Ekihsatahs 20 - Ojibwe Kihcimasina'ikan

Kishemanitoo Kiimiikiwetc Mitaahso Onahshowewinan

¹ Kishemanitoo tahsh ono kahkina kii‑ihkito ihkitowinan:

² “Niin ohsha kaaTipenciketc kiKishemanitoom kaakiih saakiciwininaan weti Iicipahkiink (Egypt), kaakii ishi kakwaataki mihtkanohkii'ikoyampan.”

³ “Keko pahkaan manitook ayaawaahken enaahsamiiyaan.”

⁴ “Keko oshihtamaasohken manitoowi oshihcikanak ci‑ishinaakosiwaatc kekoon eshinaakwahk kihci kiishikonk, komaa kaye ahkiink, komaa kaye weti kekoon eyaak anaamipiik.

⁵ Keko kaye ociciinkwanapiihtawaahken awenenak iko tino manitoohkaanak, keko kaye anami'ehtawaahken. Niin iitok kaaTipenciketc weKishemanitoomiyan, kaawiin tahsh awaac iko kipakitinihsinoon pahkaan manitoo ci⁠ayaawatc. Ninka nana'ahsaak hsa iki kaa⁠shiinkenimiwaatc, opiiwesiimiwaa' kaye, piinihsh nihsink, komaa kaye niiwink keni ayaanihke nihtaawiki'itiwaatc.

⁶ Ninka naakohtamawaak itahsh wiin aaniin eshi saaki'akwaa piinihsh mitaahswaahk keni nihtaawiki'itiwaatc iki kaa⁠saaki'iwaatc, kaa⁠na'ihtawiwaatc.”

⁷ “Keko tahsh kaye anoociko inaapacihtoowaahken kaaTipenciketc owiinsowin kiKishemanitoom, kaawiin ohsha kaaTipenciketc oka aanswe nana'ahsaahsiin iniweniwan anoociko kaa⁠inaapacihtoonitc owiinsowin.”

⁸ “Maamihkawinotan kaye kaa⁠Anwepiiwi kiishikahk, Kishemanitoo hsa i'iweni okiishikanom.

⁹ Ninkotwaahsokiishik hsa kipakitinikoo ci⁠tootaman kahkina kitanohkiiwinan.

¹⁰ I'i tahsh wiin kaa⁠niishwaahsokiishikahk mii hsa 'i e⁠Anwepiiwi kiishikahk Kishemanitoo wiin iko kaa⁠tipentank. Kaawiin hsa awiya ta‑anohkiihsii i'i ahpii. Kaawiin kika anohkiihsiim, kikosihsak, kitaanihsak, kitanohkii'aakanak kaa⁠ihkwewiwaatc, kaa⁠ininiiwiwaatc kaye. Kaawiin kaye kitawahkaanak, iki kaye kaa⁠mayakisiwaatc kaa⁠wiici ayaamihkwaa.

¹¹ Miitahsh niin kaaTipencikeyaan ninkotwaahsokiishik ninkii anohkii ekii oshihtooyaan kiishik, ahki, kahkina kaye kekoon i'imaa eyaakin. Niishwaahsokiishik itahsh e⁠ishihsek mii 'i kaakii anwepiyaan. Miitahsh kaakii onci kihtentaakohtooyaan, ekii inakintamaan niin iko ewiih tipinawewisiyaan.”

¹² “Kihtenim kitete, kimaamaa kaye, kinwesh ci⁠pimaatisiyan i'imaa ahkiink kaaTipenciketc kiKishemanitoom kaawii miinihk.”

¹³ “Keko kaye nihshiwehken.”

¹⁴ “Keko kaye papaamenimimaahken awiya owiitikemaakanan pihshikwaacaya'ink inahke.”

¹⁵ “Keko kaye kiimootihken.”

¹⁶ “Keko kaye anoociko ishi anihsha anaamimaahken kiicipimaatis ke⁠onci maanshihsetc.”

¹⁷ “Keko kaye mihsawentamawaahken kiicipimaatis owaahkaa'ikan. Keko kaye mihsawenimimaahken kiicipimaatis wiiwan, komaa kaye otanohkii'aakanan kaa⁠ihkwewinitc, komaa kaye kaa⁠ininiiwinitc. Keko kaye mihsawentamawaahken opishihkiiman, omaanshimihtatimooman, kekoonini kaye kiicipimaatis kaa‑ayaatc.”

Pemaatisiwaatc Kiikohtaanenimaawaatc Kishemanitoon

¹⁸ Kahkina tahsh pemaatisiwaatc okii waapantaanaawaa eh⁠kihci pinehsiiwaninik, eh⁠kakihci inaahtehsenik kaye. Okii noontaanaawaa kaye kihci pootaacikan e⁠noontaakwaninik, okii waapantaanaawaa kaye kihci waciini e⁠akwaapahtenik. Pemaatisiwaatc tahsh kii⁠nininkaanimisiwak, waahsa kaye kii‑ishi niipawiwak.

¹⁹ Miitahsh kaa'inaawaatc Moosihsoon (Moses), “Taka kiin kanooshihshinaam, kika pisintaakoo tahsh, keko tahsh wiin pakitinaahken Kishemanitoo ci⁠kanooshiyamintc, ci⁠nipohsiwaank,” okii'ikoo'.

²⁰ Miihsh o'o Moosihs kaa⁠ishi nahkwehtawaatc, “Keko sekisihkek, Kishemanitoo ohsha kinanta kihkenimikowaa, wiihkaa ci⁠pooni kohtaanenimaahsiwek, wiihkaa ci⁠macitootansiwek,” okii inaa'.

²¹ Waahsa tahsh pemaatisinitc kii‑ishi niipawiwa', mekwaa Moosihs pehsho e⁠naasihkank wahkwiini kaakiih kashkiitipihki kihpakaanahkwaninik eshi'ayaanitc Kishemanitoon.

Onahshowewin Kaakiimiikiwetc Ke'ishihcikaatek Onaapihkinikan

²² Miitahsh Moosihs kaa'ikotc kaaTipencikenitc, “Mii hsa 'owe ke'inatwaa Isriyalak, Kiinawaa hsa ko kikii waapantaam aaniin inahke kaakii onci kanooninakook kihci kiishikonk.

²³ Keko wiin osaawi shooniyaa waapihkonk, waapaapihko shooniyaa waapihkonk kaye onci oshihtamaasohkek manitoohkaanak ke⁠anami'ehtawekwaa, pehkihsh itahsh niin ci⁠anami'ehtawiyek.

²⁴ Mihtahkamik hsa onci oshihtamawihshik kaashi pakitinaahsonk. Miitahsh i'imaa keshi pakitinaahswaatamek kaa‑ankwaahkitekin tino pakitinaahsowinan, ini kaye mino wiiciintiwi pakitinaahsowinan. Mii hsa 'iwe keshi pakitinekwaa maanahcaanihshak, maanatihkwak, pishihkiwak kaye. Ahpii tahsh ke⁠ishihcikeyaan ci⁠kihtencikaatek niwiinsowin, kika pi'anta waapamininim ci⁠shaweniminakook kaye.

²⁵ Kiishpin itahsh ahsiniink onci oshihtooyek kaashi pakitinaahsonk, keko wiin aapaci'aahkekwanik ahsiniik kaa⁠kiishkaapihka'ontwaa, aaniihsh kika wiinihtoom kiishpin aapacihcikanan aapacihtooyek.

²⁶ Keko tahsh wiin ishihtoohkek ci⁠tahtahkohkiiwinihkantek. Maakishaa hsa inaantaweyek kika wanaaciim.”