Ekihsatahs 1 - Ojibwe Kihcimasina'ikan

Isriyalak Kiikakwaataki'intwaa Iicipahkiink

¹ Mii hsa 'owe Cekap (Jacob) kaa⁠ishinihkaasonitc okosihsa' kaakii ishi wiiciiwikotc Iicipahkiink (Egypt) kii‑ishaakopanen. Entahso peshikonitc hsa ko kii‑ishaanikopan, tako kaye kaakiih tahshinitc otaawininiink. Miihsh o'o kaa⁠ishinihkaasonitc:

² Oroopan (Reuben), Simiyan (Simeon), Liipaai (Levi), Coota (Judah),

³ Isahkaar (Issachar), Sepiyolan (Zebulun), Penciman (Benjamin),

⁴ Ten (Dan), Napihtalaai (Naphtali), Kat (Gad), Aahshar (Asher).

⁵ Niishwaahsimitana (70) hsa maamaw kiih⁠tahshiwak Cekaponk kaakii ontahkaanesiwaatc. Ini hsa wiin okosihsan Coosap (Joseph) eshinihkaasonitc aasha weti kii⁠ayaawan Iicipahkiink.

⁶ Coosap itahsh kaawiin keyaapi kiih⁠pimaatisihsii, wiicihkiweya' kaye. I'i kaye kahkina kaakii wiici ahpiihtaatisiimaahpan.

⁷ Opiiwesiimiwaa' Isriyala' (Israel) kii⁠ani nihtaawikiwa', kii⁠ani paahtiinowa' kaye. Aahpici kaye kii⁠ani soonkentaakosiwa'. Wiinke hsa ko kii⁠ani misihteyiinowa' i'imaa Iicipahkiink.

⁸ Kii⁠ayaa tahsh oshki kihciokimaa kaakiih tipentank Iicipahkiini, kaawiin itahsh aapiinc iko okiih kihkenimaahsiin Coosapoon aaniin kaah⁠pi ishihcikenitc.

⁹ Miitahsh kaa'inaatc opimaatisiima', “Inashke Isriyalak (Israel) aahpici paahtiinowak, nawac kaye wiinawaa soonkentaakosiwak ahpiihc kiinawint.

¹⁰ Taka hsa kakwe kipihtinaataanik awahshime ci⁠ani paahtiinohsikwaa. Maakishaa hsa otaa wiici'aawaa' pi'anta miikaashiyamintwaa kaa⁠shiinkeniminankitwaa. Miitahsh o'omaa ahkiink ci⁠onci tapasiiwaatc,” kii‑ihkito.

¹¹ Miitahsh Iicip kaatinowiwaatc kaakii onahsaawaatc ke⁠kakwaatakanohkii'aanitc Isriyala'. Ekiih tootawaawaatc wawiinke piko ci⁠kakwaatakanohkiinitc. Miihsh kaakii oshihtamawaanitc kihciokimaan kihci ootenawan keshi ahtaasonitc. Paaihtam (Pithom), Oremasiihs (Rameses) kii‑ishinihkaateniwan ini kihci ootenawan.

¹² Aanciko tahsh ekiih kakwaataki'aawaatc, mii 'i aanciko kaa‑anishi paahtiinonitc, misiwe kaye ekii ishi misihteshkaanitc i'imaa ahkiink. Iicipahkiink kaa⁠onciiwaatc itahsh wiinke okiih kihci kohsaawaa' Isriyala'.

¹³ Wiinke hsa okiih kakwaataki mihtanohkii'aawaa'.

¹⁴ Miitahsh kaa‑ahpiihci kakwaataki mihtanohkii'aawaatc, kaawiin weweni kiih⁠pimaatisihsiiwa'. Ekiih tootawaawaatc ci⁠oshi'aanitc kaa⁠kahkahkeyaapihkisinitc ahsinii', ci⁠oshi'aanitc kaye ke⁠onci kihci waapihkihshininitc i'i ahsinii'. Kahkina hsa ko kekoon okii inanohkii'aawaa' mihshawahkamik, maawac iko ekiih kakwaatakanohkii'aawaatc. Kaawiin awaac pankii ci⁠koohpaatenimaawaatc.

¹⁵ A'a tahsh kihciokimaa i'imaa Iicipahkiink okii inaa' niishin (2) Hiiparoo (Hebrew) ihkwewa' kaakii otaahpinaawahsonitc. A'a peshik ihkwe Shipara (Shiphrah) kii‑ishinihkaaso, a'a kotak Piyooah (Puah) kii‑ishinihkaaso.

¹⁶ Miihsh o'o kaa'inaatc, “Ahpii hsa kii⁠wiici'ekwaa Hiiparoowihkwewak kii⁠nihtaawikinaawahsowaatc, kiishpin kwiiwisenhsan ayaawaawaatc, shemaak hsa kika nihsimaawaan. Kiishpin tahsh wiin ihkwesenhsan ayaawaawaatc, pisaan hsa ta⁠pimaatisiwan,” okii inaa'.

¹⁷ Iki tahsh ihkwewak wetaahpinaawahsowaatc okiih kohtaanenimaawaan Kishemanitoon, kaawiin tahsh kii‑ishihcikehsiiwak kaakii ishi anoonikowaatc kihciokimaan, pisaan hsa ko kaye okiih pakitinaawaa' kwiiwisenhsa' ci⁠pimaatisinitc.

¹⁸ Miitahsh a'a kihciokimaa i'imaa Iicipahkiink kaakii antomaatc i'i ihkwewa' wetaahpinaawahsonitc ekii ishi kakwecimaatc, “Wekonen tahsh o'o wenci ishihcikeyek, eh⁠pakitinekwaa kwiiwisenhsak ci⁠pimaatisiwaatc?” okii inaa'.

¹⁹ Miihsh o'o kaa⁠ishi nahkwehtaakotc, “Hiiparoowihkwewak hsa kaawiin ishi'ayaahsiiwak kaa⁠ishi'ayaanitc Iicipiiwihkwewa'. Etatawe ohsha wiinawaa owencihtoonaawaa e⁠nihtaawikinaawahsowaatc. Kaawiin tahsh ninte takohshinsiimin, mii 'i aasha kii‑ishkwaa nihtaawikinaawahsowaatc,” okii'ikoo'.

²⁰ Kishemanitoo tahsh okii minotootawaa' i'i ihkwewa' wetaahpinaawahsonitc. Miitahsh Isriyalak aancihke kaakii ani paahtiinowaatc, wiinke kaye kii⁠ani soonkentaakosiwak.

²¹ Iki hsa ihkwewak e⁠kohtaanenimaawaatc Kishemanitoon, mii 'i kaakii miinikowaatc wiinawaa piko ci⁠otapinoonciishimiwaatc.

²² Miitahsh kihciokimaa Peroo (Pharaoh) kaa⁠inaahkonaatc pemaatisinitc kaakiih tipenimaatc ekii'inaatc, “Entahshiwaatc hsa Hiiparoowi kwiiwisenhsak ke⁠nihtaawikiwaatc, kika pahkopii wepinaawaak i'imaa Naayal (Nile) siipink. Iki tahsh wiin kahkina kaa⁠ihkwesenhsiwiwaatc pisaan iko ta⁠pimaatisiwak,” kii‑ihkito.