Ekihsatahs 12 - Ojibwe Kihcimasina'ikan

Maawac Iko Nihtam Pimaaci'ikoowi Wiihkwantiwin Kiimaacihcikaatek

¹ Miitahsh o'o Moosihs (Moses), a'a kaye Eran (Aaron) kaa⁠ikowaatc kaaTipencikenitc,

² “Wa'a hsa kiisihs noonkom kaa⁠pimakinsotc, mii hsa wa'a nihtam kiisihs ke⁠maatakinsotc ci⁠maacihsek ke⁠okihkinoowiniyek.

³ Mii hsa 'oweni kahkina Isriyalak (Israel) kaa⁠paahtiinowaatc ke'inatwaa: Mitaahso hsa inakinsotc wa'a kiisihs kaa⁠pimakinsotc, entahso peshikotc hsa inini oka otaahpinaan maanahcaanihshenhsan.

⁴ Kiishpin itahsh wiin onsaam akaahsiinowaatc eyaawaatc taawinink ci⁠kitamwaawaahpan misiwe maanahcaanihshenhsan, pehsho hsa wenci wiicitaamaawaatc oka wiitoohpamikowaan. Oka ishi onaapamaawaan ihsa piko ci⁠na'i kitamwaawaatc ke⁠tahshiwaatc.

⁵ Kaa⁠peshikopipoonwetc hsa tino maanahcaanihshenhs kika aapaci'aawaa, kekoon kaashi maahkisihsik. Pisaan hsa kika aapaci'aawaa maanahcaanihshenhs komaa kaye maanatihkoonhs.

⁶ Kika kanawenimaawaak itahsh piinihsh mitaahshiniiwin (14) ci‑inakinsotc wa'a kiisihs. Miitahsh i'i ahpii kahkina Isriyalak ke⁠nihsaawaatc i'i aya'aawihsha' kii'ani onaakohshininik.

⁷ Pemaatisiwaatc itahsh oka otaahpinaanaawaa miskwiini ci⁠shishoonamowaatc kwehkwehk ishkwaantemaahtikonk. I'imaa kaye kaa⁠ishi pimitaahkwakoocininitc ishkwaantemaahtikoon aaniinti waahkaa'ikanink ke⁠tashi amomintc maanahcaanihshenhsa'.

⁸ Miitahsh i'i ahpii tipihkaninik ke⁠apwewaatc ci⁠miiciwaatc i'i wiiyaahs. Oka takonaanaawaa tahsh kaa⁠wiihsakaninik aniipiishiwi takosikan, kaye pahkweshikanan kaa⁠ompisikaniwihsinik.

⁹ Keko tahsh wiin miicihkek wiiyaahs ci⁠kikashkik, keko kaye kapaahtoohkek. Memwehc ihsa koci⁠apwaasotc, kikihtikwaan, kikihkaat, kahkina ko kaye otishinaakosiwinan piincaya'ii.

¹⁰ Keko tahsh wiin kekoon ta⁠ishkwancikaatehsinoon piinihsh ci⁠ani waapank. Wekonen itahsh iko ke⁠ishkohsek, mii hsa 'iwe ke⁠ankwaahkisikaatek.

¹¹ Miitahsh o'o ke⁠ishihcikeyek wiihsiniyek, kika ihkwahpitoom hsa kikashkiikiiwiniwaan kikihcihpisoniwaank, kika kikahkisinem kaye, weyiip itahsh kika wiihsinim. Mii iitok i'iwe Tepencikeyaan nimPimaaci'ikoowi Wiihkwantiwin keoncikihtenimikooyaan.”

¹² “Mii hsa 'i ahpii tipihkahk, misiwe kaawiih shaaposhkaayaan i'imaa Iicipahkiink (Egypt) ewii nihsakwaa nihtam nehtaawikiwaatc eniniiwiwaatc, aya'aawihshak itahsh kaye. Niwii nana'ahsaak kaye manitoohkaanak eyaawaatc Iicipahkiink. Niin iitok kaaTipenciketc nintinow.

¹³ I'i hsa miskwi kaakiih shishoonamek, mii hsa 'iwe ke⁠kihkinawaaci'ikoyek aaniinti waahkaa'ikanink eshitaayek. Ahpii tahsh waapantamaan miskwi kika aansweshkawininim, kaawiin itahsh kika pakamishkaakohsiim ke⁠nihshiwanaaci'ikoyek ahpii pahkihte'amaan Iicipahki.

¹⁴ Mii hsa 'owe kaa⁠kiishikahk ke⁠inahkamikisiyek ci⁠wiihkwantiiwahkamikisiyek. Keni ayaanihke nihtaawiki'itiwaatc hsa 'i tani inahkamikisiwak ci⁠wiihkwantiiwahkamikisiwaatc kaaTipencikenitc onci, mii hsa 'owe nehpic iko keshi anami'ehcikenk.”

Kii'amontc Pahkweshikan Ewiihkwantiiwahkamikisink

¹⁵ Miihsh kaaTipenciketc eni ihkitotc, “Niishwaahsokiishik hsa minihk kika amwaawaa pahkweshikan kaa⁠ompisikaniwihsik. Nihtam itahsh kiishikahk kika wepinaam hsa kahkina ompisikanehs eyaak kiwaahkaa'ikaniwaank. Awenen itahsh iko ke⁠miicitc kekoon kaa⁠ompisikaniwaninik nihtam kiishikaninik piinihsh ci⁠niishwaahsokiishikaninik, mii hsa awe ke⁠inakimintc e⁠onci tipentaakosihsik Isriyalihkaank.

¹⁶ Nihtam tahsh i'i ishi kiishikahk kika kihtentaam anami'e maawaci'itiyek, miinawaa tahsh niishwaahsokiishikahk. Kaawiin itahsh o'o ishi ahpii ta‑anohkiinaaniwansinoon. Pisaan hsa wiin ta⁠kwayaancihcikaate miicim, miitahsh ehtako'i ke⁠ishihcikenaaniwank.

¹⁷ Miitahsh kaye o'o ke⁠ishihcikeyek ci⁠ani kanawentamek o'o Wiihkwantiiwahkamikisiwin Kaa‑amontc Pahkweshikan Kaa⁠ompisikaniwihsik. Mii iitok o'o ahpii eh⁠kiishikahk kaakiih saakiciwinikooyek eshi paapaahtiinoyek i'imaa Iicipahkiink. Miitahsh iko 'i keshi wiihkwantiiwahkamikisiyek o'o ishi kiishikahk nehpic iko keni ayaanihke nihtaawiki'itiyek ci⁠kanawentamek o'o anami'ehcikewin.

¹⁸ Nihtam itahsh kiisihs pimakinsotc mitaahshiniiwin (14) inakinsotc ani onaakohshik kika onci maacihtaam ci⁠amwek pahkweshikan kaa⁠ompisikaniwihsik piinihsh ci⁠ani onaakohshik niishtanashipeshik (21) ci‑inakinsotc.

¹⁹ Niishwaahsokiishik itahsh minihk kaawiin ta‑ayaahsinoon ompisikanehs kiwaahkaa'ikaniwaank. Awenen itahsh iko ke⁠miicitc kekoon wepisikaniwaninik, mii hsa awe ke⁠inakimintc e⁠onci tipentaakosihsik eshi'ayaanitc Isriyala' (Israel), komaa kaye piiwitewikwen, komaa kaye imaa kaah⁠tashi nihtaawikikwen Iicipahkiink.

²⁰ Keko miicihkek kekoon wempisikaniwank. Aanti hsa piko eshitaayek, mii hsa 'i eshinaakwahk ci⁠amwek pahkweshikan kaa⁠ompisikaniwihsik,” okii'ikoon

Nihtam Kii'ayaak Pimaaci'ikoowi Wiihkwantiwin

²¹ Moosihs (Moses) tahsh okii antomaa' kahkina kaa⁠niikaanisinitc Isriyala' (Israel) ekii'inaatc, “Maacaak otaahpinamaasok peshik maanahcaanihshenhs kahkina kaa⁠tahshiyek, ci⁠nihsek ci⁠wiihkwankaakeyek o'o kaawiih Pimaaci'ikoowi Wiihkwantink.

²² Ini hsa ihsapaahtikoonhsan (hyssop) ci⁠aapacihtooyan ci⁠cehkipiinaman i'imaa kihci onaakanink miskwi kaashi ahtek. Miitahsh i'i miskwi ke⁠aapacihtooyan ci⁠ahtooyan i'imaa ishpimink, ishi kwehkwehk kaye ishkwaantemaahtikonk. Kaawiin tahsh awiya ta⁠saaka'ansii i'imaa waahkaa'ikanink piinihsh ci⁠ani waapaninik.

²³ Ahpii tahsh kaaTipenciketc pimi ayaatc o'omaa Iicipahkiink (Egypt) ewii nihsaatc Iicip kaatinowinitc, waapantank tahsh i'i miskwiini i'imaa ishpimink, kwehkwehkaya'ii kaye ishkwaantemaahtikonk, mii hsa 'i ci⁠paashicishkank i'i ishkwaantem. Kaawiin tahsh oka pakitinaahsiin kaa⁠nihshiwenitc ci⁠piintikenitc kiwaahkaa'ikaniwaank ci⁠nihsiminek.

²⁴ Ishinaakwan tahsh ono anami'ehcikewinan ci⁠nehpici tootamek, kiniicaanihsiwaak kaye.

²⁵ Ahpii tahsh piintikeshkaayek i'i ahkiini kaaTipenciketc kaakii ahshotamawinek ewii miininek, mii hsa tahsh o'o nehpic ke⁠ishihcikeyek ke⁠onci maamihkawiyek o'o anami'ehcikewin.

²⁶ Ahpii tahsh ocihcihsenik kiniicaanihsiwaak o'o ininekwaa, ‘Wekonen tahsh o'o ke⁠onci ishihcikeyaank ci⁠kanawentamaank o'o wiihkwantiwin?’

²⁷ Miihsh o'o keshi nahkwehtawekwaa, ‘Mii hsa 'iwe Pimaaci'ikoowi Wiihkwantiwin kaakiih pakitinaahsoohtamawintipan kaaTipenciketc ke⁠onci maamihkawiyek. Aaniihsh okii aansweshkaanan kitaawininaanin kiinawint Isriyalak kaatinowiyank, ahpii kiih⁠pimi ayaakopanen o'omaa Iicipahkiink. Iicip kaatinowinitc iitok wiin kii⁠nihsaakopan, kiinawint tahsh wiin kaawiin kikiih papaamenimikohsiinaan.’ ” Miitahsh Isriyalak kaakii animihkohtaawaatc ekii anami'ehtawaawaatc kaaTipencikenitc.

²⁸ Miitahsh kaye kaa‑ani ishi maacaawaatc, ekii ishihcikewaatc kaaTipencikenitc kaakii'ikowaatc, Moosihs, Eran kaye.

Kiinihsintwaa Kwiiwisenhsak Nihtam Kaanihtaawikiwaatc

²⁹ Miitahsh e⁠aapihtaa tipihkaninik kaaTipenciketc kaakii nihsaatc kahkina kwiiwisenhsa' nihtam kaakii nihtaawikinitc i'imaa Iicipahkiink (Egypt). Kihciokimaa tahsh otaawinink kii‑ishi maacihseni, okosihsan kekii ani kihciokimaawinihpan ekii niponitc, piinihsh a'a tahkonikan okosihsan anaamahkamik kaakiih kipa'ontc. Kahkina kaye nihtam kaakii nihtaawikiwaatc aya'aawihshak kii⁠nipowak.

³⁰ E⁠aapihtaa tipihkaninik tahsh kihciokimaa Peroo (Pharaoh) kii⁠wanishkaa, iki kaye aanihkewikimaak, kahkina hsa Iicip kaatinowiwaatc kii⁠wanishkaawak. Aahpici hsa tahsh kii⁠kihci mawinaaniwan i'imaa Iicipahkiink, aaniihsh kaa⁠tahsinkin taawinan oncita piko peshik awiya ekii nipotc.

³¹ Miitahsh shemaak kaakii antomaatc Moosihsoon (Moses), Eranoon (Aaron) kaye mekwaa eh⁠tipihkaninik ekii'inaatc, “Maacaak, inkoci ishaak, maaciish kaye Isriyalak (Israel) ci⁠nakanekwaa kaa⁠tipenimakwaa nimpimaatisiimak. Maacaak anta anami'ehtawihk kaaTipenciketc kaakii ihkitoyek ewii ishihcikeyek.

³² Maaciinihkwak kimaanahcaanihshimiwaak, kipishihkiimiwaak kaye, mii 'i ishi maacaak taapishkoo kaakii ihkitoyek. Kakwecimihk hsa kaye kaaTipenciketc niin ci⁠minotootawitc,” okii inaa'.

³³ Iicip kaatinowiwaatc hsa piko okiih kakaansomaawaa' Isriyala' wewiip inkoci ci⁠onci ishaanitc i'imaa otahkiiwaank. Mii hsa 'o kaa'inaawaatc, “Kahkina ohsha ninka nihsikoomin kiishpin maacaahsiwek.”

³⁴ Isriyalak itahsh okii mooshkina'aawaan pahkweshikanan wempisikaniwihsinik i'imaa onaakaniink kaakii ishi nihtaa kiishiswaawaatc. Miitahsh kaakii ishi kashkiikinaawaatc okikishkikaniwaank ekiih pimiwanewaatc otinimaankaniwaank.

³⁵ Kii‑ishihcikewak Moosihsoon kaakii'ikowaatc. Okii antotamawaawaa' Iicip kaatinowinitc kekoonan kaakii waapaapihko shooniyaa waapihkowaninikin, ini kaye wesaawi shooniyaa waapihkowaninikin, takohsh kaye kikishkikanan.

³⁶ KaaTipenciketc hsa okiih tootawaa' Iicip kaatinowinitc ci⁠kihtenimaanitc Isriyala', miihsh kaakii onci miinaanitc wekonen iko kaakiih kakwecimikonitc. Miitahsh kaa⁠ishi mashashkonamawintwaa Iicip kaatinowaatc otaya'iimiwaan.

Isriyalak Kiinakatamowaatc Iicipahki

³⁷ Isriyalak (Israel) hsa tahsh i'imaa Oremasiihsink (Rameses) ecikaatenik kii⁠onci maacaawak weti Sahkat (Succoth) ekii ishaawaatc. Ninkotwaahswaahk mitaahswaahk 600,000 hsa kiih⁠tahshiwak ininiwak. Kaawiin iitok ihkwewak, apinoonciishak kaye kiih⁠takwakimaahsiiwak.

³⁸ Aahpici kaye kiih⁠paahtiinowak kotak pemaatisiwaatc kaakii maacinisha'ikewaatc. Aahpici kaye kiih⁠paahtiinowa' maanahcaanihsha', pishihkiwa' kaye kaakii maaciinaawaatc.

³⁹ Okiih kiishiswaawaan hsa ini pahkweshikanan kaakii ompisikaniwihsinik Iicipahkiink (Egypt) kaakiih pionci maacaawaatc. Mii hsa 'i kaa‑ahpiihci sesakooc saakiciwinintwaa i'imaa Iicipahkiink kaawiin kanake kii‑ishihsehsiiwak ci⁠nawahponihkewaatc, komaa kaye cikiih kwayaanci'aawaahpan pahkweshikanan kaakii ompisikaniwinitc.

⁴⁰ Mii hsa 'i niiwaahk nihsimitana (430) tahso pipoon Isriyalak i'imaa Iicipahkiink kaakiih tashi pimaatisiwaatc.

⁴¹ Mii hsa 'i eh⁠kiishikaninik mayaako niiwaahk nihsimitana ekii ishihsenik. Miihsh i'i ahpii kaaTipenciketc opimaatisiima' kaakii nakataminitc i'i Iicipahki.

⁴² Mii hsa 'i ahpii eh⁠tipihkaninik kaaTipenciketc kaakii naakatawaapamaatc Isriyala' ewiih saakiciwinaatc i'imaa Iicipahkiink. Mii hsa 'iweni eh⁠tipihkaninink kaaTipenciketc, ke⁠onci kihtenimikotc Isriyala' ci⁠ahshawaapinitc minihk iko keni ayaanihke nihtaawiki'itinitc.

Enaahkonikenk Ke'ishihcikenk Ahpii Pimaaci'ikoowi Wiihkwantink

⁴³ Miitahsh Moosihs (Moses), a'a Eran (Aaron) kaye kaa⁠ikowaatc kaaTipencikenitc, “Mii hsa 'owe enaahkonikenk ke⁠ishihcikenaaniwank ahpii Pimaaci'ikoowi Wiihkwantink, kaawiin hsa awiya meyakisitc i'imaa ta⁠onci wiihsinihsii ahpii wiihkwantiwintc.

⁴⁴ Pemiihtaaketc itahsh wiin kaakii ataaweyek pisaan i'imaa ta⁠tashi wiihsini kiishpin kota ehta aasha kaa⁠kihkinawaatashakeshwaawintwen.

⁴⁵ A'a tahsh wiin acina ehta i'imaa kaa⁠ishitaatc, a'a tahsh kaye kaa‑anohkii'intc kaawiin i'imaa ta⁠onci wiihsinihsii.

⁴⁶ I'imaa hsa waahkaa'ikanink ta⁠tashi wiihsininaaniwan kaakiih tashi kwayaancihcikaniwitc a'a aya'aawihsh. Kaawiin akwaciink ta⁠ishiwicikaatehsinoon i'i wiiyaahs. Kaawiin kaye ohkanan kika piikonansiim.

⁴⁷ Kahkina hsa ko kaa⁠tahshiwaatc Isriyalak o'o ta⁠ishihcikewak ci⁠wiihkwantiiwahkamikisiwaatc.

⁴⁸ Kaawiin itahsh wiin awiya kaa⁠kihkinawaatashakeshwaahsiwintc i'imaa tashi wiitoohkaasohsii wiihsiniwintc. Kiishpin itahsh wiin kaa⁠mayakisitc kii‑ishi kapehshitc eshi'ayaayek, antawentank itahsh kewiin ewii ishi wiitoohkaasotc Pimaaci'ikoowi Wiihkwantiwintc ewiih kihtenimaatc kaaTipencikenitc, taka pinamaa ta⁠kihkinawaatashakeshwaawa' ininiwa' ayaanitc otaawininiink. Miitahsh ke⁠tootawintc taapishkoo i'imaa kewiin Isriyalihkaank e⁠onci tipentaakositc.

⁴⁹ Mii hsa 'oweni peshikwan inaahkonikewin ke⁠tipenimikowaatc iki Isriyalihkaank kaashi nihtaawikiwaatc, iki kaye kaa⁠mayakisiwaatc kaashi kapehshiwaatc eshi'ayaayek,” okii'ikowaan.

⁵⁰ Kahkina hsa ko Isriyalak kii⁠na'ihtamook ekii ishihcikewaatc kaaTipencikenitc kaakii ishi anoonaanitc Moosihsoon, Eranoon kaye ci‑ishihcikewintc.

⁵¹ Miitahsh i'i kaa⁠ishihsenik i'i ahpii eh⁠kiishikaninik kaaTipenciketc kaakiih saakisi'aatc Isriyala' i'imaa Iicipahkiink ekii kihci paahtiinonitc.