Ehstar 9 - Ojibwe Kihcimasina'ikan

Coowak Kiicaaki'aawaatc Kaashiinkenimikowaatc

¹ Mitaahshinihsin (13) e⁠inakinsonitc Etar (Adar) mitaahshiniishokiisihsoon (12) mii hsa 'i ahpii cikiih toocikaatenikipan kihciokimaa otoonahshowewin. Mii 'iwe eh⁠kiishikaninik Coowak kaakii shiinkenimikowaatc kaakii mihsawentaminitc ci⁠shaakooci'ikowaatc, tekwac itahsh Coowak okiih shaakooci'aawaa'.

² Coowak itahsh kii⁠ayohkwiinowak eshi ayayaawaatc kihci ootenaahkaank ahkiink kaakii ishi kihciokimaawinitc Seraksiihsan (Xerxes) ci⁠miikaanaawaatc i'i kaawii nihsikowaatc. Kaawiin kanake awiya' okiih shaakooci'ikohsiiwaa', aaniihsh i'i kotak pehkaanwewaanakisinitc pemaatisinitc okii kohsikowaa'.

³ Kahkina iitok kaa⁠niikaanishkaminitc ahkiin, i'i wekimaawentaakosinitc tepentaminitc ahkiin, i'i kaye kihciokimaan kaakii wiici'aanitc okii wiici'ikowaa' Coowak aaniihsh okii kohtaanenimaawaan Mwaartihkaaiyan (Mordecai).

⁴ Misiwe tahsh kiih⁠kihkentaakwanini pepahkaan ahkiink Mwaartihkaai e⁠mashkawentaakositc. I'imaa kaye kihciokimaawikamikonk aancihke kii⁠ani mashkawentaakosi.

⁵ Coowak itahsh waah⁠tootawaawaatc iko i'i kaa⁠shiinkenimikowaatc okiih tootawaawaa'. Kihci moohkomaanan okii aapacihtoonaawaan ekii nihsaawaatc kaa⁠shiinkenimikowaatc ekii nihshiwanaaci'aawaatc.

⁶ I'imaa hsa wiin maawac kihci ootenaank Soohsa (Susa), Coowak okii nihsaawaa' naanwaahk (500) ininiwa'.

⁷ Miiwa' itahsh o'o kaye Eman (Haman) okosihsa' kaah⁠tako nihsaawaatc: Paarshantehta (Parshandatha), Taalpan (Dalphon), Aaspehta (Aspatha),

⁸ Porehta (Poratha), Aateliya (Adalia), Aaritehta (Aridatha),

⁹ Paarmashta (Parmasta), Arihseyii (Arisai), Arihteyii (Aridai), kaye Paayiisaahta (Vaizatha) ekii ayishinihkaasonitc.

¹⁰ Miiwa' ihsa 'o Eman (Haman) okosihsa' kaakii otetetc Ahmitehtawan (Hammedatha) kaakiih shiinkenimaatc Coowa'. Coowak itahsh kaawiin okiih papaamentansiinaawaan otaya'iimini.

¹¹ I'i tahsh eh⁠kiishikahk i'imaa maawaci kihci ootenaank Soohsa, kii⁠wiintamawaa kihciokimaa aaniin minihk kaa⁠nihsimintc.

¹² Miihsh kihciokimaa kaakii'inaatc kihciokimaahkwen Ehstaran (Esther), “Coowak ihsa naanwaahk (500) okii nihsaawaa' ininiwa' o'omaa kihci ootenaank Soohsa, i'i kaye mitaahso (10) Emanan okosihsini. Kaanaka tahsh amanc eshihcikewaakwen pepahkaan ahkiink eshi tipencikeyaan? Noonkom itahsh wekonen entawentaman? Kika miinikoowiihs. Wekonen iko entawentaman kika miinikoo.”

¹³ Miihsh Ehstar kaa⁠ishi nahkwehtank, “Kiishpin kihciokimaa ishi minwaapantank taka pakitin pisaan Coowak o'omaa eyaawaatc kihci ootenaank Soohsa ci‑ishihcikewaatc eshihsininik kitoonahshowewin waapaninik. Taka mitaahso (10) Eman okosihsa' ta‑akoocikaniwiwa' awiya kaashi akoocikaniwitc.”

¹⁴ Miihsh o'o kaa⁠ihkitotc kihciokimaa ci‑ishihcikaaniwaninik. Kii‑ihkitonaaniwan i'imaa kihci ootenaank Soohsa, miihsh kaa⁠ishi akoonimintc Eman mitaahso (10) okosihsa'.

¹⁵ Mitaahshiniiwikiishik (14) e⁠ishihsenik eh⁠pimakinsonitc Etar kiisihsoon, Coowak kii⁠ohkwiino'itiwak miinawaa i'imaa kihci ootenaank Soohsa miihsh kaakii nihsaawaatc awahshime nihswaahk (300) ininiwa'. Coowak itahsh kaawiin okiih papaamentansiinaawaan otaya'iimini.

¹⁶ Miihsh peshikwan Coowak pepahkaan ahkiink kaakii ayaawaatc kaa⁠ishi ohkwiino'itiwaatc ekii naatamaasowaatc. Niishwaahsomitanashinaanan tahsink mitaahswaahk (75) okii nihsaawaa' kaakiih shiinkenimikowaatc. Kaawiin itahsh kanake okiih papaamentansiinaawaa otaya'iimini.

¹⁷ Miihsh o'o kaa⁠ishihsek mitaahshinihsin (13) e⁠inakinsotc Etar kiisihs. Mitaahshiniiwin (14) itahsh e⁠inakinsonitc mii 'i kaa⁠ishi anwepiwaatc, ekii ishikiishikanohkewaatc ci⁠ciihkentamink, kaye tahsh ci⁠wiihkwantinaaniwaninik.

¹⁸ Iki tahsh wiin Coowak eyaawaatc i'imaa kihci ootenaank Soohsa kii‑ishi maawaci'itiwak mitaahshinihsin (13) e⁠inakinsonitc Etar kiisihsoon, mitaahshiniiwin (14) kaye e⁠inakinsonitc. Paanimaa tahsh mitaahshinaanan (15) e⁠inakinsonitc wiinawaa kaakii anwehshinowaatc ekii ishikiishikanohkewaatc ci⁠ciihkentamink, kaye ci⁠kihci wiihsinink.

¹⁹ Miitahsh o'o Coowak pikwacaaya'ii kaa‑ayintaawaatc, ootenaahsink kaye kaa‑ayintaawaatc kaa⁠onci Anwepiiwi kiishikanohkewaatc mitaahshiniiwin (14) kii‑inakinsonitc kiisihsoon Etar. Mii 'iwe ahpii ciyiihkentamowaatc, e⁠kihci wiihsiniwaatc kaye, kaye tahsh e⁠maamiinitiwaatc kekoonan miikiwewinan.

Coowi Pimaaci'ikoowikiishikan Piyoorim Kaa'ishinihkaatek

²⁰ Mwaartihkaai (Mordecai) itahsh kii⁠anoohkii o'oweni ci⁠oshipii'ikaatenik. Kii⁠anoohkii kaye ci‑ishinisha'ikaatenikin eshi ayayaanitc pehsho, waahsa kaye kahkina Coowa' eshi ayayaanitc pepahkaan ahkiink eshi tipentaminitc kihciokimaan Seraksiihsan (Xerxes).

²¹ Ekiih kanoonaatc entahsopipoon ci⁠ciihkentamowi kiishikanohkenaaniwaninik mitaahshiniiwin (14), mitaahshinaanan (15) kaye inakinsonitc Etar (Adar) kiisihsoon.

²² Mii hsa iwe ahpii iitok e⁠ishi kiishikaninik Coowak kaakiih caaki'aawaatc kaa⁠shiinkenimikowaatc. Miiwan ihsa ono kiisihsoon eh⁠pimakinsonitc kaakii wii nihsintwaapan kaakii onci maanentamowaahpan, tekwac itahsh noonkom ekiih pahkaanihsenik ke⁠onci ciihkentamowaatc, kaye tahsh ke⁠onci minwentamowaatc. Mwaartihkaai okii oshipii'amawaa' ci⁠kanawentaminitc kaakii ishikiishikanohkenk ci⁠kihci wiihsinink, ci⁠ciihkentamonaaniwaninik kaye. Kaye tahsh ci⁠maamiinitinaaniwaninik miicim, ci⁠miinimintc kaye ketimaakisinitc.

²³ Coowak itahsh kii‑inentamook ci⁠maacii kanawentamowaatc i'i inahkamikisiwin entahsopipoon, ekii ishihcikewaatc Mwaartihkaaiyan kaakii ishipii'ikenitc.

²⁴ A'a tahsh Eman (Haman) kaakii otetetc Ahmitehtawan (Hammedatha) kaakii ontahkaanesinitc Ekaak (Agag) kaakii'inimintc kaakiih shiinkenimaatc Coowa' kii‑inentamokopan ewiih caaki'aatc kahkina Coowa'. Mii iitok i'i Piyoor kaa⁠ishinihkaatenik kaakii anta mihko otaahpinikekopanen ahpii kiishikaninik ke⁠nihsaatc kahkina Coowa'.

²⁵ Ahpii tahsh kihciokimaa kaa⁠kihkentank o'oweni, kii⁠anoohkii ci⁠oshipii'ikaatenik onahshowewin i'i Eman kaawii ishi macitootawaanihpan Coowa' meshkwac ci⁠kiiwe naasihkaakonitc ci⁠ontaahpinenitc, kaye tahsh okosihsini ci⁠akoonimintc awiya kaashi akoocikaniwitc.

²⁶ Miitahsh ono Anwepiiwi kiishikoon Piyoorim wenci ishinihkaatekin aaniihsh kii⁠anta miihko otaahpinikenaaniwanikopan. I'i kaye Mwaartihkaai kaakii ishipii'iketc otooshipii'ikanink, i'i kaye kahkina kaakii ishi waapankewaatc, i'i kaakii ishihsewaatc Coowak.

²⁷ Coowak itahsh wiinawaa piko kii‑inentamook, i'i kaye opiiwesiimiwaa', awenenan ihsa kokeni Coowiwinitc ci⁠kanawencikaatenik i'i niishokiishik kaakii Anwepiiwi kiishikanohkewaatc. O'o ci‑ishihcikenk entahsopipoon mayaa kaakii ishi kihkino'ikenitc Mwaartihkaaiyan.

²⁸ Miitahsh kaakii inentamonaaniwank kahkina entahshiwaatc taawinink, kaye imaa keni ontahkaanesiwaatc misiwe piko pepahkaan ahkiink, kihci ootenaahkaank kaye ci⁠maamihkawiwaatc ci⁠ani kanawentamowaatc i'i kaakii ishikiishikanohkewaatc, mooshak i'i ci⁠ani ishihcikenaaniwaninik.

²⁹ Miitahsh kihciokimaahkwe Ehstar kaakii otetetc Aapihelan (Abihail), a'a kaye Mwaartihkaai kaa⁠Coowiwitc kii‑ishi mashkawipii'ikewak kehcinaac iko ci‑ishihcikenk o'o Mwaartihkaaiyan kaakii ishipii'ikenihpan otaanaank.

³⁰ Kahkina hsa Coowak kii⁠oshipii'amawaawak misiwe pepahkaan ninkotwaahk niishtanashiniishwaahso (127) ahkiink eshi ayayaawaatc i'imaa Seraksiihs otookimaawiwinink. Ekii ishipii'amawintwaa ci⁠minohsewaatc, weweni kaye ci⁠pimaatisiwaatc.

³¹ Kii‑ihkitowak ci⁠aayiici onahcikaatenik i'i Coowi pimaaci'ikoowi kiishikan Piyoorim kaa⁠ishinihkaatek, ci‑inahkamikaninik kaye kiishikaninik kaakii ishi onahcikaatenik tahsh piko kaakii ishi kanawentamowaatc ahpii eh⁠kiishikaninik kii⁠wiihsinihsikwaapan ahpii kaye kii⁠mawiwaahpan. Mii hsa oweni Ehstar kaye Mwaartihkaai kaakii ihkitowaatc o'o ci‑ishihcikenaaniwaninik.

³² Ehstar itahsh kaakii ishi onahciketc kii⁠onci aayiicihsin kaakii inahcikaatek ci‑ishihcikenk Coowi pimaaci'ikoowi kiishikahk. Kaye tahsh kii⁠oshipii'ikaate i'imaa eshi oshipii'ikaatek kahkina kekoon enahkamikahk.