Ekihsatahs 2 - Ojibwe Kihcimasina'ikan

Moosihs Onihtaawikiwin Ehtashintenik

¹ I'i tahsh ahpii kii⁠ayaa inini Liipaaink (Levi) ekii ontahkaanesitc, ekii wiiwitc ihkwewan kaakii wiici ontahkaanesiimaatc.

² Miitahsh a'a ihkwe kaakii ani kikishkawaawahsotc ekii ayaawaatc kwiiwisenhsan. Ekii waapamaatc itahsh e⁠minonaakosinitc, okiih kaanaan nihsokiisihs (3) minihk.

³ Ahpii tahsh kaa⁠kashkihtoohsik awahshime ci⁠kaanaatc ini apinoonciishan, mii hsa mashkohsii mahkahkonk kaa⁠ishi piina'waatc. Okii ishihtoon i'i mahkahkoni ci⁠onsihkaahsininik, pikiwan ekii aapaci'aatc. Miitahsh kaa⁠ishi pahkopii'ank ciikew kaakii ishi mashkohsiihkaanik i'imaa Naayal (Nile) siipink.

⁴ Otawemaan itahsh a'a kwiiwisenhs waahsa kii⁠onsaapiwan ewii waapamikotc aaniin ke⁠ishihsetc.

⁵ Kihciokimaa tahsh otaanihsan kii⁠naasipiiwan i'imaa siipink ewiih kisiihsipasonitc. Mekwaa tahsh a'a otaanihsimaa eh⁠pimaashakaametc kaa⁠wiiciiwikotc oshkiniikihkwewa' kaakiih pamiihtaakotc, okii onci waapantaan mashkohsii mahkahkoni e⁠akwantenik eshi mashkohsiihkaanik. Miihsh kaakii anoonaatc peshik kaa⁠pamiihtaakotc ci⁠naasihkaminitc.

⁶ Ahpii tahsh eh⁠paahkinank i'i mahkahk, apinoonciishan okii waapamaan e⁠mawinitc. Miihsh kaa⁠ishi koohpaatenimaatc ekii ihkitotc, “Mii hsa wa'a peshik Hiiparoowi apinoonciish,” kii‑ihkito.

⁷ A'a tahsh kwiiwisenhs kaakii otawemaatc okii'inaani kihciokimaan otaanihsini, “Nintaa ishaa na ci⁠awi kanoonak Hiiparoowihkwe ke⁠nooni'aahtamawihk ini apinoonciishan,” okii'inaan.

⁸ Miihsh kihciokimaahkwenhs kaa'inaatc ini ihkwesenhsan, “Haw, maacaan.” A'a tahsh ihkwesenhs okii awi kanoonaan omaamaani ini apinoonciishan.

⁹ Kihciokimaahkwenhs hsa okii'inaan ini ihkwewan kaakii antomimintc, “Maaciish a'a apinoonciish ci⁠nooni'aahtamawiyan, kika tipa'amawin itahsh kaye,” okii'inaan. Miitahsh ini ihkwewan kaa⁠ishi otaahpinaanitc ini apinoonciishan ekii nooni'aahtamaakotc.

¹⁰ Ahpii tahsh kaah⁠te'ahpiihtaatisinitc ini apinoonciishan, a'a hsa ihkwe okii ishiwinaan kaakii ishi'ayaanitc kihciokimaa otaanihsan. Miitahsh a'a otaanihsimaa kaa⁠ishi inakimaatc ini kwiiwisenhsan wiin iko ekii okosihsitc. Miitahsh kaa⁠ihkitotc, “Nipiink itahsh ekii onci akwaasipinak, Moosihs (Moses) hsa ninka ishinihkaanaa,” kii‑ihkito.

Moosihs Kii'ahpa'iwetc Mitiyan (Midian) Ahkiink

¹¹ Ahpii hsa Moosihs (Moses) kii⁠kiishaapewitc, kii‑ishaa ekii anta waapamaatc owiici ontaatisiimaakana' Isriyala' (Israel). Miihsh kaakii waapantank aaniin kaa‑ahpiihci kakwaataki'imintc. Okii waapamaan itahsh Iicipiiwininiwan (Egyptian) eh⁠pahpahkihte'waanitc peshik Hiiparoowininiwan (Hebrew) kaakii wiici ontaatisiimaatc.

¹² Misiwe hsa tahsh kii⁠ayinaapi, e⁠kihkentank itahsh awiyan i'imaa e⁠ayaahsinik, mii hsa kaa⁠ishi nihsaatc ini Iicipiiwininiwan. Miihsh kaa⁠ishi ninkwaawanka'waatc ekiih kaanaatc.

¹³ Miinawaa tahsh e⁠ani waapaninik kii‑ishaa weti. Okii waapamaa' niishin Hiiparoowininiwa' (Hebrews) e⁠miikaatinitc. Miitahsh kaakii'inaatc ini mayaa kaa⁠mamaashiinitc, “Wekonen wenci miikaanatc a'a kiwiici ontaatisiimaakan?” okii'inaan.

¹⁴ Miihsh o'o kaa⁠ishi nahkwehtaakotc, “Awenen kaa⁠inakimihk ci⁠tipenimiyaank, ci⁠onaahkoniyaank kaye? Kiwii nihshish ina taapishkoo kaakii ishi nihsatc a'a Iicipiiwinini,” okii'ikoon. Miitahsh Moosihs kaa⁠ishi sekisitc ekii ihkitotc, “Tepwe iinsan kihkencikaate aaniin kaa⁠ishihcikeyaan.”

¹⁵ Ahpii tahsh kihciokimaa Peroo (Pharaoh) kaa⁠noontank aaniin kaa⁠inahkamikaninik, miitahsh ekii nanaantone'ank aanti ke⁠onci nihsimintc. Miitahsh Moosihs kaakii onci maaciipa'iwetc eshi'ayaanitc kihciokimaan. Weti tahsh Mitiyan (Midian) ahkiink kii‑ishi anta kapehshi. Miitahsh i'imaa onta'ipaanink kaakii ishi onapitc.

¹⁶ Kii⁠ayaa tahsh anami'ewikimaa i'imaa Mitiyan ahkiink, ekii niishwaahcinitc (7) otaanihsa'. Moosihs itahsh i'imaa e⁠namatapitc, kiihpi takohshinoo' i'i otaanihsimaa' ekiih pi mooshkinepatoonitc ahtoopaanan kaa⁠onci minihkwenitc oteteni omaanahcaanihshimini, omaanatihkomini kaye.

¹⁷ Kiihpi takohshinook tahsh kotak okanawi maanahcaanihshiwek inkoci ekii inaamwa'waanitc i'i ihkwewa'. Miihsh Moosihs kaakii naatamawaatc i'i ihkwewa', okii wiici'aa' kaye e⁠mina'aanitc oteteni omaanahcaanihshimini, omaanatihkomini kaye.

¹⁸ Ahpii tahsh iki ihkwewak ekiih takohshinowaatc otetewaan Cehtaroon (Jethro) eshi'ayaanitc o'o okii'ikowaan, “Wekonen tahsh noonkom kaa⁠kiishikahk wenci kitaahtapiiyek?” okii'ikowaan.

¹⁹ Miihsh o'o kaa⁠ishi nahkwehtawaawaatc, “Iicipiiwinini hsa ninkii naatamaakonaan okanawi maanahcaanihshiwek inkoci ekiih kakwe inaamo'onankitwaa. Wiin tahsh iko kaye ninkiih kwaapa'ipiihtamaakonaan ekii mina'aatc maanahcaanihsha'.”

²⁰ Miitahsh o'o kaa'inaatc otaanihsa', “Aaniinti tahsh eyaatc? Wekonen tahsh weti kaa⁠onci nakanek? Antomihk ci⁠wiici wiihsiniiminank,” okii inaa'.

²¹ Moosihs hsa kii‑inentam i'imaa ci‑ishi kapehshitc. Miihsh Cehtaroon kaakii miinikotc otaanihsini Sihpoorawan (Zipporah) ci⁠wiiwitc.

²² Miiwan itahsh ini ihkwewan kaakii ayaawaanitc kwiiwisenhsan. Moosihs hsa tahsh Kersham (Gershom) okii ishinihkaanaan ini okosihsan. Miihsh o'o kaa⁠ihkitotc, “Aaniihsh eh⁠piiwitewiyaan o'omaa ahkiink i'i kaa⁠onci ishinihkaanak,” kii‑ihkito.

²³ Naanaake tahsh ekii ani ishihsenik kihciokimaa Iicipahkiink (Egypt) kii⁠nipo. Miitahsh Isriyalak (Israel) kaakii moohkonewaatc onsaam ekiih kakwaataki mihtanohkii'intwaa ekiih pamiihtaakewaatc. Okiih shaakowaanaawaan, ekii mawiwaatc Kishemanitoon ci⁠naatamaakowaatc. Onsaam iitok kii⁠tahkonikaasowak.

²⁴ Miitahsh Kishemanitoon kaakii noontaakowaatc eshi moohkonewaatc, ekii maamihkawinitc kaye kaakii ishi ahshotamawaanikopanen Eparahaaman (Abraham), Aaisikoon (Isaac), ini kaye Cekapoon (Jacob).

²⁵ Kishemanitoo okii waapamaa' Isriyala' aaniin eshi kakwaatakihtoonitc, miihsh kaakiih koohpaatenimaatc.