaatisiin ishihciketc itahsh, kewiin ihsa ta⁠nihsaakaniwi. Mihsawaa ko ahpa'iwetc kaashi pakitinaahsowintc keshi papaamenimaahsiwintipan.

¹⁵ Awenen ihsa koke⁠pahkihte'waatc oteten komaa kaye omaamaan, kehcinaac ta⁠nihsaakaniwi.

¹⁶ Awenen ihsa kokaye kiimooci maaciinaatc awiyan, ataawaaketc itahsh, komaa kaye mihkikaniwitc keyaapi e⁠kihciwinaatc, ahpii hsa kaahcitinintc ta⁠nihsaakaniwi.

¹⁷ Awenen ihsa piko kemaci'inaatc oteten komaa kaye omaamaan ta⁠nihsaakaniwi.

¹⁸ Kiishpin itahsh ininiwak miikaatiwaatc, peshik itahsh pimwahsina'aatc ini kotak ininiwan, komaa kaye pihkwaahkoninciihtawaatc ishi nihsaahsik itahsh, kaawiin ta⁠nana'ahcikaniwihsii. Kiishpin itahsh ini ininiwan kaakiih pahkihte'waatc nipewinink onci pimihshininitc kaa⁠inakanaamaatc

¹⁹ naanaake tahsh ishi wanishkaanitc, akwaciink papaa sahka'onitc eh⁠papaamohsenitc, miitahsh eshinaakwaninik ci⁠tipa'amawaatc eshi wanihcikenitc tipa'ikan onci. Miihsh kaye ci⁠wiici'aatc piinihsh ci⁠mino'ayaanitc.

²⁰ Kiishpin itahsh inini mihtikoni aapacihtootc pahpahkihte'waatc kaa⁠pamiihtaakotc kaa⁠ininiiwinitc, komaa kaye ehkwewinitc onci niponitc kaa⁠inakanaamaatc, mii hsa 'i eshinaakwaninik ci⁠onci onahkonaakaniwitc.

²¹ Kaawiin itahsh wiin kekoon tashi nana'ahsaahsii kiishpin niishokiishik, komaa kaye nihsokiishik keyaapi ani pimaatisinitc aaniihsh wiin otipenimaa' i'i pemiihtaakotc.

²² Kiishpin ihsa ininiwak miikaatiwaatc pihtakanaamaawaatc itahsh ihkwewan kekishkawaawahsonitc onci wani'aawahsonitc itahsh i'imaa onci, ini tahsh ihkwewan i'imaa onci maahkisihsinik, a'a hsa inini kaakiih pihtakanaamaatc ini ihkwewan ta⁠tipa'ike'aa minihk iko onaapemini keshi antawentaminitc, komaa kaye otinaahkoniwen ke⁠ihkitonitc.

²³ Kiishpin itahsh a'a ihkwe i'imaa onci maahkisitc, miihsh i'imaa pimaatisiwin ci⁠aapatahk ci⁠tipa'ikaatek pimaatisiwin.

²⁴ Awiya hsa kicaapakanaamaatc awiyan, kewiin hsa ta⁠kicaapakanaanso, awiya kaye manaapite wepakanaamaatc awiyan, kewiin hsa ta⁠manaapite wepakanaanso. Awiya kaye kiishkininciishwaatc awiyan, kewiin ihsa mii' ta⁠kiishkininciishwaa. Awiya kaye kiishkisiteshwaatc awiyan, kewiin ihsa ta⁠kiishkisiteshwaa.

²⁵ Awiya kaye caakiswaatc awiyan, kewiin ihsa ta⁠caakiswaa. Awiya kaye maahki'aatc awiyan, kewiin ihsa ta⁠maahki'aa. Awiya kaye nameyaahpinanaatc awiyan kewiin ta⁠nameyaahpinaanso.

²⁶ Kiishpin ihsa inini pahkihte'waatc oshkiishikoniink eniniiwinitc, komaa ehkwewinitc kaa⁠pamiihtaakotc ishi kicaapakanaamaatc itahsh, mii hsa 'i ci⁠pakitinaatc ci⁠tipenintisonitc. Mii 'iwe keshi tipah'ikehsenik.

²⁷ Kiishpin itahsh wiin manaapite wepakanaamaatc eniniiwinitc, komaa kaye ehkwewinitc kaa⁠pamiihtaakotc, mii hsa 'i keshi pakitinaatc ci⁠tipenintisonitc, mii 'iwe keshi tipa'ikehsenik.

Keshihcikewaahpan Kekoonan Kaatipentamowaatc

²⁸ Kiishpin ihsa awiya otayaape pishihkiiman oteshkaniniink onci pashipa'owenitc, nihsaanitc itahsh awiyan, mii hsa 'i ci⁠nihsimintc. Owiiyaahsini itahsh kaawiin ta⁠miicinaakaatehsinini. A'a tahsh wiin kaa⁠tipenimaatc ini pishihkiwan kaawiin kekoon tashi nana'ahsaahsii.

²⁹ Kiishpin itahsh wiin kaa⁠nihtaa moohkiihtaakenikwen pemaatisinitc, kaa⁠inaawintipan itahsh a'a inini ci⁠kipa'waatc opishihkiiman, kiishpin kaa⁠ishihcikehsik, kiishpin itahsh ishi pashipa'owenitc otayaape pishihkiiman nihshiwenitc, mii hsa 'i ci⁠nihsimintc ci⁠papiimwahsina'imintc, kewiin ihsa ta⁠tako nihsaakaniwi.

³⁰ Kiishpin itahsh wiin pakitinaakaniwitc ci⁠tipa'iketc ci⁠pimaaci'itisotc, minihk ihsa ko ecikaniwitc ta⁠caaki tipa'ike.

³¹ Kiishpin itahsh aape pishihki nihsaatc kwiiwisenhsan komaa kaye ihkwesenhsan mii hsa peshikwan inaahkonikewin ke⁠aapatahk.

³² Kiishpin itahsh kaye awiya otayaape pishihkiiman nihsaanitc eniniiwinitc, komaa kaye ehkwewinitc kaa⁠pamiihtamaakenitc, mii hsa 'i ci⁠tipa'amawaatc ini ininiwan kaakiih tipenimaanihpan opamiihtamaake' nihsimitana (30) waapaapihko shooniyaa' minihk. Ini tahsh wiin opishihkiiman ta⁠nihsaawan.

³³ Kiishpin ihsa inini kipa'ansik waanihkaan, komaa kaye waanihketc ishi kipa'ansik itahsh, piincihsenitc itahsh pishihkiwan komaa kaye maanshimihtatimoon,

³⁴ mii hsa 'i ci⁠tipa'iketc. Oka tipa'amawaan ini tepenimaanitc aya'aawihshan, wiin itahsh ci⁠tipenimaatc kaa⁠niponitc aya'aawihshan.

³⁵ Kiishpin ihsa inini otaapepishihkiiman nihsaanitc kotak ininiwan opishihkiimini, iki hsa minciniish ininiwak oka ataawaakenaawaan ini kaa⁠pimaatisinitc pishihkiwan ci⁠nenaawinamaatiwaatc shooniyaan. Ini tahsh kaye pishihkiwan kaakii nihsimintc, mii 'imaa ke⁠onci nenaawinamaatiwaatc wiiyaahs.

³⁶ Kiishpin itahsh kii⁠kihkentaakwaninikipan opishihkiiman e⁠nihtaa miikaasonitc, kaye tahsh kiih⁠kipa'waahsik opishihkiiman, miihsh eshinaakwaninik ci⁠tipa'amawaatc ini kotak ininiwan. Oka miinaan ihsa ini ininiwan pemaatisinitc opishihkiiman. Iniweniwan itahsh wiin kaa⁠niponitc pishihkiwan oka ayaawaan.